المشاركة الأصلية كتبت بواسطة أمازون
http://www.arabtravelersforum.com/tr...2/#post6157950

السلام عليكم

وعليكم السلام والرحمه


أخواني وأخواتي الأفاضل أنا بإذن الله قادم إلى الكويت الأسبوع القادم للسياحة ولدي عدد من الاستفسارات أتمنى انكم تفيدوني فيها:

حياك الله وان شاءالله نفيدك باللي تبيه ..


1/ كيف احوال الطقس.. نهارا ... ليلا؟

وااايد احسن من قبل وخصوصا على المسيان حلو الجو واول الصبح بس الظهر اشوي حار .

2/ ماهي أفضل وأجمل ثلاثة أسواق في الدولة ... أنا اعتقد بعد البحث أنها (الأفينوز - شرق - الكوت) صححوني إذا غلطان.

واضافه عليهم 360 و مارينا - واذا تبي مجمعات راقيه وهاديه الصالحيه والرايه ..

3/ ماهي أفضل الأماكن والمراكز للشباب؟

انا ماادري اذا بروحك ولا مع قروب بس بقولك عندك مثلا : القهاوي اللي على البحر مارينا ويفز - واللي عند موفنبك البدع - وسبونز في الفحيحيل .. اما تسليه بينت بول عند الابراج - المدينه الترفيهيه - الشعب - نادي الصيد والفروسيه - ملاعب الصابون كوره القدم تاجير - والبرو كارت (سباق السيارات)- وتاجير الجت سكي على الواجهات البحريه ..

4/ أنا من عشاق الرحلات البحرية .. أين توجد الأماكن الخاصه بالرحلات البحرية والعشاء في البحر لمدة ساعتين مثلا؟

عند مطعم مركز السلطان على البحر في كشك اتاجر منه ان بغيت تتمشى او تروح للجزر كبر وام المرادم ..

5/ أريد أن أسافر إلى بعض الجزر مثل فيلكا .. هل الرحلات للجزر تصلح للسياحه بمعنى هل هي مخدومه سياحيا وهل هناك برنامج معين لرحلات الجزر أو رحلات يوميه لها؟ وماهي الجزر الي تنصحون فيها؟

فيلجا حلوه بس يبلها بعد يعني في انشطة بحريه بس للقريه التراثيه وهذيل تحجزلهم من عند مارينا ويفز ونظام السكن بيوت كويتيه قديمه مع التطوير .. طبعا اذا تبي تغوص عندك كبر وقاروه وام المرادم واللي لهم رحلات يوميه ( كبر ام المرادم وفيلجا )

6/ ما هو أفضل طريق من قطر إلى الكويت وكم طوله؟

مااعرف

7/ أريد برنامج مقترح (للشباب) لمدة أربعة أيام على ذوقكم؟

واعذروني على الإطالة...




اليوم الاول :

الصبح اتريقون على 9:30 او 10 مطعم لونوتر في مول 360 منطقة جنوب السره على الدائري السادس ريوقهم وااايد حلوو بوفيه وبعد الريوق اتمشون واتسوقون في المول وتحلون في لادوريه كافيه عندهم خوووش ماكروون ورقمهم 24717271
وبعدين المنطقه اللي بجنب صبحان والمطار منطقه الضجيج تروحون وتسابقون سيارات PRO KART هذي خريطتهم ورقمهم 90096121 فاتحين من 10 ص لي 12 مساء
http://www.facebook.com/photo.php?fb...46408922058156

بعد ما اتخلصون تروحون الفندق تريحون وبعد صلاه العشا تروحون منطقه البدع ، شارع التعاون عند الفنادق موفنبيك وشيك وريجينسي قعدات خارجيه كافيهات ومطااعم اتعشون في مطعم المياس ( لبناني ) داخل منتجع شيك يطل على البحر الاكل حلو والقعده حلووه ،، او المطعم الايطالي ما اعرف اسمه اعلانه بالمقلوب يمه جافا ديتور كافيه ... وبعدين اتحلون في شوكلت بار عند الموفنبيك ..


اليوم الثاني :

الصبح الريوق مارينا ويفز السالميه ، مطعم زعتر وزيت على المرسى ،، بعد الريوق اتروحون المركز العلمي على شارع الخليج اذا خليتوا مارينا مول يمينكم كملوا سيده تلقون المركز العلمي على ايدكم اليسار لي وقت صلاه الظهر مثلا ..

بعدين اتروحون اتغدون في منطقه الشعب البحري على شارع الخليج العربي في مكان اسمه ملتقى الشعب في مطعم النوخذه ( سي فوود ) واااايد حللللوووو ويمهم حديقه الشعب بعد الغدا ريحوا اشوي مو واايد وبعدين دشوا لعبوا على 6 تطلعون منها ..

تروحون الفندق واتريحون اشوي بعد ماتصلون العشا تروحون اتعشون في المباركية اذا تبون الاشياء الشعبيه ..

اذا ماتبون شعبي تروحون منطقه البدع واتعشون في مطعم واسابي (ياباني) ..

اليوم الثالث:

الصبح اتريقون في مول 360 كاكاو كافيه يم لورينزو واتسوقون لي حزه الظهر ،، بعدين تروحون منطقه فحيحيل مجمع الكوت والمنشر واتمشون فيهم واتغدون في مجمع الكوت مطعم ياميجانا (لبناني) يطل على البحر وعقب الغدا ادشون سينما في مجمع الكوت ،، عقب السينما على المسيان تقعدون في وحده من الكافيهات اللي يطلون على النافووره المكاان واايد حلووو ..
واتمشون في اسواق فحيحيل الشعبيه وبعدها اتعشون في مكان اسمه spoons المكان حلوو باتجاه ابراج غاليه وعاليه اذا خليتوا مجمع كويت ماجيك يمينكم كملوا سيده تلقون مكتوب spoons اتعشون في فرايديز واتحلون في شوكلت بار ..


اليوم الرابع:

الصبح الريوق في مجمع الافنيوز مطعم لورنزو (ايطالي) او دين اند دلوكا.. واتسوقون فيه وبعدين تروحون السالميه اتغدون في مغل محل (هندي ) في ماركس اند سبنسر يم مارينا مول ..

وبالليل شوفوا لكم مسرحيه لطارق العلي ، واذ ماتبون مسرحيه تروحون مجمع الصالحيه اتمشون فيه واتعشون في المطاعم اللي بره عند النافوره او العشا يكون في مطعم شرين بانو (ايراني) منطقه دسمان مقابل قصر الشيج جابر الصباح رحمه الله ...

http://www.arabtravelersforum.com/travel487746/

مواضيع عشوائيه ممكن تكون تعجبك اخترناها لك: