الحلقة الثانية : الرحلة الطويلة
في صالة الانتظار جلسنا تقريبا نص الساعة او اكثر , ما اذكر بالضبط و كنت انا اول من دخل صالة الانتظار و بدوا الناس بعدي يكثرون و يكثرون يوم شفت نفسي العربي الوحيد في صالة الانتظار جاني شعور بالراحة ممتزج بملعقة خوف من الرحلة الطويلة إلى ان جا واحد خليجي معه عود و عائلة خليجة . كنا متوزعين في الصالة لكن الشيء الذي شد انتباهي وملاحظتي اننا نحن الخليجي القلة في الصالة كل منا قاعد في حالة بس جالسين وساكتين لكن الاجانب كل منهم معه كتابه ويقرا فيه بتمعن و انسجام _وقتها دركت لم هم سبقونا بكل شي _ و انا اتلفت في وجيه الناس و احاول ان اقراء افكارهم _في خيالي الواسع _ لفت انتباهي واحد نيوزلاندي مربي لحيته وقتها اتبسمت و قلت : ما شاء الله الرجال عرف الحق واتبعه .,و ادعيله بالثبات على الحق و يهدي من معنا من في الصالة الى الحق .
كلها لحظات الا و فتحوا ابوابه استعدادا الى تقدم الوفود الى الطائرة و كالعادة الخطوط الاماراتية تحب التأخير ما اذكر مره خلال رحلتي اننا اقلعنا على الموعد. دخلنا الطيارة وانا اودع ارض العرب التي ترعرعت فيها , ودعت ارض الخليج و ركبت الطائره و انا اتارك ورائي ذكريات و أحباب . ركبت الطيارة و دلوني على المقعد الي للأسف ما كان قريب من النافذه كان على يساري واحد استرالي و بنت نبوزلاندية صغيرة وامها كنا كلنا و جهتنا كرايس تشيرش بدأ الكابتن بالاعتذار على التأخير كالعادة. و كنت اقضي هذي اللحظات بدعاء السفر عسا ربي ان يوصلني بالسلامه و يكون خليفتي في أهلي , و بدت الطيارة في الارتجاج و التأهب الى المدرج و انا افكر يا ترا هل بيكيفي الوقود و لا بنطيح في المحيط ونغرق او نطيح في جزيرة مجهولة مثل المسلسل المعروف (لوست) , و بدت الطيارة تسابق الريح و تزداد سرعتها كلما تعمقت في التفكير .
مرت ربع ساعة منذ اقلاعنا في الجو و بدات الانوا تضيء و بدأت الشاشات بالتوهج بالاعلانات و مفصحتا عن 300 فلم و 500 قناة و دبت الحركة في الطائرة و الخدمة الراقية الي هي احسن من خدمة بعض الناس انتو عارفين من هم شفت اول فلم و شربت لي شاهي و نمت و نمت وفجأة صحيت وقلت خلني اصلي الظهر و العصر جمعا وقصرا دام في اشارة وجهة القله لكن قلت اصليها على اي توقيت ؟ توقيت الرياض _ توقيت دبي _ توقيت استراليا و جت في راسي فكرة رياضية من الرياضيات و جمعت عدد ساعات الرحلة زائد فرق الوقت بين دبي و استراليا و قسمتها على اثنين و عرفت المتوسط لكنا للأسف فكره فاشلة , و لقيت حل اكثر تطور و هو اني اشوف الشمس و فعلا كانت شبه فعالة لأن الغيم تحتنا و قمت و صليت و تحمدت ربي و اشكره وادعوه ان ييسر لي الرحله وييسر لي مشاكل مطار كرايس شيرش زي ما صار لواحد من الاخوان معنا هو في المنتدى و غصت في محيط خيالي و حاولت استرجع دروس الجغرافيا حقت صف خامس ابتدائي كيف ارسم خريطة المملكة و عدد دول مجلس التعاون و اضيف عليها بعض الاشياء الي هم يحبون يسمعونها يعني عشان اثبت لهم اني ماني ارهابي (كما هو في وجهة نظرهم ) . و كنت احاول اتدرب كيف اتغلب على جهاز كشف الكذب فكنت تارة اتدرب على العيو البرئيه المليئة بطيب الطفوله و دموع العذاراى و نمت مرة ثانية و صحيت و حسيت ان الوقت راح و ضاع و قمت سألت الرجال كم باقي _ كنت توقع 5 ساعات او 6 ساعات _ فاجأني ب 13 انا بلهت او كما يقولون في الجنوب (فغرت) و رجعت الى كرسيي الوضيع و قعدت حرك اقدامي _ اعزكم الله_ لكي ما تتورم او يتجمع الدم فيها و شفت لي كذا فلم زيادة و جت الوجبات الطعام الي مدري وش هي فطور او غداء او عشاء المهم ان وجباتهم كنت من ألذ الاطباق و جاتني المضيفة و سألتني : وش تبي تشرب , قلت لها وش عندكم من مشروبات , ردت علي بكل ثقة : تفاح و برتقال و كوكتيل ومويه و ببسي و ميرندا و بيرة انا وقتها انقلب وجهي و طلب ببسي دايت الي كان الذ من الببسي الي في بقالاتنا (الببسي الي الغازات حقتة ما تروح و طعمة يوديك فوق السحاب _ مع اني كنت فعلا فوق السحاب ) و المحيط تحتنا يعني ما كنت مصدق اني معلق بين السماء والارض و شفت فلم زيادة و فلم غير و نمت و تقلبت و صحيت وكليت من ذا الاكل الي يجنن و رجعت وشفت فلم و قمت اصلي المغرب والعشاء الا و يصير هذاك الشي الي وقف قلبي عنده , الطارة بدت تهتز في الجو و قتها انها ربطت الحزام بقوه وقعد ادعي واتشهد و استغفر . مدري وش صار يمكن في احد خطف الطيارة و بنصدم برج اتجارة العالمي مره ثانيه _كالعادة افكاري البنوراميه_ او دخلنا مجال مثلث برمودا _ كان الشي الوحيد الي تخيلته في ذي اللحظه _امي و ابتسامتها الي زينتها دموع لحظة وداعنا في المطار الا و يقولي الرجال ا تخاف هذي مطبات هوائية ( غريبة حتى في السماء في مطبات ) صدمنا في كذا مطب الى ان هدا الوضع و كنت كل شوي اشيك على الخريطة و خط السير في القناة ( كميرات الطيارة) الا و هذيك هي قارة استراليا تحمدت ربي و نمت مرة ثانية الين النوم والافلام طفشوا مني و كانت كل ما تجي وجبه الرجال الاسترالي الي جنبي يطلب نفس الطلب الي اطلبه و هو ياكل ويرجع ينام _ كنت كل ما نقرب من استراليا _ يزيد خوفي من الأجرائات الأمنيه في محطة المطارين القادمين و كل مالها تقرب استراليا و اخيرا و ليس اخرا قطع المسافه الكبيرة و هذيك هي سدني بدت تقرب ,و ظمنا مطار سدني الدولي الى صدره البارد و اخيرا عانقت طائرتنا الأرض بعد طوووووووووووووول غياب و بدأ الناس الي نازلين سدني بتعبئة استمراتهم و نزلنا من الطيارة و كانت سدني مدينة خيالية و كنت ما اعرف شي في المطار عشان كذا جاتني فكره اني الحق خويي الاسترالي لأنه بيروح معي كرايس تشيرش و لصقت فيه و قالة موظفة المطار العجوز : الى بيروح سدني على اليسار و الي عندهم ترانزيت(مواصلة) الى كرايس تشيرش على اليمين و قابلت خوينا النيوزلاندي الملتحي مرة ثانية كان وراي هو في الطابور و قدامي الاسترالي الي بلحقة و قال موظف الجمارك: الي معه لاب توب يطلعه ويحطه في ذي العلبة البلاستيكيه ( انا خفت و قلبي طاح بين رجولي ) لأن نسخة الفيستا مو اصلية و قعدت اتحسف و اقول يا ليتني سامع كلام خويي الي في المنتدى و شريت اصليه او يا ليتني ما مسحت الاكس بي ( حسيت بقيمة الاكس بي ) قلت خلني اتبسم لهم بابتسامه تبعث الامان في قلوبهم و لكن لا حياة لمن تنادي ما يبيون احد يتبسم و وجيهم يابسه تقول كأن الواحد فيهم متضارب مع زوجته , واستسلمت و حطيت الاب توب و دخلوه الجهاز الاشعه و مشوه وراتحت شوي و فتشوا الشنطة الصغيرة الي معي وشافوا جوازي و تأكدوا من فيزتي (التأشيرة) الى دخول استراليا _ المشكله اني ما طلعت من المطار _و الي يخلص من الجمارك و يطلع فوق فو صالة الانظار الثانية و حولها الدوتي فري (السوق الحره ) توني مخلص الجمارك و من الخوف ما عرفت وين اروح مع ان الدرج قدامي و سألت الرجال حق الجمارك وين اروح الا و الرجال يتقلب و جهه و ينافخ علي ( انت وش جابك هنا ؟؟) الا والاسترالي الي كان جنبي في الطيارة يأشر لي و يقول للجمارك هذا معي و قتها قلت ان امي داعية لي. و ناظرت و اشوف النيوزلاندي الملتحي و اقول الله يعينه مسكين بيبهذولنه عشان دينه و فجئه و قفت وصلبت وانا اطالع فيه :112:يؤيؤيؤيؤ كل دعائي له راح في الهوا و انكشف المستور و ما طلع مسلم ولا شي لقوا في شنطته الشخصيه ( بطل خمر) و تحسفت على الأوقات الي قضيتها في الدعاء و تجاهلت الوضع بملامح احباط و قهر و طلعت فوق ألحق خويي الاسترالي و تشكرت منه ووراني صالة الانتظار _كان اقلاعنا بعد ساعة و لكن كالعادة (التأخير) لأن الجو كان ممطر في استراليا و الكابتن خايف و انا خايف اكثر منه بس ما تأخرنا كثير يعني تقريبا 10 دقايق بس المشكلة اني انا ادقق في المواعيد و ما اتساهل فيها و فتحوا البوابات إيذانا بدخول الطائره و بدت الطائرة بزحف في المدرج المبتل و كنت خايف لا تزرق الطيارة يمين ولا يسار وتنحرف عن مسارها و تصير لنا مصيبه , و بدت الطائرة تسابق المطر و اقلعت و اصبحنا فوق السحاب _ المطر من تحتنا و من فوق ما في مطر كان منظر خيالي كانت الرحلة من سدني الى كرايس تشيرش من 2 الى 4 ساعات ماني متأكد , و قمت و صليت الفجر و كنت فرحان اني صليت 5 فروض بين السماء و الارض و جا الفطور الذيذ (اه يا هو لذيذ ) و كالعاده انا وخويي الاسترالي نفس الطلب و نفس المشروب(ببسي دايت) و شفت فلم واحد هذي المره , كلها ساعات وقالوا اربطوا الاحزمه و استعدوا للهبوط و قتها قلبي بدا يناقز من الي بيصير لي في مطار كرايس تشيرش و قلت مالها داعي بعد ذا المشوار يسولولي مشاكل .
