الموضوع: بكرا الصباح طالعين ، نخيتكم ياديرة الطيبين

السلام عليكم ورحمة الله ....
بكرا بعون الله طالعين الكويت وهاذي أول مرة نزورها ، حبيت تساعدوني بجدول حلو مناسب لثلاث أيام ( أهم شي أماكن حلوة يستانسوا فيها عيالي ) ونصيحتكم لأفضل المطاعم اللي تقدم أكلات كويتية غير فريج صويلح لأنه مدرج ضمن المخطط فنبغى مطاعم ثانية ، وشنو أفضل وقت لزيارة الأسواق الشعبية ( سوق شرق ، سوق المباركية ، والوالد موصني أروح سوق اللطيور راح له من الثمانينات وصاجني فيه لازم أروح ) وفعاليات هلا فبراير وين تكون بالظبط ،،، وباقي حالة الجو عندكم كيف دافي مثل عندنا ولا شلون .....

لكم أجمل تحياتي .....

مواضيع عشوائيه ممكن تكون تعجبك اخترناها لك:

• كيف أقضي أيام زيارتي الأولى للكويت ؟ أماكن يجب زيارتها
• فندق هوثورن حولي صور
• جدول لمده ايام
• مشروع العاصمه العالمي الجديد بتكلفة مليون دينار كويتي
• الرجاء الدخول
• المركب السريع الى ماكاو
• محــلات في مجمع كويت ماجيــك
• سؤال عن
• استفسار بشأن شقه
• سوق الجملة للملابس الرجالية
• فزعه يا اهل الكويت
• مساعدة عن زيارة الكويت
• جدول فعاليات هلا فبرايـــــــــــــــــــــــــــــــــــــــــ ـــــــــــــــــر
• الخيران
• ممكن شوي من وقتكم؟؟ ولكم الدعاء
• زيارتي لدولة الكويت الشقيقة
• كيف ستبدو الكويت بعد عاما؟
• استفسار بخصوص فيزة الخدامه
• اكل كويتي
• الخطوط الجوية الكويتية بالصور

حياااااج الله اختي بالكوييت بتنوور ..

امم حبيت ارد على اسألتج

المطااعم عندج : برج الحمام , ميس الغانم , قيصر

وافضل وقت انج تزورين الاسوااق الشعبيه الصبح عالسااعه 8 ونص تطلعين الجوو يكوون عجييب والشوارع تقريبا فاضيه لأنه الحين مداارس ..

طبعااا على فعاليات هلا فبراير تكوون في صاله التزلج والحجز يكون في الافنيوز و 360 وشررق

وطبعااا يااريت يفيدج الي حااطينه بالمنتدى اهني موجود فيه كل المعلومات وان شاء الله تستفيدين

وحيــاااج الله في ديرتج الثاانيه وكلناا اهلج واخوااانج واي مسااعده اناا حااضرر

حياج الله حبيبتي بالكويت
بالنسبة للجو حلو لاهو برد ولا حر ربيعي
وبالنسبة للاسواق الشعبية المباركية كل شي بخاطرج شعبي تلقينه
الفعاليات حاطين بالجريدة راح يكون في مجمع الكوت في منطقة الفحيحيل هالايام
وبالنسبة للمطاعم واااااااايد كل مجمع تلقين الي ناسب ذوقكم وهم على شارع الخليج
وبالنسبة لعيالج عندج ماجيك بلانت بالافنيوز من ترفيه وتسوق
وان شاء الله تستانسون بالكويت

يعجز اللسان عن شكركم أيها الأحبة .......
كويتي عاشق لندن / النور نورك أشكرك على المعلومات الحلوة وعساك على القوة ياخوي .....
al-7lwa/
الله محي أصلج حبيبتي ،، الحمد لله أن الجو ربيعي ليش أني حاملة هم بنتي الصغيرونة ـ عندها مرض تكسر الدم ولاتتحمل جو بااارد وكنا ناويين نهون عن الروحة لو كان الجو كلش بارد من حظها الفصعونة الجو دفا السنة ، هم أشكرك على المعلومات اللطيفة وإن شاء الله نكون من زوار هالبلد الطيب بأهله وناسه دوووم ....

أجمل تحياتي ....

حياك الله بديرتك الثانيه الكويت.....
تكفين مادام انك بالكويت لا يطوفك فلم ( افتار) في جميع دور السينما يعرض خياااااااااال
ومناسب لجميع الاعمار...... وتصلون بالسلامه.

