هلا اختي
سلمي عالوالدة وايد وقوليلها تروح واهي مرتاحة ومتطمنة .. انا سبق وان زرت ايطاليا السنة اللي طافت وحجزت هالسنة على أول 7 انشالله .. اول شي بالنسبة للسوق طبعاً لا يعلى على ميلانو بسوالف الموضة واخر الصرعات مثل ما يقولون واللي اعرفه ان تنزيلات المحلات هناك تبدأ تاريخ 15-7 حتى 15-8 من كل عام (بميلان فقط) فحاولوا تستغلون هالشي وتضبطون الرحلة على هالتاريخ نفس ما انا بسوي انشالله .. وفي بعد سوق الاوت ليت بميلان للأسف ما رحتله السنة اللي طافت وناوي اروحله هالسنة انشالله .. باختصار ميلان كافي عليها 3 أيام تسوق وتكون آخر ايام الرحلة وأرشح فندق اسمه Brunelleschi نظيف وراقي وسعره معقول اتوقع 27 دينار بالليلة حق الغرفة الثلاثية وفوق هذا ما ياخذ منكم الا خمس دقايق مشي منه لساحة الدومو والسوق.
بالنسبة لفينيسيا اهي روعة تبين الصج وتصلح أكثر شي حق العرسان اليدد بس صح كلام الوالدة زيارة يوم واحد كافي عليها وهذا اللي بنسويه هالسنة بإذن الله بعد ما جربناها السنة اللي طافت 3 أيام هالسنة بنزورها يوم واحد لان معانا ناس ما شافوها .. وأحسن الأماكن اللي تزورونها بفينيس غير ساحة السان ماركو والتمشي .. فيها أول بنك بالعالم وأكبر مصنع زجاج ان ما خاب ظني حسب ما قالنا شخص مغربي صادفناه هناك .. بالنسبة للفندق (إذا حابين تسكنون) فندقنا غير مناسب لكم لان ضيج ولا فيه أصنصير! شوفي آراء الاعضاء عن أفضل فنادق فينيس يفيدونكم أكثر.
بالنسبة للتنقل كنا نتنقل بالقطار نحجز من المترو عندهم آلة تحجزون فيها حالا بس هالمرة احتمال اضبط حجوزاتي من اهني واختار التنقل بالطيارة خاصة بين المناطق البعيدة شوي لان مرات أقل من تكلفة القطار وأسرع.
أقترح عليكم مناطق ثانية مثل فلورنسا منطقة حلوة فيها سوق لا باس فيه وفيها أماكن اثرية نفس باجي مناطق ايطاليا .. وروما العاصمة فيها سوق وفيها الكولسيوم (المدرج الروماني).
وشلون على الفيزا؟! سويتوها والا بتسوونها؟! وهل عندكم خبرة بمتطلباتها؟!
وبس .. إذا في شي جديد راح نتعاون بهذا الموضوع بترتيب الرحلات بما ان وقت السفر مقارب وأي خطوة اقوم فيها انشالله ابلغكم ..

مواضيع عشوائيه ممكن تكون تعجبك اخترناها لك: