الموضوع: ( دوسلدوورف وماحولها 2010 م )

بســم الله الرحمــن الرحيــم



مثل ماهو واضح من العنوان إن التقرير راح يتكلم عن سفرتنا خلال صيف 2010 م ( لدووسلدورف والمناطق والبلدان اللي حولها ) بعد مشاورات كثيره بين السكن في كولون أو دووسلدورف استقرينا على الأخيره ، وبعد مشاورات كثيرة بين ميونخ وبين دووسلدورف استقرينا على الأخيرة ولسبب واحد ان في صيف 2007 م زرنا ميونخ والمناطق والبلدان القريبة منها ، والحمدلله اختيارنا خلانا نطلع بسفرة حلوة وموفقة من جميع النواحي .

والأكيد التخطيط للسفرة يبتدي من منتدى العرب المسافرون وقوقل وغيرها من المنتديات ، وبعد ماستقرينا بلشنا بالحجز قبل السفره بشهر والحمدلله كل شي كان تمام اللهم الفندق كنا نبي في الإنتر كونتيننتال بس مالقينا طول مدة السفرة فاستقرينا على الهوليدي إن .

راح احط لكم المختصر الخاص بالحجوزات :

منطقة السكن : دووسلدورف duesseldorf .
اسم الفندق : هوليدي إن سيتي سنتر Holiday Innduesseldorf city centre koenigsallee .
الخطوط : الإماراتيـــــة .
مسار الرحلة : الدوحة - دبي - دووسلدورف - دبي - الدوحة .
التاريخ : 21/7/2010 م حتى 9/8/2010 م نوصل قطر : 10/8/2010 م
وقت الإقلاع :9:45 صباحاً بتوقيت قطر ، وقت الوصول : 7:30 مساءاً بتوقيت دووسلدورف .
وقت العودة : 3:00 عصراً بتوقيت دووسلدورف ، وقت الوصول : 2:30 فجراً بتوقيت قطر .

بسم الله نبدأ تقريرنا لدووسلدورف

مواضيع عشوائيه ممكن تكون تعجبك اخترناها لك:

• استفسار بخصوص استيكر الطرق
• المترددين في قضاء عطلة الصيف في المانيا لا يدخلوا على الموضوع
• سؤال بخصوص تأجير سيارة
• الطريق الى مطار هان؟
• مهرجان النحت على الرمال فى ألمانياصوور
• اخوي ابو عمر اخواني المشرفين لحظه من فضلكم
• الحجز من
• استفسارات عن روست وقارمش و زيلامسي بليز يالاخوان
• القرار صعب والوقت ضيق الرجاء مساعدتي
• من أناقة ميونيخ إلى رومنسية ستراسبورغ إلى السحر الباريسي تقرير بالصور
• ابي رايكم في الفندق
• حسبي الله ونعم الوكيل الله لايربحهم
• مساعدة في جدول رحلة وايجار سيارة
• استفسار ارجو المساعدة من المشرفين والاعضاء
• افزعوو لي قرب السفر وينك يا ابو عمر
• مساعدة ترتيب جدول ارجوكم
• السياحة
• هل شركات تأجير السيارات مغلقة يوم الأحد؟؟
• لمن يهمه الامر
• قريبـــاً جـداً فانتازيا لانــد في تقرير مفصل وشامل

رجعنـــــــــــــــــــــــــا


البداية كانت في مطار الدوحة الدولي سوينا التشك إن وعلى طول رحنا على صالة الإنتظار ، وماقدرت أخذ الا صورة 1 ، والقاعة حلوة وهادية بس تبقى الصالات اللي في مبنى القطرية الخاص بالدرجة الأولى والبزنس أحلى وأشرح وفيها خدمات أكثر




وبعدها رحنا للبوابة عشان تبتدي رحلتنا إلى دبي ، والحمدلله كانت رحلة خفيفة وموفقة وماعانينا من شي اللهم ضيق الكراسي ، طول مدة سفرتنا من إلى كانت الطيارات صح كبيرة بس الكراسي ضييييقة للأسف اللي هي اصغر حجم .
وهنا أول ماوصلنا مطار دبي بتلقون خدمة عربات الأطفال في كل مكان ومجاناً وتسلمونها عند باب الطيارة أو في الأماكن المخصصة لها



