الموضوع: الخطبة الحمصية

بسم الله الرحمن الرحيم


http://www.homsnet.com/forum/showthread.php?t=3361

قرأت قصة طريفة جداً عن عادات الخطبة في مدينة حمص ، وبما أنها طويلة نوعاً ما ، فسوف يتم سردها على شكل أجزاء حسب ما قسمها كاتب القصة ... وسنبدأ بالجزء الأول منها ، وآمل أن تنال إعجابكم ...




للأمانة فقد حاولت البحث عن كاتب هذه القصة ، وبذلت مجهوداً لذلك الأمر
إلى أن تبين لي - على ما أعتقد - بأن كاتب القصة يدعى " أبو يزن " ....
وأتوجه له بالشكر على هذه القصة الجميلة وأستأذنه بنقل القصة هنا ....
وقد حرصت على أن أنقح القصة من الأخطاء الطباعية والنحوية التي وردت فيها
فأرجو أن تعذروني عن أي خطأ ورد فيها ....
مع تمنياتي لكم بالمتابعة ، وعدم الملل

مواضيع عشوائيه ممكن تكون تعجبك اخترناها لك:

• بعض المعلومات من الأماكن السياحيه في سوريا
• استفسار عن اجراءات دخول السيارة
• بالنسبة لصلنفه
• مدارس سعودية في دمشق؟
• الصيد والرمايه
• سؤال عن المواصلات بسوريا
• الليله طيــارتي للشـــــام
• الرجــاء الدعاء لاخـــتي
• كيف الوصول الى دير الزور
• ثلاث مفاجــاءات بانتظاركم
• تـــــــــــــــ المعجزة ــــــــــــــــــدمر
• الدردري السياح الكويتيون حلوا في المرتبة الأولى في سوريا
• محلات لادوات المدرسيه
• من دمشق إلى حلب
• الاوضااع بالشاام
• أخوكم عزيز يحيكم من سوووووووووووووووووريا
• الدول الأمنه
• كم يأخذ التاكسي من مطار دمشق إلى فندق الجلاء في اتوستراد مزة ؟؟
• هل خدمة بلاك بيري شغالة في سوريا
• وردني اتصال من سوريا

الجزء الثاني:
شفنا كيف بالجزء الاول من القصة كيف راحت الخطابة أم فاروق هيي واختا أم أحمد لتخطب لابنها وشافت البنت وعجبتا وطلبتها من أمها فورا , ووعدت أم البنت أنو تشاور جوزا ويسألوا عن الجماعة ويردولن خبر ( طبعا هيك الاصول )
رح نكملكن شو صار بقصة هدول الجماعة الحماصنة و آلية الخطبة اللي رح تتم حسب التراث والعادات والتقاليد .
المهم بلشوا أهل هالبنت يسألوا عن العريس الجديد ويعرفو أصلوا وفصلوا وممشاه ووين بروح ووين بيجي ,, وضل أبو هالبنت يلف ويدور ويسأل عن هالشب , ووصل لجنب بيت الجماعة وراح يسأل السمان اللي عالسوكي وصار بيناتن الحوار التالي:

الاب : السلام عليكم
السمان : وعليكم السلام
الاب : خيو بدنا نسألك سؤال بلا صغرة
السمان : أي تفضل سئال
الاب : في جيرانكون هون من بيت (................) بتعرفون شي؟
السمان : أي لكن أخي لكن هدول جيراني وزبايني من زمان وبعرفون كلياتن
الاب: بتعرف ابنن فاروق؟
السمان :أي لكن انا اللي بعرفوا صاحب ابني سليمان الروح بالروح, شو القصة لك أخي كأنو الشغلة فيها خطبي وجازي
الاب : أي والله يا أخي
السمان :شوف لقلك لك أخي ,الجماعة ما فيون شي والسبع تنعام منون واببن أخلاقوا منيحة ولالو لا طلعات ولا فوتات
الاب :شو هالحكي؟
السمان : متل ما عم قلك والله , ولو عندي بنت وطلبا مني كنت عطيتون عالسريع
الاب :كتر خيرك يا سيدي والله يعطيك العافي
السمان :ولو يا أخي اهلا وسهلا حلّت البركي
الاب : خاطرك السلام عليكم
السمان : لك وييين عود لنفتحلك كازوزة
الاب : غير مرة انشالله, ............السلام عليكم
السمان : وعليكم السلام ورحمة الله وبركاتو

المهم الاب خرط مشطو هالشب وعجبوا اللي سمعوا من هالعالم عن هالجماعة وقرر أنو يعطيهون بنتو ( مع انو الشب عندو بيت بالآجار)

(ابو البنت وام البنت مساء في السهرة)


المشهد :
ام عبدو عم تحفر البيتنجان مشان تعمل محشي بكرا وابو عبدو عم يتفرج عالتلفزيون والبنت بأوضتا عم تدرس:

ابو عبدو : والله اليوم رحنا سألنا عالولد
ام عبدو : أي وشو قالولك؟
ابو عبدو : والله مدحولي منون كتير والجماعة وضعون على قدو ها يعني مانن كتير مريشين
ام عبدو : ييييي ( وهيي عم تنشتر ,أنو ما عجبا الوضع )
ابو عبدو :شبيك؟ الناس مدحولي كتير من اخلاقون ونحنا شو بدنا غير السترة لبنتنا
ام عبدو : وقال شو يا بعدي بدو يسكنا ببيت الاجرة , بكرا سنة زمان بيطلع من البيت وبروح بيسكنها عند أمو
وخود عاد كل يوم نقار وبكرا ما بتشوفا غير حردت وأجت قعدت بخلقتك ,( وقريضة انشالله هاي بعجنا البيتنجاناي )
تصطفل بنتك وانتي حر فيها
ابو عبدو : كبري عقلك يا مرا هلأ دغري حردتيها للبنت ,لك لسا ما لحتى يصير نصيب بالاول؟
خلص بكرا اتصلي بالجماعة وقوليلون يتفضلوا مشان يشوفوا البنت
ام عبدو :اييييه متل ما بدك

تاني يوم بعد ما هدّت ام عبدو على طنجرة المحشي رفعت هالسماعة واتصلت بالجماعة وصار هالحوار:

ام عبدو : ألو مرحبا
الخطابة : أهلين ....منك انتي؟
ام عبدو : أنا ام عبدو
الخطابة ( طبعا ام فاروق اسمها) : ييي ميت اهلين وميت سهلين اهلين بأم عبدو
أم عبدو : شلونك خيتو
ام فاروق : والله الحمد الله ماشي الحال, شلونك انتي وشلون اللي عندك وشلونا عروستنا؟
ام عبدو : بيدعوا بسلامتك
خيتو تفضلوا بكرا المسا بعد العشي مشان تشوفو البنت
ام فاروق : ايه يزيد فضلك يا خيتو , بكرا بعد العشي انشالله منكون عندكون
ام عبدو : خير انشالله ونحنا بانتظاركون
ام فاروق: على خير انشالله
ام عبدو : خاطرك
ام فاروق: الله معك مع السلامة

وتاني يوم الساعة 8 ونص بعد صلاة العشاء راحت أم فاروق هيي وابنها ( العريس ) وأبو فاروق لعند الجماعة

ودخلوا الجماعة لعند بيت العروس وفات أبو فاروق وابنو عالصالون وفاتت أم فاروق عؤضة القعدي
( طبعا كان حاضر من أهل العروس ابوها وعمها وأخوها الكبير)

المهم أجت البنت لتفوت تضيف القهوة للعريس الجديد
لبست تياب محتشمة شوي وحطت حجابها وحملت صينية هالقهوة ودخلت عالصالون وصار الحوار التالي:

البنت : السلام عليكم
الجماعة الجالسين : وعليكم السلام
البنت عم تضيف أبو العريس: تفضل عمو
ابو فاروق : الله يسلم هالديّات يا عمو
البنت عم تضيف العريس وهيي خجلانة وحاطة عينا بالأرض: تفضل
العريس وهوي خجلان ووجهو متل الشوندرة وعم يتطلع من تحت لتحت بالبنت : يسلمو...
ووقت شال العريس فنجان القهوة اطلعت فيه البنت مشان تشوفو مزبوط وتأكد فيه منيح

المهم كملت البنت ضيافة القهوة لأبوها وعما وأخوها وطلعت لبرات الصالون بسرعة

وبعد شي نص ساعة من تجاذب اطراف الحديث والتعرف مزبوط على الجماعةوالاستفسار عن العريس من قبل ابو البنت وعمها وأخوها متل ( شو بتشتغل وكيفو شغلك ومن هالحكي اللي بلا طعمي اللي بيسألوه للعريس أول ما بيتقدم للعروس
المهم وفي أثناء جلسة النسوان مع بعضون قالت أم فاروق لأم عبدو: ابعتولنا ورا العريس مشان يقعدلو هون شوي
وفهمت الام انو الشب بدو يقعد مع البنت هوي وأمو لحالون مشان يتقرر نصيب هالخطبة

المهم وبلا طول سيرة قام العريس من بين الرجال وأجا وقعد مع أمو بؤضة القعدة وطلعت الام برات الأوضة
وصار هالحوار
أم فاروق : شو لك أمي عجبتك البنت؟؟
فاروق : أي والله يا أمي كتير عجبتني
أم فاروق : لكن هلأ بتجي بتفوت هالبنت وقعود جمبا وسايرا شوي وبس قلك لبّس بتقوم بتلبسها الخاتم
فاروق : ماشي أمي

وبعد شوي فاتت هالبنت مشان تضيف كاسة البوظا وقطعة الكاتو
ضيفت الجماعة وقعدت عجنب
وبلش هيك حوار خفيف بينها وبين الشب ( وبهيك حالات بكون الحوار مختصر وبسيط لأنو التنين بكونوا خجلانين من بعض لسا
وبعد شوية حكي غمزت الام ابها وقالتلوا : قوم أمي لبسها
قام هالعريس وراح قعد جمب البنت وطالع من جيبتو هالخاتم ومدت هالعروس ايدها ولبسا الشب الخاتم

وهون نطت أم فاروق وطرقت هديك الزلغوطة

وبعد المبروك والله يتمم على خير وقبل ما يمشو الجماعة طلب الابن من أمو انو تقول لأم البنت أنو الشب بدو يحكي مع البنت عالتليفون ( مشان تكمل المودة ومشان ينكسر حاجز الخجل قبل ما تصير الخطبة الرسمية )

ووافقوا والله الجماعة وما قالوا شي

وطلعوا بيت العريس من عند الجماعة والعريس ضحكتوا لورا أدنيه
وفاتت العروس على أوضتا وسكرت الباب وهيي فرحانة بعريسها وعم تلعب بالخاتم اللي بأيدها
وللقصة تتمة.......
ترقبوها في الجزء الثالث
بس اذا نسيت ذكروني

(( صباحكم ياسمين دمشقي ))



وهون نطت أم فاروق وطرقت هديك الزلغوطة

لكل مدينة ومنطقة طقوس معينة ومحددة لطرق الزواج
يسلمووووووووووا

شكرا ابو احمد على هذه الاطروحه وتصلح مسلسل تلفزيوني 0 واصل ونحن بالانتظار

متى الحلقه الاخيره؟اومسلسل تركي للسه مطول

يعطيك العافيه الله يسعد كل الحماصنه

المشاركة الأصلية كتبت بواسطة الذيب الشمالي
http://www.arabtravelersforum.com/tr...8/#post5003878

(( صباحكم ياسمين دمشقي ))



وهون نطت أم فاروق وطرقت هديك الزلغوطة

لكل مدينة ومنطقة طقوس معينة ومحددة لطرق الزواج
يسلمووووووووووا

أشكر الذيب مع نسمات جدة الجميلة عروس البحر الأحمر

المشاركة الأصلية كتبت بواسطة النشمي2009
http://www.arabtravelersforum.com/tr...6/#post5003956

شكرا ابو احمد على هذه الاطروحه وتصلح مسلسل تلفزيوني 0 واصل ونحن بالانتظار

أشكرك اخي لمرورك البهي ....ربما تصلح ولكن بحمص فقط

المشاركة الأصلية كتبت بواسطة خيال الشرقية
http://www.arabtravelersforum.com/tr...2/#post5004602

متى الحلقه الاخيره؟اومسلسل تركي للسه مطول

يعطيك العافيه الله يسعد كل الحماصنه



أهلاً بالخيال لا خيو مو مطول تكي وبيكون عنك
تحياتي

الجزء الثالث:

وهيك يا جماعة الخير تم الوفاق وتلبيس خاتم الشوفي ايذانا ببدء المشوار بين فاروق وسوزان
بقي هلأ يصير فصل النقد والمتقدم والمتأخرحسب العادات والاصول قبل ما تصير الخطبة الرسمية
فتشاورت أم عبدو وأبو عبدو ( أهل العروس ) عهالتفاصيل واتفقوا عكل شي

وبعد كام يوم رفعت أم فاروق سماعة هالتلفون واتصلت بالجماعة مشان تشوف شو صار معون بشغلة النقد ومشان يحددو موعد الخطبة
وصار الحوار التالي:
أ م عبدو : ألو مرحبا
البنت : أهلين مين؟
ام عبدو :مين عم يحكي سوزان؟
البنت : أي مين ؟
أم عبدو : ما عرفتيني خالي؟ أنا أم عبدو
البنت : أهلين مرت عمو
ام عبدو : يي تقبري قلبي شلون طالعة منك مرت عمو ما أحلاها
البنت : تسلمي يا مرت عمو ,
ام عبدو : الله يسلمك يا رعوستنا ,,,,, الماما هون خالي؟
البنت : لا والله يا مرت عمو نزلت عالسوق وهلأ بتجي
ام فاروق : طيب خالي إذا اجت خليها تحكي معي ..أي
البنت : ماشي مرت عمو
وبهاللحظة بترجع أم عبدو من السوق وبترن الجرس
البنت : لحظة مرت عمو لشوف مين عالباب يمكن هاي الماما
ام فاروق : يالله خالي عم استنى
البنت فتحت الباب لأمها وقالتلا : ماما هاي أم فاروق عالتلفون
ام عبدو : أي روحي فوتي الاغراض عالمطبخ وطفي تحت الطنجرة لروح احكي معها ونوسي صوت المسجلة صوتا واصل لبراعالشارع يبعتلكون الأريضة انشالله, شو ضاربكون الطرش ؟
البنت : يالله
وراحت أم عبدو ومسكت السماعة : ألو
ام فاروق : اهين أم عبدو شلونك خيتو ؟
ام عبدو : الحمد لله الله يسلمك
ام فاروق : كيف هالشباب والصبايا من صوبك؟
ام عبدو : بيدعوا بسلامتك
ام فاروق : وشلونا عروستنا ؟
ام عبدو : لايئة
ام فاروق : ايه الله يخليلك ياها يارب
ام عبدو : تسلمي يا ستي
ام فاروق: أي اختي ام عبدو شو صار معكون مشان النقد ؟
ام عبدو : والله يا خيتو حكيت مع ابو عبدو وابو عبدو شاور حالو والحمد لله مشي الحال
ام فاروق : أي
ام عبدو : والله يا خيتو نحنا طالبين علامي ب 100 ألف ومتأخر 500 ألف وما بدنا منكن شي غيرو والجهازعلينا خيتو نحنا منجهز بنتنا
ام فاروق : يه والله كتير يا ام عبدو علامة بمية ألف بعدين كتير 500 ألف متأخر
ام عبدو : لا والله يا خيتو ما كتير, ليكي أختا اللي اكبر منها جابولا بيت حماها علامي ب150 الف ودفعولا متأخر 700 ألف ,بس ابو عبدو ماهان عليه تدفعوا متل الجماعة لأنو ابنكون الله يسلموا لساتو بأول الطريق وحالتو على قدها فما رح يتقل عليه وابو عبدو والله كتير حبو لابنكون فاروق وطاير عقلوه فيه

ام فاروق عم تقول بقلبها: ( أي هادا حبوه لابني وهيك طلبوا , شلون ما يكونوا ماحابينوا ؟ ولي على آمتون انشالله , خربوا بيتوا للصبي )
ام فاروق: بس يا ام عبدو والله الدهب غالي بهالايام
ام عبدو : شوفي ولك اختي ام فاروق , البنت رح تصير بنتكون وعندكون وشو ما لبستوها رح تلبسوها من قيمتكون
بعدين الدهب مرجوعوا الكون بالآخر يعني اذا تجوزت البنت وصار نصيب فشو مصرياتا وشو مصريات جوزا
ام فاروق : خلص خيتو لكن رح شاور اليوم فاروق وأبو فاروق وبكرا منردلكون خبر انشالله
ام عبدو : يا ستي كلو خير ونحنا عم نستنى تلفونكون
ام فاروق : ما شي خيتو يالله بدك شي
ام عبدو : الله معك أماني سلمي عالشباب والصبايا
ام فاروق : بيوصل انشالله ...مع السلامة

وإلى اللقاء في الجزء القادم ...............

الجزء الرابع :
منرجع عن جديد منكمل قصة هالخطبة المشحرة
فبعد ما طلبوا الجماعة هالنقد الغالي وهالعلامي الغالية احتار العريس وأهلوا من وين بدون يجيبوا هيك مبلغ مشان يشتروا فيه الذهب
كانوا متوقعين انو يكون حق العلامة أقل من هيك بكتير
أثناء السهرة وأم فاروق أبو فاروق قاعدين عم يتفرجوا عالتلفزيزن وعم يفصفصوا بزر وفاروق قاعد عجنب متل القرد اللي قاتلو صاحبو وشايل هموم الدنيا فوق راسو
صار الحديث التالي:
أم فاروق : شبك لك أمي مانك على بعضك
فاروق : تركيني بهمي أمي الله يخليكي
أم فاروق : هلأ آخدي عقلك هاي السنكوحة ؟؟ما شفت أهلا شو طلبوا مننا شي بيكسر الضهر
أبو فاروق وهوي عم يزورا لأم فاروق: أم فارووووق.....سمعينا
أم فاروق : أي وشو حكينا
أبو فاروق :ابني انتي شو صار معك مشان البيت اللي استأجرتوا؟
فاروق : دفعنالوا للزلمي 48 ألف أجار البيت ل6 شهورواستلمت البيت وبدو تزبيط شوي
ابو فاروق : وأديش باقي معك ؟
فاروق : والله يا أبي بقيان 100 ألف
ابو فاروق :أي خلص لك أبي محلولة الشغلي
فاروق : شلون؟؟
ابو فاروق :خلص أبي أنتي بكرا نزيل انتي وأمك واشتروا العلامي وتروك الباقي عليي
فاروق شلون يا أبي والله ما عم أفهم عليك
ابو فاروق : نحنا منتكفل بباقي المصاريف أنا وأمك واعتبرون نقوط مننا
فاروق : بس ياأبي أنا وعدتكون أنو ما آخد منكن ولا فرنك واني بدي اتزوج من حر مالي
ابو فاروق :خلص لك ابني ليش شو نحني وشو انتي ....اعتبرون دين وبعدين بتردلنا ياهون
فاروق عم ينفّخ : ماشي الحال ....الله يخليلي ياكون يارب
وهيك يا جماعة انحلت المشكلة المالية تبعت هالجازة ومشي الحال وقرر ابو فاروق انو يعطي ابنو من المصاري اللي محوشون لأيام العازي لأنو فاروق كان مواعد ابوه انو ما يخليه يدفع ولا شي من مصاريه مشان خطبتو وجازتو
المهم تاني يو م الساعة 11 قبل الظهر نزلت أم فاروق وأختا أم أحمد ومعون فاروق عسوق الصياغ مشان يشوفو ويتفرجوا عالذهب ويشتروا هالعلامة
وصارت أم فاروق هيي وأختا يفوتو بمحل ويطلعو من محل وما يعجبهن شي وبما أنو أم فاروق الها خبرة بالبياعين والمعالجة والمشتراة فهيي اللي استلمت هالشغلي وقبل ما تفوت على أي محل بتقلوا لابنها : انتي بتسكت وما بتفتح تمك ولا بكلمة أنا وخالتك منعرف شلون نحكي مع الصياغ
وشوفو شو صار بأحد محلات الصاغة اللي بالسوق :
أم فاروق : السلام عليكم
فاروق : السلام عليكم
أم أحمد : يعطيك العفي يا خيو
الصايغ : وعليكم السلام .....أهلا وسهلا مدام
ام أحمد : دخيلك يا خيو شي كاسة مي طقطقت زلاعيمي ونحنا عم نفتل بالسواق
الصايغ : أي تكرم عينك................تعا يا ولد روح عبي ابريق المي من السبيل وتعا بسرعة
أم فاروق : بأديش الدهب اليوم خيو ؟
الصايغ : والله يا أختي متحسن شوي اليوم 805 ليرات الغرام
ام أحمد : يه مبارح كان ب 800 ورقة شو اللي غلاه اليوم؟
الصايغ :والله يا أختي هيك أجانا سعرو اليوم
ام فاروق : ممممممم طيب شوفي عندك فرجينا لنشوف
الصايغ : انتو شو طلبكون أختي؟.... ....يعني شو المناسبة؟
ام فاروق : والله خطبنالو لأبننا وبدنا نشتري علامة
الصايغ : أي ألف مبروك يا أختي ............ شوفي أختي عندي طقوم رولكس وعندي جنازير وعندي مباريم وعندي أساور سحب وفي طواق وفي خواتم مفردة وسناسل ورقّات وشي مألمس وشي بلا ألماس وشو ما بدك ..شو بتحبي تشوفي؟
أم فاروق : فرجينا طقومة الدهب اللي عندك
فتح الصايغ الفيترينا اللي عندو وطالع هالطقومي و بلشت أم فاروقهيي وأم أحمد على هادا حلو وهادا ما حلو وهادا مشرشح وهادا بطلت موضتو .ويييييييييييييييييي....................هيك لحتى داقت خلاقوا لصاحب المحل وقال:
شو أختي ما عجبك شي لهلأ:
أم فاروق : لا والله يا خيو .......ما عندك غير هدول؟؟؟
الصايغ : لك أختي صرتي شايفي 15 طقم وما عجبك منون شي وعم تقوليلي ما عندك غير هدول !!!!!أي روحي دوري سوق الصاغة كلو بحمص ما بتلاقي متل طقومة الذهب اللي عندي
ام فاروق : اييه منشوف صايغ غيرك......خاطرك خيو
الصايغ وهوي متنكرز : الله معكون مع السلامة شرفتو
وبعد ما طلعوا من عندو قال : تضربوا من بين الزباين ......لعما نكتُّولي المحل نكت .......شو هالنسوان هدول.........الله يعين هالكنة الجديدة على بيت هالأحما
وهيك بعد ما دارو السوق من اولو لآخرو ونكتوه نكت مشي الحال واشتروا العلامة واستقر رأي أم فاروق على جنزير مترين وطقم أساور سحب ومعون حلق واشتروا المحابس ومشي الحال وانقضت الشغلي على خير
رجعت أم فاروق عالبيت ورفعت هالسماعة واتصلت بأم عبدو مشان يحددوا موعد الخطبة ............. ودار الحديث التالي بينهما:
أم فاروق : مرحبا أم عبدو
أم عبدو : أهلين أم فاروق يا أهلا وسهلا
أم فاروق :شلونك انشالله بخير كيفو أبو عبدو وكيفا هالعروس وكيفون الشباب والصبايا من عندك؟؟
ام عبدو : الحمد لله بيدعوا بسلامتك
ام فاروق : الله يسلمك ويحفظك يا رب.........خيتو أم عبدو نحنا جاهزين ها.......... واشترينا العلامة ومشي الحال
ام عبدو : ييييي ............ايمت اشتريتوها؟
ام فاروق : والله مبارح يا خيتو
ام عبدو : وشو هيي؟؟
ام فاروق : يا ستي جبنا جنزير مترين وجوز أساور سحب وجوز حلق بس شو ....الله وكيلك شي بياخد العقل
ام عبدو ما عجبتا العلامة وانقهرت : عاد تكونوا جايبين طقم ذهب من هالطقومي النازلة جديد....... والله أحلى وأهيب
ام فاروق : لك نحنا هيك كنا بدنا نشتري بالاول بس والله ياخيتو ما عجبنا شي بهالسوق ومافي شي بعبي العين
أم عبدو عم تحكي حالها( يعني الجنزير بعبي العين أكتر؟؟ولي عليكون ) : أي ماشي الحال أختي أم فاروق
ام فاروق :وايمت بتكوني جاهزة مشان نعمل الخطبة ؟
ام عبدو : وليش هيك مستعجلة كل هالأد خيتو ؟
ام فاروق : أي ييييييييي بنا نفرح فيهون لهالعرايس
أم عبدو : طيب خليها بعد 3 أسابيع
ام فاروق: يه ليش هيك كل هالأد ......ما بيصير نسبقها شوي؟
أم عبدو : لا يي يا خيتو بدي انزل عالسوق واقطعلا لبنتي قماشة مشان خيطلا بدلة الخطبة وشوفي أديش بدها وقت عند الخياطة وبدي أعزم هالعالم وجهز حالي مزبوط ..........يعني بتعرفي انتي الخطبة ولوازمها
أم فاروق : ماشي الحال خيتو بعد 3 اسابيع............ووين بدكون تعملوا الخطبة؟
ام عبدو : هون والله عندي بالبيت صالوني كبير وبيساع ..............بس ما يكونوا جماعتك كتار
ام فاروق: ههههههههههه لا كتار ولاشي مافي غير سلايفي وخواتي وبنات حمايي وخالاتي وبنات خالاتي وهالكام جارة ورفيقة .............يعني شغلة 40 مرا
ام عبدو : ايه الله يقدم اللي فيه الخير ................لكن ما الخميس الجاي ولا اللي بعدو ....اللي بعدو
ام فاروق: أي خلص لكان .........خيتو أم عبدو أماني بضهرك اذا لازمك شي عوني شي مساعدة بتقوليلي ها
ام عبدو : تضلي سالمي يا رب ما بدنا غير سلامتك والله
أم فاروق : الله يسلمك .....يالله خاطرك
ام عبدو : مع السلامة الله معك

وهيك يا جماعة موعدنا بالجزء الخامس مع الخطبة بإذن الله .............وأما شو خطبة!!!!!

واصل اخي الكريم مسلسلك الجميل فنحن متابعين 0 وفقك الله 0

أحييك أخي النشمي وشكراً لتحفيزك الطيب

الجزء الخامس

وأخيراً تحدد موعد الخطبة وبلشت التجهيزات المعتادة لحفلة الخطبة على الطريقة الحمصية البحتة

نزلت أم عبدو هيي وبنتا عالسوق وقطعوا شقفة القماشة التقيلة مشان يخيطو منها بدلة الخطبة
وراحوا لعند الخياطة الحجة شكرية مشان يخيطوا عندها بدلة الخطبة
وعند الخياطة وبينما كانت الحجة شكرية عم تاخد مقاس سوزان بالميزورة دار الحديث بينها وبين الجماعة

الخياطة : ييييي لكن خطبتك بعد جمعتين
سوزان : أي والله خالي
الخياطة : ييي سبع مباركات يا خالي سبع مباركات
سوزان : شكرا خالي الله يبارك فيكي
الخياطة : من بيت مين خطيبك خالي؟
سوزان : من بيت ( ................)
الخياطة : يييييييي بعرفون لكن ....كانوا جيراننا ببيت أهلي من زمان من بيت (..........) أوادم والله بيقولوا عنهون
سوزان : أي
الخياطة : وحالتون منيحة خالي هالجماعة :؟
سوزان : ماشي الحال
الخياطة :وشو بيشتغل خطيبك خالي؟
سوزان : ..عندو نص سرفيس مشغلوا على طريق الشام وبيشتغل عليه هوي وابن عمو
الخياطة : أي خالي ما قلتيلي شلون بدك موديل البدلة؟
ام عبدو( جايبي معها جورنال فيه موديلات كتيرة ) : شو فيلنا هالموديل حجة شكرية شو رأيك فيه؟؟
الخياطة : فرجيني لشوف ام عبدو.............ممممممممم....يا سلام شي حلو كتير وأكابري.....وين القماشة اللي جايبتيها؟ فرجيني ياها لشوف
ام عبدو طالعت القماشة من الكيس وعطتها للخياطة : تفضلي حجي
الخياطة : يا عيني شو هالقماشة التقيلة من وين قطعتيها أم عبدو؟
أم عبدو : والله من عند سحلول
الخياطة :بأديش حسبلك الضراع؟
أم عبدو : والله بعد ما عالجناه أخد حق الضراع 1500 ليرة
الخياطة : ييييي ولي على قامتو شو غلوجي.........وكام ضراع جبتي؟
أم عبدو : ضراعين ونص ....ما بيكفوا؟
الخياطة : أي بيكفوا وزيادة
ام عبدو : أي الحمد لله خفت ما يكفوا
الخياطة : أم عبدو أعملا الكمام زم ولا فلو؟
ام عبدو : لا خليه فلو أحلا
الخياطة : وأعملك هون على جنب زمّي ولا لأ؟
أم عبدو : لا بلاها هاي الزّمي
الخياطة : بدك طولا يكون قصير ولا طويل
ام عبدو : شو رأيك ماما بدك ياها طويلة ولا قصيرة؟
سوزان :حيا الله ماما
ام عبدو : خلص حجي خليلا ياها لتحت الركبة بأصبعتين
الخياطة :أي منيح هيك لتحت الركبة بأصبعتين ......لكن شوفي أم عبدو بتروحي بتنطي هلأ عالسوق قبل ما يسكر وبتجيبي ضراع تول من نفس لون القماشة اللي جايبتيها مشان أعملك هدول اللي متل الوردات المحطوطين عالكتاف والخصر
أم عبدو : أي والله صحي ليكي نسيت جيبون .....خلص هلأ منروح منجيبو ومنجي
سوزان : بس ما تتأخري خالي حبابي لأنو الخطبة بعد جمعتين
الخياطة : لا خالي شي عشر تيام انشالله بتجي بتلاقيها جاهزة
أم عبدو : يالله خاطرك حجي ....منرجع لعندك بعد شوي .....أنتي معزومة ها لا تنسي
الخياطة : ييي منتشرف والله سوزان غالي علينا........الله معكون

وبنفس الوقت ببيت أم فاروق كانت أ م فاروق قاعدة هيي وبناتا سحر و بسمة عم يتناقشوا مين بدون يعزموا عالخطبة وسجلنا هاللقطات من حكيون:
بسمة : أي وشو رح تلبسي ماما ؟
أم فاروق : والله يا بنتي عندي الطقم اللي لبستو بعرس أختك من ست شهور لأيئ وعين الله عليه
سحر : أنا بدي البس بدلة الخطبة تبعيتي وقت انخطبت لسعتا جديدة والله ...حرام تقعد بالخزانة ويا كلا العت
بسمة : أنا والله بدي أنزل اشتري جاهز من السوق لأنو ما عندي شي البسوا الله وكيلكون
أم فاروق : بسمة أومي أمي جيبيلنا شقفة ورقة وقلم مشان نسجل اللي بدنا نعزمون مشان قبل الخطبة بجمعة نتصل ونعزمون
بسمة : وين حاطين الدفاتر والاقلام ؟
أم فاروق : شوفي بجرار الكومودينة يمكن في دفتر وقلم
بسمة قامت وجابت الورقة والقلم ورجعت قعدت
بسمة : أي مين أكتب ماما؟
أم فاروق : سجلي عندك ...مرت عمك أم عصام ومرت عمك أم فواز وعمتك حياة وعمتك فوزية وعمتك غصون
بسمة : أي سجلتون
سحر : ماما وبناتون ما بدك تعزمي حدا منون؟
ام فاروق : منقلا لكل وحدة تجيب معها بنت بنت عالماشي ...بكرا بالعرس منبقا منعزمزن كلهون
بسمة : ومين كمان ؟
أم فاروق : سجلي خالتك أم أحمد وخالتك أم لؤي وخالتك فاتن مع بناتون
بسمة : سجلت ومين كمان؟
ام فاروق :استني لشوف لأتذكر......أي ...سجلي مرت خالك سوسن ومرت خالك أميمة مع بناتون
وسجلي بنات خالتي أم خالد وأم كنعان وأم حسان
بسمة : سجلت ومين كمان؟
سحر: ما بدكون تعزموا حدا من بيت حمايي؟
بسمة : أي صحي وأنا بيت حمايي كمان
أم فاروق : سجلي حمات أختك وبنات حماها وكناينها وسجلي حماتك وبنات حماكي وسلايفك
بسمة : سجلت ومين كمان؟
أم فاروق : سجلي جارتنا أم عامرهيي وبنتا وجارتنا أم صبحي هيي وبنتها
سحر : ولشو هدول ولك أمي بدك تجيبيلنا ياهون وتصمديون قدامنا
ام فاروق : أنتي سكتي ما دخلك ............سجلي بسمة أم عامر وأم صبحي
بسمة: سجلت ومين كمان؟
أم فاروق : ونحنا التلاتي ..............شوفي اجمعيلي ياهون كام مرا صاروا؟
بسمة : استني شوي .....تلاتي وتلاتي ستي واربعة عشرة مممممممممممم خمسطاعش وسبعة بيصيرو تنين وعشرين وخمس طعش ممممممممممم بيصيرا ....37 وحدة
أم فاروق : أي منيح ...نحنا قلنالا لأم عبدو عنا 40 مرا
بسمة : ايه خدي ماما هاي الورقة خليها معك .............أنا بدي قوم روح صارت الساعة 9 هلأ بيجي جوزي
سحر : وأنا كمان رايحة
أم فاروق :قاعدين لك أمي وين رايحين؟
سحر وبسمة : منجي مرة تاني ماما...........أنتي تبقي روحي لعنا ...جيبي البابا وفاروق وتعو سهرولكون شي سهرة عنا
أم فاروق : انشالله ما منستغني ..............استنوا لأطلبلكون تكسي من المكتب أحسن ما توقفوا بالشارع هيك حريمات لحالكون
سحر وبسمة : يالله .....بيكون أحسن
وطلبت أم فاروق سيارة تكسي لبناتا وراحوا عبيوتن وقعدت هيي تراجع الورقة تبعت المعازيم لحتى تشوف بركي نسياني شي حدا تعزمو ا عالخطبة................


