الموضوع: اول محطه في رحلتي الاوربية ,, تركيا وصيف ساخن

اما الآن نبتدي نغوووص في صلب المووضووع

رحلتي كانت لمدة طويله و معاي ولدي الله يحفظه هذي منعتي اني اكتب كل يوم بتفاصيله بس راح احاول اضبط لكم الايام بقدر استطاعتي

اول يووم كان الجو المغرب وطبعا كان جو رائع بالنسبه للرطووبه والموت اللي كان عندنا فالبحرين فكانت نقلة نوعية و الجو كان يبشر بخير و بما انها زيارتي الاولى لتركيا راح اسجل لكم جميع انطباعاتي

اولا انطلقنا الى مجمع جواهر عشان نتعشى و نتمشى فيه


صورة خارجية




ومن الداخل لاحظت الامن الشديد و التفتيش في كل مجمعات اسطنبول يعني كانك داخل مطار !! و طبعا من لقافتي حاولت التصوير لكم جاتني وحده من الامن و خربطت علي خرابيط فهمت منها اني امسح الصوره هههههههههههه بغيت اقولها ليش يعني بافجر المكان تذكرت ان الوضع متازم و ياغريب كن اديب و مسحتها

وهذي صوره من الداخل

في يوم اخر من الايام الاسطنبوليه

رحنا الى رحلة في مضيق البوسفور و طبعا انتقلنا الى الميناء اللي كان قريب من منطقة تقسيم بس رحنا طبعا بالتاكسي وماقدر اوصف لكم حرارة الجو !! و رداءة التاكسي اللي كانت محبطه لاخر درجه قلنا نروح نتبرد فالرحلة البحرية

هذي الميناء و تقدرون تشوفون التكاسي اللي ما ذكرتني الا بتاكسي مصر و اخر مره رحت لها من سنين و كنت صغير ماتذكر الا التاكسي و حالتها الماساويه فاذا بالتاريخ يعيد نفسه




وهذي هني رصيف الميناء اللي يبيع ماي عن الشمس الحارقة و اللي يبيع سميط " وهذي وجه الشبه بينها وبين مصر" اللي بالفعل حسسني اني في مصر و سوريا و جبال الارن و طريقة الشوارع فوق وتحت يعني لا يمت للدول الاوروبيه بصلة الا الكلام الهيورغليفي






هذي مطعم عائم و سالت عنه قالو مطعم سمك عائم !! بس الجو لا يساعد على الجلسه فيه ابداا يعني تبي مااي فقط يسد النفس وشكله فالصوره احلى بكثير من الواقع " وجهة نظر"





يمكن لو كان الجو الطف يكون له طابع ثاني !





وهذي صورة عبارتنا اللي بتاخذنا فالجولة




وطبعا فيها جلسات داخلية واخترناها طبعا بس للاسف المكيفات كانت لا تعمل !!





و خارجية مظلله عن حرارة الشمس





و بدت رحلتنا






فعلا تحس انك بين مضيق تشوف الديره على جهتين و احساسك انك في الماء بين اوروبا و اسيا شعور جميل




وطبعا اثناء الرحلة يجون يبيعون الشاي التركي و طبعا حبيت اجربة بس للامانه ما حبيته كثير لان طعمه قووي جداا يعني لو احط فيه سكر على كثر ما احط ما يغلب مرارته



و نكمل رحلتنا بعد ما قلت اطلع بره لان الحر ذبحنا بالداخل عالاقل ينسم علينا الهوى




منطقة بيت المسلسل نور و مهند اللي ما سوى فالناس خير هههههههههههههههه




الجسر اللي يربط الجزء الاسوي بالاوروبي في اسطنبول







و تحت الجسر





المحطه اللي قريت في عدد من التقارير انها حلوه و تستاهل الزياره بس ما حصل لنا فرصه ان نوقف فيها لان العباره ما وقفتشششي فيها مرينا عليها وصورتها لكم





و مطاعم تطل على المضيق و فيها موسيقى و حفلات و الشمس تصقع




قلاع على الجبل اثرية





و الى هنا انتهت رحلتي في مضيق البوسفور

وللتقرير بقية ,,,

الصراحه التشجيع خطير و يساعد اني اكمل التقرير " طول ما الصور جاهزه حنا بخير"

بعد الرحلة البحريه عصافير البطن بتوصوص و رحنا الى جواهر مول و تغدينا في مطعم يحسسنا ان فعلا جايين من رحلة بحرية



وطبعا كانت الطلبات بحرية ايضا





وهذي الطلب عاد اتذكر انه سمك " بالعظم طبعا" و صديقنا جاب لنا منه 4 وهذي كله من مشكلة اللغة شوي الا يهل علينا الطاوله كلها نفس الطلب مع ان كل واحد طالب طلب و ماقصرنا الا هو ملزم ان قلنا ولا عرفنا حتى نفجج الكلام و نشرح له قام و جاب لنا واحد مصري يفهم و قام يترجم لنا و تفهم الموضوع و شالهم و خصمهم من الفاتورة اللي بصراحة تفاجأت من اسعار المطاعم في اسطنبول " غالية"




و للتقرير بقية ,,,

اما الآآآن نكمل لكم فريج الهوتيل
في تقسيم وهي منطقه حية بالمطاعم و الناس و راح اوريكم اياها بالصور


هذي الصوره تشرح لكم المكان اللي فيه فندقنا و طبعا ما تمر فيها السيارات الا نادر يعني لو كان تاكسي او باص سياحي



وعلى ناصية هذي الشارع فيه واحد يشوي بو فروه مممم يسمونه كستناء "للي مايعرف البوفروه"

لا حد يسال عن سعره ههههههههههههه اذتكر شريت الكيس الصغير و عطيت الريال 20 ليره وقفت انتظر الخرده قالي مافي هههههههههههههههههه معقوله مافيه الا 7 او 8 حبات ب 5 دنانير بحرينية ,,,



وبعدين يجي شارع عام و ميدان فيه حمام و تكاسي و فيه فندق مرمره


وبعدين يجينا شارع فيه ناس و خلوق و على قولة الوالده كانت توصف لي الشارع لانها رايحه قبلي تركيا تقول " الشارع اللي تشوفين فيه رووس الناس و الخلوق" الله يطوول عمرها ويخليها

واليكم شارع الرووس



و كان فيه هناك عرض لعدد من دول العالم يمرون و يسوون استعراض بلسبهم و يشيلون علم دولتهم وهذي ما صورته لكم بكاميرتي














كان يمر الترام و بصراحة كانت فيه حركة عجيبه فيه فرقة موسيقية و طق وو طبوول




و معلم من معالم اسطنبول الايسكريم " الحيــــــــة" وهذي تشوفه في كل مكان هناك حتى فالمطار وقلت اصوره لكم





و اخيرا صورة ليلة للشارع






وكان العشا في مطعم بورصه يعني بوفيه تختار منه اللي تبي وتحاسب بس اذكر ليلتها تعشيت شوربه عدس هههههههههههه لاني كنت شبعانه




وللتقرير بقية ,,,

اما الاآآآن ننتقل معاكم على منطقة السلطان احمد و الحمام شمسي

و نبتدي بالصور

هذي الصورة اللي نشوفها اول ما ننزل من الباركات




وندخل نتمشى في الشمس و فالطريق في محلات تبيع تحف وتذكارات بس محد يقدر يوقف من الحررر





مواقف اخرى و اتوقع كانت اقرب من اللي وصلنا لها التاكسي و خلاناا نسبح من الحررر والشمس




و اخيرا وصلنا المسجد الازرق وفيه حديقه حلوه بس بعد ما قدرنا نستمتع فيها بسبب الحر كنا نشرد بسرعه عن الشمس ولا حنا لاحقين

و واحد يبيع جح يبي يخفف معاناة الناس بس نوو ووي ,,,






وعند الباب لقينا واحد تركي وكان معانا يسولف و يهذر و يساعد و يشيل جاري حماني قلت حق ريلي احتررررررررررس انهووووووووووووووو نصاب , بعدين قال انا مابي منكم فلوس ولا شي انا ابي ارافقكم وبعدين ابيكم تجون محلي و تشوفون بضاعتي و كان عنده محل سجاد قلنا حنا مو جايين للسجاد لزم الا يرافقنا وقلنا كيفه المهم قام يشرح ويشرح و يساعدنا بصراحه لان الاصطفاف مريع و الحر بديــــــع

وهذي الساحه الداخليه للمسجد



وهذي من الداخل الصراحه ما كان فيه نفس و من وجهة نظري ما كان يستحق الزياره عندنا مساجد احلى و حتى ما قدرنا نصلي فيه لان الروح على الروح ,, بس على كلام مرافقنا ان اللي بناه كان يقول انه بيبقى موجود الى يوم القيامه ... لان على الزلازل اللي تعرضت لها تركيا الا انه ما تاذى و انه موجود الى هذا اليوم ,,,






و ننتقل الى ,,,,,

آيه صوفيا


و هو على حسب كلام صديقنا ,, انه كان كنيسة و حولوه الى مسجد و الحين خلوه كمتحف


وطبعا كان فيه اصطفاف هائل للتذاكر و ماقصر طوفنا عليه و دخلنا بسرعه





المدخل







و من الداخل






و رحنا فوق و طبعا كان صعب على حماني فخليناه تحت مع الخدامه و رحنا على بالنا بنجوف شي ههههههه على كلام صديقنا في لوحات

وما شفنا الا عمليات الترميم فيه



وهذي لوحات صديقنا ,, وكان يقول انهم يشيلون الصليب و كل ما يمت الى المسيحية عشانه صار مسجد ويبين من الصور




و طبعا النزلة ,, تكسرنا و ماجفنا الا هاللي صورته لكم ههههههههههههههه




و اخيرا كنا نبي نروح الى المتحف و للاسف كان يوم الثلاثا و كان مسكر ولا حد قالنا يعني طلع مشوارنا على فشووف هههههههههههههههههههه بس رحنا له يوم ثاني و راح انزل لكم الصور


و للقراده بقية ,,,,

نرجع للمتحف ,, الصراحه كان يستحق الزيارة فيه اشيا جدا جميلة بس للاسف الزحمة الشديدة والحر الاشد ما خلاني اصور لكم من الداخل لانه ما كان كله مكيف و حتى لو كانت بعض الغرف مكيفة من ناحية وحده فقط ,,

و اليكم الصور


اولا المدخل




حديقة القصر





الصراحه روعه من الحديقة تشوف بحر مرمره





و مدخل آخر بعد هالحديقة الحلوه ,, بغض النظر عن الجو




فناء القصر و للاسف هذي الصورة الاخيره عندي والاسباب معرووفه




خلصنا من المتحف و توجهنا على مجمع هستوريا اللي كان قريب نوعا ما من المكان ولكن مابي اقولكم شصار في التاكسي ,, بو حماني تهاوش معاه و هم كانو نصابين يعني اذكر كان الحساب 48 ليرة عشان مشوار ما يستاهل وبعدين عطاه 50 الا يبدلها جدام عيوني لاني كنت فالسياره ما نزلت و يوريه 5 و يقوله انت عطيتني خمسه مو خمسين و صارت الهوووووووشه

خلونا على هستيريا ابرك

هذي المجمع من الداخل مجمع صغير بس مرتب







وكان الغدا في مطعم



و الطلبات كانت بالاشاره محد يعرف انجليزي ولا عربي اكيد ,, عندهم بوفيه و عندهم منيو وهذي الطلبات من المنيو






وبعد الغدا

رحنا كوفي شوب معروف عندهم كنت اشوفه في كل المجمعات تقريبا

mado

و نشوف التحلية والقهوه التركية اللي بصراحه طعمها كان خيالي " تراني مدمنة قهوة"

السويت كان غير اللي طلبته بس مشينا الحال لان حتى لو بنعترض هههههههههه محد بيفهم لنا




و الكوفي





واكيد للتقرير بقية ,,

نرجع الى تقريرنا من جديد

الحين راح اتكلم عن المجمعات طبعا تكلمت عن جواهر مول , و مجمع هستوريا

اما الان مجمع استونيا التجاري و هو بعيد يعني بالتاكس حوالي 40 دقيقه بس الصراحه كان كبير وذكرني بمجمعات دبي اللي ارضه كبيره و مساحته شاسعه و الصراحه كانت زيارته ممتعه


وهذي بعض الصور






وكانت لنا استراحه بعد التسوق في







ننتقل الى مجمع زرناه مرتين و بصراحه كبير وفيه اكويريم بعد وللاسف كان يسكر من وقت ما لحقنا عليه








واذكر انا رحنا للغداء و كانت فيه مطاعم حلوه و هذي ساحة المطاعم



وكان الغدا في








و التحلية و الكوفي في



هذي اللي كانها ام علي تطلع محلبية رز و طاح فيها حماني حبيبي




و طبعا الكنافة اللي كانت فرش يسونها عند الطلب اللي لم اذق في حياتي مثلا قـــــــــط و كان فيها جبنة موزاريلا و اهداااااااااااااااء لبعض النااااس



و اخيرا القهوة التركية الرهيـــــــــــــــــــــــــبة





و اقلبو الفنجال وانتظروووني افج لكم الفااااااااااااااااال و للتقرير بقية ,,,,

نكمل معاكم و الى

جــــــــــــــــزر الاميــــــــرات

و طبعا عشان نروح جزر الاميرات في اكثر من طريقه كان في عباره توقف في اكثر من محطه و الرحلة تكوون طووويله أو البوت اللي يوقف على ماعتقد في محطه وحده بس و من بعدها جزر الاميرات و طبعا كان اسرع والاثنين للهم اوقات معينه و خذناهم من الفندق

توجهنا الى ميناء اكباتاش و منه الى بوتنا و الى البرنسس آيلند




و اللي واضح من الصورة ان فاللغة التركية اللفظ لا يمت بصلة الى حروف كتابة الكلمه






و اول ما وصلنا صورة الميناء جزيرة الاميرات





و ضواحية







اول ما وصلنا الصراحه ما عرفت وين نروح و كانت الشمس بلا تعليق بس شفنا هالناس تمشي واحنا وراهم و طبعا بو حمني وانا اقوله اكيد المكان فيه شي حلوو اصبر



و بعدين وصلنا الى هذي المكان







وهذي سنتر الجزيرة




و طبعا في هذي اللحظه محد كان معاي ههههههههههههههه الكل قعد في المطعم لان الشمس حارقة و لاتطاق بس انا تمشيت وهذي فريج المطاعم اللي على البحر و الصراحه الجلسه كانت حلوه بس الجوو شوي بس عالاقل كان فيه مراوح تنسم عالمكان




و ودانا زوجي على مطعم علي بابا كان يسوي دعايه وقت ما كنا نشتري تذاكر في ميناء اسطنبول و فعلا ما خلف وعده للرجال وودانا له بس كان مكانه و اكله حلو " بس ما يوصل لمستوى الاكل اللبناني " وجهة نظر




و كان يجيب كل المقبلات في صحن وانت تختار منهم اللي تبيه تحطه عالطاولة و الحسااابه بتحسب ,, اخترنا منهم




وكان المنظر بددديع




والاكل بعد




وبعدين حان وقت التمشيه وطبعا ما قام معاي الا بو حمني لان البيبي رقد ههههههههههه من الحراره و المروحه

و توجهنا الى



و الاصطفاف كان مرررررررررريع بس كان يمشي يعني 15-20 دقيقه فالشمس نوبروبلم واذكر كان فيه ناس يبون يركبون معانا و ندفع بالنص بس ما حبينا ,,,


واخيراا تحنــطرنـــاا





وخذنا الى جولة بالجزيره فوق الجبل و قال لنا تبون كل الجزيره او نصها و اكتفينا بالنص لانه اكثر من نص ساعه حوالي 45 دقيقه بس ممتعه لان الحنطوور مظلل و لله الحمد


مسجد الجزيره وسمعت صوت الاذان فيه




و غابات تطل على البحر







وبيوت ناس من سكان الجزيرة




و خلصت جولتنا و في طريقنا للعوده للمطعم لقينا مطعم لقيمات وااااااااو لم اذق في حياتي مثلها قط






وطبعا خذتها تيك اوي و كلتها في مطعمنا مع الكوفي التركي وااااااااااااااااو





و بعد ما تقهوينا تعبنا من الحر هههههههههههههههه وقلنا بس بنرجع وللاسف حسب الجدول اللي عندنا اياه مافي شي على الوقت يعني لازم ننطر ساعه الا ربع عشان نروح في العباره اللي وقفت في مليون محطه و كااانت حر مووت و خذت منا حوالي ساعتين و زووود و انهرنا من الحر


وللتقرير بقية ,,

نكمل تقريرنا

كانت عندنا مشكله في تذكرة الخادمه و كانت قادمه عن طريق الخطوط الجوية القطريه و سوو لنا سااالفه مالها اول من تالي " المختصر اذا شريتو التذكره عن طريق النت و البطاقه الائتمانيه مو باسم المسافر نفسه او ما كان موجود فالمطار وقت السفر ما بيخلووون الشخص يسافر ولازم اجراءات طووويله عريضه"

ورحنا نبحث عن مكتب الخطوط الجوية القطريه و كان في فندق الانتركونتيننتال و كان جدا قريب من الساحه اللي فيها فندق مرمره و طبعا الكل في منطقة تقسيم

يعني في حديقه لو نتمشي بضعة امتار شفنا الانتركونتيننتال فيها

هذي الحديقة




وهذي الانتر على اليمين




و بعد ما خلصنا شغلنا في الخطوط القطريه دخلنا الانتر وشربنا كوفي وصورت اللوبي بس للاسف ههههههههههه الصوره مسحتها بالخطا ولكن الفندق فخم جدااا بس ترا ابعد من فندقنا شوي عن فريج المطاعم ولكن موقعه ممتاز


و اول ما طلعنا من الانتر كان على مقربة منه هذي الفندقين




اللي لونه بيج من ناحية اليسار وراء الشجر حياة رجنسي و شكله ما عجبني اضافه ان موقعه بعيد و اللي على اليمين اللي كله نوافذ زرقاء الريتز


وللتقرير بقية ,,,

ننتقل الى مكان هام و حيوي في اسطنبول وبصراحه عجبني جدا

الجرااند بــازار




مثل ما شايفين من الصوره هو سووق حلو و تراثي ذكرني بسوق المنامه القديم هههههههه فيه اشيا صناعه تركيه يعني كل شي موجود فيه وانا بطبيعتي امووت فالاسواق الشعبيه احس تقدر تعرف الديره شنو فيها ويميزها من السوق الشعبي


هذي مدخل السوق لانه كان سوق مسقف يعني داخلي و كان له طابع جدا جميل






ومن خلال فرتي فالسوق اكتشفت ان الاتراك يموتون في العين والحسد و يؤمنون فيها بطريقه مب طبيعيه لدرجة كل السوق ههههههههههههههههه عيون زرقا و تحف و ميداليات حتى المسابيح على عيون


وبعد فرتنا فالسوق والتجول قررنا نتغدا في مطعم من المطاعم الانتيك التركية في قلب البازار





و حتى الديكور كان شعبي للنخاااع




و المنيو





و صورة للمطبخ و البوفيه مثل نظام كل المطاعم التركية و الشيف يحط لك اللي تبي




و صورة من طلباتنا







و اخيرا قهوه تركيه بس للاسف ما صورتها هههههههه , واحب انوه ان الاسعار لم تكن شعبيه بتاااتاا البــته يعني لاحد يحسب انه رخيص ,,



و للتقرير بقية " اخيرة" ,,,,

و اخيــــرا ,,

الجزء الاخير من التقرير الاسطنبولي


و طبعا بيكون التوجه الى مطار اتاتورك الدولي






و اخترنا السفر على الخطوط الجوية التركية لانها كانت الوحيدة اللي تاخذنا الى وجهتنا برحلة مباشرة ,, و على درجة رجال الاعمال و طبعا صورت لكم قاعة الانتظار فالمطار












و البوفية اللي ماكن فيه الا سندويجات جبن وخنزير مع انه كان وقت غدا






و الصعود الى الطائرة , كراسي البزنس اللي ما تختلف عن الايكونومي الا ان فيها طاولة فالنص و وجبات طعام " ذكرتني بحرين اير نفس الكراسي بس الفرق فاللون من احمر الى تركواز"







السلطه و المقبلات






الوجبة الرئيسية






و بعد ساعتين و خمس دقائق بالضبط وصلنا الى وجهتنا ,,,








مطار نـــيس الدولي ,, و منه الى مديـــنة كــــــــــــــــــــــــــــان الفـــــرنسيــــــــــــة ...





و انتظروني فالبوابة الفرنسية ,,

اعزائي .. كل اللي مر على سلسلة تقاريري لهذا الصيف و عجبته هالتقارير حبييت اضيف لمسه اخيره من التقرير حبيت اذكر شئ مهم و هو سعر الفندق



Elite World Istanbul Hotel
*****

خمسة نجوم و السعر كان للغرفه الواحده 175 دولار بدون الافطار

و كان الحجز عن طريق الانترنت موقع

www.hotels.com


وكان السعر الافضل بعد المقارنه مع كل المواقع و مكاتب السفريات



اما بالنسبة لتذكرة الطيران من اسنطنبول الى مطار نيس الدولي 275 دينار بحريني للشخص الواحد على درجة رجال الاعمال " بصراحة حسيتها ما تسوى "


وحبيت اذكر اننا اشترينا التذاكر و الفندق قبل اكثر من شهر من موعد السفر ...


اي استفسااار حاضرين ,,