طبعاً مطار دبي كبير وحلو وفيه خدمات لاتعد ولا تحصى ، من أروع المطارات ، ونزلت طيارتنا عند المبنى الجديد وانطلقنا لصالة الإنتظار وكانت ماشاء الله كبييييره ومليانه ناس وفيها خدمات حلوووه بس عيبها الحررررر لانها مفتوحه من كل مكان على الدور الأول + ان الزجاج منفذ سهل وقوي للشمس فكانت حاااااره بشكل لايطاق ويالله لقينا فتحات تكييف وقعدنا تحتها ، ومن الزحمه ماقدرت اصور الا صورتييين لكن هالصورتين ظالمين جمال الصالة





وبعدين حان وقت الإنطلاق إلى



عن طريق الخطوط الجوية الإماراتية

صـــــــور من داخـــــــــل الطيـــــــارة





وزعوا علينا هالعلبه وفيها لزقات تتلزق عالكرسي بالشي اللي تبونه ومجرد يشوفه المضيف بيعرف إيش المطلوب منه مع قناع العين الخاص بالنوم



بسم الله بلشنا رحلتنا



وهذي وجبة الغداء مع السويت





وطبعاً طول مدة السفرة قضيناها مع الأفلام والبعض بالنوم والبعض مع الألعاب والرسوم المتحركة




ترى الفلم حلو ويصيح

ومازلنا ننتظر وقت الوصول بالسلامة



الحمدلله هانـــــــــــــــــت



------------------------------------------

وبكـــــرة اكمــــل لكم البـــاقــــــي

تكملـــــة اليـــوم الأول ( يوم السفر والوصول إلى دووسلدورف )

الحمدلله وصلنا بالسلامة إلى الأراضي الألمانيه ، وكان المطار مايشجع الصراحه مظلم وتصليحات والأسقف فيه بعضها طايح او يمكن هم شايلينها ومبينه الوايرات والتمديدات ، بالعربي إستقبال غير مشجع وتحسون بكتمه وضيقه في المطار .
بس الحمدلله الإجراءات سريعة وخلصنا من كل شي بسرعة واخذنا تاكسي ( طبعاً هم نظامهم يوقفون بالدور وتركبون مع اول تاكسي فالصف ، يعني مافي بركب مع اقرب واحد للبوابة او مع احسن واحد يعطيني سعر )
المهم ركبنا التاكسي وانطلقنا للفندق تقريباً خذنا ربع ساعة ، واول ماحرك التاكسي اكتشفنا ان اللاب توب في التاكسي فكان صدمة لأن من البداية نسينا قاري بنتي وشنطتها اللي فيها الاشياء اللي تسليها فالبيت وبعد هالمره ننسى اللاب توب فالسيارة ، وعلى طول كلمت الرسبشن قبل مانسوي التشك إن وأي شي ثاني وقالوا بنكلم شركة التكاسي اللي فالمطار ونبلغهم .
المهم سوينا التشك إن بسرعه وبسهوله بس للأسف ماصورت الغرفة لكن عموماً تتميز ( بالنظافة ) وتعتبر غرفهم من غرف النوم المتعودين عليها في أغلب الفنادق اللي خاليه من الفخامة ، اللي هي سرير وخلفة صورة وعالجنبين ابجورة + طاولة التلفزيون وتحتها ارفف وثلاجة + طاولة الشاي + كرسيين وبينهم طاولة + طاولة مكتب + كبت الملابس .
ويومياً يبدلون الشراشف والفوط ، واللي يشتغلون خدومين ومتعاونين وبشوشين من أولهم لين آخرهم .
مع ملاحظة ان الوقت اللي كنا فيه كان في تجديدات في الدور الرابع ، يعني اللي بيحجز يطلب القسم المجدد .

وهذي صور اللوبي ( الصبح ) احنا وصولنا فالليل بس صورت الصبح بعد مافضى الفندق فالأيام الأخيرة وبتدوا يرجعون الناس لبلدانهم لان ماشاء الله من كثر السياح اللوبي ماكان يفضى .


مدخـــــل الفنـــــدق وتلاحظون العرابات الخاصة بالشنط ( اخدم نفسك بنفسك )



جلســـات موجودة في اللوبي



جلســــة ثانية ( والباب اللي ظاهر فالصورة ) يوديكم على حمام السباحة + الباركات رقم 2 وتسخدمون الأصنصير للوصول لها + الغرف ( اعتقد الغرف في هالقسم كبيره او يمكن سويتات )



المطعم الخاص بالفندق ، ولين حجزتوا طلبوا مع وجبة الفطور



هذا قسم تابعة لقاعة المحاضرات والإجتماعات عندهم



وهذا جزء تابع للبار ( الله يهديهم ) وتراه اول ماتدخلون الفندق بتلقونه قبالكم بس ماقد اشتكينا ولاحظنا مضايقات اللهم شكله وموقعه يضيق لأنه فالواجهه



-----------------------

معلومات للي يبي يستخدم باركات السيارة :
اليوم ب19 يورو ، والساعة ب3 يورو ، اذا صادف دخلتوا وطلعتوا في اقل من نص ساعة مايحسبون عليكم
ونظامهم ياتدفعون لهم يومياً او يخلونه على حساب الغرفه وتدفعون وقت التشك آوت ، لسهولة طلعتكم من الباركات الأحسن تنزلون معاكم كرت الموقف و وقت ماتبون تطلعون سلموه للرسبشن عشان يطقون الكرت وتعطونهم رقم الغرفه عشان اول ماتطقون الكرت في الجهاز الخاص بالمواقف على طول بيفتحون لكم الباب .
بس لو ماسويتوا هالشي بتضطرون تحت فالمواقف اذا طقيتوا الكرت تنتظرونهم يردون عليكم وتعطونهم رقم الغرفه وتقولون لهم ان نبي نطلع والموضوع بياخذ منكم دقيقتين انتظار .

----------------------

بعد ماخلصنا من الفندق والمعلومات والجولة ، نزلنا نستكشف شارع الملوك حيث ان الفندق يقع على بدايته ومجرد دقيقتين مشي إلى 3 دقائق بتكون في وسط شارع الملوك ، طبعاً الجو وقتها كان باااااااااااارد ومطر قوووووووي وصار ليل والمحلات صكت فخذنا جولة سريعة ورجعنا الفندق نرتاح وسألناهم عن اللاب توب وللأسف مافي خبر وكان عشانا من ( صب واي ) وهو قريب من الفندق بس تطلعون من البوابة وتروحون يسار بتلقونه

اليـــوم الثـــاني ( اكتشاف اشهر الأماكن الموجودة في دووسلدورف وتكون مزدحمه بالسياح واهل البلد )


فالبدايه أول شي سويناه قبل مانطلع من الفندق ، سألنا الرسبشن عن اللاب توب اللي نسيناه في التاكسي وللأسف مافي خبر ، بس بيني وبين نفسي حاسه انه بيرجع وان ربي مراح يخيب ظني ، فتوكلنا على الله وبدينا يومنا .

هنا حديقة صغيرة تعتبر نقطة عبور عشان توصلون لشارع الملوك وهي موجوده بالضبط جدام الفندق ، او ممكن تطلعون من الفندق وتروحون يمين واول إشارة تصادفكم تلفون يسار وبتلقون نفسكم في شارع الملوك .




فطلعنا من الفندق ورحنا حق محل تأجير السيارات avis عشان نستلم السيارة وقالوا لنا جايين بدري والسيارة للحين ماوصلت فتعالوا عالساعة 1 الظهر .

هذي صور من الطريق لمحل التأجير



ولو تدققون بتشوفون علامة محل التأجير باللون الأحمر




ولما شفنا باقي 3 ساعات على وقت استلام السيارة قررنا نروح المدينة القديمة مروراً بشارع الملوك ، وواضح من العلامات اللي فالصورة ، المدينة القديمة ( آلتشتاد ) وشارع الملوك ( كونقس آلي )




وهذي البحيره اللي تتوسط شارع الملووك وعلى يمينها ويساراها المحلات والمطاعم والمجمعات التجارية وفندق الإنتر والبنوك ، بس المحلات والمطاعم تصير على جهه وهي اللي يكون فيها الحركه وزحمة الناس والجهة الثانية فيها البنوك وغيرها من المباني وفندق الأنتر




وهنا وصلنا المدينة القديمة ، واحنا دخلنا لها من جهة الاكشاك ( هالمكان روعه ويفتح النفس ) وفيه كل شي حلو وغريب واهم شي الورود والفواكه الطازجه ، والمخابز واللحوم والمطاعم .




واترككم مع الصور الخاصة بأكشاك البيع











صابوووووون وأدوات العناية بالجسم



حلوياااااات وكيك وبساتيييك أشكال وألوان



حفر على الخشب وادوات ثانية مصنوعة من الخشب بمهاره





مكسراااااااااات



واحنا نتمشى ومازلنا في منطقة الاكشاك شمينا ريحة بهارات هنديه قويه ، فقلنا أكيد هالريحه طالعه من مطعم هندي ، وفعلاً في عربه تبيع الأكل الهندي بس ماجربنا الأكل عندهم لان المكان زحمه على طووووووول وخذت هالصوره في آخر يوم لنا في دوسلدورف وكان المحل فاضي لأنهم قربوا يصكرون



-----------------------------

ومع هالجزء تنتهي جولتنا في منطقة الاكشاك وبندخل على المدينة القديمه ، مع العلم انهم جنب بعض وانتوا فالاكشاك تشوفون المدينة القديمة وماتدخل السيايير في هالمنطقة فقط للمشاه


وهالصور بتوضح لكم المدينة القديمة ( عباره عن مدينة كبيرة وفيها ممرات وتفرعات كثيره وتتميز بوجود المطاعم والمقاهي بكثرررررة وفيها طبعاً الحانات وبكثره ( الله يهديهم ) وفيها محلات للتسوق ، يعني مكان رووعه وكل يوم راح تكتشفون فيها شي حلووو وجديد وفعلاً على مدح الأعضاء في تقاريرهم المنطقه وايد حلوه وشرحه وفيها حياه وناس .
بس تجنبوها فالويك إند من بعد الساعة 10 ونص فالليل ، لكن فالايام العاديه نقعد فيها لين الساعة 11 او 11 ونص بالليل .
وللأمانة الصور ظالمه المكان لأن حلاته هالمكان تشوفونه عالطبيعه ، وعلى كثر مانروحها مازهقنا منها .












هذي 3 مطاعم لبنانية جنب بعــــض



وهذا سوبر ماركت مفتوح 24 ساعة ومنتشر بكثرة في المانيا ، وهنا موقعه عند الاكشاك



-------------------------------------

بعد اشوي بنطلع على منطقة النهر ( للعلم مازلنا في اليوم الثاني وكان الجوو روعه براد ومطر )

من خلال المنطقة القديمة تطلعون على النهر ، وفي جزئيين للتمشي عند النهر ، المنطقه اللي فووق وتكون بس للتمشي ومافيها مطاعم ، والمنطقه اللي تحت هذي اللي يكون الكورنيش فيها ملاصق للنهر ومرسى العبارات وهالمنطقه مليانه مطاعم بس مافيها مطاعم عربية

نشوف الجزء اللي فوق








هذي المنطقة اللي تنزلون لها بالدرج وملاصقة للنهر






واااااو وناسه ملاهي عالجهه الثانية من النهر وكانت موجودة من تاريخ ( 17/7 حتى 25/7 ) وأكيد زرناها وبحط لكم صورها فالأجزاء الجاية )




وأحلى شي تشوفون كل وسائل المواصلات في نفس الوقت ( السيارات والقطار عالجسر ) والطيارات وقت الإقلاع والهبووط ، والنهر والعبارات اللي فيها ، منظظظر حلوو كل شي فيه يشد الإنتبااه



بعدها رجعنا مره ثانية للمنطقة القديمة عشان نتغدى غدا خفيف ونروح نستلم السيارة ، واخترنا ناكل في مطعم لبناني وهو موجود من ضمن ال3 مطاعم اللي حطيت صورتهم فوق ، ونظامه تختارون الأكل وهلب يوور سلف اما الباقي لا تطلبون بالمنيوو والأكل يوصلكم لحد الطاوله .









وبعد هالغدوه الخفيفه طلعنا من المنطقة القديمة ورحنا نستلم السيارة ، وخذت لكم صور سريعه لمحل حلويات جنب المطعم اللبناني ، ومشهوره هالماركة في المانيا وعجبتني الحركات اللي مسوينها وطريقة العرض وللعلم للبيع بعد مش بس للعرض وكنوع دعاية للمحل .






والحمدلله استلمنا السيارة وخذنا جولة في شوارع دووسلدورف وكانت جوله فيها 100 غلطه بس بعدين صار الموضوع سهل والسواقة ولا أروع في اوروبا حتى اللي مايسوق بيتمنى انه يسوق ، ولو جربتوا بتكنسلون القطارات والتكاسي وبتعتمدون على تأجير السيارات ، بس صارت لنا مشكله مع المحل انهم ماعطونا كرسي اطفال وقالوا انتوا توفرونه مع ان وقت الحجز طلبنا كرسيين أطفال ، المهم حركنا من عندهم وتمينا اسبوع نطلع بالسيارة من غير كرسي أطفال وندعي ان الشرطة ماينتبهون لنا وفاليوم السابع رحنا ندور كرسي عساس نشتري بس كلها احجام حق اطفال اقل من سنه ، ولما رجعت لورقة الحجز لقيت انه مكتوب ان احنا عندنا اطفال وطالبين كراسي ، فعلى طول اتصلت لها وتهاوشت معاهم وقلنا لهم هذي مسؤوليتكم انتوا توفرونه احنا جايين سياحه مش جايين نضيع وقتنا ندور على كرسي وقالوا تعالوا استلموا الكرسي ، اللي طلع ان ماكان عندهم قبل وكانوا يبون يصرفونا ويبلشونا واحنا نشتري الكرسي ، بس غيره ماصارت لنا اي مشكله معاهم .

المهم بعد ماستلمنا السياره وشفنا الأغلاط قامت تزيد رجعنا باركات الفندق وخليناها ترتاح هههههه وقلنا بنطلع فيها للمسافات الطويله اما داخل دووسلدورف مراح نحتاجها ، بس بعد التمكن استخدمناها داخل دووسلدورف وخارجها وصارت رفيقتنا في كل مكان مع ملاحظة ( ان كل المناطق اللي زرناها السواقه في شوارعها سهله اللهم دووسلدورف اشوي يبيلها تركيز وبلجيكا يبيلها تركيز من كل اللي فالسياره لأن مافي التزام بقواعد المرور وكل واحد يطلع في ويه الثاني والإشارة تكون حمره وعادي يمشون )
فالنهاية انصحكم وبشدة بتأجير سيارة ولا تفوتون متعة هالشي .

وطلعنا من الفندق ورحنا جهة فندق ( شتايقنبرغر ) عشان نروح الحديقة ، ولو تتطلعون على تقارير الأعضاء بتلقون المنقطة جدام الفندق حلوة ومرتبة بس احنا يوم رحنا شفناها بهالصورة



وهذي صور للحديقة ، بس للأسف نسينا ناخذ أكل للبط لكن رجعنا لها كذا مره بعديين وأكلنا البط






ومن الحديقة رجعنا لشارع الملوك مره ثانيه عشان نتسوق ورحنا ko جاليري مجمع صغير وفيه سوبر ماركت تحت وكانت هذي مشترياتنا ، اهم شي النوتيلا



وطول ماانتوا تتمشون في شوارع دووسلدورف بتلقون المحلات المتخصصه بالأدوات المنزليه والمطبخ موجوده بكثره وكل محل عنده اشياء احلى من المحل الثاني






ولما ظلم الوقت قررنا نرجع للمدينة القديمة عشان نتعشى ونرجع الفندق نرتاح ، وهذي صور من الطريق للمدينة القديمة ، وبعد وقع اختيارنا على مطعم لبناني غدا وعشا مع العلم ان المطعم يصير واحد من المطاعم ال3 اللي ذكرتهم فوق










وهذي صورة ليلية للمدينة القديمة ( ياحلاتها فالليل )



وفالطريق للفندق شفت مطعم القرود ( ذكرته إحدى العضوات في سفرتها لدووسلدورف ومدحت اكله بس احنا ماجربناه محد تشجع بس انا كنت متشجعه لكن للأسف ماجربته ) وقريب من فندقنا ، بس تطلعون من بوابة الفندق راح تشوفون عماره عاليسار طويله وكلها زجاج ، المطعم يصير وراها بالضبط في بناية لونها أبيض .




---------------------------------

ونشوفكم بكرة إن شاء الله في الجزء الخاص باليوم الثالث

اليــــــوم الثالــــــــث ( مازلنا نتمشى في دووسلدورف )


طلعنا من الفندق عالساعة 12 الظهر ورحنا نتسوق في ( الكافهوف ) هالمحل مشهور ولازم في كل منطقه موجود وفالمنطقه الوحده تلقون فيها من فرعين إلى 3 أفرع لهالمحل ، وفي دووسلدورف اللي انا شفتهم وقريب على فندقنا هم 3 أفرع واكييد في أكثر من هالعدد .
اللي احنا رحنا له يعتبر قريب على فندقنا ( مجرد ماتطلعون من البوابة الرئيسية تلفون يمين وتمشون سيدة وبتشوفونه على إمتداد النظر واضح ومبين .



