السلام عليكم إخواني وأخواتي
كيف حالكم جميعا وعساكم بخير إن شاء الله والله يختم عليكم شهر رمضان المبارك وانتم بألف صحة وعافية
اليوم الصباح كانت مقابلتي في السفارة الأمريكية بالرياض والحمد لله الذي سهل الأمور وبشكره تدوم النعم
سأشرح ماحصل بالتفصيل وأعلم أن أغلبكم يعرف ما يحدث ولكني أسعى إلى أن أفيد الأعضاء الجدد مثلي والذي لم يأتي موعد مقابلتهم حتى الآن وأعتذر عن الشرح المفصل والتفاصيل الدقيقة ولكني أحببت توضيح كل شيء .
المرحلة الأولى
البداية كانت بالذهاب الساعة 6:30 صباحا حيث أن الموعد كان 7:30 ولكني أحببت الذهاب بدري حتى أصبح أول واحد بس للأسف مافيه نصيب هههههههه
وجدت أمامي قرابة ال 15 شخص مابين شباب ورجال ونساء والأغلبية للشباب والبنات وكان الجميع واقف عند البوابة الخارجية للسفارة بعشوائية بانتظار فتح الباب وأصبح العدد كل ماله يزيد حتى بدون مبالغة وصل الموجودين إلى أربعين شخص قبل الساعة 7 وعند الساعة 7:15 صباحا تم فتح الباب الخارجي للسفارة والاصطفاف عند الشباك الخارجي حتى تسلم أوراقك الاثباتية وتضع مامعك في صندوق الأمانات وبعدها تدخل إلى غرفة التفتيش وتمر من عند الجهاز الكاشف وتضع جميع أوراقك وأغراضك في جهاز كشف الأشعة . إذا كان معك جوال ومفاتيح وأي شي غير ورقي يجب وضعه في صندوق الأمانات وتأخذه وأنت خارج من السفارة .
انتهت المرحلة الأولى
المدة التقريبية من الوصول إلى الانتهاء من المرحلة الأولى كانت ساعة وأربعين دقيقة ( مسك الطابور الرسمي والتفتيش ووو استغرق أربعين دقيقة وساعة لأني جاي بدري )
اللغة المستخدمة من الموظفين هي العربية إلا إذا رغبت الانجليزية لكنهم يبدؤون بالعربية من تلقاء أنفسهم
--------
المرحلة الثانية
بعد الخروج من غرفة التفتيش تصبح داخل مقر السفارة رسميا ( في الفناء الخارجي للسفارة ) وتمشي إلى الأمام لتجد أمامك باب كبير وثقيل جدا جدا. بعد الدخول من الباب تصبح داخل مبنى السفارة وتجد أمامك موظف أمامه مجموعة كراسي بالترتيب تمسك سرا مع الناس حتى يأتي دورك عنده وتسلمه الجواز وإيصال رسوم الفيزا من البنك الأمريكي وورقة الموعد اللي فيها الباركود اللي تكون أنت طابعها من الموقع حق السفارة بعد ماعبيت الابلكيشن D160 . يشيك عليهم بسرعة ويمرر قارئ الباركود على الورقة اللي معك للتأكد من موعدك وبعدها يقوم بطباعة ورقة صغيرة ويلزقها على الجواز فيها التاريخ حق اليوم وباركود ( مرجع لهم ) ويعطيك رقم انتظار ( مثل اللي في البنوك والصرافين ) للمرحلة الثالثة .
انتهت المرحلة الثانية
المدة التقريبية للمرحلة الثانية هي 15-20 دقيقة فقط
اللغة المستخدمة من الموظف هي العربية إلا إذا رغبت الانجليزية لكنه يبدأ بالعربية من تلقاء نفسه.
--------
المرحلة الثالثة
بعد اخذ رقم الانتظار من الموظف اللي في المرحلة الثانية تذهب إلى غرفة كبيرة فيها كراسي ونوافذ زجاجية مثل نظام صرافين البنوك بالضبط وفوق كل واحد شاشة الكترونية علشان تعرف رقمك وأنت عند أي واحد بالضبط إذا جاء دورك . إذا ظهر رقمك على الشاشة تذهب إلى النافذة المخصصة لرقمك ويطلب منك انك تعطيهم الجواز والإيصال حق الفيزا من البنك فقط وبعد دقيقة تقريبا يطلب منك أن تعمل البصمات لكافة أصابعك في الجهاز الالكتروني اللي عند النافذة , بعد اخذ البصمات الالكترونية يقوم الموظف بإرجاع الجواز والإيصال ورقم الانتظار اللي أخذهم منك ويقول لك خذهم وروح للصالة الثانية اللي بعدنا وانتظر حتى ينادون رقمك .
انتهت المرحلة الثالثة
المدة التقريبية للمرحلة الثالثة هي 30 دقيقة وتقل إذا لم يكن هناك زحمة .
اللغة المستخدمة من الموظفين هي الانجليزية ( بناء على ماحصل لي وشفت الناس اللي قبلي ) إلا إذا رغبت العربية لكنهم يفضلون الانجليزية في هذه المرحلة . ( انجليزية مبسطة جدا وأي واحد عنده خلفية خفيفة تمشي معه الأمور )
-----------
المرحلة الرابعة ( أهم مرحلة )
ملاحظه هامة
قبل أن ابدأ بسرد ماحصل بالتفصيل تذكروا أن هذا ليس مايحدث لكل المتقدمين وان ظروف المقابلة تتغير من شخص لآخر ومن موظف لآخر أحيانا يسألونك أسئلة كاملة وشاملة وتدقيق على كل شيء وأحيانا لاتكون بتلك الشدة ولكن الاحتياط واجب ويجب أن تتجهز لكل شيء من أوراق واستعداد نفسي للإجابة وتوقع أي شيء لأنها مسألة توفيق وحظ وليس لك إلا هذه الفرصة فلا تتهاون في أي شيء من استمارات وأوراق ولا تعتمد على كلام الناس أو من سبقوك فكل واحد وظروفه وتوفيقه وأتمنى التوفيق للجميع.
بعد الخروج من الغرفة اللي في المرحلة الثالثة تذهب إلى الصالة الكبيرة اللي بجنبها وتجلس حتى ينادونك بالرقم بدون شاشة يعني فيه موظفة في أول الصالة تنادي على الرقم وإذا خلص تنادي على الرقم اللي بعده وهكذا لازم تسمع وتنتبه لاتسولف ويروح رقمك مثل واحد اليوم والله رحمته مع أخته وماركزوا على الرقم وراح عليهم الدور لكن بعد محاولات متكررة منهم سمحوا لهم بالدخول . المهم إذا جاء رقمك تقوم وتمشي وتقول لك الموظفة لأي نافذة تروح طبعا مثل نظام نوافذ البنوك اللي في المرحلة الثالثة لكن المرة هذي مايقدر احد من المنتظرين يشوفك أو يسمعك لأنه فيه حواجز لكل نافذة وأيضا الشاشة تكون مغلقة .
فيه بعض الشباب اللي يعرفوا بعض إذا خلص واحد منهم رجع لأصحابه ويعلمهم ايش سألوه وقالوا له وإيش الأوراق ووووو هههههههه ذكرني بتغشيش الاختبارات الشفوية ( يارب اغفر لي ) طبعا كان رقمي مطول شوي وجالس بجنب شباب ماأعرفهم ولكنهم مؤدبين ومحترمين الله يوفقهم ويحفظهم وجلسوا يقصوا علي قصص عن بعض الأسئلة اللي سمعوها من الشباب عن المقابلة وهم كانوا قبلي في الرقم راحوا ورجعوا لي يبغون يغششوني ههههه والله حبيتهم , ماأبغى أطول المهم سألوهم ليش رايح وأول مرة وين رحت قبل ووين ناوي تسكن في أي مدينة وليش وهل عندك نية تهاجر وتعيش هناك أو هل تبغى تدرس أو تعالج وإيش عملك الحالي وسألوهم لأنهم شباب جامعة مين يبصرف عليكم هناك . فقط .
جاء دوري ورحت للنافذة المطلوبة وحصلت الموظف ( فيه موظفين رجال ونساء بس ماتختار اللي يفضى ينادي الرقم ) وبدئت المقابلة ومعليش أبكتبها بالعربي أسهل وأوضح وبعد مافي حيل أغير اللغة هههه . للمعلومية المقابلة كان معظمها باللغة الانجليزية وقليل جدا استخدم الموظف العربية .
التواصل مع الموظف كان عن طريق سماعة هاتف عندك وعنده علشان الصوت والإزعاج ماترفع صوتك وتأخذ راحتك في أي شيء تقوله.
صباح الخير كيف حالك ممكن تعطيني جوازك وإيصال البنك وعطيته اللي طلبه وثم قال ضع إبهامك في جهاز البصمة الالكترونية ووضعته وبعد ذلك سئل أول مرة تروح لأمريكا قلت نعم قال وين رحت قبل لأي دولة قلت ...... و ....... فقط قال في أي مدينة وولاية راح تسكن فيها قلت نيويورك ولاس فيجاس قال كم يوم راح تجلس قلت تقريبا 20 يوم بعدين سأل وين تعمل قلت ......... قال هل أنت متزوج قلت لا قال فيه احد راح يسافر معك قلت لا وبعدها طلب يشاهد المستند D160 اللي طبعته والله أخذه بثانية نزل عينه عليه ورجعه لي .
انتظرت دقيقة على بال مايكتب الموظف على الكمبيوتر وبعدها قالي لي جايب صور معك قلت نعم قال OK بس قلت تفضل الصور قال لا لاأحتاجهم وقال لي معك كشف حساب وتعريف راتب قلت نعم وأعطيته إياهم شافهم في ثانية ورجعهم لي !!!
بعد كم دقيقة كذا قالي مبروك حصلت على الفيزا ههههه طار النوم مني يوم قالها وأنا كنت رايح مصبح
تفضل هذا جوازك خليه معك !!!!!! استغربت الصراحة لأني قريت هنا وحتى احد الأصدقاء طلع فيزه قبل كذا واخذوا الجواز منه وأرسلوه له عن طريق الفيدكس الجواز والتأشيرة ,,,, قلت له لماذا هل فيه مشكلة قال لالا هذا أمر طبيعي وعادي لاتخاف الفيزة انتهت OK بس خلي الجواز معك وروح لفيدكس واشتري ظرف فارغ من عندهم حق السفارة الأمريكية وانتظر حتى يجيك اتصال أو ايميل من السفارة يطلب منك إرسال الجواز علشان نضع داخله التأشيرة وروح لأي فرع فيدكس وسلمه الظرف والجواز ونرجع الجواز والتأشيرة لك عن طريق الفيدكس أيضا يعني الجواز رايح جاي مع الفيدكس . استغربت من كلامه وعرف من شكلي إني ماارتحت من كلامه وقالي لي هذا أفضل لك علشان لو تبي تسافر برا وتحتاج الجواز ماتنتظر مدة طويلة وبالنسبة لنا أول ماتطلع فيزتك راح نتواصل معك ونقول لك أرسل الجواز لنا علشان ندبس فيه التأشيرة ونرجعه لك قلت طيب متى ممكن تطلع الفيزا قال على الوضع الحالي احتمال أسبوعين إلى شهر فقط وتطلع فيزتك واهم شيء لاتشيل اللزقة اللي وضعناها اللي فيها اليوم والتاريخ والباركود خليها على الجواز .
بعد ماخلص كلامه شكرته وأخذت جوازي وأوراقي ورحت لفيدكس اللي في السفارة وقلت له أبي ظرف فارغ علشان الجواز ضحك وقال لي مايحتاج ههههه والله نويت حاجة ثانية بس ربك ستر قلت ليش الموظف يقول خوذ ظرف ووووووو قال مايحتاج تأخذه من عندنا إذا كلموك وتواصلوا معك وقالوا لك أرسل الجواز روح لأي فرع فيدكس وهم يعرفوا المطلوب بالضبط سألته ليش كذا قال هذه التعليمات من الشركة علشان إذا رحت للفرع اللي راح ترسل منه الجواز راح يكون هو نفس الفرع اللي راح يرجع له الجواز والتأشيرة لأنه هنا ماتقدر تدخل تآخذه بعد مايخلص ولازم فرع ثاني خارج السفارة وعلشان بعد الفلوس لأنه راح نأخذ منك قيمة الشحن من والى السفارة يعني مثل المنشار ههههههه طالع نازل . ترددت وبغيت ارجع للموظف حق المقابلة بس كانت زحمة وناس وتوقعت مايدخلوني عليه وضمن لي الموظف حق فيدكس انه هذه الطريقة ومافيه أي مشكلة وكثير من الناس كذا والأمور جيدة ,,,, توكلت على الله ومشيت من عنده وإذا فيه واحد بجنبي نفس كلامي بالضبط وواحد ثالث عكسنا بالضبط اخذ موظف المقابلة منه الجواز وقال سدد عند فيدكس والرجال سدد ومشي وقلت للموظف ليش هذا كذا ( الغيره وما تسوي ههههههه ) قال فيه موظفين يتبعوا الطريقة هذي وفيه عكسهم لكن ماعليك النتيجة وحده وماتأثر بموعد إصدار الفيزا يمكن أنت تخلص قبله ( لعب علي وارتحت ههههه ) .
بعد كذا طلعت من السفارة ووصلت إلى المكتب الخارجي حق الأمن والتفتيش وأخذت جوالي ومفاتيحي وتوكلت على الله راجع للفندق وأنا أغمض عين وافتح عين ههههه .
انتهت المرحلة الرابعة
المدة التقريبية لهذه المرحلة كانت قرابة الساعة ( المقابلة 8-10 دقائق ) وفيدكس ( 10 دقائق كلها شرح ) والباقي انتظار الدور .
****
مشاهدات رأيتها
* وقت المقابلة يختلف من طبيعة موظف إلى آخر مثلا فيه احد الأشخاص كان قبلي بالدور وراح للمقابلة وخلصوا ثلاثة أشخاص عند موظف ثاني وهو لسى ماطلع يعني مسألة حظ وتوفيق بعد الله .
* لو تقدر تجي للسفارة وجيوبك فاضيه مافيها جوال أو مفاتيح ومامعك أوراق في جيوبك بس مبلغ مالي بسيط يكون أحسن لأنه راح توفر دقائق مهمة في غرفة التفتيش والناس اللي بعدك راح تمشي قبلك إذا كان مامعهم شيء وأنت راح يتأخر رقمك لأنك تأخرت في التفتيش .
* المرافقين مايدخلوا أبدا وقت المقابلة حتى النساء يروحوا للمقابلة لوحدهم والمرافق فقط للنساء إلى قبل الدخول إلى المقابلة .
* يوجد ثلاجات عصيرات وكوكا كولا وماء ومأكولات خفيفة في الانتظار .
* لو اخترت الموعد في ساعة معينة اعلم أن كثير من الأشخاص اختاروا نفس التوقيت معك فلا تحاول المجادلة أن موعدك هكذا ويجب أن تكون الأول واللي يحدد ترتيبك هي المرحلة الثانية فقط .
* حاول أن لاتجاوب أو تتكلم أكثر من المطلوب عند سؤالك واجعل إجابتك قصيرة وواضحة ولا تفسر شيء إلا إذا طلب منك الموظف كذلك .
* احمل مبلغ مالي في جيبك احتياط لو اخذوا الجواز منك حتى تدفع للفيدكس .
* يوجد مواقف للسيارات بجانب السفارة وتستوعب عدد كبير من السيارات .
* يوجد في داخل حي السفارات وبالتحديد في ساحة الكندي مركز متكامل لتصوير الأوراق والصور الفوتوغرافية الشخصية إذا احتجت ولكن الأسعار عاليه وكذلك يوجد لديهم خدمة تعبئة التقارير والنماذج لمعظم السفارات ولكن اكرر المبلغ ضعف السوق ويصلحون للطوارئ فقط إذا نسيت شيء أو احتجت شيء بسرعة ولا اعلم متى يبدأ دوامهم الصباحي .
* ولا تنسون الملاحظة اللي بالأحمر فوق .
****
وختاماً أعتذر عن الإطالة عليكم وعلى نفسي ههههه جلست أربع ساعات وأنا اكتب وأحاول ماأترك صغيرة ولا كبيرة إلا وأقولها ويمكن فيه أشياء وتفاصيل قد يراها البعض مالها داعي لكني والله كتبتها من باب إني ماابغى اخلي شيء ناقص والعذر والسموحة من الجميع إذا وجد تقصير وهو بلا شك موجود فلا أحد منزه عن ذلك إلا هو سبحانه .
وأحب أن اشكر كل الإخوة والأخوات اللي استفدت منهم في هذه البوابة والذين أثروا البوابة بمواضيعهم وتقاريرهم ومشورتهم ومساعدتهم لنا وردهم علينا عند أي استفسار وأقول لهم جزاكم الله كل خير وجعل ماتقومون به في موازين حسناتكم وأعمالكم .
وشكر خاص معطر بالورود إلى هؤلاء الإخوة الكرام الذي استفدت منهم ومن ردودهم ومن من مواضيعهم وبفضلهم بعد الله استطعت تكوين صورة عن الولايات المتحدة الأمريكية من ناحية الفيزا والمتطلبات والنماذج وكذلك عن المدن والبرامج السياحية وغير ذلك كثير وهم :
Impact
ahmad059
waleed8818
وارثة الطيب
kakashi9
aziz20012001
واعتذر ان نسيت احد بالخطأ
والسلام عليكم ورحمة الله وبركاته
مواضيع عشوائيه ممكن تكون تعجبك اخترناها لك:
رد مع اقتباس
المشاركة الأصلية كتبت بواسطة محمد901
المشاركة الأصلية كتبت بواسطة وارثة الطيب
المشاركة الأصلية كتبت بواسطة impact
ماراح تصير أسؤء مني إن شاءلله
بعدم أرسال متطلباتهم بس كانت لي ظروفي اللي أجبرتني كل هالتأخير فأنت طول بالك لأتكدر خاطرك علشان تأشيره يا الغالي ..
المفضلات