الموضوع: أم عساف واسواق بكين وجوانزوا

السلام عليكم
الحمدلله تمت رحلتي انا وزوجي بكل خير من البحرين دبي ومن دبي الى بكين
وكانت بكين من وجهة نظري جميله الجو ولكن اهلها سيئ الطباع لاخر درجه
وخصوصا بالمولات والاسواق كثيرين المجادله بشكل فظيع ومتعب حتى عند سور الصين
بالسعر وعصبيين وخصوصا سوق الحرير وسوق اللولو وطبعا في شارع دونق فونق التسوق
فيه ارحم بكثير وهو مليان مولات صغيره يمين ويسار وكل مول يوجد به مراكز لعمل مساج القدم
وطبعا رخيص خصوصا لما يكون زوجي بالعمل وانا وحدي مع النساء
ببالنسبه للاسواق ايضا في جوانزوا هاي ثاني مره ليه واحبها بالمره واحس بامان حتى بالتنقل
لوحدي مع النساء اهلها طيبين وانا الان فيها باقي لي اسبوع تقريبا وارجع
انا رحت بيجن لو طبعاا وهدا شي اساسي وكمان شاينا بلازا حلوو -وكمان في سان يان لي
وفي دفتر يوزعونه مخبازة سباء رحت سوق القرطاسيه الشنط حق الاطفال خياااال
واغراضهم رخيصه ورحت كمان من ورقة سبا سوق الالكترونيات والساعات
وسمعت عن سوق اسمه تي مال بدوره لسه
واي سؤال انا حاضره للاجابه واتمنى ماطولت عليكم

مواضيع عشوائيه ممكن تكون تعجبك اخترناها لك:

• اسير الدوحة دقيقه لو سمحت من وقتك
• أين بكين ؟؟؟
• اجازة الصين والجوو العام
• مساعدة عن مدينة
• المسافة من إلى
• ممكن تردون علي الله يعافيكم
• انا الان فى كوانزوا ومحتاج توجيهاتكم
• استفسارات
• إستفسار عن كوانزو و شينزن لعائلتي
• حاليا انا بهونغ كونغ مشكله الوتس اب ما يشغل معن الانترنت يشتغل
• استفسار بسيط الله يجزاكم خير
• الرجاء المساعدة
• القنوات في الصين؟؟
• طريقة الوصول من المطار الى الفندق لو سمحتم عن طريق المترو
• للاخوة إلى عندهم خبرة في الصين
• استفسار عن شارع العرب و فنادقه في كوانزو
• ســـــــــــــــــاعدوني بالفنــــــــــــــــادق
• اخواني مساعدتكم الله يخليكم
• اي عمله آخذها معي للصين ؟
• طريق العودة من كوانزو إلى هونج كونج وضياع الـ

الحمد لله على سلامه الوصول ورحله موفقه باذن الله
انا طالع بعد شهر من الان كيف الفندق الي بكوانزو وكم نجمه وكم سعره
وايش تنصحينا ناخذ مئونه للاكل
شاكراً لك

اتمنى لكم قضاء وقت ممتع وترجعوا بالسلامة

المشاركة الأصلية كتبت بواسطة أم-عساف
http://www.arabtravelersforum.com/tr...8/#post3915718

عزيزتي ام فاتي ... شنط درجه اولى في بورقة مطعم سبا بجوانزوا سوق كامل للشنط
وانا شخصيا اشتري من بيجن لو وتشاينا بلازا
لما ارجع بنزل صورة دفتر مطعم سبا كامل لك بالعناوين صيني وعربي
اخي العزيز مهند انا نزلت مرتين في ماريوت رهيب مررره خمس نجوم وفندق يونق
فونق خمس نجوم بخلي زوجي ينزل كرته بالمنتدى لك والاسم او الصفحه اللي يحجز
منها يونق فونق حديقته بنص الفندق خيال وماريوت بعد حلو ونظيف هاي اللي جربناها
ماريوت اقرب للتكاسي ومن الباب الوراني على طول الف ليله وليله و7اليفين بقاله
وناخد ويانا اندومي وكورن فليكس وجبن وحلاوه ومربى بس للفطور لاني مااقوم



بارك الله فيك اختي الكريمه
ترجعون با السلامه

ياليت تشرحين لنا اكثر عن بكين من ناحيه الاماكن السياحيه والجو والاسعار

وماهي وسائل التنقل .وهل صادفتي شقق فندقيه فيه

ولك مني جزيل الشكر

السلام عليكم ...

اخيرا ام عساف فالصين ....

اتمنى انج وجدتي الاوضاع كما تصورتيها ...

مجمع T-Mall .... مجمع ضخم للغاية ... يمكن 5 او 6 ادوار ....

انصحكم بزيارته ...


ولا تنسين التقرير اختي ....

اتمنى لج التوفيق والعودة السالمة ...

ام عساف ترجعين بالسلامه واتمنى شرح مفصل عن الرحله والاسواق . المطاعم . اماكن الترفيه . الفنادق . الطيران الداخلي والدولي . لان ذلك سوف يكون مرجع لجميع الاعضاء . واسف على الاطاله بس ناوي انشاء الله الذهاب الى الصين .في سبتمبر القادم وشكراً .

حمدلله على سلامتك ,,,,,,,

ننتظر تقريرك

حمدلله على السلامه

اختي ام عساف

الله يهنيج يارب ويوفقكم بالسفره ..فيما يرضي الله\

اختي بس بسألج

1-كم سعر الفندق في الليله؟

2- هل يوجد سوق متخصص للملابس الرجالية ماركات مقلدة "يبيع بالجمله" , وما اسم السوق؟

3- هل يوجد سوق متخصص لـ ملابس الرياضية "بالجملة" في كوانزو وما اسمها؟

4- ذكرتي لنا انكي زرتي سوق القرطاسية , ما اسم هذا السوق ؟ وكم كانت اسعار الشنط المدرسية "تقريبا" بالرممبي؟


وآسف على الاطاله خيتوو واتمنى لج دوام الصحه والعافيه

انتظرج؟

الله يسلمكم جميعاااا
انا اليوم رحلتي للعوده وبرد على كل الاسئله بس اوصل بالسلامه
وهدا دليل مطعم سبأ للي طلبوا اسواق واسسواق جمله ملابس
http://www.arabtravelersforum.com/travel367733/
وعلى فكره المطعم موشي ابد زحمة ناس صراحه وافارقه يخوفون
لكن مطعم الباشا رهيب مصري بجوانزوا وبنزل لكم كرته ومطم الف ليله وليله
للغداء لان بالليل ناكل فيه لغاية الساعه 11 يبدء رقص ماندخله وعندكم البسفور التركي
هادي مطاعم قوانزوا
وبالنسبه للاخت اللي سالتني عن مطاعم بكين في الف ليله وليله وبرا جلسات رائعه
وجنبه مطعم تركي كمان جلسات خارجيه روعه ومطعم رومي الايراني كمان جلسات خارجيه
هدول ال3 جنب بعض مشي تتنقلي وخصوصا الجو ببكين رائع ترا واشربي شاي وايراني وادعي لي
ولحين اترككم واروح المطار واللي اعرفه برد عليكم اخواني واخواتي ولايهمكم منتدانا الغالي ماقصرمعاي
وانا مابقصر معاكم انشاء الله

وحبيت اسأل 100 ريال سعودي كم تساوي بالصيني ؟! معليش أطلت عليك الاسئله ..

عزيزتي Angelina jolie
بالنسبه لاسواق الجمله والساعات والنظارات والقرطاسيه والالكترونيات
كلها تسكر 6 الى 7 بالكثير والمولات كذالك ولكن يوجد سوقين ليليين في
جوانزوا شارع بيجن لو - شارع سن ساجيو كمان ليلي ورخيص جدا
وبالنسبه لل100 ريال تساوي 50 ريال تقريبا
وماطولتي ولاشي بالعكس استمتعت بالاجابه

ولايهمك اخوي مسافر جديد لو جاء لزوجي عمل بروح سوق التنين ...انشاء الله

هههههههههههههه ان شاء الله يجيله عمل وتقضون اجمل الأوقات

ولايهمك اخوي بالعكس انا مثلك كنت اسأل واستفيد من سعة صدر الاخرين
جزاهم خير ومشرفين المنتدى ... بالنسبه لي اشتريت psp لولدي الصغير صيني
ب400 رمبي يعني 200 ريال واشتريت جوالات للبنت الكبيره بلاك بيري صيني
ب700 رمبي يعني 350 ريال بالواي فاي وبلوتوث وكاميرا خلهم يفلونهااا وشريت
الوان بعد للولد الثاني وواحد احتياط لو خربوها ... وبالنسبه للبلاي ستيشن 3
سالت عنه والله وولدي وصاني بس ماشريت خفت الصيانه عندنا مايصلحونه
ويسوون لنا حوسه اجيب مع الضمان احسن .. يعني انصحك بالاشياء البسيطه
وشريت الشاشه اللي تعرض الصور وفديوكليبات كمان ب200 ريال
حلوه فرحانين فيها مرررره وجهاز عرض افلام الديفي دي بشاشه
مثل اللابتوب الصغير ب300 ريال وافلام كرتون الواحد بريالين
وقي كل شريط 20 مقطع ... خلهم يفلونها وشنط مدرسيه طبعا تعرف
قلب الام تبغى كل شي لعيالها والله يعين ابو العيال بس ...

اخي العزيز احنا نزلنا في جوانزوا في شاينا هوتيل وهو خمس نجوم
على حساب العمل ولانعرف بكم الغرفه صراحه ولكن روووعه
بالنسبه لل100 تساوي خمسين زوجي قال لي هالمعلومه وعلمتها
كل الحريم اللي معاااي خلهم يفلون ويشترون خخخخخ
بالنسبه لبكين بالشمااال الصيني وهي بعيده جدا عن جوانزوا
وركبنا طياره حدود 3ساعات من خطوط صينيه ايضا على
حساب العمل لاتسالني بس زوجي دفع تذكرتي طبعا قال 500ريال
وبالقطار يومين سمعت المترجمه تقول هالكلام العام الماضي
وبالنسبه لهونج كونج مارحت لها بس بنروح سياحه ونودي الاولاد
خصوصا انها بالقطار لجوانزوا 3ساعات فقط وخصوصا بعد ماصرت
اعرف البلد وقادره على تمشية الاولاد لوحدي فترة عمل والدهم انشاء الله
في العام الماضي نزلت في فندق سويس اوتيل وكان رائع جدا وكمان
اسمع الناس توصف في فندق قراند ونزلت مره في فندق دونق فونق
خطير كمااان وكلها فئة خمس نجوم وانصحك برايي لو عيله كبيره تدور
شقه ولو صغيره الفندق افضل وطبعا كمان تفرق المده لو طويله شقه
اوفر لك ولو قصيره فندق اريح لك ... تأأمر أمر أخوي واتمنى ان اكون
فعلا افدتك بمعلوماتي البسيطه

[size="5"]ام عساف مارديتي على اسئلتي شكلك مرهقه بعد السفر .


حياك ام عساف ..والله يعطيك العافيه .
عندي سؤال صغير في بدايه الامر لكن الله يعينك على باقي اسئلتي معجبه بالمحققين .
ههههههههههههههههه
في بكين وكوانزوا اقدر اخذ فرشه معي واجلس اتقهوى في حدايقهم وملاهيهم مثلنا والاممنوع ,

بالنسبه لبكين سور الصين كم يكفيه من الوقت ؟وهل القبر الامبراطوري قريب منه هو ساحه (تيان ان مين )
يعني اقدر اروح على رجليننا والا لازم تكسي وكم المسافه بينهم .
وهل هن في مكان واحد الا كل واحد بمكان ..
................
والملعب اللي على شكل عش عصفور وين فيه وش اقرب معلم سياحي له .
...........................
.المدينه المحرمه كم تحتاج من الوقت
...............................
القصر الصيفي كم يحتاج من الوقت .
واسئلتي علشان اعرف هل اقدر ازور هالاماكن بيوم واحد والاكل يوم معلم سياحي .
والله يعطيك العافيه