وقبل الخطبة بثلاثة أيام كانت أم عبدو ( أم العروس )عم تحكي مع أختها أم عدنان عالتلفون وصار الحديث التالي:
أم عدنان : وشو صار معك لك أختي ؟
أم عبدو : جبنا البدلة أونت مبارح من عند الخياطة وشو طلعت ما أحلاها بتاخد العقل
أم عدنان :أي منيح ....وشوصار بالسفرة لك أختي ما اعتمدي شو بدك تساوي؟
أم عبدو : لا شلون اعتمدنا
أم عدنان: وشو رح تعملي؟
أم عبدو : يا ستي وصينا على 100 قرص صفيحة مضفورة من عند المهباني
أم عدنان : أي والله هادا صفيحتو طيبي..........وشو كمان؟
أم عبدو : بدي لف يالنجي بيتنجان وورق عنب ............وبدي أعمل شي أربع جاطات كبة مواس وكبة حميص
أم عدنان : ولشو لوشة الكبة هلأ ولك أختي والله بدها شغل كتير
أم عبدو : معليشي أختي صايرة وصايرة..........وبدي أعمل تبولة شي صدرين كبار
أم عدنان : وشو كمان ؟
أم عبدو : وصيت جوزي يروح لعند هادا اللي عند دوار الحمراء ....شو أسمو و الله نسيت ....اي معجنات الحمرا ويوصيه على برك بجبنة وبسبانغ وبلحمة.......و100 قرص بيتزا صغير
أم عدنان : ييييي لك هادا غالي ياأختي هالمحل قديش بدو يحط حقون جوزك هالمشحر ؟
أم عبدو :قد ما يطلع حقون يطلع بس ما بدي أطلع بسواد الوجه قدام الجماعة ويقولوا أم عبدو سفرة الخطبة تبعت بنتها ما كانت بتعبي العين
أم عدانان: طول عمرك صاحبة واجب لك أختي
أم عبدو : ووصينا على جاطين حلو مشكل من عند أبو اللبن وبكرا بدو ينزل أبو عبدو على سوق الحشيش من بكير ويشتريلو سحارة تفاح وسحارة برتقال وكرتونة موز وسحارة خيار
أم عدنان : والله كتير صار يا أختي
أم عبدو: وبدي اعمل شي اربع جاطات جيليه .........وسلفي أبو محمد وصى على قالب الكاتو 3 طبقات من عند الرينبو وقال هادا هدية منو
أم عدنان : كتر خيرو والله هالزلمي
أم عبدو :أي والله يا أختي ...............لكن بركي بتجي من بكرا أنتي وبناتك بتناموا عنا مشان تعاونونا الله يوفقكون
أم عدنان : أي لكن لك أختي من بكرا بكير بكون عندك
ام عبدو : خير انشالله........بدك شي أختي
ام عدنان :سلامتك الله معك

قبل الخطبة يبوم في المساء كانوا بيت أبو فاروق عم يتعشوا وكان قاعد عالسفرة فاروق وأبوه وأمو
- خلص فاروق عشاه بسرعة وقام مستعجل
أم فاروق : وين أمي عود كمل أكلك ما أكلت شي
فاروق : خلص أمي شبعت الحمد لله
وركض فاروق عالمطبخ وجاب كاسة شرب كبيرة وعباها كلها شاي وراح ركض فات على أوضتو وسكر الباب وراه
حست أم فاروق عهالحركة ونطت هيي كمان وراحت على أوضة القعدة

( عم تتساءلوا يا ترى شوفي ؟وشو القصة ؟)

فاروق راح على أوضتو مشان يحكي مع خطيبتو سوزان وأم فاروق ركضت على أوضة القعدة مشان ترفع سماعة التلفون التاني مشان تتسمع شو عم يحكي ابنها مع خطيبتو( كالعادة )
واتصل فاروق بخطيبتو وردت عليه مرت عمو أم عبدو:
فاروق : مرحبا مرت عمو
أ م عبدو : أهلين
فاروق : كيف الصحة وكيفو عمو وكيف الجميع ؟
أم عبدو : منيحين بيسلموا
فاروق : سوزان هون مرت عمو :؟
ام عبدو: أي هون دقيقة لعيطلك الها
يا سوزااااااااااااان ...سوزاااااااااااان
سوزان من بعيد : نعاااااااام
أم عبدو :تعي ماما احكي مع خطيبك
سوزان هيي سمعت كلمة خطيبة نطت متل القردة وركدت ركيد على أوضتا ورفعت السماعة وقالت لأمها:
سكري ماما عم احكي
أم عبدو : أي ماشي( وبهالوقت بتعمل حالها أم عبدو سكرت السماعة وكبست زر من زرار التلفون مشان يطلع صوت و يعرفوا انو السماعة اتسكرت )
يعني هلأ صار عنا عالخط فاروق وخطيبتو.........والمتنسطين أم فاروق وأم عبدو

فاروق : مرحبا
سوزان : اهلييين
فاروق : كيفك اليوم ؟
سوزان : والله مشتاقتلك
فاروق : عن جد؟
سوزان : أي عن جد
فاروق : طيب أديش اشتقتيلي ؟
سوزان : كتيييير ............وانت؟
فاروق : وأنا كمان.........شلون استعداداتك مشان بكرا
سوزان : والله تعبنا اليوم كانت خالتي عنا هيي وبناتا وعم نشتغل طول النهار
فاروق : الله يعطيكون العافي
سوزان : وأنت شلون استعداداتك لبكرا؟
فاروق : ماشي الحال .........بس ..........خيفان من شغلة وحدة
سوزان: شو هيي؟
فاروق : الفوتة بكرا بالخطبة عالنسوان.....والله خجلان كتير من هالشغلة
سوزان :ههههههه أي بسيطة هيي كلها ساعة زمن وبتنقضى ..........بعدين لا تنسى رح تكون قاعد جنبي
( أم فاروق وهيي عم تتسمع بتقول لحالا : ولي على قامتا ما أقواها )
فاروق : ليش هيك كأنو الصوت ضعيف شوي
سوزان : ما بعرف والله يمكن من عندك
فاروق : لا يقوم حدا رافع السماعة من عندك؟
سوزان : لحظة لأتأكد
وراحت سوزان طلعت من أوضتا وراحت عؤضة القعدة( وبهالاثناء حست أم عبدو بهالشي فتركت السماعة وكمشت المرادن وعملت حالا عم تشتغل بالصوف فشافتها سوزان وعرفت أنو مافي حدا رافع السماعة فرجعت على غرفتها)
سوزان : مافي حدا من عندي رافع السماعة
فاروق : بجوز هاي الخطوط تعباني ............أي احكيلي لشوف...
.
.
.
.
.
وهيك الى نهاية المكالمة
وتسمعت أم فاروق وأم عبدو على كل المكالمة اللي صارت بين فاروق وسوزان ( سبحان الله هالحماوات ما ببطلوا هالعادي منوب)

وأجا يوم الخطبة والعالم كلها ملتاشة ومتل ما بتعرفوا يا أعزائي يسبق الخطبة كتب الكتاب اللي بيقولوا عنا كتب الكتاب البراني ( عند الشيخ يعني ) وهوي كتب كتاب نظامي وفي عليه شهود بس غير مصدق بالمحكمة أصولا

حبكه رائعه وانت مشروع كاتب عظيم 0 لم تترك صغيره او كبيره الا وتطرقت لها 0

يعطيك العافيه 0 وتسلم الانامل 0 وسر بكتاباتك وسرد باقي المسلسل فكلنا اذان صاغيه وقلوب متشوقه 0

بـــصراحــة موضوع رائــــع وجميــــل ...


أطـــروحـــة رائعه بمعني الكــــلمة , شيء جـــديد يضــاف الى هذه البوابه الجميلة ...


سلمـــت يداك ياغالي على هذا الموضوع ..


تحـــياتي..

أشكر الإخوة الأكارم النشمي 2099،والنورس العربي لمرورهم ومتابعتهم

الجزء السادس
" يوم الخطبة "
وبعد أذان المغرب راحت سوزان هيي وأختها لعند الكوافيرة ايزابيل اللي عند دوار الحمرا مشان تعمل شعرها عندها
وبهالوقت كانوا بيت أم عبدوا عم يجهزوا الصالون مشان بدون يجو الرجال ويجتمعوا مشان يصير كتب الكتاب البراني اللي هوي ضروري مشان يقدر الخطيب يشوف خطيبتو ليلة الخطبة
وصارت الساعة تماني ونص بعد العشاء وجمعوا بيت أبو فاروق حالون هني وجماعتون وقرايبينون وراحوا لعند بيت العروس ( طبعا وبطريقون مروا لعند الشيخ اللي بدو يكتب الكتاب وأخدوه معهون
ووصلوا على بيت العروس واستقبلهم أبو عبدو بلأهلا والسهلا وكان حاضر عمام العروس وخوالها وولاد عمها وولاد خالها وجدها وحشد من الناس
وبلش كتب الكتاب بخطبة القاها الشيخ اللي بدو يكتب الكتاب ( هاي العادة متعارف عليها عنا قبل كتب الكتاب )
وبعد الخطبة جلس الشيخ وكتب العقد على الورق وأخد من تنين من الموجودين هوياتهم ليسجلهم شهود على العقد وبعدها قام الشيخ ومعه الشهود واستأذنوا من أبو عبدو ودخلوا أحد الغرف الجانبة في البيت ثم جاءت سوزان ( العروس ) ولابسة ومتسترة وجلست وسألها الشيخ :
انت سوزان بنت صلاح بنت فاطمة؟
سوزان : نعم
الشيخ : هل يا بنتي بتقبلي بفاروق ابن محمود ابن ازدهار زوجا لك على سنة الله ورسوله؟
سوزان سكتت وخجلت وماعاد تعرف شلون يطلع الحكي منها فرجع سألها الشيخ : هل يا بنتي بتقبلي بفاروق ابن محمود ابن ازدهار زوجا لك على سنة الله ورسوله؟
سوزان : نعم بقبل
الشيخ للشهود : سمعتو يا أخوان؟
الشهود : أي نعم اسمعنا
الشيخ : يا الله خدولنا طريق لنرجع لعند الجماعة
ورجع الشيخ عالصالون ليكفي كتب الكتاب
( عادة سؤال البنت قبل كتب الكتاب واجبة عندنا ولازم يكونوا الشهود موجودين ويسمعوا جواب البنت وذلك لاثبات صحة الزواج وتأكيده 100 %
وجلس الشيخ وقال : تعا يا أبو عبدو أقعد على يميني وتعال ياأبو فاروق وأقعد على يساري
وقاموا ابو عبدو وابو فاروق وعملوا متل ما قلن الشيخ
وجلسوا قدام بعض وبيناتهون الشيخ
وقال الشيخ : أبو عبدو حط أيدك بأيد ابو فاروق وقول ورايي
الشيخ : زوجت
أبو عبدو : زوجت
الشيخ : وأنكحت
ابو عبدو : وأنكحت
الشيخ : موكلتي
ابو عبدو: موكلتي
الشيخ : ابنتي سوزان
ابو عبدو : ابنتي سوزان
الشيخ : لموكلك
ابو عبدو: لموكلك
الشيخ : ابنك فاروق
ابو عبدو : ابنك فاروق
الشيخ : على مهر
ابو عبدو : على مهر
الشيخ : مقدمه 100 ألف ليرا سورية مقبوضة
ابو عبدو : مقدمه 100 ألف ليرا سورية مقبوضة
الشيخ : ومؤجله 500 ألف ليرة سورية
ابو عبدو : ومؤجله 500 ألف ليرة سورية
الشيخ : باقية في ذمته
ابو عبدو : باقية في ذمته
الشيخ : مادام عقد الزواج هذا قائما
ابو عبدو : مادام عقد الزواج هذا قائما
الشيخ : والله على ما أقول شهيد
ابو عبدو : والله على ما أقول شهيد
الشيخ يلتفت لأبو فاروق ويلقنه:
الشيخ : وأنا قبلت
ابو فاروق : وأنا قبلت
الشيخ : تزويجك
ابو فاروق : تزويجك
الشيخ : وانكاحك
ابوفاروق: وانكاحك
الشيخ : موكلتلك
ابوفاروق: موكلتك
الشيخ : ابنتك سوزان
ابو فاروق: ابنتك سوزان
الشيخ : لموكلي
ابو فاروق : لموكلي
الشيخ : ابني فاروق
ابو فاروق : ابني فاروق
الشيخ : على مهر
ابو فاروق : على مهر
الشيخ : مقدمه 100 ألف ليرا سورية مقبوضة
ابو فاروق : مقدمه 100 ألف ليرا سورية مقبوضة
الشيخ : ومؤجله 500 ألف ليرة سورية
ابو فاروق : ومؤجله 500 ألف ليرة سورية
الشيخ : باقية في ذمة موكلي
ابو فاروق : باقية في ذمة موكلي
الشيخ : مادام عقد الزواج هذا قائما
ابو فاروق : مادام عقد الزواج هذا قائما
الشيخ : والله على ما أقو ل شهيد
ابو فاروق : والله على ما أقول شهيد
الشيخ : ...الفاتحة على نية التيسير والقبول
وقرأ الجميع الفاتحة وبد ما خلصت قراء الفاتحة سمعوا الموجودين صوت الزلاغيط من جوا من المطبخ
وقام العريس وباس ايد ابوه وبوس عمو ودار وسلم على جميع الحاضرين
وبعدا دخلوا العالم عالسفرة وأكلوا واتحلوا وانبسطوا وباركوا للجماعة وقالوا السلام عليكم وراحوا
وهون خلص الجزء من الخطبة الخاص بالرجال وباقي الجزء الخاص بالنسوان

يتبع ...

