الموضوع: ملينا من المطاعم

اخوانى الاعزاء
الاحظ من خلال اطلاعى فى هذا المنتدى الكريم بان السياحه بالكويت اصبحت فقط مطاعم مطاعم مطاعم

ماذا يحصل فى جوهرة الخليج ماذا يحصل فى بلدى الكويت . رب الاسره حينما يريد الخروج مع عائلته لايفكر الا الى اى مطعم سوف يذهب واين الافضل مع الاسف سياحتنا بس مطاعم وهذا سبب زياده وزن الكويتيين لانه بالبيت فقط ياكل واذا اراد التنزه لايوجد الا المطاعم ولهذا السبب اذا جاءت عطله ولو كانت 4 ايام تجد الكويتيين يسافرون لانهم ملو من المطاعم
اما المطاعم عندنا فاغلبها مع الاسف داخلها شيشه ورائحة الشيشه اجلكم الله كأنها ريحة مجارى يعنى المطعم اساسا غير صحى . المهم والله ياخوان كثير من الاوقات اخرج مع عائلتى ولا اعرف اين اذهب فيسألونى بابا وين نبى نروح الصراحه لااعرف الجواب وفى النهايه نتشاور الى مطعم نذهب :110::110::110:

مواضيع عشوائيه ممكن تكون تعجبك اخترناها لك:

• سامحوني عالتقصير
• فلل منتزه الخيران
• بحاجتكم يااهل الكويت لاتخيبون املي الله يخليكم
• استفسار عن فندق هولدي ان السالميه
• الكويتيون ينفقون مليون دينار على تذاكر الطيران
• وش رايكم بالسعر؟؟ رياض كويت رياض
• فندق السفير الدولي
• استفسار عن الصين
• استفسار يااهل الكويت اذا ممكن
• زيارتي للمطعم الهندي بالصور
• عاجل بكره مسافر وضروري الرد
• مقتطفات من رحلتي إلى الكويت نوفمبر
• مطعم حلووو
• شقق فندقية جديدة بالسالمية وعرض مغري
• أهل الخبرة ليه اللون الأزرق شعار الكويت الشقيق
• حلبة سباق الربع ميل في الكويت
• بعض الاماكن بالكويت
• فندق فيأو قريب من منطقة قرطبة عاااااجل
• مافي محل تكون الاسماك حولك فيه؟؟
• بغيت فندق بسعر 30 دينار بحريني وياريت يكون مع الفطور لثالث ايام العيد

شاليهات

حدائق ومنتزاهات

روح حديقة الشعب وحولي بارك او المدينه الترفهييه

وهم لا تنسى المركز العلمي وابراج الكويت

وفي السينما

في رحلات باليخت لفيلجا او بالبحر

مو لازم كله مطعم

كويتيه مزيونه صاجه بعدين الشيشه هاذي في القهاوي وليست مطاعم استغرب انك تقول المطاعم شيشه
عمومآ انت جرب الشاليهات والبحر وممارسة الانشطه البحرية في الصيف قمة الوناسة
وبالشتا كشتات البر مع الاهل وااو جو موطبيعي

يا هلا فيك اخوي
فعلا صارت اكثر طلعاتنا للمطاعم و المجمعات
و ترى مو كل المطاعم فيها شيشه
بالعكس .... كل المطاعم اللي اروح لها الحمدلله ما فيها شيشه
و التغيير مطلوب ... يعني لو زهقت من المدينه الترفيهيه و منتزه الشعب و حديقة الحيوان و المركز العلمي وغيره كثييييييييير
ف الاحسن انكم تطلعون شاليهات او جواخير او حتى تأخذ قواري عيالك و تقعدون على البحر
والله وناسه
بالتوفيق

الحين الجو حلو فتقدر توديهم هالمخيمات
راح تصير طلعه حلوة
وهالمجمعات فيها اماكن حق الالعاب للاطفال وخصوصا سوق السالميه
اذا ماتبي مكان مكشوف

اي صاجين الكويت مافيها الا مطاعم ...

وحتى الاماكن المكشوفه مثل الترفيهيه والشعب تحتاج جوي حلو ... وتكون حق اليهال الاغلب


ملينا من المطاعم والمجمعات


نبي شي يديد


الكشتات والبر والبحر يبي يمعه وناس ... عشان تحلى ...

بس في يوم جذي تبين تروحين مكان غير هل اماكن ويكون مميز وحلو مافي ... الا السفر

اخاف البر مقصر عن المطاعم ام شيشة!!
بقيات وجراقيات وتقحيص وازعاج طول اليوم

فعلاً ماساة بعض المرات تحتار الله يجيب المطر ونغير شوي

موضوع حلو تشكر عليه أخوي سمو رجل


وفعلا هذي مشكلة ولكن كيف نتعايش معها أعتقد هذا هو الهدف من الموضوع وليس جلد الذات

والحل كما ذكروا الاخوان والاخوات مشكورين والله لو تطلع تلف ويا عيالك بالسيارة ..أو تقعد بحديقة على الثيل وعيالك عندك

أو قعده على البحر أو مكشات أو مزرعة أصايل بالوفره عندهم خيام اليوم 10 دنانير.

انا من اللي اعرفه من اهلنا بالكويت انه اغلب الكويتين الحين طالعين البر والله كانت لي ذكريات حلوه مع بر الكويت لما كنت صغيره وقبل الغزو ياسلام ايام جميله وقتها كان عمري 7 سنوات بس والله لحين بذاكرتي وحتى الحين والله البر بالكوبت وناسه بس هالسنه مالي نصيب اجي وقت البر
ياليت لو احد منكم يسوي تقرير عن البر والمخيمات تغيير والله

المشاركة الأصلية كتبت بواسطة فاررسه
http://www.arabtravelersforum.com/tr...1/#post2551331

انا من اللي اعرفه من اهلنا بالكويت انه اغلب الكويتين الحين طالعين البر والله كانت لي ذكريات حلوه مع بر الكويت لما كنت صغيره وقبل الغزو ياسلام ايام جميله وقتها كان عمري 7 سنوات بس والله لحين بذاكرتي وحتى الحين والله البر بالكوبت وناسه بس هالسنه مالي نصيب اجي وقت البر
ياليت لو احد منكم يسوي تقرير عن البر والمخيمات تغيير والله





احلا جو البر هاليومين صج اكو برد بس وناسه هذا معني السياحه بالشتاء بالكوين اما المقاهي برد والحدايق الشعبيه او غيرها ما تسوي هاليومين ورورح اي منتزه بالكويت تلقاه فاضي العالم بالبر


ودمتم

فعلا كلامك منطقي لا نفكر الا بالمطاعم

ولكن المطاعم النظيفه التى لا تبيع الشيشه

وهو السبب في ازدحام المطاعم في ايام العطل

الذي يجعلك تنتظر اكثر من ساعه لتاخذ دورك

والله صاج بس الكويت ياسينمات او مطاعم او قهاوي ولا مجمعات وين تروح كل كلامكم علي عين وراسي شاليهات او بر



بس مشكله احنا نتكلم عن طلعت بووو ساعتين وين نروح فيها مو كشته ....انا اقول ماكو احلا من السفر من غير منازع




ديرتي واحبها بس باجازه خل تعذرني(لووووووووووووووووووول)

اولا اقول للجميع شكرا على مروركم الراقى والذى اثرى الحوار .

ثانيا : الاخت التى ذكرت بانها تستغرب بانه هناك شيشه فى المطاعم وانا استغرب انها لم تلاحظ بان اكثر المطاعم الان بها هذة الشيشه العفنه .
ثالثا : بخصوص الاعضاء الكرام الذين ذكروا الاماكن الاتيه والتى سوف اقوم بالتعليق عليها .
1. المدينه الترفيهيه : اصبحت قديمه جدا وممله والعابها من سنة الهدامه ولم تتطور حق الهنود ماشى حالها .
2. المركز العلمى : اتصور لايستحق الزياره اكثر من مره او مرتين وقد قمنا بزيارته 6 مرات وملينا والسمك اللى فيه شيب وصرنا انشوف الشيب بشوارب الهامور يعنى السينما اللى تجدد الافلام فقط .
3. الحدائق : والله ملينا من الهايد بارك وحدائق الطيور وحدائق الفراشات :109::109: الحدائق اللى عندنا داخل المناطق فقط شفتوها ظلمه والالعاب محدوده جدا موديل 1960 ومكسره وتخاف لايطلعلك بالظلمه واحد منشع او متعاطى .
4. البر : وين البر البلديه حكروا الناس فى مساحات ضيقه جدا وصار الواحد يربط حبل خيمته على حبل خيمة جاره واذا انت قاعد بخيمتك وعطست تسمع جارك يقولك يرحمك الله :110::110: ولا ماتدرى ولا ولد صغير داش عليك الخيمه يقولك وين ابوى . واذا طلعت من الخيمه عشر دقايق تشوف شكلك بالمنظره كانك طالع من قبر من الغبار بسبب البقيات والتقحيص والمعافر . وبعدين البر شهر بالسنه .
5. البحر : ياجماعه اللى يشوف بحر يصوره لى من زمان ماشفت بحر بالكويت كل كونكريت ومبانى .اسف نسيت اللى يبى البحر لازم يلبس مايوه ويلبس عياله ملابس البحر اللى خابرينه ويدش فندق ويستانس ويتعرف على الاجانب اللى معاهم فلبينيات girl frind مفاصيخ ويطالعونه ويطالعهم يعنى متعه متبادله .

اى وناسه بالكويت اى بطيخ مطاعم فقط

المشاركة الأصلية كتبت بواسطة ;2561785


4. البر : وين البر البلديه حكروا الناس فى مساحات ضيقه جدا وصار الواحد يربط حبل خيمته على حبل خيمة جاره واذا انت قاعد بخيمتك وعطست تسمع جارك يقولك يرحمك الله :110::110: ولا ماتدرى ولا ولد صغير داش عليك الخيمه يقولك وين ابوى . واذا طلعت من الخيمه عشر دقايق تشوف شكلك بالمنظره كانك طالع من قبر من الغبار بسبب البقيات والتقحيص والمعافر . وبعدين البر شهر بالسنه .
5



هههههههههههههه
صاج صاج بوصالح قال وبوصالح صاج
لا تعليــــــــــــــق كفيت ووفيت :x1:

كل واحد بديرته يشوف ان مافي مكان يروح له لان هذي الاماكن كان رايح لها من قبل ...ليش ما يكرر زيارة هذي الاماكن على فترات واذا يحب يسافر .... خله يجرب الفنادق المحليه الي ما ندشها على ابو انها في نفس الديرة....المنتزهات الي ما جربها والجديد الحين سليل الجهراء وصحاري وغيرها ليش انقط فلوسنا بره خلها مرة وحدة بالسنة .......وجني كتبت لكم مقال مشكورين على العموم..

شكرا على مرور الجميع واحترم وجهات نظرهم

انا معاكم بعد

يعني نقعد نقرر ساعه كامله وين بنروح هاهاهاهاهاهاااااااااااااااااااااااااا وأخر شي نستقر عليه ان راح نفتر شويه بالسوق

وبعدها نروح مطعم هذا اذا سوينا انجاززززززز يعني بنفتر بالسوق قبل ما نتعشا

والبرررررر وماادراك مالبر هذا اليوم راجعه بالليل من الشاليه ولا اشوف غبره صوب الشعيبه جهه شارع طريق المغرب السريع
غبره مو طبيعيه اخنقنا بالسياره

بصراحه هذاتلوث مو بررررررررررررررررررر

صادق والله الكويتين صارو بس :36_11_15::36_1_51:
ما في سياحة بالكويت مره كنت في دبي ، شفت عائلتين في الوافي كلهم سمان من الأكل قلت عادي ، لين رحت نفس اليوم سيتي سنتر إلا أشوف بعد كذا عائلة كويتية وقلت الأكل وما يسوي

أحمدو ربكم على الاقل عندكم سينما لو علي انا مأبي مولات ولا مطاعم ولا حدائق ولا شاليهات ولا اي شيى مأبي الا سينما مدري يمكن علشاني مجنون افلام اقول كذى.

والله ديرتنا فيها اشياء وااايدد بس احنا عودنا نفسنا علي السفررررر



...........لا تنسووون هالنقطه.....



ونرد نقول ماكووو احلا من ديرتنا

اي والله ماكو احلى من ديرتنا

انا الصراحه بيتوتي وماأحب اطلع وايد

بس بحزة المعاشات اروح مجمع اشتري الشغلات اللي ابيها

اخوي سمو الرجل ..

طول بالك ،
أخوي من هالأماكن اللي ذكرتها مثل الاكويريم وغيره ترى لي زرتوها بين الفترة والثانية بفترات بعيدة مثلا كل 4 اشهر او اكثر تراها بتكون حلوة ليش لأ ،
اليهال يفرحون بالسمج وخصوصا لي كانوا صغار خل نقول لي عمر 8 و9 سنين بتكون حلوة عندهم ما فيها شي .

والبر اخوي حلو حتى لو احكرونا بحدود معينة ما فيها شي ، روحة البر حلوة فيها وساعة وحرية للياهل باللعب وتغيير ..أحسن من روتين المطاعم المتكرر .

وغيره وغيره ...


اخذها من اختك ..
انت خلك متفائل دايم
وشوف هالأماكن بعين حلوة ولا تذمها عند اليهال
صدقني بتصير حلوة بعينهم وبيستمتعون فيها ان شاء الله .
بس لي قلت هذا مو حلو وذاك بعد ، جذي اليهال ماراح يتعلمون الا عالمطاعم وبس .
حتى ان كانت عندك هالاماكن مملة بس اليهال ممكن يشوفونها حلوة ،
جرب وغير من هالروتين وان شاء الله بتقل روحتكم للمطاعم .



مشاركاتي ...

http://www.arabtravelersforum.com/travel243625/ ...................... http://www.arabtravelersforum.com/travel228674/

http://www.arabtravelersforum.com/travel226492/ ...................... http://www.arabtravelersforum.com/travel234650/

http://www.arabtravelersforum.com/travel199276/ ...................... http://www.arabtravelersforum.com/travel222528/

http://www.arabtravelersforum.com/travel235741/ ...................... http://www.arabtravelersforum.com/travel244617/

كلمة وحدة أقولها لك .....


تتمنى إنك ما تكون كويتي ؟



بتقول طبعا ما أتمنى ... مو علشان ديرتك
مو عشان إنك ما تكون أناني

لاا

لا

لأن الكويت غير
فيها كل شي

على كل عيوبها .. كل شي فيها

بس يبي الي يطالعها بتفائل

يبي الي ينظر للحقيقة


المخيمات الي تقول زحمة طق عصي عشان روعة

المطاعم مو كلها شيشة ( الفايز - الأبراج - قيصر - فريج صويلح - الوالي - حسني - مغل محل ..............) بس دور عدل

وغيرها .. وغيرها


أنظر للحقيقة .. والمميزات.. ولا تنظر للعيوب

أكو شي بدون عيوب !!!!!!!!!!!!!!!!!!!!!!!!!!!!!!!!!


وبالنسبة للسفر .. طبعا بنسافر .... مو عشان ديرتنا مو حلوة
لا
لأن الله معطينا خير .. وديرتنا متعودين عليها طول السنة فيها

عادي





ويعطيك العافية



إختكم زارا