اسفه والله اعذريني يااختي الغاليه
بالنسبه ليه ماشفت احد مفرش ويتقهوى كلهم على الكراسي ويشربون
وياكلون بس اعتقد عادي محد يمنع هم ينامون حتى على الارصفه
والحدايق وبالنسبه لسور الصين ساعتين بالسياره من بكين
ويكفيه ساعه تتمشين وتركبي تلفريك وتتصوري وكمان وانتي
طالعه للسر سوق على اليمين واليسار يبيع اغراض الصين
والله الله بالمكاسره ترا كل ماطلعتي فوق ارخص البلايز
والسور بعيد ساعتين من بكين والساحه تبعد بالتاكسي
يمكن عشرين دقيقه انا مارحت له ولاالمعالم الثانيه
لان زوجي مشغول وتقفل المعالم بدري ...
لوقمتي بدري تقدري تروحي معلمين بيوم
واحد مو اكثر لان التكاسي يضيعون الوقت
خدي راحتك حبيبتي وفعلا ماشاء الله رجعت
ومدري ارد على مين ولا مين فاعذروني اسألي
كل اللي بخاطرك وانشاء الله افيدك يااارب

مشكوره حبيبتي وماقصرتي .

حبيت اسئلك ماتعرفين مكتب اقدر اشحن فيه اغراضي الزايده بدل جرجرتهم معي اذا بغيت ارجع ان شاء الله

وعلى الاقل ماياخذون مني زيادة وزن ..
اذا تعرفين ياليت تعطينن عنوانهم او رقم تلفونهم .
وبعد انا سمعت عن شقق اسمه (نانسي )سئلت عنها مرتين ولا لقيت اجابه .

ولا تخافين تراني مابعد بديت بالاسئله بس عسى ماتملين من اسئلتي واظطر ادور مره ثالثه لاحد يساعدني .
والله يهنيك ويعطيك العافيه .

الله يعطيك العافية ............ ودي اسأل بخط سير الرحلة اختي ام عساف الله يسعدك
من الرياض لبكين وبعدين قوانزو - وبعدين هونغ قونغ ؟؟
وهل صحيح ان ملاهي دزني بالصيف تسكر حنا رحلتنا ان شاء الله نهاية شهر سبعة هجري ..........وعندي بعد نفس سؤال الاخت ناقدة
الله يجزاكم خير

سلام
اختي العزيزه انا نفسي ودي كنت اشحن اغراضي زيك لو عرفتي اعطيني الرقم
وشقق مااعرف والله ... وخدي راحتك بالاسئله حبيبتي اللي اعرفه بجاوب
واللي مااعرفه الاخوان مابيقصرون ... نفيد ونستفيد

اول الحلم والله مارحت هونج كونج وماادري عن ديزتي
السنه الجايه بروحها ... اي اسئله ثانيه انا حاضره

طيب لو معاي انا وزوجي طفلين بعمر سبع سنين تقريبا
كيف نظام السويتات في فنادق خمس نجوم في جوانزو؟وسعرها
وهل يشمل الفطور لكل العائلة؟
يا ريت تنصحوني بفندق موقعه قريب من اسواق اقدر اروح لها على رجولي
وشكرا مقدما لمساعدتك وسعة صدرك

بليز اي احد يقرا سؤالي بعد لا يبخل علي بالجواب وبادعيله

عزيزتي لفته ... انا رحت الصين مرتين مع زوجي عمل ولوحدي انا وياه ما اعرف النظام كيف
ممكن الاخوان يفيدونك ... بالنسبه للفنادق القريبه كمان ما اعرف والله ..
اي سؤال ثاني انا حاضره لو اعرف اجاوي من عيوني

ام عساف اذا تعرفين ارقام مكاتب سياحيه هناك ببكين او جوانزو

يوفرون لنا سواقين وحجوزات ياليت تعطينا ارقااام هالمكاتب

وتعطينا ارقــآآم السوآقيـــــــن


وشقق اذا فيه رخيصـه

مع الاسعار لآهنتي


وربي ييسر لك امووورك

حمدلله على السلامة يا ام عساف
نهاية السنة بحول الله انا وام العيال
نبي نكرر رحلة 2009

هلا اختي ام عساف .. مشكوره ويزاج الله خير

بسممكن تخبريني عن اهم الاسواق في جوانزو و المولات
ووين اقدر احصل اكسسوارات النساء مثل الولو والفضه و ملابس الاطفال

وبكون شاكره لج عزيزتي