و اثناء تفكيري و خوفي من المجهول و زعوا علينا الاستمارات _ قعدت اتذكر الترجمه للإستمارة الي نزلها واحد من الاخوان في المنتدى_ احاول اتذكر واتذكر من الخوف ما قدرت اجمع قلت يالله مالي غير الله ثم ذا الي جنبي و أسأله و ما قصر معي الرجال ساعدني بكل شي و تأكد لي من صحت بياناتي و حاول جاهدا ان يترجم لي بعض الاشياء الي ما فهمتها, لكن الشي المهم اني كنت صادق بكل البيانات و كنت رمز للشفافيه يعني طبقت كل نصيحه من نصايحكم في هذا المنتدى , مثلا (كنت محتفظ بالاوراق حقت القبول _ وكتبت لهم اني نازل عندهم للدراسة _ يعني رحت و كنت طابخهم طبخ من كثر تجارب الشباب الي قريتها في المنتدى _ كلها لحظات و تهبط الطائرة الساعه 1 الظهر و اخيرا و ليس اخرا لأن وراي طيارة ثانية من كرايس تشيرش الى نلسون على الساعه 6 تحسبا لمشاكل المطار و قمت و كأني المجرم الي عارف وش مصيره بعد لحظات و تمنيت اني لي اجنحه عشان ما اتعب نفسي و او اني اتحول واصير سمكه و اروح سباحه لكن الخيال يبقى خيال و الواقع يبقى واقع و نزلت من الطيارة وكان المطار شبه فاضي و كله قزاز و وصلت الجوازات و شافوا تأشيرت استراليا و خذ مني الاستمارة لدخول نيوزلاند وانا اتبسم له وهو يتبسم لي ( الحين بدا مفعول الابتسامه على الناس _يعني هي اهم شي _خلك بسيط وسوا كأنك من عيال بلدهم ) و رحت انتظر شنطتي و كلها دقيقه و تجيني ذيك الموضفه و تسألني و الابتسامه على وجهها حسستني بالامان و انا الابتسامه شقت وجهي . سألتني انت ليش جاي هنا و قلت : جاي للدراسة , طالعت فيني وقالت طيب ليش اخترت نيوزلاند, و جاوبتها اني قريت عنها وعجبتني وان السكان طيبين و سألتني كم تقعد هنا و قلت لها 10 اسابيع . و قالت لي انت لغتك حلوه يعني ما تحتاج لدراسه و جاوبتها : لازم اطور لغتي و راحت و خذيت شنطتي و شاف الرجال جوازي و على طول قلي روح مسار 5 انا هنا قلت هذي اللحظه الحاسمه _حانت لحظة الصفر _ و قلت راح اهزمهم بسلاح (الاخلاق ) و فعلا كان فعال بنسبة 100% فتشوني و كانوا مبسوطين مني و طلعت _ يعني ما خذت الأجرات من الا اقل من ساعه و ارتحت . و اتصلت على اهلي و طمنتهم و قلي الوالد غير حجزك على نلسون من الساعه 6 الى الساعه 3 دامك فاضي و فعلا غيرته بكل يسر وسهوله و حطيت شنطتي و شحنوها لطيارة الصغيرة (الخطوط النيوزلاندية) وانتظرت عند البوابه و اتصلت على الهوم ستي و استانسوا اني قلت لم انها كلها ساعه انا عندكم و رحت عند البوابه و انتظر شوي كلها اقل من ساعه الا وانا في الطياره .
الى هنا و نصل الى نهاية الحلقه الثانيه . شكرا على المتابعه و انا راح اكون صريح معكم بكل شي و انتظروا البقية و الصور خلال هاليومين ان شاء الله _ مع السلامه

مواضيع عشوائيه ممكن تكون تعجبك اخترناها لك: