الموضوع: طلب لبنات الكويت الذويقـــات

السلام عليكم ورحمة الله وبركاته ..



انا عن قريب زرت الكويت صراحه اعجبتني حيــل ....


وين احصل ملابس حلوه وتكون اسعارها معقوله
ابغى بلايز حلوه او بديات
طبعاً انا ذوقي نعوم مااحب الاشياء الدفشه او المبالغ بموديلها
تعجبني بديات تيرانوفا ومرات زارا
وبلايز بيرشكا
بس انا هالمره ما ابغى ماركه ابغى محلات عاديه بس حلووووه بمعنى الكلمه

وابغى بعد تنانير طويله .. وملابس بيت
وشنط

سمعت بسوق بالسالميه اتوقع اسمه المعلم اذا مو غلطانه
يمدحونه وانا مدري مارحت له ؟؟



اكون شاكره لكم عالاجابه...

مواضيع عشوائيه ممكن تكون تعجبك اخترناها لك:

• مشاريع الكويت المستقبلية في عاصمتها مميز ومتجدد
• توقيع عقد انجاز مرسى يخوت بحرياً في منتزه الخيران
• الله لايهينكم مجموعة من الآسئلة
• استفسار عن فنادق في الكويت ، أرجوا المساعده
• للأماخرائط أرشادية للأماكن الترفيهية الفنادق الأسواق
• أستفسارات متعدده لعيد الأضحى
• عاشق اللؤلؤه
• منتجع سليل الجهراء إطلاله على الصحراء
• شارع مبارك الكبير
• تحية محبة وتقدير أبثها لكم من بلدي الثاني الكويت
• بليز بيضوا ويهي مع رفيجتي الي بتزور الكويت لاول مرة
• وش رايكم بفندق رؤوم ان للشقق الفندقية
• بزوركم يا أهل كويت العــــــــــــز ساعدوني
• ممكن خدمه بسيطه
• مساعدتكم في الشقق الفندقيه
• معلومات وشرح تفصيلي وصور عن ابراج الكويت
• الهوية الوطنية
• سؤال لاهل الخبره
• تنبيه بضرورة الإلتزام بمكان كتابة الموضوع يرجى الدخول للأهمية
• العملية الكويتية تعتزم افتتاح تسعة فنادق خلال عامين

أختي العزيزة : أموول
أهلا وسهلا فيج بالكويت ...
بالنسبة لطلبج ....
البلايز والبديات البسيطة ...تلقينها بمحل أسمه ( ديربي جينز ) موجود بسوق شرق فوق مركز سلطان
عنده بديات بجميع الألوان وأسعاره مناسبة ، وعنده بعد تنانير طويلة وحلوة
بالنسبة لملابس البيت ...سوق السالمية ( المعلم ) في كل ما يلبي طلبج
إن شاء الله أكون وفيت لطلبج وحياج الله بالكويت مرة ثانية

مشكووووره اختي نيلووفر

بس انا عندي لج اسوقه احله
انشالله راح تعجبج اختي
سوق السالميه القديم ا مجمع النقره الشمالي او الجنوبي
او عندج منطقة الفروانيه مجمع الحمرمول

هااااااااااااااااي أموووول كلك ذوق بعد عمري"عندج دريم مول"بالري بجانب المشاتل

حياج اختي
مجمع النقره الجنوبي والشمالي بتلاقين طلبج وفي شغلات ماتتعدي 60 ريال اذا انتي من السعوديه
لان اغلب المحلات هناك تسوي عروض هالمجمع بحولي ويعروفونه اهل التكاسي والحلو فيه تقدرين تسوقين بالمجمعين لان بينهم جسر مشاه وقريب من بعض بس اوقات دوامهم من الصبح لي الظهر يسكرون ويرد يفتح علي 4ونص واتوقع لي 10
عندج الفروانيه في سوق اسمه مترو شغله حلو وخاصه لملابس البيت الاقطان
عندج المثني في محل اسمه دسكاون فوق يبيع ماركات بس نظام اوستكات وساعات تحصلين عنده بلايز وبناطير مثل ماركه دكني وكنزو وفيه اطفال ورجالي بعد
هذا اللي اذكره حاليا واذا ذكرت بعد شي بكتب لج
وحياج الله بالكويت

وايييييييييد حلووو الموضوع
بليز دلونا بعد وين محلات ثانيه

يسلموووووو

نفس كلام الاخوان والخوات

مجمع النقرة الشمالي والجنوبي راح تلاقين فيه طلباتج والمهلب

ملابس البيت موجودة بالنقرة الجنوبي بعد وفعلا سوق السالمية

اللي فيه سيتي سنتر والمعلم أيضا شامل كامل لكل الامور اللي

تحتاجينها وباسعار مناسبة

وحياج الله

مشكوره اختيq8-r7al
صراحه النقره رحت لهم كلهم ما أعجبوني
والحمراء رحت له بس ما اشتريت شي
عالعموم تسلمين عالرد ...

أختي راحة واستجمام
مشكووووره بس بسألك دريم مول ماركات والاعادي ؟

هلا اختي الكويت305
بسألك مترو مجمع أو محل واحد بس وين صاير بالضبط ماعليك أمر ؟؟
وبعد المثنى وين مكانه ..؟


تسلمو عالردود

وينكم يابنات الكويت
نبغى بعد اسماء
سواء محلات صغيره
او مجمعات ...

هلا أختي كويتية^رحالة

مشكوووره عالرد
ماقصرتي ..

حبيت أضيف ...
بالنسبة لملابس البيت ( الأقطان ) سوف تجدينه في
( الجميع ) وهو له فروع في عدة أماكن بالكويت ( بالديرة - بالسالمية - بالفحيحيل بالفروانية بحولي......)
( سناء وغيروا اسمه الحين وصار اسمه - رد تاغ- ) له فروع بكل الديرة
(الجوهرة ) له فروع أيضا

كلهم عبارة عن سوق كبير وفيه ملابس وحاجات أخرى لجميع أفراد الأسرة

يعطيــــــك العافيه
أختي نيلووفر عالتفاعل
ماقصرتي ...

حياج الله

حياج اختي
بس تري اذا رحتي النقره الجنوبي والشمالي ماعجبك فصدقيني السالميه مثله ومتروا كذلك يعني نفس البضاعه
لانهم نفس النظام كله خياط الكويت او من الصين
المهم متر و اهو مثل سوق شعبي بالسرداب بس اذا ماعجبك النقره فماله داعي تروحين
المثني هذا روحيله هالمجمع قبال مجمع الصالحيه مكانه بالديره
مادري اختي الحين كل شي صار نفس بعض
ولو بندلج علي المجمعات كلهم نفس المحلات بنفس الدول مثل زار ومانجو وهالسوالف
بس مادري يمكن يعجبج سوق السالميه يسمونه ستي سنتر

مرااااااااحب بنات
بسألكم كذا وحده كتبت (الاقطان)
وش قصدكم فيها مو فاهمه

عزيزتي اغلب لبس بنات الكويت يا انه يكون شغلات معارض يعني مثل بيت ديفا ولا كريزما او ناس عندها مشاغل بيوتها تسوي نخيط عندهم اشيا ناعمه وغريبه بس اغلب شغلنا تري فناتك يعني تركيب قطع علي قطع
مستحيل بتلاقين في المحلات اللي ذكروها البنات شي يستاهل انج تتعنين له وتروحين تطقين مشوار يعني اخذي شغله من زارا وروحي مكان ثاني ركبي عليها قطعه ثانيه مع ملفع مع جينززززززززز بتطلع بدله كلها ذوق
واتمني انج ماتروح لدريم مول ولا اي مكان حتي مجمع النقره الشمالي والجنوبي خلاس انتهوااااااا مافيهم شي يسوي حسافه احد يروح لهم الا لشغلات البيت الملابس القطنيه خلينا نكون واقعين

حياك الله أختي shjen

انا من السعوديه وانتي عارفه الجنز
مستحيل ألبسه
حتى لو كان عادي انا ماارضى عن نفسي اطلع بهالشكل
اللي فبالي وابغاه بلايز وتنانير طويله ..
رحت للمجمعات الكبيره (شرق " الأفنيوز " مارينا ....الخ
بس صرااااحه نااااااار ولو ابغى ماركه اشتريت من السعوديه
انا ابغى اشياء عاديه بس تكون حلوه ..

حياج اختي
شرايج اذا جيتي الكويت تعطيني الو وافر فيج الكويت ولا هالحيره اللي انتي فيها هههههههههههه
شوف يالعزيزه الملابس القطنيه يعني ملابس البيت دراريع من القطن تتراوح قيمتها من 1ونص يعني بحدود 20 ريال وفي لي 20 و25و50 دينار بس طبعا اللي بالاسواق الشعبيه ماتتعدي قيمتهم 7دنانير يعني 100 ريال
وهالقطنيات ملابس للبيت عاديه تكون خفيفه ومريحه عشان جذي نسميها قطنيات


اختي الخوات ماقصروا اكتبلوج تقريبا كل محلات الكويت بالنسبه للي اسعارهم مناسبه اما الباجي مثل ماقلتي ياماركات
او له فروع عندكم ومثل زارا وبرشكا وهالسوالف

شوفي حبيبتي اذا عندج صوره لبس معين تبينه حطيها يمكن نفيدج اكثر
مع انه هذي تقريبا محلات الكويت كلها
وحياج بديرتنا وموفقه


اي ذكرت اذا وصلتي الكويت علي خير اشتري جريده الوطن وبتلاقين فيها اعلانات معارض لبنات الكويت اخذي العنوان وخلي السواق يوديج ويمكن تحصلين طلبج لان اغلب لبس البنات الحين من هالمعارض لان في فناتك

عندج كويت ماجيك فيه اقطان وتنانير وبوديات متنوعه

انصحج في دريم مووووووووول الي بالري

ما في احسن منه