هلا فيج اختي وان شاءالله تستانسين بالكويت
المطاعم التي تقدم اكل كويتي : ( مطعم الستينات ) في حولي بجانب السنترال + فريج عقاب ( موجود في الفحيحيل )
المطاعم الفاخرة تقدم مأكولات مختلفة هندي امريكي اسيوي
ميس الغانم ( انصح بزيارته ) + قيصر ( مطعم هندي ) + برج الحمام + روبي تيوزدي ( مطعم امريكي انصح بزيارته )
بالنسبة للاسواق الشعبية
سوق المباركية سوق شعبي عام ، بالنسبة لملابس الحريم انصحج بزيارته مجمع العربيد في منطقة الفروانية
بالنسبة للمولات
اهم شي تروحين الافنيوز + المارينا مول + سوق شرق + مجمع 360 ( جديد )
بالنسبة للعيال
انا انصحك تودينهم حولي بارك + المدينة الترفيهية + حديقة الشعب

واي مساعدات اخرى انا موجود

بالنسبه للمطاعم ميس الغانم وفريج صويلح ما يتفوتون
واذا تبون للريوق روحو لونتر في المارينا مول ب 5 دينار بس عجيب ويوقول فيه فرع عالبحر قعدته احلى

ما سوينا شي يالغاليه
وما عليها شر البنوتة الله يخليها لج وشافيها يارب
واي شي اعيونا لكم وحياج مرة ثانيه بديرتج

ما أقدر أزيد شيئ علي الاخوان ... ماخلو شيئ
يعطيهم ويعطيك العافيه
وحياك في الكويت
تنورينا
بس أزيد انه في بوفيه من الساعه 7ص الي 12 ويعتبر افطار وغداء شامل العصير 3 أنواع + شاي وقهوه
فقط ب 2دينار .... في مطعم tikka
السالميه بجانب مركز سلطان ومقابل هارد روك كافيه

حياج الله بالكويت اختي تنورين وتشرفين .. بخصوص الاماكن اللي تقدم الاكل الكويتي .. فريج صويلح .. يوم البحار موجود فية مطاعم واكل كويتي وايضا سوق المباركية فية مطاعم تقدم الاكل الكويتي ..


وهذا برنامج حلو اذا تبينة ( حسب رايي الشخصي ) :

اليوم الاول : سوق شرق ( نهارا ) + تأجير قارب مع سائق من امام سوق شرق والذهاب في رحلة بحرية والغداء في مطعم بورت بجانب سوق شرق - الغداء في مطعم ميس الغانم - في المساء التسوق في مجمع الافنيوز والعشاء فية ( المجمع فية جزء كبير لتسلية الاطفال .. يعني تتسوقين وتخلينهم يلعبون )

اليوم الثاني : المارينا مول ( نهارا ) التسوق والغداء في المجمع ( او في مطعم فريج صويلح ( مطعم شعبي شغل عدل للمجابيس وهالامور ) ) - المركز العلمي - العشاء في ابراج الكويت

اليوم الثالث : صباحاً في سوق المباركية والغداء في المطاعم الشعبية هناك - مساءا المدينة الترفيهيه والعشاء فيها ( ترى المدينة كبيرة جدا )



وفي مجمع للالعاب كبيرة توهم مفتتحينة اسمه ديسكفري وفية مطاعم داخل .. تقدرين هم تودينهم له ..


وحياكم الله

ياهلا وغلا بأحلى ناس أهل الكويت الطيبة
واجب علي أرجع واشكركم جميعا ، على نفوسكم الحلوة على طيب أصلكم على حسن مساعدتكم وأهتمامكم ..... وعلى كل شي ... !
رجعنا من الكويت بعد أيام سعيدة قضيناها بين ربوع هذا الوطن الغالي ... فعلا مثل ماسمعت وقرأت عنها وأكثر ،، أستمتعنا بكل ثانية من وقتنا هناك ، جدولنا كان حافل لدرجة أني مانمت كم ساعة متواصلة إلا لما رجعت السعودية من أبراج الكويت الشامخة ابتدينا ولي سوق المباركية العريقة والمجمعات الحلوة وللبحر ول....... سوق الحمام والطيور ( لاتستغربون ترى أنا وزوجي راعيين مغامرات ونحب نروح كل مكان حتى سوق الغنم مدري الخرفان رحنا وصورنا معاهم بعد ) فعلا بلد طيب بأرضه وناسه وخفيف دم بالمرة ....

الله يحفظكم جميعا وإن شاء الله كانت الزيارة الأولى وليست الأخيرة ......
أجمل تحياتي ....