الخطبة

وهيك يا جماعة خلص كتب الكتاب البراني وراحت الرجال
وبلشت هالنسوان تكفت كفت على بيت أم عبدو ( طبعا أغلبهم كان من بيت العروس ) ولسا ماكانوا جايين بيت العريس لسا وامتلا الصالون عند بيت أم عبدو لأنو متل ما بتعرفوا ( الخطبة لأهل العروس ) يعني من لاقي بالخطبة أهل العروس أكتر من أهل العريس...........
تأخرت الساعة وصارت عشرة ونص ولسا ما أجو بيت العريس وأم عبدو تدايقت من هالقصة
أم عبدو عم تحكي مع وحدة من النسوان بالعرس : شفتي لك يا خالتي لهلأ ما حدا شرّف منهون
المرا: أي والله يا خيتو ليش هيك تأخروا ؟ مافي بالعادي حدا يتأخر هيك
أم عبدو : اذا اجو بعد شوي إيمت بدا تطلع العالم من عندي ؟...الساعة 3 الصبح
المرا: أي والله ....شفتي انتي
وبهاللحظة بتوقف السيارات اللي جايبة النسوان أهل العريس قدام بيت أم عبدو ( بيت العروس يعني )
ونزلت هالنسوان وكل وحدة راسها منفوخ من فوق من تحت الشالات والايشاربات المحطوطة حط عالشعر بس ( لأنهن عاملين شعرهون عند الكوافيرات وخيفانين ما يخرب الموديل اذا حطوا الحجاب متل العادي)
وكل وحدة لابسي هالعباي السودة ( لأنو بالعادة بالخطبة بيلبسوا بدلات وطقومي مزلطة شوي )
ولا بسين كمان هالكعب العالي ( يعني أقل كعب 11 سم )
وفي ناس متل العادي جايبين معون كنادرون بالكيس مشان ما يتوسخوا عالطريق
والمكياج والزوقة على الوجوه أشكال وألوان( وشي حاطين من هادا اللي بيلمع ) ( واللي حاطا العدسات ) واللي حاطا رموش اصطناعية )..........................وشو مناظر
وصاروا يسألوا: وين صار البيت أم فاروق؟
أم فاروق : هوني هادا ليكوه اللي عالقة لمباتو
وفي وحدة ختيارة جاي متأخرة عالخطبة هيي وبنتها وقعدت تدل الشوفير عالبيت والشوفير ماعاد يعرف من وين يروح
الختيارة : طلاع من هون خيو على ايدك الشمال
الشوفير: تكرمي يا حجي.
الختيارة :ايه الله يوفقك يا ابني ويحن عليك
الشوفير وهلأ من وين خالتي؟
الختيارة : استنى شوي خيو لحتى شوف وين صرنا............هلأ نحنا وين خيو؟
الشوفير: صرنا بالقصور يا حجي
الختيارة عم تحكي بنتها : وين قالتلك أم فاروق البيت؟؟
البنت : قالت بالشارع اللي قدام مدرسة طلائع النور تالت بناي عاليسار
الختيارة : خيو طلاع من عند طلائع النور على ايدك اليسار
الشوفير: أفففففففففف استغفر الله العظيم .......................وهاي طلائع النور يا حجي
الختيارة : وين صار البيت وين صار البيت أريضة انشالله قاعدين بآخر ما عمّر الله ...........خيو يحني عليك انزيل اسألنا وين بيت (أم عبدو ) اللي عندون خطبة اليوم
الشوفير: نعم خالتي....شو تفضلتي؟ نزلو انتو دوروا عالبيت ورايي طلب لبرات حمص الله يرضى عليكي والجماعة عم يستنوني
بنت الختيارة: خلص خيونزلنا هون...............أديش بتريد؟
الشوفير: 40 ليرة يا أختي
الختيارة: يه أريضة انشالله لشو ال 40 ورقة ؟
الشوفير : هلأ جايبتيني من بابا عمرو للقصور و40 ليرة كتير...؟؟؟
الختيارة : أي والله يا خيو عم ياخدوا 35 ورقة بس بالعادي
الشوفير: اختي 40 ليرة هادا اللي عندي ........يا ناوليني يا أما هلأ برجعك عبابا عمرو
الختيارة : يه قال يرجعنا قال.اعطيه بنتي اعطيه............قريضة انشالله شو الشغلي نهيب؟
الشوفير: لا حول ولا قوة الا بالله ..............افففففففففففففف
ونزلوا الجماعة من التكسي واندلوا عالبيت ومشي الحال
واجتمعوا هالنسوان قدام بيت أم عبدو وفاتوا كلياتون ورنوا جرص الباب
ووقت انفتح الباب بلشت هالزلاغيط من على الدرج وهني فايتين على بيت العروس ووقفت أم فاروق بنص بيت العروس هيي وخواتا وبناتا وبلشت تقول:
- أووووووووووها وحلت علينا البركي
أوووووووووها والسبع مباركات
أوووووووووها واليوم خطبة عروستنا
أوووووووها وكملت بوجودكن الفرحات
وليليليليليليليليليششششششششششش
ردت عليها أم عبدو وقالت :
- أووووووووووها يويا جماعة كلكون
أووووووووها وما نسينا فضلكون
أوووووووها واليوم عنا
أووووووووها وبكرة أنشالله عندكون
وليليليليليليليليليششششششششش
ردت أم أحمد أختا لأم فاروق:
- أووووووووووووها وأم العروس الله يعطيكي
أووووووووووها والسعادة بتواتيكي
أوووووووها وعقبال فرحتك بالكمالي
أووووووووووها ومنجي منكافيكي
وليليليليليليشششششششششششش
ردت عمتها للعروس :
-أووووها وفقسنا بيضة
أوووووووووها وطلعت بصفارين
أوووووووها وكل الناس بفرحة
أوووووووووووووها وفرحتنا فيكون بفرحتين
وليليليليليلييشششششششششش
وزلغطت هالنسوان ودخلوا على هالصالون وما في غير على لسان أم عبدو: أهلين وسهلين يا ميت مرحبا تفضلي لهون عالصدر أم فاروق
أم فاروق : الله يزيد فضلك يا أم عبدو يا أم الفهم والزوق
وانفردوا هالنسوان بهالصالون وأخدوا راحتون
كانت بهالوقت سوزان عم تحط اللمسات الاخيرة لمكياجها بأوضة النوم هيي ورفقاتها وبنات عمها
سوزان : شو إجو ما هيك؟
رفيقة سوزان هدى: أي إجو شو مانك سمعاني كل هالزلاغيط
سوزان : يا ربي خيفانة ومستحية كتيرة
هدى: أي حاجتك عاد ,شو رح يا كلوكي............ليش هيك عرقتي
سوزان : والله ما بعرف ....شوبت ما بعرف ليش
هدى : استني شوي .........خدي هاي المروحة هوي فيها وخليها معك
سوزان : هلأ هيك بدي ضل عم هوي فيها قدام العالم
هدى : لك لأ يا جدبي بس وقت بتشوبي ....مشان ما تعرقي وينتزع مكياجك
سوزان :طيب هاتيها لشوف...............شو يالله ما خلصنا؟
هدى: أي خلصنا يالله قومي طلعي.
وهون بتفوت أم عبدو: ولكون شو صارفيكون ما خلصتوا؟
سوزان : يالله ماما خلصنا........اجينا
وطلعت أم عبدو هيي وبنتا (العروس سوزان ) وبنات عمها ورفقاتها وعدد من قرايبينا
وهني فايتين عالصالون قالت أم عبدو:
- أوووووووووها وحوطتك بياسين
أووووووها يا زهر البساتين
أوووووها ويا مصحف صغير
أوووووها وعلى روس السلاطين
وليليليليليلششششششششش
ردت أم فاروق من جوا :
- أووووووها واسم الله عليكي
أووووووووها وعين الله عليكي
أوووووووووها وعين الحاسد تبلا بالعمى
أوووووووووها واللي ما بيصلي عالنبي كمان
وليليليليليليليشششششششششششش
وفاتت سوزان وانصمدت على كرسي الستيل وهيي لساتا عم تهوي بالمروحة لأنها كتير شوبت
وبلشت هالعالم تطلع بهالعروس وتشؤلا من فوق لتحت ( عم نحكي على أهل العريس طبعا ) ليشوفوا ابنون مين بدو ياخد وشو نقتلوا أموا
وبلشت هالنسوان بعادتها اللي ما بتبطلها منوب وهيي الشلي والنقد والحكي والقر على هالعروس وأهاليها
وصارت هالأحاديث الجانبية بين الموجودين من النسوان:
الاولي: شفتي ولك ....حلوة هالعروس ما شبها شي
الثانية : قال حلوة قال.......شو حلاها ..........يحلي وبرا انشالله .......مانك شايفتيها زْمكِّة وطولها شبرين بعدين شوفي على هالعيون اللي الها..........صغار متل عيون الصراصير
ماشفتي خطيبة ابني ناهد ما أحلاها ؟ طول وهيبة وأكابرية وكل عين هالأد .........هاي مدري شلون حاسستا هبياني هبياني
الأولى: لا يووووووو ما كل هالأد والله عيونا ما شبن شي بعدين ليكي هالخدود ما أحلاهن شلون موردين .....انتي خطيبة ابنك خدودها سالتين وكراسي خدودا طالعة
الثانية: هلأ خطيبة ابني هيك؟ أي والله ما بتفهمي بالبنات ..........لا تشوفيها هيك ......هادا كلو من المكياج والضراب السخن اللي بيحطوه على وجوهن
وكان في تنتين كمان عم يتوشوشوا :
الأولى: شفتي يا خيتو على هالعروس شلون شايفي حالا
الثانية : أي والله شايفي .......والله هالأم فاروق ما توفقت بهالعروس لابنا ...........مبين عليها قوية
الأولى: أي والله ........لا وشو......... شايلتي مروحة وعم تهوي فيها وحاطة إجر على إجر ........الله يقرف عمرا
وكمان تنتين عم يتوشوشوا بين بعضون
الاولى : شفتي هالصالون ما أحلاه وطقم هالكنبايات مبين عليه تقيل
الثانية : أي والله والأم مبين عليها نضايفية كتير وأكابرية كتير
الاولى : شفتي أم كنعان شو ملبسي بنتا؟
الثانية : أي والله شفتي هالدلاقة الدم .......ملبستا الحفر والمزلط .......ما عيب عليها
الاولى : أي لكن يا خيتو بدا تمشيلا سوقا ......بركي حدا بيشوفا بهالخطبة وبيجي نصيبا
الثانية : ولا هديكي بنت أم فيصل شوفي الداير اللي لابستو شلون لفوق الركبة
الاولى : أي والله يا خيتو .......لا عاد حدا استحى وماعاد في عيب.....وإذا كنا هيك نسوان بين بعضنا.......ما بيجوز من الله حرام
الثانية : أي والله ...........أديش الساعة معك؟
الاولى: الساعة 11............. ليش؟
الثانية : أي ايمت بدو يجي العريس ويلبس ويروح ؟
وبهالوقت شعلوا الصبايا هالمسجلة وبلش الرقص وقاموا هالبنات ليرقصوا ورقصوا سحر وبسمة أخواتو للعريس
بعدين قامت أختا للعريس هيي وبنت خالتا أم أحمد ورقصت
وبعدين قامت أم فاروق وأم عبدو وعملولن فتلة عالماشي وراحت أم فاروق لعند سوزان( العروس ) وقالتلا :
أومي عمليلك فتلة يا عروس ريتك ما تبلي انشالله
وقامت سوزان وهيي خجلانة ورقصت شوي وبعدين قعدت وصارت تهوي بالمروحة لأنها شو بت كتير
وهوي تهوي من هون والعالم اللي قاعدين (أخل العريس ) يتزاولوا منها من هون
نطت وحدة من بيت العريس وقالت: يييه عليكون انتو و هادا الشريط اللي حاطينو أي والله ملينا منو
خدي يا بنت حطيلنا هادا الشريط
وزتت هاي المرا الشريط لعند البنت الواقفة عند المسجلة وفتحت البنت المسجلة وحطت فيه الشريط وشغلتو
واذا
بيطلع شريط لعلي الديك
وقالتلا المرا: عليي الصوت شوي حبابي............
وقاموا بنات من بيت العريس يرقصوا على أغنية على الديك ( طل الصبح ولك علوش)
وبلش هالتتصفيق والزلاغيط
وهون أم عبدو ( أم العروس ) فار الدم لراسا والجماعة وصارت تقول لحالا : يه يه يه يا سواد وجهي قدام هالعالم شو هالغناي هاي..........يه الدم يصبِّغون على هالعملي
وبعد خمس دقايق قالت أم عبدو للبنت اللي واقفة عند المسجلة: شيلي خالي شيلي والله راسنا وجعنا
هون أم فاروق بتتدايق من هالحركة وبتقول لحالا : ييييي هلأ ماعاد تعجبها هالأغاني هالبنت الباشا؟...تنزل عليها النزلة انشالله
وصارت الساعة 12 واندق الباب وبيجي العريس فاروق أفندي
وفتحتلو الباب أختو سحر وراحت رجعت عالصالون وقالت : حطو عراسكون يا جماعة إجا العريس
وحطوا هالنسوان المقدرات حجاباتون على روسون وفي بنات ما حطوا على راسون وفي بنات حطوا الحجاب حط (يعني نص شعرون مبين )
- تعقيب :في عادة عنا بالخطب أو العراس أنو في أمهات بيخلوا بناتون بدون حجاب أحيانا حتى لو إجا العريس أو أحيانا بيكون في عراس بيكون فيها مصورين وكراسين رجال , فأحيانا بتعطي الامهات بعض الحرية لبناتون بهيك مناسبات وهادا الشي غلط مع أنو الامهات بيحطوا حجابون متل العادي .....بس البنات ......وبيصيروا الأمها يقولوا .( خطي معليش هيي هالليلة وبس .....أي وشو صار يعني ؟ )
طبعا أنا عم أحكي عن البعض وليس الكل بس هادا الشي اللي عم يصير
( طبعا كلامي بينحصر بالناس المحجبين بس أما اللي ما بيحط حجاب فيصطفل هادا شيء خاص فيه والله يهدي الجميع )
المهم وقت اجا العريس قعدت هالعالم بمحلاتا وراحت أم العريس وأخواتو سحر وبسمة مشان يستقبلوه ويفوتوه ( لأنو يا حرام بيكون كتير خجلان )
أم فاروق : أهلين أمي
فاروق : في نسوان كتير جوا؟
سحر: لا ما كتير شي 70 مرا
فاروق : ولي
أم فاروق : لك شبك أمي قول الله وفوت وقول السلام عليكم وقعود محلك جنب خطيبتك
فاروق : ماشي ...........يالله روحو لنشوف قولوا الله
وبلشت أم فاروق الزلاغيط من على الباب هيي وبناتا وصارت تقول:
أوووووها وصولوا على النبي
أوووووها وزيدوا صلاتوا
أوووووها ويلي بيشوف فاروق وما بيصلي عالنبي
أووووووووها ولشو حياتو
وليليليليليششششششش

أوووووها وفاروق يا واحد
أووووووها وسوزان يا تنين
أوووووها وخرزة زرقا
أوووووها ترد عنكن العين
وليليليليليلييشششششششششش

وفات هالعريس ووجهو أحمر متل الشوندرة وقال السلام عليكم
بس ما حدا رد عليه لأنو كان صوت المسجلة أعلى ويا حرام شو خجل لأنو ماحدا رد عليه السلام
وقامت سوزان واجت على باب الصالون واستقبلت عريسها
ووقت شافا فاروق فنجر عيونو وارتخى حنكو لأنو أول مرة بيشوف سوزان بدون حجاب وبكامل زينتها وطار عقلو
أمو واقفة جمبو وقالتلوا : شبك أمي شو أول مرة بتشوفا
فاروق : بس حليانة كتير ولك يا أمي
أم فاروق : ييي تقبر قلبي هاي لأنو أول مرة بتشوفا بدون حجاب
ووصل فارق عنص الصالون محل ماقاعدة العروس وجمبا كرسي فاضي مشان يقعد العريس وإجا العريس ليقعد وإّذ بتقلوا أمو : وين بدك تقعد أمي ما بدك تلبس خطيبتك علامتا؟
فاروق أد مانو متلبك نسي العلامة بالمرة وبعدين سوزان أخدتلو عقلوا فقام وطالع من جيبتو هالعلبة المخمل الحمرا وفتحا وطالع منها العلامة
وهون بتجي أختو بسمة وبتقلوا : لحظة أخي استنى شوي
وبتركض بسمة عالمطبخ وبتجيب صينية وبتحط عليها مفرش مطرز وبترجع عالصالون وبتاخد الذهب من أخوها وبتحطوا عالصينية
وراحت دارت فيه عالنسوان وحدة وحدة مشان يشوفوا العريس شو جايب وشو بدو يلبس
( هاي العادة كانت موجودة قديما , ويمكن في ناس لهلأ ماشي على هالعادة )
ورجعت بسمة بالصينية وعطت الذهب لأخوها وبلش فاروق بدو يلبس سوزان وأول شي لازم يلبسها ياه محبس الخطبة...................

ولبس فاروق سوزان محبس الخطبة وعطاها محبس الخطبة تبعو ( اللي هوي من الفضة طبعا لأنو الرجال حرام يلبسوا ذهب) ومسكت سوزان ايد فاروق وهيي خجلانة ولبستوا المحبس بايدو اليمين
ورنت هالزلاغيط بكل الصالون
كان في ناس ما عجبون الوضع منوب واللي هيي أم عبدو (أم العروس)
أخدت أختا أم أحمد وفاتوا عالمطبخ ليحكوا
أم أحمد : ولك شبك أختي ليش هيك شاحطيني شحط عالمطبخ؟؟
أم عبدو : تنزل عليون النزلة انشالله
أم أحمد :منون هدول؟
أم عبدو : ما عرفتي مين ؟ بيت أبو فاروق
أم أحمد : يه ليش ولك أختي شو عملوا الجماعة؟
أم عبدو : شفتلي على هالعلامة اللي جايبينا؟
أم أحمد : عين الله عليها شبا ليش؟
أم عبدو : طلبنا 100 ألف حق علامة قلت لحالي بكرا بيجيبولن شي طقم رولكس من هالتقال ولا شي ماية ألماس
ولا شي بعبي العين...........شو جنزير ومترين شو هاد؟؟مين عاد لبس مترين بهالايام
أم أحمد : أي ولك أختي ماشي الحال عاد كلو ذهب...........بكرا بتبقى بعدين قبل ما تتجوز بتنزل عالسوق بتبدلون بشي أحلى
أم عبدو : بس يا خوفي ما تطلع العلامة بمية ألف
أم أحمد : يه وشو بدك تعملي
أم عبدو :بركي بعد بكرا السبت بنزل عالسوق وباخد هالعلامة معي وبسومها عند شي صايغ لأنو يمكن ما توصل لل 100 ألف
أم احمد : ايه خيتو عملي متل ما بدك ....بنتك وانتي حرة فيها
ورجعو التنتين عالصالون بس أ م عبدو كانت ضاربة بوز غير شكل عم تنشتر أشكال وألوان وما عم تحكي مع حدا
وبعد ما لبس العريس العلامة قعدوا العروسين وقامت كام وحدة مشان يرقصوا
وبلش فاروق يحكي مع خطيبتو
فاروق: حلياني ولك يا ضرصاني
سوزان : هيهيهيئئ يحلي أيامك
فاروق :تسلملي هالضحكة يا رب
سوزان : الله يسلمك
فاروق: عجبوكي الدهبات؟
سوزان :بيجننو يسلموا ايديك
فاروق :أنا لو صحلي تقلك بكنوز الدنيا ما كنت بقصر
سوزان : عجبتك بدلتي؟
فاروق : بتاخد العقل رح تاكل منك شقفة
سوزان : عنجد؟
فاروق : أي والله.,.......
اجت وحدة من اللي عم يرقصوا وقالتلا لسوزان : يالله يا عروس قومي وفرجينا رقصتك الحلوي
سوزان : عنجد خجلانة ....بلاها بلاها حبابة
فاروق: يالله قومي لشوف وفرجينا
سوزان قامت وهيي خجلانة ووجها محمر أشكال وألوان وحطولا غناية هيفاء وهبي( رجب حوش صاحبك عني) وعلوا المسجلة عالآخر
وصارت هالعالم تصفق والعريس صار يسفق لعروستو
وصارت العالم تغني مع الغناي بس صاروا يقولوا بدال رجب حوش صاحبك عني( فاروق حوش صاحبك عني )
وأجت أم فاروق وقومت فاروق مشان يرقص مع خطيبتو
وعينكون ما تشوفوا فاروق احمر وجهو وحرن وقال لأمو: خلص أمي ما بدي قوم وين بدك تقوميني قدام كل هالنسوان لأرقص؟؟؟
أم فاروق: لك أي أوم ولك أمي ما حلوة مشان خطيبتك
وهون سوزان بتجي بتشدوا لفاروق وبتخليه يقوم ويوقف جمبها
وهون فاروق احمر واصفر واخضر وهالنسوان صارت تضحك من جوات قلبها
ووقف فاروق وصار يصفق بس وما حاول يرقص منوب وسوزان صارت ترقص جمبو
وخلصوا من الرقص وأجت أم عبدو وقالت: يالله تفضلوا عالسفرة يا عرايس ( طبعا وهيي لساتا مبوزمة )
ودخل فاروق وسوزان عالسفرة العمرانة لحالون قبل ما تفوت العالم وقطعوا قالب الكاتو
وحط كل واحد قطعة بصنو وبلشوا يطعموا بعضون
فاروق :افتحي تمك لشوف.........هممممممممم
سوزان : انت كمان فتاح تمك.........هيهيهيهئئ
وبتروح سوزان بتحط كام كباي وبتجي بتقول لفاروق: دوق هدول الكبايات هدول شغل ايدي
فاروق: ممممممم ياسلام شو هالكبة هاي ....يسلموا ايديكي فعلا شي طيب
وخلصوا العروسين من السفرة وطلعوا عالصالون وفاتت هالنسوان عالسفرة وبلش السفق وطرق الصحون من هون و من هون ودارت الاحاديث الجانبية التالية بين النسوان
الاولى: ليش هيك هالتبولة مافيها حامض ولي على قامتون انشالله
الثانية : أي والله وليكي هالكبة مافيها حشوة منوب لشو هالكحتني هاي تنزل عليهون النزلي
الاولى: ولا شفتي هاليالنجي الرز تبعا مانو مستوي وعم يقرط
الثانية :أي شفتي ولا ليكي شأد جايبين قراص صفيحة مضفورة........تقولي جايبين عالعدد ...أي يكتروهون شوي
الاولى: يا خيتو مبين عليها هالأم عبدو ما بتفهم منوب
وأكلت هالنسوان وشبعت وتملت ولبسوا وقالوا خاطركون وألف مبروك انشالله
وهيك يا جماعة خلصت حفلة الخطبة اللي طالت كتير

ورح نرجع نكفي قصة هالخطبة وشو بيصير أثناء فترة الخطوبة والتحضير للجهاز

مع الشكر لصاحب القصة

واصل اخي ابو احمد 0 قصه جميله جدا يعطيك العافيه

أحيي متابعتك أخي الكريم

الجزء السابع
" فترة الخطبة وما أدراك مافترة الخطبة "

وهيك يا جماعة الخير تمت الخطبة على خير وسلام والحمد لله وانكتب الكتاب وصارت سوزان من نصيب فاروق
وبعد الخطبة لازم العريس يصير يشوف خطيبتو على طول ويحكي معها عالتلفون على طول مشان يتعرفوا منيح على بعض ويدرسوا أخلاق بعض وينبسطوا شوي بفترة هالخطبة قبل ما يجي العرس
لأنو متل ما بتعرفوا مرحلة الخطبة هيي أحلى وأجمل مرحلة بحياة المتزوجين [/align]
[align=right]

وبيوم من ذات الأيام بعد الخطبة بشي جمعة زمان قرر فاروق أنو يطلع هوي وخطيبتو سوزان مشوار

ويتفتلوا سوا متل ما بيعملوا كل العرسان بالعادة

بس كان في مشكلة

وهيي أم العروس ( أم عبدو ) اللي يمكن ما تخلي بنتا سوزان تطلع هيي وخطيبها لحالهون

شوفو شلون صارت القصة:

اتصل فاروق ببيت حماه مشان يتفق هوي وسوزان على الطلعة فبترد عليه مرت عمو أم عبدو ( كالعادة )

فاروق : ألو مرحبا

أم عبدو : مرحبتين ...أهلين فاروق

فاروق : شلونك مرت عمي

أم عبدو :لايئة الحمد لله

فاروق : وشلونو عمي وهالشباب والصبايا

أم عبدو : كلن بخير

فاروق: أي الحمد لله,...............سوزان هون مرت عمو

أم عبدو : أي هون ....عم تدرس والله بئوضتها .........عيطلك إلا ؟؟

فاروق : أي من بعد إذنك

أم عبدو : أي تكرم عينك ................ياا سوزاااان ..................ولك يا سوزاااااااااااااااان

سوزان بترد من جوا : نعم ماما

أم عبدو : ونعامي انشالله مانك سمعاني؟

سوزان : شوفي ليش؟

أم عبدو :تعي احكي مع خطيبك فاروق

سوزان بنط قلبها من محلو وبتركض حفياني وبتنسى تلبس شحاطتها وبتخطف السماعة من ايد أمها

أم عبدو : لا تطولي كتير متل مبارح ..............بدي أحكي مع خالتك أم أحمد عالتلفون

سوزان :أي ماما خلص ما بطول

أم عبدو : لنشوف

سوزان :ألو

فاروق : مرحبا سوسو

سوزان :أهلين فوفو

فاروق : كيفك يا عمري

سوزان : مشتاقتلك

فاروق: تشتقلك العافي يا رب

سوزان :أنت كيفك .؟

فاروق : أنا وقت بسمع هالصوت الحلو بصير بألف خير

سوزان : عنجد عم تحكي؟

فاروق : لكن شو

سوزان : صدقتك والله

فاروق : والله عم احكي جد..........طيب شو بدك اعملك مشان تصدقي؟

سوزان : ولا شي خلص صدقتك

فاروق : شو صار معك؟

سوزان :بشو؟

فاروق : بالمشوار اللي قلتلك عنو مبارح

سوزان : يا ربي وبركي الماما ما وافقت؟

فاروق : ليش لهلأ ما قلتيلا؟

سوزان :لا لسا......................طيب بركي قالتلي بدي روح معكون؟

فاروق : لا شو تروح معنا يستر عرضك ............ما بيكفي وقت بجي لعندكون بتقعدلي متل سنجق عرض وما منعرف نحكيلنا كام كلمة علي بعضون أنا وياكي

سوزان : شو بدي اعمل طيب؟

فاروق : دبريها بمعرفتك

سوزان : طيب اتركني أنا اتصرف وبحكي معك أنا وقت باخد الموافقة

فاروق : ماشي ........بس لا تتأخري ؟ عم استناكي على نار ها

سوزان : يا لطيف شو مستعجل ههيهيهيهئ .............خلص بهاليومين بخبرك شو بصير معي

فاروق : ماشي...........بدك شي حياتي؟

سوزان :الله معك .........مع السلامة

فاروق : الله يسلمك

وتاني يوم وسوزان قاعدة هيي وأمها بالسهرة عم يقمعو البامي فبتقول سوزان:

ماما

أم عبدو : شبك

سوزان : ما بدك تعزلي المطبخ ؟ كتير صاير وسخ هالكام يوم

أم عبدو : لا ما بدو شي عين الله عليه لسا هديك الجمعة عزلناه بعد ما صارت خطبتك

سوزان : طيب شو رأيك بكرا استعير السيبا من عند الجيران وليفلك التريات ليكي شلون متوسخين وسماكة الغبرة عليهون هالأد

أم عبدو : أنتي شو قصتك اليوم من وين أجتك هالمروة هاي ؟............هيك من الله

سوزان : لا ماما عنجد عم شوفك كتير عم تتعبي وبدي ساعدك بشغل البيت مزبوط وشيل عنك كتف

أم عبدو : ايه عملي متل ما بدك

سوزان : طيب بكرا ببلش

وهيك تاني يوم بعد العصر استعارت سوزان السيبا من عند الجيران و طلعت عالتريات وليفتون ومسحتون بلورة بلورة ولمبة لمبة وقطعة قطعة لحتى صاروا يبرئو برئ

بعدين راحت مسحت الارض وشطفت البرندات ونفضت الغبرة وغسلت المواعين اللي بالمجلى هيك لحتى هلكت يا خطي

وأم عبدو قاعدة عم تتفرج عليها وبدها تعرف شو سر هالنخوة والهمة القوية اللي نازلي على بنتها هيك فرد مرة

ولما خلصت سوزان أجت وقعدت جنب أمها وقالت: ماما

أم عبدو : نعم

سوزان : بدي قلك شغلة

أم عبدو : قولي

سوزان : خطيبي فاروق

أم عبدو : شبو بدر الدجى؟

سوزان : عازمني بكرا على مشوار

أم عبدو : شوووووووووو......اي عال والله هادا اللي كان ناقص

سوزان : يا ربي .......وشوفيها يعني ......ما خطيبي يالله؟؟

أم عبدو : خلص بدو يشوفك بيجي لهون وبيشوفك لشو الطلعة برات البيت

سوزان : حبابي ماما الله يخليك والله ساعة بس ما منطول

أم عبدو : مافي .............لك انتي مجنوني؟؟.........شو بدون يحكوا علينا العالم ؟

سوزان : شو بدن يحكوا يعني ؟خطيبي هادا وفي كتب كتاب براني صاير بيناتنا

أم عبدو :شووو...وصايرة عم تعرفي تحكي كمان

سوزان : ماما حبابي الله يوفقك يا رب هوي هالمشوار بس

أم عبدو: طيب لوين بدو ياخدك ؟

سوزان : بدو يا خدني مشوار بالسرفيس تبعو.........هيك يعني شمة هوا

أم عبدو : وبركي ماهان على أبوكي ؟

سوزان : هلأ بس يجي بسألوا

أم عبد و : اصطفلي أذا ابوكي عطاكي إذن فروحي أنا ما دخلني

ونطت سوزان وباست أمها بوسة كبيرة

وبيجي أبو عبدو بالليل وبتركض سوزان بتبوسو وهوي فايت من الباب وبتاخد منو الاغراض وبتفوتون عالمطبخ

وبالسهرة وهني عم يتفرجوا عالتلفزيون بتقلوا: بابا

أبو عبدو : نعم بابا

سوزان : بدي آخد إذنك بشغلة

أبو عبدو :شو هيي بابا

سوزان : فاروق بكرا بدو يا خدني مشوار

أبو عبدو سكت شوي بعدين قال: لوين بدو ياخدك؟

سوزان : هيك مشوار بالسرفيس تبعو هون بالبلد يعني بالدبلان وبشارع الغوطة وعطريق الوعر يعني هيك تفتيلة بس

أبو عبدو : ماشي بابا روحي بس لا تطولي ساعة زمن بس

سوزان : لا بابا ما بطول......الله يخليلنا ياك يارب

وبتركض سوزان على أوضتها وبتتصل بفاروق

سوزان : الو فاروق

فاروق: أهلين سوسو ......شو طمنيني شو صار معك؟

سوزان :مشي الحال

فاروق : يعني بكرا منروح ان شالله

سوزان : أي

فاروق : يقبرني ربك .......خلص بكرا جهزي حالك الساعة 5 المساء بمر باخدك

سوزان :وأنا عم استناك......يالله لازم سكر بدي روح نام

فاروق : وين لسا ماحكينا مع بعض

سوزان : والله هلكاني اليوم من شغل البيت وتعباني كتير

فاروق : خلص سوسو روحي ارتاحي وبكرا موعدنا انشالله

سوزان : أكيد

فاروق : ما بدك تقوليلي شي قبل ما تسكري؟

سوزان : ممممممممم شو بدي قلك ؟

فاروق : تذكري

سوزان :مممممممم أي عجزت

فاروق : ما بدك تقولي شي لخطيبك فاروق؟

سوزان : يالله منك والله بستحي من هالشغلات

فاروق : طيب خلص سمعيني ياها بس هالمرة

سوزان : ما بقدر ماعم تطلع معي

فاروق : طيب أنا رح شجعك.........أنا بحبك..............يالله قوليها

سوزان ...مممممممم........ااااااااااا...ببببب............ بحبك

فاروق : تئبشي قلبي ان شالله..........يالله سلام

سوزان : الله معك

وسكرت سوزان السماعة وتنهدت تنهيدة كبيرة وراحت نامت وهيي عم تحلم بالمشوار بكرا مع خطيبها فاروق

وأجا بكرا وجهزت سوزان حالها ولبست أحلى تياب عندها ودلقت قنينة البارفان عليها وتحمرت وتزوقت وحطت هالبياض السليماني والكحلة والمسكارة وطلعت وقفت عالبرندة وهيي عم تستنى خطيبها فاروق

وبهالوقت فاروق كان عم يلبس تيابو فلبس أحلى تياب عندو هوي التاني
ودلق على حالو قنينة البارفان بس بعدين حس انو ريحتها غريبة وإذ بتطلع قنينة الكولونيا تبع الحلاقة فبيقول لحالوا: لعما ..........هاي قنينة الكولونيا تبع الحلاقة........اي يا الله كلو عند العرب صابون

ونزل من البيت وركب بالسرفيس تبعو وشد لعند الحلاق وفات لعند الحلاق وصار هالحوار:
فاروق : سلاااام عليكم
الحلاق والموجودين : وعليكم السلاااااااااااام أهلين فاروق
فاروق : الله ريتو نعيماً يا شباب
الموجودين :الله ينعم عليك
فاروق : خيو أبو زهير بدي منك تقصلي شعري قصة غير شكل وبعدا بدي ياك تعملي سيشوار مرتب
الحلاق : أي تكرم عيونك...............شو الظاهر عندك موعد اليوم؟
فاروق : أي والله يا اب زهير..................بيني وبينك اليوم عازم خطيبتي على مشوار
الحلاق: أي تتهنى يا سيدي ...........ووين بدكون تروحوا؟
فاروق : والله ما بعرف ..........بدنا نتفتلنا شوي بهالدبلان وبشارع الغوطة وعلى طريق الوعر وشارع الخراب
الحلاق : هيك بدكن تقضوها على تفتيل؟؟؟ خدا وقعود انتي وياها بشي مطرح وحكولكن كلمتين
فاروق : أي لوين بدي روح أنا وياها ؟ مافي محل بحمص متل الخلق والعالم ينراحلو
الحلاق : تعا لدلك على محل فاتح جديد وعم يقولوا عليه شي خيلة كتير
فاروق: شو اسمو؟
الحلاق: يا سيدي اسمو أجنبي ,,,,,,,,,,,, ووولا محمد شو أسمو هادا المحل اللي عم تروح عليه انتي ورفقاتك؟
صبي الحلاق محمد : اسمو السبورت كافيه
الحلاق : ايوا .....اسمو السوبر كافيه
فاروق : ووين صاير هادا السبرت كافيه؟
الحلاق : على طريق طرابس عند اشارة فندق السفير
(( طبعا السبورت كافيه كانت بوقتها فاتحة جديد يعني من شي سبع سنين ))
فاروق : وشلون وضعو هالمحل؟؟
الحلاق : شي أوبّهة تمام .........على كيفك يعني .........وخرج عشاق وناس خاطبين شرواك
فاروق : خلص لكن رح نروح ونجرب
الحلاق: خير ان شالله...................نعيما فاروق أفندي
فاروق : الله ينعم عليك
وطار فاروق وركب بالسرفيس وطيران على بيت حماه أم عبدو مشان ياخد سوزان عالمشوار

ووقت كانت سوزان عم تستنى فاروق عالبرندة بتطلع أمها وبتوقف معها وصار هالحوار:
أم عبدو : شو لسا ما شرّف الأفندي
سوزان : لا لسا
أم عبدو: ديري بالك ولك بنتي
سوزان : من شو؟
أم عبدو : بني آدم يعني بركي قلك تعي نروح لهون ولا لهون ...........أوعك ها بقرف عمرك
سوزان : لا بس بدنا نعمل تفتيلة بالسرفيس وبس
أم عبدو : أنا عم وعيكي يا جدبي لا يقوم يضحك عليكي............بركي قلك تعي نروح لعنا عالبيت مشان تشوفي أمو ......أوعك ها
سوزان :ليش؟
أم عبدو : بركي ماكان في حدا بالبيت ويستفرد فيكي يادلاقة الشفّة
سوزان : خلص ماما لا تخافي ولا يهمك
أم عبدو : ايه ...............لنشوف

وهون بيجي فاروق وهوي عم يزمر من بعيد

وسوزان بتشوفو من فوق وبتعملو بايييييييييييييي
سوزان : بدك شي ماما؟؟
أم عبدو :متل ما فهمتك ها........ديري بالك ها............ولا تتأخري كتير
سوزان :لا ما بتأخر ..... خاطرك ماما

ونزلت سوزان وركبت جنب فاروق ووقت شافها قلها
فاروق : لك أهلين ........يا ويلااااااااااااااه شو هالريحة الي حاططتيها ؟ريحتا كتير حلوة
سوزان : وانت كمان شو هالتياب الحلوين وريحة عطرك كتير مميزة ((صارت ريحة كولونيا الحلاقة مميزة؟؟؟))
فاروق : تسلميلي يا رب....................لوين بتحبي نروح؟
سوزان : وين ما بدك

وسحب فاروق بهالسرفيس من القصور وقطع طريق حماه وطلع عالكورنيش
وهوي ماشي شغل المسجلة وحطلا لسوزان شريط لنجوى كرم مشان تروق آخر رواق
ونزلو بعدين من أشارة مدينة الملاهي عالكورنيش يسارا باتجاه الساعة الجديدة وبعدا أخدو يمينون وفاتوا بالدبلان
وسوزان مبسوطة وطاير عقلها هيي وفاروق
وقال فاروق: تاكلي بوظة؟
سوزان : أي مناكل
فاروق : لك تكرم عيونك يا عيوني
ووقف فاروق عند الرينبو ونزل اشترا كاستين بوظة أم العشرة
ورجع طلع بالسرفيس ومشيو على مهلون
وفاتوا بشارع الغوطة ووصلوا على دوار الكاردينيا وراحو عاليسار باتجاه الحمرا
وأخد فاروق طريقو باتجاه السبورت كافيه
فاروق: سوزانو
سوزان : نعم
فاروق : شو رأيك نقعدلنا بشي محل هيك حلو ونتساير ونحكي
سوزان : لا ما بتخليني الماما ............... قصدي بخاف لا نتأخر وعدت الماما ما أتأخر كتير
فاروق : لا ولا يهمك ما منتأخر
سوزان :طيب وين بدنا نروح
فاروق: في كافيتيريا كتير حلوة أسمه السبيرت كافيه هون لقدام شوي
سوزان :ايه بعرفا .......... حكولي رفقاتي بالمدرسة عليها
فاروق : خلص رح نروح لكن
ووصلوا هالعريسين عالسبورت كافيه وصف فاروق هالسرفيس ونزنلوا ودخلوا عالكافيتيريا
وقعدوا
وبعد شو بيجي الكرسون
الكرسون : أهلا وسهلا
فاروق : أهلين فيك خيو
الكرسون : شو بتحبوا تطلبوا
فاروق : شوفي عندكون؟
بيروح الكرسون بجيب المينو وبيجي بيعطيها لفاروق
فاروق صار يقلب بهالمينو ومافهم عليها لأنها كانت بالاجنبي
وعطاها لسوزان وقلها : شوفي شو بدك تطلبي
وقال فاروق للكرسون : جبلي فنجان قهوة اذا سمحت
الكرسون : تكرم والمدام شو بتحب تطلب
فاروق : آنسة أذا سمحت ............ نحنا مخطوبين ولسا ما تجوزنا
الكرسون: ان شالله ألف مبروك
سوزان بما أنها بتعرف انكليزي فقررت تطلب كابوتشينو فقالت:
سوزان : أنا بدي كابوتشينو فاروق
فاروق : خلص جبها كابوشتينو
صار الكرسون يبتسم لأنو فاروق ما قال كابوتشينو صح
وبنفس الوقت ابتسمت سوزان وقت سمعت فاروق عم يقول عن الكابوتشينو ( كابوشتينو )
فاروق اشتلق انو الكرسون وسوزان عم يبتسموا فشو قال لحالوا : يخرب بيتو عم يلطشلي خطيبتي
فقام وقف وقلو للكرسون : ليش عم تبتسملا ولا
الكرسون : عفوا أستاذ أنا ما ابتسمتلها ولا شي
فاروق : كذاب شفتك بعيني وعم تكذب كمان........ سوزان : روحي واقعدي بالسيارة لاحقك
سوزان انقطع قلبها واصفرت وصارت متل الليمونة وركدت وفتحت باب السرفيس وعدت جوا وسكرت الباب وصارت تتناوء من الشباك
فاروق كلمة منو و كلمة من الكرسون علقت بيناتون وبلش ضرب البكوس ولطش الكفوف وشلف الصحون والكراسي
وقامت هالعالم وفكتون وطلع فاروق من الكافيتيريا وهوي عم يسبسب أشكال وألوان
وسوزان قاعدة بالسرفيس وعم تقتل بحالا
وطلع فاروق بالسرفيس ووجهو ما بيتفسر
سوزان : شو صار ليش هيك وجهك وشو عملتلو للزلمي؟
فاروق : كنت بدي ادبحو واشرب من دمو............... شو قلك هالحقير وقت صار يتبسم؟
سوزان : الله وكيلك ماقال شي بس أنا كنت عم ابتسم وقت قلتلو عالطلب........... ما بعرف ليش هوي اتبسم
فاروق: هيك لكن
سوزان : الله وكيلك هادا اللي صار
(( سوزان ما حكت لفاروق ليش ابتسموا هيي والكرسون مشان ما تجرحوا لفاروق ))
فاروق : لك سوزان أنا بغار عليكي من الهوا
سوزان : عنجد؟؟ هلأ كل هادا اللي عملتو لأنك بتغار عليي
فاروق : لك أنا مستعد موت حالي مشانك
سوزان : هلأ طيب شو صار مشي الحال
فاروق: أي مشي الحال واعتذر بس بعد ما أكل اللي فيه النصيب
سوزان : أي الحمد لله خلينا هلأ نروح من هون والله كرهتو لهالمحل خلينا تقعد شو بجنينة الدبلان أحلى
فاروق :أي والله

وراحو فاروق وسوزان وكملوا مشوارن بجنينة الدبلان عند البطات

وانتهى هالمشوار المشحر على خير

يمكن طولت عليكن بهالقصة
مشان هيك إبتداء من الجزء القادم رح نبلش بالجهاز ونلحق بعدها العرس

مع الشكر لصاحب القصة

الجزء الثامن
" الجهاز "

ومضى شهرين

وقرب الجهاز

وأم عبدو بهالشهرين زمان ما هديت من التخفيق بالسواق هيي وبنتها سوزان
طبعا بدها الجهاز يكون بعبي العين وببيض الوجه قدام بيت أحما بنتها ومناها تقلعلها عينا لأم فاروق بالجهاز اللي بدها تطالعو لبنتها
عنا بحمص ( وبمعظم المناطق السورية ) الجهاز بيتألف من كل ما تحتاجه العروس من مستلزمات لبيتها من لباس وأدوات مطبخ وفرش ومتفرقات عديدة
ودرجت العادة أنو أهل العروس هني اللي بيجهزوا بنتهم وأحيانا أهل العريس هني اللي بيقوموا بهالشي
وفي ناس ( أهل العروس ) بياخدو مصاري من بيت العريس مشان الجهاز ( يعني بتصير الشغلة مشتركة بين أهل العروس وأهل العريس )
وبقصتنا هاي أم العروس هيي اللي بدها تجهز بدون ماتاخد مصاري ( حسب شور الأب أبو عبدو )
وكملت أم عبدو الجهاز تقريبا وصار لا بد من تحديد موعد الجهاز والعرس

واتصلت أم فاروق بأم عبدو مشان تستفهم منها بخصوص الجهاز ودار بيناتون الحديث التالي:

أم فاروق : مرحبا
أم عبدو : أهلين وسهلين أم فاروق
أم فاروق : شلونك أم عبدو وشلونو أبو عبدو وعبدو وهالصبايا
أم عبدو : كلن بخير بيدعوا بسلامتك
ام فاروق : الله يسلمك ويحفظك........... وشلونا عروستنا الحلوة سوزان؟
ام عبدو : لايئة والله
أم فاروق: هالمنظومة ليش ما بتتصل فيي وبتقلي شلونك يا مرت عمو ؟ ماشاطرة غير تتصل بفاروق بس
أم عبدو: يه شو هالحكي؟ أي والله لشرطلك حناكا
أم فاروق : لا يوه لا تحكيها شي..........والله بحبها من جوات قلبي..........
أي أم عبدو ........ شو شو صار معكون مشان الجهاز؟
أم عبدو : والله صرت تقريبا جاهزة يعني فينك تقولي رح خلص
أم فاروق : يه شو خلصتي؟ ماشاء الله حولك
أم عبدو : أي والله
أم فاروق :خليني شوف ابني فاروق شو صار معو بالبيت .....يمكن خلص الدهان وباقي شوية تمديدات بالمطبخ....فيمكن يخلص بهالجمعة .
ورح روح أنا وبناتي مشان نشطف البيت وننضفوا
أم عبدو: على خير ان شالله .....لكن ايمت بتحبي نحدد موعد الجهاز؟
أم فاروق : يا ستي ما هاي الاربعاء.....................الأربعاء اللي بعدا ...........شو رأيك؟
أم عبدو: أي هيك منيح كتير
أم فاروق : لكن خبري جماعتك وجهزوا حالكون عالاخير
أم عبدو: وهو كذلك
أم فاروق : يالله خاطرك خيتو
أم عبدو :الله معك

ومرو هالاسبوعين وإجا يوم الجهاز وسوزان طاير عقلا من الفرحة وأم عبدو ماعم تهدا
فمن صباح يوم الجهاز عزلت الصالون تبعها ونضفتو منيح وجابت جهاز هالبنت وحطتو كلو بهالصالون
وبلشت تجي العالم بها المسا ( من قرايبين العروس طبعا )
وصاروا يعاينو هالجهاز ويشوفوه ويمدحو ويشكروا منو ومن زوق أم عبدو
والساعة ( 9 ) بالليل أجت هالسيارات على بيت أم عبدو اللي بالقصور واشتغلت هالزمامير بهالحارة
طبعا كان سرفيس فاروق حاضر أول شي وعم يسوقو شريكو لفاروق اللي هوي ابن عمو
ومستأجرلو ( 3 ) سوزوكات وكام سرفيس من رفقاتو اللي بيشتغلوا معو عالخط
وطلعت هالشباب الطيبة على بيت أم عبدو وكان باستقبالن أبو عبدو وابنو عبدو وكام شب من قرايبينون
وبلشوا ينزلوا هالجهاز ويحطوه بالسيارات
وطلعت أم أحمد خالتو لفاروق هيي وكام وحدة وفاتت عبيت أم عبدو
وسلمت عليها وقعدوا شربوا فنجان قهوة وبعد ما خلصوا الشباب تنزيل الجهاز قامت أم أحمد مشان تنزل
وهيي طالعة من الباب مدت ايدها وسحبت مزهرية كانت محطوطة على رف جنب باب الدار وقالتلا لأم عبدو:
شوفي أم عبدو شو أخدت ها ان شالله سبع مباركات
ردت عليها أم عبدو: الله يبارك فيكي
( جرت العادة عنا بالجهاز أنو بعد ما يجو أهل العريس وياخدو الجهاز من بيت العروس بتجي وحدة من أهل العريس وبتشيل أي شي موجود ببيت العروس وبتاخدو لبيت العروس الجديد
ولازم يكون هالغرض اللي بتاخدو مالو علاقة بالجهاز / يعني من أغراض بيت أهل العروس/
وبيسموه عنا ( السرقة ) وممكن تكون السرقة مزهرية أو ابريق ماء أو شي قطعة صمد
أو شي لوحة يتتعلق عالحيط ، حتى أحيانا بتكون قطعة موكيت صغيرة ممدودة عالارض
يعني بالمختصر شوماشافو أهل العريس شي قريب منهون بيشيلوه وبياخدوه
وللمعلومية في ناس أحيانا (من أهل العروس )بيتقصدوا يحطوا شي قريب من باب البيت قصدا
مشان ياخدوه بيت العريس وهني طالعين......................
وبتلاقوا الناس بيقولوا : والله سرقنا يوم جهاز فلانة من بيت أهلها كذا وكذا
طبعا وهالغرض بيروح وبيصير مع جهاز العروس الأصلي
هيك عنا العادة سبحان الله ولا تسألوني ليش لأنو بصراحة ما بعرف
ونزلت أم عبدو وركبت بهالسيارة هيي وقرايبينها ومشيت هالسيارات وبلشت الزمامير بهالحارات وبهالشوارع
( يعني هالعادة عنا مو معقولة – يعني حاطين هالكراكيب والشراطيط بهالسيارت واللي بيسموهن الجهاز
وعم يفتلوا فيهون بالشوارع لا ويزمرولن كمان................. ما بعرف ليش)
ووصلوا السيارت على بيت العريس اللي مستأجروا بجورة الشياح ( كما سبق ذكره )
ونزلت هالنسوان من السيارات وطلعوا لفوق على بيت العريس
وبلشوا الشباب يحملوا الاغراض من السيارت لبيت فاروق
واستقبلت أم فاروق الجهاز وأم عبدو بالزلاغيط وصارت تقول

أوها ام العروس الله يعطيكي..
أوها والسعادة بتواتيكي..
أوها وعقبال فرحتك بالكمالة..
اوها وبنجي بنكافيكي..

ليليليليليشش..

وفات الجهاز عالبيت
طبعا بلشت أم عبدو بفتح الجهاز شنتة شنتة وكرتونة كرتونة وكل ما تنفتح شنتو أو كرتونة تبلش هالزلاغيط
كان جهاز أم عبدو لبنتا معقول نوعا ما يعني يخزي العين ما منقصة شي
ملاحظة: العروس سوزان غير موجودة بالجهاز لأنو جرت العادة أنو العروس ما تروح عالجهاز )
خلص فتح الجهاز وترتبت الاغراض بالخزاين وانحط كل شي بمحلوا
وخلص الجهاز وكل مين رجع عبيتو
رح تستغربوا هلأ إنو ليش مافي تفاصيل عن الجهاز أو حوارات عن الجهاز متل ما تعودتوا بهالقصة ........
بسيطة حقكن عليي رح خلي الحكي عن الجهاز للناس اللي حضروا الجهاز
وتاني يوم بتتصل أحدى النسوان واللي هيي أم فؤاد بأم ناصر اللي هيي بتكون قرايبتا لأم فاروق
وكانت حاضرة بالجهاز وبدا تستفسر منها شو صار بالجهاز وشو طالعولا للعروس
فبصير بيناتون الحديث التالي:
ام فؤاد: مرحبا أم ناصر
ام ناصر: يي اهلين ام فؤاد شلونك خيتو شو أخبارك
ام فؤاد: والله الحمد لله ماشي الحال شو أخبارك انتي ان شالله منيحة؟
ام ناصر : بخير الله يسلمك
ام فؤاد : مبارك ما عملتو خيتو......... شلون كان جهازكون مبارح؟
ام ناصر: الله يبارك فيكي يا رب وعقبال فرحة فؤاد....
والله هالجهاز مانو كل هالأد والله يا خيتو
ام فؤاد : يه ليش؟
ام ناصر: أي والله يا خيتو .... شو هالأم عبدو هاي والله طلعت قليلة فهم
ام فؤاد : يه أمانتك الله
ام ناصر : أي والله متل ماعم قلك ..... تكوني جاي وشايفي بعينك على هالجهاز المشحر
صحي ولك ليش ما رحتي؟
ام فؤاد: والله كنت ماني مبسوطة مبارح ... هيك تعباني شوي
ام ناصر: على خير ان شالله
ام فؤاد: أي احكيلي ولك خيتو شو مطالعتلها لبنتها هالمنظومي؟
ام ناصر: استني لجلس قعدتي مشان اعرف احكي منيح...........
ام فؤاد : يه مبين في حكي كتير معناتا
ام ناصر : سمعي لأحكيلك.......
هادا يا خيتو اجا هالجهاز وطالعوه وفوتوه على هالدار وحطوه بالمحرك وبالكاريدور
واجت ام عبدو وفوتت الشناتي الكبيرة اللي فيها التياب على أوضة النوم وفتحت أول شنتاي وبلشت تطالع
أم فؤاد : ايه كملي لشوف
أم ناصر: وعينك ما تشوفي هالتياب المطالعتلا ياها .. شي بكب وبيعمي الله وكيلك
ام فؤاد : وشو مطالعة؟
ام ناصر : يا ستي مطالعتلا كام داير من هدول المكسرات .... مين عاد لبسو هادا ؟؟,
بدا تطالعها لبنتها متل الست المقدرة وكام بلوز وكام كنزة صيفي وشتوي ........
بس شو ..... من وين جايبتون ما بعرف.... من البالة من البسطة .
الله أعلم..... كلو من هادا المعرق واللي عليه هالورد وهالملون والاصفر والحمر ييييييي.........
متل تياب النّوَر الله وكيلك ، ومطالعة يا ستي كام توينز (قطعتين يعني )
كلو من هادا المسفسف واللي كمامو طويلة .... ما عجبوني والله منوب
ام فؤاد: يه يه يه بحياة الله عم تحكي جد؟
أم ناصر: أي والله متل ماعم قلك.....ومطالعتلا شي 10 جواز كنادر كلو من هادا اللي بيلمع وعليه هالبهرجان ....
تقولي بدها ترقص فيهون
ام فؤاد: هههههههههههه
أم ناصر: لا وشوفي هالكنادر كلن كعب 11 مع انو بنتها مانا قصيرة والله .... فلشو هالكعب العالي ما بعرف
ام فؤاد : أي وشو كمان
ام ناصر: يا ستي ومطالعتلها كام طقم وروب سهرة ..... هدول ها يعني ماشي حالون ، ما اشبون شي
ومعون شي ست سبع جزادين بس مانن جايين عكسم هالطقومي والرواب ...... كل شي شكل الله وكيلك
أم فؤاد: أي وشو مطالعة كمان؟
أم ناصر: ومطالعتلا كام تنورة من هدول القصار وكام كنزة قطن متل تبعوت هدول البنات النص كم
واللي على أد الجسم ........
شي مسفلئ وشي مزلط وشي حفر .... شي بيفجج الراس الله وكيلك ........
قال شو ..... هدول بدا تلبسون بالبيت لأنو شفتي بنتها ما بتطلع بدون حجاب
ام فؤاد: ها ها ليكي الضرصاني ليكي ....الله يهديا يا حق .... اي وشو كمان؟
ام ناصر: مطالعتلا كام تفريعة من هدول الرخاص تبعوت البسطات أم ال75 ...قال هدول للبيت...........
ولك اشتهيتا تكون مطالعة شي كام جلابية أو كام عباية من هالتقال .... مافي هيك شي الله وكيلك

أم فؤاد: يه والله شي بسود الوجه .... اي وشو كمان ؟
أم ناصر: ومطالعتلا معون كام بيجاما من من هدول القطن وكام شحاطة
ومطالعة للمطبخ طقم طناجر وكام طقم فناجين قهوة وصحون الايشاني وشوية معالق وسكاكين
ام فؤاد : يه بس؟
ام ناصر: وكام مزهرية وكام قطعة صمد وثريتين وقال على أساس جايبتون من عند الزحلاوي ....
بس وقت بتشوفيهون بتقولي هدول جايبتون من سوق المسقوف
لا وحزري شو ؟...... مطالعتلا كام شقف زريعة تبعوت ورق الصالون ....
مين عاد طالعوا هادا بالجهاز ولك أختي آآآآ قوليلي بس
ام فؤاد : يه العين تطرقا ان شالله ...... كل الجهاز هيك؟
ام ناصر : أي والله يا خيتو شي بكب وبيعمي كلو كراكيب مالا طعمي حبالتي حقو .
لك اشتهيت شفلي شي سجادة تقيلة أو شي بدلة سهرة تقيلة أو شي طنجرة ضغط للمطبخ
أو شي طقم حرامات مقبل أو شي شنتاية سامسونايت للصيغة والذهب.....
ما شفت شي يعبي العين ..... والجهاز كلو على بعضو ما عجبني والله يا خيتو
هادا غير الضنا اللي عم ترمح بين أجريكي هون وهون الله وكيلك انطوش راسي
ما عرفت ايمت خلص هالجهاز المشحر وأخدت تكسي ورجعت عبيتي
ام فؤاد :يه بكرا لكن بعد العرس اذا رحنا عالمباركة منشوف عاد شو ملبستا لبنتها ومنشوف شوي من هالجهاز
أم ناصر: أي والله على خير ان شالله
ام فؤاد :بدك شي خيتو؟
ام ناصر :سلامتك...خلينا نشوفك أماني ها
أم فؤاد : ان شالله ما منستغني ...خاطرك
ام ناصر :الله معك مع السلامة

(هادا الحكي دار بين جماعة من أهل العريس وعطو رأيون بالجهاز , هلأ شوفو شلون بينظروا أهل العروس للجهاز كمان بنفس الطريقة السابقة)
تاني يوم بتفوت أم هيثم جارتها لأم عصام أختا لأم عبدو بدها تصطبح عندا ويشربوا فنجان القهوة ويحكوا عن الجهاز فشوفوا شلون صار الحديث:
دقت أم هيثم الباب الصبح على أم عصام وفتحتلا أم عصام وهيي عم تحط عراسا الايشارب
أم عصام : مين ؟
ام هيثم :انا ولك أنا أم عصام
أم عصام : يه أهلين شلونك أم هيثم
أم هيثم: ولك صرلي ساعة عم دق عالباب شو نايمين لهلأ؟
أم عصام : أي والله يا خيتو مبارح ما رجعنا عالبيت للساعة 3 الصبح.....تفضلي فوتي
أم هيثم : يزيد فضلك....مبارك ما عملتوا .... شلون كان جهاز بنت أختك مبارح؟
أم عصام: الله يبارك فيكي والله لايئ عين الله عليه .........
استني لفوت أعمل القهوة وجاييتك تفضلي على أوضة القعدة
وراحت أم عصام عالمطبخ و عملت فنجانين قهوة ورجعت على أوضة القعدة وقعدت هيي وجارتا يحكوا:
أم عصام : والله يا خيتو شو جهاز وشو جهاز طلع........
شي بياخد العقل ..... كامل مكمل ماناقصوا شي
أم هيثم : يه أي تتهنوا والله والله سوزان بتستاهل وبتتقل بالذهب ......الله يخليلا هالام
أم عصام : الله يسلمك ويحفظك
أم هيثم : أي هاتي لنشوف شو مطالعتلا أختك لبنتا؟
أم عصام : ييييي قولي شو ما مطالعة ..... الله وكيلك يا خيتو حطوا هديك الحسبة حق هالجهاز وكلو من أحسنوا
والله وصهري أبو عبدو ما قصر يا خيتو حط كومة مصاري على جهاز بنتو
أم هيثم : الله يفرحوا فيها يا رب ويتمملكون على خير ....... اي احكيلي هاتي لنشوف
أم عصام : شو بدي احكيلك لأحكيلك ...... عدي معي :
أول شي التياب ما رح احكيلك من الدواير شي سبعة تماني ومن البناطلين شي سبعة تماني هادا غير البلايز والتوينزات والقمصان والبلوزات والكنزات .....
كومايات كومايات الله وكيلك وكلو من الغالي
أم هيثم :يييي تتهنو والله وشو كمان أختي أم عصام
أم عصام : عينك تشوفي الكنادر والشحاطيط الله وكيلك وقت حطيناهون بكومودينة الكنادر ما ساعت
هادا غير مفارش التخوت واللمبديرات والبرادي والمخدات ......
ولك شوفي بس طقم مفارش التخوت الحرير المشكوك والمطرز الله وكيلك لبنت وزير ما طلع هيك
أم هيثم : ييي ماشالله
أم عصام: ييي يا خيتو عينك تشوفي طقومة السفرة والايشاني والصحون والطناجر وطقومة المعالق والشوك والسكاكين
كلو راحت جابتو أختي من عزاز الله وكيلك..... هادا غير طقومة السهرة اللي نزلت عالشام اشترتون
... والحرامات اللي وصت عليهون من حلب
أم هيثم : ها ها يخزي العين وشو كمان خيتو؟
أم عصام: شوفي البقج اللي انحط فيهون الجهاز وانضب بالخزاين كلو من هادا المطرز والمشكوك
شي بياخد العقل الله وكيلك ، وطالعتلا أختي كام شقف زريعة للصالون بياخدو العقل ....
عينك تشوفي قال ما عجبون ..........
نطت وحدة جاي من عندون وقالت:يه هادا لشو مطالعينو ؟ عجبك ولك يا خيتو
أم هيثم : يي العين تطرقا ان شالله شو بيفهمون....
اي والله الزريعة والخضار روح بالبيت ولك خالتي
أم عصام: شو بيعرفني ولك يا خيتو..... أصلا أسافتا بنت أختي يعطوها لهيك عالم
بس شو بدو يحكي الواحد .... النصيب
أم هيثم : أي والله نصيب هادا يا خيتو..... ودخلك شو جايبي كمان؟
أم عصام: شوفي الخلع اللي مطالعتا أختي .... مطالعة لأم فاروق وبناتا كل وحدة قطعة قماش من هالتقال
ومطالعة للعريس بيجاما وشحاطة من التقال وشوية غيارات
ومطالعة لأبو العريس بيجاما شتوية جوخ الله وكيلك..........
لكن أختي أم عبدو فهمانة وبتعجبك ما قصرت مع الجماعة الله وكيلك... بس بدك حدا يقدر ....
عينك تشوفيون شلون زاغوا عيونون وقت شافوا البدلة السودة اللي مطالعتلا ياها أختي لبنتا سوزان ...........
يي يا خيتو شي بياخد العقل .... الله وكيلك كلفتا لأختي 8 الاف
أم هيثم: أماني بضهرك عم تحكي عنجد؟ 8 تالاف؟؟
أم عصام : ولك أي
أم هيثم : ماشاء الله والله شهيتيني شوف هالجهاز
أم عصام : انتي التاني الله يصلحك ليش ما رحتي؟
أم هيثم : والله يا خيتو كانت سلفتي عندي وما طلعت للساعة 11 بالليل قلت ماعاد لحق
أم عصام : والله يا خيتو جهاز وجهاز شو بدي عدلك لعدلك .........
الحكي ما متل الشوف يا خيتو .... خمس سيارات ما ساعتو .... شي كتير كتير
أم هيثم : بكرا بالمباركة ان شالله بتفوتيني عالبيت لجوا لأتفرج عليه
أم عصام : أي لكن لكن تكرم عينك
أم هيثم : وايمت العرس ان شالله؟
أم عصام : بعد بكرا وعليكي خير.........ت فضلي ها لا تنسي
أم هيثم : لا يي بدي اجي لكن ..... منشوفك هنيك معناتا
أم عصام : ان شالله .......
أم هيثم : يالله خاطرك بدي قوم لحق اطبخ واعمل البيت
أم عصام: لك عديلك شوي لسا ما شفناكي
أم هيثم : يبعتلك الهنا الباب عالباب ايمت ما بدك بتشوفيني
أم عصام : يه أي والله
أم هيثم : خاطرك
أم عصام : مع السلامة

وهيك يا جماعة خلصنا من الجهاز وبقي علينا العرس وتحضيراتو

الجزء التاسع
" ليلة العمر 1 "
وإجا يوم العرس
اليوم اللي بيستناه كل العرسان
ليلة العمر , ليلة السعادة , ليلة الحب والوفاق , ليلة ولا ألف ليلة وليلة
بليلة العرس حكا فاروق مع سوزان آخر تلفون بيحكوه الخطيبين بين بعضون قبل يوم العرس
ومتل ما بتعرفوا يا أحبائي هادا التلفون بيكون إلو نكهة خاصة وعذوبة غير شكل
( طبعا اللي متجوز أكيد بيعرف هالشي واللي ما تجوز لسا رح يجيه هيك يوم ويحس فيه , ومنهن أنا - كاتب القصة يعني )
رح جيب مقطع من حديث سوزان مع فاروق عالتلفون ليلة العرس طبعا مشان ما نطول عليكون
- سوزان قاعدة بالتخت ومتغطاي بالحرام ومفوتة سماعة التلفون تحت الحرام وعم تحكي
- فاروق قاعد بالصالون وطافي اللمبة وجنبو كاسة شاي كبيرة وصحن السيجارة مليان جنبو وعم يدخن سيجارة وعم يحكي عالتلفون
- طبعا مافي داعي نقول أنو أم فاروق وأم عبدو كل وحدة رافعة من عندها السماعة وعم تتسمع عالحديث الدائر
فاروق: أي سوزانو وين راح صوتك؟
سوزان : هون موجودة بس بردانة كتير
فاروق : ليش مانكون مشعلين الصوبيا؟
سوزان : لا انطفت , يمكن خلص المازوت تبعها مشان هيك تغطيت بالحرام
فاروق : من بكرا ورايح ان شالله كل أيامك رح تكون دافية
سوزان : عنجد؟؟؟؟؟؟؟؟؟
فاروق : لكن عنجد , خلص يا سوسو هانت يعني كلها كام ساعة ومنصير سوا على طول
سوزان : فاروق
فاروق: يا عيون فاروق وقلب فاروق وروح فاروق
سوزان : خيفاني
فاروق : من شو خيفاني يا عمري؟
سوزان : من بكرا
فاروق : هلأ حدا بكرا عرسو ورح بدو يضل مع حبيبو على طول بيكون خيفان؟
سوزان : لك لا يا الله منك مو هيك قصدي
فاروق : لكن شو قصدك يا قلبي؟
سوزان : ما بعرف بس حاسي حالي بمنام ؟ بعدين زعلاني على بابا وماما وأخواتي شلون بدي اتركون على طول
فاروق : معليش سوسو بكرا بتتعودي و هاي سنة الكون بعدين ليكي بيتنا قريب من القصور يعني فركة كعب بتكون أمك عندك أو انتي بتكوني عندها
سوزان : يالله يا فاروق , بحياتي ما شفت أرق وألطف منك
فاروق : الله لا يحرمني منك يا رب...........
سوزان : قلي هلأ , شو شكلا السيارة اللي بدك تطالعني فيها بكرا؟
فاروق : لك أحلى سيارة لعيونك ............سيارة رفيقي عمار مازدا 929 لونها أزرق بتطير العقل وباخخها جديد طالعة وكالة بكرا المسا بدو يروح يزينها ويجهزها
سوزان : والصالة حلوة؟
فاروق : لكن يا عيوني , صالة نقابة المعلمين اللي بالغوطة ورا شعبة التربية , أحلى صالة بحمص الله وكيلك
سوزان : بس بيقولو في أحلى منها
فاروق : لا أحلى ولا شي هاي أحسن وحدة , صدقيني لأعملك عرس ما انعمل بحمص كولاياتا
أم فاروق وهيي عم تسمع بتقول لحالها: هلأ صالة النقابة ماعاد تعجبها وتعجب أهاليها ؟؟؟ تروح تشوف أختها اللي عملولا عرسها بأرض الدار تبعت بيت حماها , ما بيكفي استأجرنالك صالة أنتي وأهاليكي ؟؟
كمان أم عبدو وهيي عم تتسمع بتقول لحالها : ولي على حظك المشحر يا بنتي , مالقوا غير هالصالة يعملولك عرسك فيها ؟؟؟ قلة صالات بالبلد ............ اي يدفعولن شوي زيادة ويعملولك عرسك بشي صالة مقبلة ؟ الله يهدك يا أم فاروق شو قوية , كلو شغلك وجئك ولوصك هادا
سوزان : آآآآآآآآآآآآآه ( تثاؤب )
فاروق : ليش عم تتاوبي؟ شو نعستي؟
سوزان : أي والله , شفت صارلنا تلت ايام ما هدينا
فاروق : طيب حبيبي روحي نامي مشان بكرا تكوني مصحصة عالآخر
سوزان : يالله وأنت روح نام كمان مشان ما تجيني بكرا عالعرس وعيونك دبلانة
فاروق : أنا نام ؟ لك من وين بدو يجيني نوم وبكرا يوم هنايي وسعدي مع حبيبة قلبي
سوزان :ههههه يالله منك خلص بئا,,,,, يالله روح نام ,,,,, تصبح على خير
فاروق : وانتي من أهلو يا روحي, ............ما نسيتي تقوليلي شي؟
سوزان : ييي علينا , بكرا بقلك يها لتمل منها
فاروق : بدي اسمعها منك آخر مرة ونحنا خاطبين
سوزان : ليش شو فرقت ؟
فاروق : فرقت كتييييييييييييييييييييييير
سوزان : بحبك
فاروق : قوليها كمان مشان الله
سوزان :بحبك بحبك بحبك
فاروق : لك يقبرني الله اللي خلقك يا حبيبتي .......وأنا كمان بحبك
أم فاروق وهيي عم تتسمع بتقول لحالها : حبك برص انشالله
أم عبدو وهيي عم تتسمع بتقول كمان : يه رح ياكلها للبنت عالتلفون أريضة اللي تئرضو انشالله ماعاد يستنى لبكرا؟
فاروق : باي حبيبتي
سوزان : باااي

وسكروا الأربعة السماعة وراح كل واحد على تختو مشان ينام ويحلم بيوم بكرا شو جايب معو

وإجا يوم العرس
وبيت أم فاروق وبيت أم عبدو ملتاشين لوشة إلها أول ما إلها آخر
رح نحكي شوي عن تحضيرات بيت العريس وبيت العروس ليوم العرس بس كل مين لحال

بالنسبة لبيت أم فاروق :

- أم فاروق وبناتا راحوا بعد العصر لعند الكوافيرة مشان يعملوا شعرون ( ما رح قول شو أسمها الكوافيرة مشان ما تقولوا عم أعملها دعاية ) المهم إجا دور بسمة بنت أم فاروق فقامت وقعدت عالكرسي تبع الكوافيرة
الكوافيرة : أهلين وسهلين
بسمة : أهلين فيكي
الكوافيرة : شلون بتحبي أعملك شعرك؟
بسمة: والله ما بعرف شو رأيك انتي ؟ يعني شعري شو بيلبقلو؟
الكوافيرة: شو رأيك أعملك شنيون
بسمة: شلون بدك تعمليه؟
الكوافيرة: رح ارفعلك ياه من ورا ولفلك ياه لجوا وثبتلك ياه بالبكل والفكساتور ومن قدام رح اعملك الغرة لفوق وخليها عالية شوي ورح جعدلك السوالف , كتير حلو بيطلع
بسمة : هيك قولتك
الكوافيرة : أي لكن هيك دارج هالايام
بسمة : يي بس ما بدي روح عالعرس لاقي كل العالم عاملة متلي , بعدين لا تنسي أنا أخت العريس فلازم يكون موديل شعري حلو, ولا شو رأيك ماما؟
أم فاروق: أي أمي لكن , بس أنا رأيي تعمليه متل ماكانت عاملتو بنت جارتنا أم حازم وقت حضرنا مباركتها
بسمة : لا ماما هداك الموديل ماعاد حدا عمل متلو..........خلص خلص اعمليلي متل ما قلتيلي
الكوافيرة: اوكي
وعملت الكوافيرة الموديل لبسمة وطلع كتير حلو
وقامت بنتا الثانية لأم فاروق سهير وقعدت عالكرسي وقالتلا لكوافيرة: أنا بدي ياكي تقصيلي شعري كاري
أم فاروق : يه ليش بدك تقصيه ولك بنتي ؟ خليه هيك طويل والله أحلا
سهير: لا , بدي غير الموديل ورفقاتي قالولي إنو كتير بيلبقلي الشعر الكاري
أم فاروق : ولك شو بدون يحكوا عليكي العالم هلأ بالعرس , بيقولو ليكو أختو للعريس طالعة متل حسن صبي
سهير : أي يحكوا اللي بدون ياه , ماما أنا هيك عاجبني
أم فاروق : تصطفلي
وقصت سهير شعرها كارو وعملت سيشوار
وبعد ما خلصت سهير إجا دور أم فاروق لتعمل شعرها فجلست عالكرسي وقالت للكوافيرة :
خيتو شوفي شو رح قلك، سشوريلي شعري متل العادي يعني ما بدي موديل معين واذا عندك من هادا البخاخ اللي بيلمع بخيلي شوي على شعري
بسمة : يه يا أمي لشو هادا اللي بيلمع بدك تحطيه على راسك ........شو بدون يحكو علينا العالم؟
أم فاروق : انتي سكتي شو بيفهمك
سهير : أي تركيها تحط اللي بدا ياه , عرس هادا حبيبتي بعدين أمك من زمان ما عملت شعرها هيك شي موديل حلو
وعملت أم فاروق شعرها وبختلها الكوافيرة من البخاخ اللي بيلمع وصار شعر أم فاروق عم يلمع لمعان غير شكل تحت ضو التريا

وخلصوا الجماعة من عند الكوافيرة ورجعوا عالبيت ولبسوا تيابن استعدادا للعرس
وكان لبس الجماعة كالآتي:
- أم فاروق لبست طقم لونو نيلي وعليه على صدرو ألماسات صغار مشكوكين على شكل وردة
- سهير لبست تنورة سودة طويلة وفوقها توينز كمامو شيفون ولونو أسود ومشكوك بالسيلان والبرق على صدرو وكمامو والبادي تبعو لونو أبيض
بسمة : لبست تيور لونو بيج وطراف كمامو وقبتو لونن بني
وطلعوا الجماعة وراحوا على صالة النقابة مشان يبلشوا يستقبلوا الناس الجايين عالعرس

بالنسبة لفاروق:
طبعا فاروق بعد العصر فات عالحمام تحمم وطلع ولبس تيابو وراح لعند الحلاق صاحبو وحلق شعرو وحلق دقنوا وعمل سيشوار ورجع عالبيت ولبس البدلة السودة اللي اشتراها من عند (.............) ( مشان ماتقولوا عم أعمل دعايات ) وتعطر ولبس الكندرة الجديدة وقعد بالصالون هوي وأبوه ليستقبلوا الرجال اللي بدون يجو على سهرة العريس

بالنسبة لبيت أم عبدو :

سوزان عم تنط هون هون مانا عرفاني شو بدها تساوي وعم تقول:
وينا بدلتي البيضا .؟ ليش لهلأ ما إجت من عند الخياطة ؟...... وين كندرتي هلأ حطيتا هون؟؟؟..... وين حطيتي العلامة تبعيتي ماما؟؟.......... ليش لهلأ ما أجت بنت عمي إيمان ؟ بدي ياها ضروي ؟ ماما حميتي الحمام بدي فوت أتحمم ......... ماما اتصلي بخالتي أم عصام وقوليلا تجي هيي وبناتا بسرعة.......... يا ربي أديش الساعة هلأ ؟؟.......... لا نقوم نتأخر!!
أم عبدو : ولك بنتي شبك ؟ , طولي بالك ليش هيك متلهوجي . اقعدي كنيلك شوي هلأ بيجو الجماعة, علامتك جوا عندي بأوضة النوم عالشوفنيرة وهلأ بتجي البدلة من عند الخياطة

رن الجرص

وركضت سوزان متل المجنونة وفتحت الباب وإذ إيمان بنت عمها لسوزان عالباب
سوزان : يقطع عمرك ليش لهلأ ؟
إيمان : ما لحتى لقيت صيدلية فاتحة وجبت من عندها الاغراض
سوزان : أي تعي يالله نفوت على أوضتي
أم عبدو: أهلين خالي إيمان كيفك ؟
إيمان : أهلين مرت عمو , الحمدلله ماشي الحال
أم عبدو: وينا أمك خالي ليش ما أجت معك؟
إيمان : عم تلبس هلأ بتجي
وسحبت سوزان إيمان من أيدها وفاتو على أوضة النوم وسكروا الباب وراهن بالمفتاح
وبعد نص ساعة طلعوا من الأوضة
وقعدت إيمان بأوضة القعدة تستريح شوي من العمل الشاق في تجهيز العروس لليلة العرس
ودخلت العروس لتتحمم حمام العرس
وطلعت سوزان من الحمام ولبست تيابها وراحت هيي وايمان لعند الكوافيرة نفسها اللي راحو لعندها وقت الخطبة
وعملت شعرها ورجعوا عالبيت بسرعة
وكانت البدلة البيضا بوقتها إجت من عند الخياطة فدخلت سوزان على غرفتها ولبست البدلة البيضا تبعت العرس وفاتت إيمان وأم عبدو وأم عصام مشان يحطوا الماكياج على وجه العروس وشوفوا شو صار.........
أم عصام : وينا علبة الزوقة؟
أم عبدو : ليكيها أختي هون
أم عصام : أعطيني لشوف المايعة
أم عبدو: خدي أختي
سوزان : لا تكتريلي كتير من المايعة خالي بعدين عيوني بيدمعو
أم عصام : ولا يهمك خالتو
وحطت أم عصام قلم الكحلة المايعة على عين سوزان وسكرت سوزان عينها وسحبت أم عصام قلم الكحلة هديك السحبة ففاتت كل الكحلة بعيون سوزان وسحبتلا ياها لبرا وشطتها شط لفوق
سوزان : أي أي وقفي وقفي خالي , فوتي الكحلة كلها بعيوني
أم عصام : فتحي عينك ,........ فرجيني لشوف....... أي لا مافيهون شي عين الله عليهون
و حرحروا عيون سوزان واحمروا ودمعوا وصارت سوزان
إيمان: وقفي لحطلك المسكرة
أم عصام : وينا البودرة تبعت الوجه ؟........ هاتي أختي هاتي لنحطلها شوي خلي خدودا يوردو
إيمان : اعطيني قلم الحمرة من جنبك
أم عصام : مسكي إيمان هادا القلم وحدديلها شفايفا
أم عبدو: ولك أختي حطيلا شوية بياض سليماني خليها تبيض شوي
أم عصام : أي هاتي لنشوف لنحطلها شوي

وهيك ضلوا عم يشتغلوا بزوقة هالعروس شي ساعة..... بس شلون طلعت بالآخر....... من تحت إيدين الجماعة... شغلي كبيري

وبعد الماكياج حطت الطرحة على راسها وثبتولا ياها بتاج ألماس اصطناعي صغير ودلقت على حالها نص قنينة بارفان
ولبست الكندرة البيضا اللي كعبها 11 سم وراحت وانصمدت بالصالون
وبلشت العالم اللي من أهل العروس تكفت كفت لبيت أم عبدو والكل عم يستنوا سيارات بيت العريس لتجي وتاخدهون عالصالة
والمسجلة شغالة والزلاغيط عم تلعلع ببيت أم عبدو

بهالوقت كان العريس عم يقضي أحلى اللحظات هوي وأبوه وأخواتو وولاد عمو وولاد خالو ورفقاتو وقرايبينو
بسهرة حضر فيها مطرب حمص المعروف أبو مروان الطش وفرقته وبحضور فرقة السيف والترس والعراضة المعروفة في مدينة حمص
لعلمكون أبو مروان بكون رفيقو لأبو فاروق الروح بالروح وحلف يمين إلا ما يجي ويغني بسهرة عرس فاروق ابنو لصديق عمرو
واللي جاب فرقة العراضة و السيف والترس هوي ابن عمو لفاروق وشريكو عالسرفيس ( كنقوط يعني )
وغنى أبو مروان الطش ورقص العريس ورقص أبو العريس ورقصوا المدعويين جميعا

ووقت صارة الساعة 10 ونص قام ابن عمو للعريس وقال : يا جماعة الخير ...على حب النبي اللي عندو سيارة يتفضل معنا بدنا نروح نجيب العروس من بيتها والباقين يقعدوا يكفوا السهرة لأنو نحنا راجعين

وقامت الشباب الطيبة اللي عندن سيارات (أو بالأحرى اللي مستأجرين سيارات ) ونزلوا وركبوا بسياراتون
وشوفوا شو كان موكب سيارات العرس
سيارة العروس مازدا 929 لون أزرق


سيارة مرسيدس 280 لرفيق ابن عمو لفاروق
سيارة بيجو 504 بيضا ء اللون لرفيقو لفاروق ( طبعا هاي السيارة راحت جابت أم فاروق وبنتها سهير من الصالة مشان يروحوا ويجيبوا العروس من بيتها مع العريس
وطبعا فرقة العراضة كانت جاي معون أكيد
وانطلق موكب السيارات عم يزمر بهالشوارع هيييييييييييك لوصل لبيت العروس
واشتغلت الزمامير بالحارة
وانمدت الروس من عالبرندات من بيت أم عبدو وطلعت الجيران من البنايات المجاورة لحتى يتفرجوا شلون جاييين بيت العروس ياخدوا العروس
نزل فاروق من السيارة المازدا وكانت أمو وأختو واصلين على بيت أم عبدو وعم يستنوا وصولو
ونزلت فرقة العراضة وعملتلوا عراضة لفاروق على باب مدخل بناية أهل العروس قبل ما يطلع لفوق
ومن ما يقال في العراضات:

صلوا على محمد
مكحول العين
نير وغضير
وعادينا
الله عليه

وشنغليلي شنغليلي . الله يعينو على هاليلة ومن هالليلة وصارلوا عيلة
وعريس الزين يتهنى
يطلب علينا ويتمنى
يطلب الروح لأديلو
والروح أغلى ما عنا
وعريس الزين ما بيعك
لو جبلي تمر خالي
وهي ويالله وياماشالله

ياسباع البر حومي
اشربي ولاتعومي
اشربي من بير زمزم
زمزم عليها السلام
و ياسلام اضرب سلام

وبعد ما خلصت العراضة طلع العريس لفوق على بيت عروستو بالطابق التاني
واستقبلتو أمو من عالباب بالزلاغيط واجت مرت عمو أم عبدو واستقبلوا وفوتوا عالصالون وكانت سوزان بانتظتاروا وهي بأبهى حلة
ووقت شافا فاروق عجبتو كتير وطار عقلوا وابتسامتوا صارت شبر على وجهو وهيي بالبدلة البيضا والطرحة على راسه
وجلس فاروق جنب خطيبتو وجابولو القهوة فورا
ودار بين فاروق وسوزان وهني عم يشربوا القهوة الحوار السريع التالي:
فاروق : يا لطيف شو حليانة
سوزان : تسلم هادا من زوقك
فاروق : طالعة متل الملاك بهالبدلة البيضا
سوزان: وأنت بتجنن كمان....... غير شكل طالع اليوم
جلس فاروق قعدتو ونفش حالو وقت سمع هالكلام وأنّش
فاروق: مبسوطة ؟ ولا لساتك خيفاني؟
سوزان: يعني ....... هيك وهيك
فاروق: يالله خلينا نقوم نمشي
سوزان: يالله
وغمز فاروق أمو أنو بدو يقوم لازم يمشو
أم فاروق: يالله يا جماعة لبسوا بدنا نمشي......... وينك أختي أم عبدو يالله تفضلي
وقاموا الجماعة ولبسوا المانطيات وحطوا على راسون ومسك فاروق عروستو من ايدها وقاموا يمشو
وهون بهاللحظة أم عبدو ركضت عالمطبخ وصارت تبكي
ولحقتها أختها أم عصام وكام وحدة من قرايبينها وصاروا يواسوها
أم عصام: ولك أختي ليش عم تبكي...... فوق ما تفرحي هاي بنتك كبرت وبدها تتجوز وتروح مع عريسها
أم عبدو: والله ما بإيدي يا أختي والله زعلانة شلون بدها تتركني هالضرصاني والله رح اشتقلها كتير
وحدة من المعازيم : طولي بالك أم عبدو .... مسحي دموعك ويالله تعي نمشي ...... هلأ اذا شافتك بنتك عم تبكي والله بتقطعيلها قلبها
أم عصام : يالله أختي هاي سنة الكون .... الله يحسن أيامها يارب....... ادعيلها أختي ادعيلها
أم عبدو: الله يوفقها ويحميها يا رب
أم عصام: يالله أختي مسحي دموعك وروحي طلعي مع بنتك وجوزها وخليكي قوية
أم عبدو: يالله

وطلعت أم عبدو من المطبخ ومسحت دموعها ومشي ورا بنتها وقلبها عم يتقطع عليها
وفرحانتلا بنفس الوقت
ونزلوا الجماعة عالدرج والزلاغيط شغالة
ووصلوا لتحت وركب فاروق وسوزان بسيارة المازدا وركبت أم عبدو من قدام جنب الشوفير
وركبوا النسوان بالسيارات والسرافيس


وبلشت الفتلة
4 سرافيس خط طريق الشام المدينة وادي الذهب المدينة الجامعية 3 سيارت تكسي صفراء كولت وسكانيا ولانسر

منرجعلكون بعدين لنكملكون القسم الاخير من قصتنا الشيقة وعرسنا الحمصي...

مع الشكر الجزيل لصاحب القصة
نقلت القصة من موقع شبكة حمص نت

ولمتابعتها بأجزائها :



الجزء الأول : http://www.homsnet.com/forum/showpos...52&postcount=1

الجزء الثاني : http://www.homsnet.com/forum/showpos...4&postcount=10

الجزء الثالث :http://www.homsnet.com/forum/showpos...7&postcount=13

الجزء الرابع : http://www.homsnet.com/forum/showpos...6&postcount=30

الجزء الخامس : http://www.homsnet.com/forum/showpos...4&postcount=35

الجزء السادس : http://www.homsnet.com/forum/showpos...0&postcount=42

الجزء السابع : http://www.homsnet.com/forum/showpos...4&postcount=60

الجزء الثامن : http://www.homsnet.com/forum/showpos...7&postcount=65


الجزء التاسع : http://www.homsnet.com/forum/showpos...0&postcount=71



[COLOR="rgb(0, 100, 0)"]أحييكم والسلام عليكم [/COLOR]

اخي ابو احمد0 تسلم يد الناقل والكاتب 0 فقد اعطيتنا فكره دقيقه عن عادات العروس في حمص وقد تكون في الشام

جميعه 0 بارك الله فيكم 0 ولازلنا ننتظر المزيد 0 تقبل احترامي

أحييك أخي وصديقي النشمي وإن شاء الله سأقدم جديدي عن العراضة الشامية

حكايا جميلة وحوار شامي جميل لمناسبة هامة
مشكور اخي
ربي يبارك فيك

المشاركة الأصلية كتبت بواسطة nanaabuabed
http://www.arabtravelersforum.com/tr...4/#post5033064

حكايا جميلة وحوار شامي جميل لمناسبة هامة
مشكور اخي
ربي يبارك فيك




ـأشكرك كل الشكر لمرورك

مشكوووووووووووووووور