وبعد جولة تسوقية خذت منا ساعتين ونص رجعنا للفندق نرتاح وبعدها رحنا عالمدينة القديمة ، وهالساعة ومحطة الترام لازم بتمرون عليها وانتوا رايحين للمدينة القديمة من جهة الكافهوف اللي يصير على شارع الملوك .



بعد خذنا جولة تسوقية سريعة وكان وقتها بررررررررد ومطر واخترنا نتعشى في مطعم النورد سي
( مطعم متخصص بالسي فود فقط ونظامه هلب يور سلف ) ومافيه منيوو ، الأطباق جاهزة ومطبوخة وانتوا تختارون اللي تبونه وكان هذا اختياري



هذا سيكل عائلي وموجود فالمدينة القديمة ، في منه اللون الوري واللون الأصفر أو الأخضر ، نسيت اللون الثاني بصراحة



وكان وقتها 2 يقدمون عرض وكانوا مسويين جوووو



بعدها رحنا عند النهر عشان نروح بالعبارة لمدينة الملاهي ( وهذي صور توضح لحظة الإنطلاق لين الوصول علماً ان موضوع الإنتقال للجهة الثانية من النهر خذ منا 3 دقائق تقريباً ، والتذكرة كانت روحة فقط وللعودة لازم تقصون تذكرة ثانية )



وصلنــــــــــــا الملاهي

الملاهي حلوه وكبيرة وفيها العاب تصلح للكبار والصغار + فيها اكشاك لبيع التحف و الأعمال اليدوية + محلات الأكل بأشكالها وأنواعها حلويات وجبات خفيفة وجبات دسمة كيك عصاير كريب .... إلخ )







هاللعبـــــة ذكرتني بمصر













وهذي اللعبة تطلعون على سير متحرك يتحرك بسرعه وبعدين تنزلون عالزحليقة


بعد لعبة سباقات الحصن ذكرتني بمصر







وهذا بس مهمته يراكض ورا الناس ويخوفهم بس كان مسوي جووو وربكه





محل يبيع صناعات يدوية من الخشب ، وطلع محل لشباب من المغرب العربي وعندهم اشياء حلوة واسعارهم معقولة



هذي الشواية عجييييبة وريحة اللحم والشواي عجيبة اكثر ، وحجمها كبير واااااايد



جوز الهند منقعينه في ماي باااااااااااااارد



حركة الكاتشب والماسترد المعلقين عجبتني ، بس تاخذون الطلب اللي تبونه وتحطون من النوع اللي تبونه



وهذي آخر صورة للملاهي وكان ودي احط لكم صور اكثر للألعاب بس تعرفون زحمة الناس تخرب الصورة وبعد كان يطق مطر فماقدرت أخذ صور أكثر للألعاب ، عموماً ملاهي حلوة وماتتفوت وبتحسون فيها بتغيير الجو حتى اللي مايلعبون بيستانسون
وبعدها رجعنا نتمشى في شارع الملوك وتعشينا من مطعم ( صحارى ) لكن تيكآواي
وموقعه ( تطلعون من الهوليدي إن وتروحون يمين ويصير عند ثاني إشارة عاليمين بالضبط عالزاوية اليمين مقابل مطعم ماريدو )

اليـــــــوم الرابـــــــــــــــع ( بون + دويسبرغ )


طلعنا من الفندق الساعه 11 ، وبما ان بنمسك خط وإحداثيات واسامي أماكن فجهزت مساعدنا فالسفر وصرنا مانستغني عنه



وهذي صورة من الخط الســريع بس صادفتنا زحمه بسيطه ، والطريق من دووسلدورف لين بون خذ منا ساعة 1 بس



بداية دخول بــــون ، وهالشوارع اللي مظلله بأشجار موجودة بكثر في ألمانيا



وصلنـــــا بـــــون ، والمنطقة المسورة فكرناها حديقة لكن طلعت مقبره



بداية دخلونا سنتر بون ، بتشوفون هالمبنى وخلفه حديقه كبييييره أو الأصح مسطح عشبي وبتشوفون صوره بعد اشوي



لافته توضح وصولنا للسنتر ( خذنا الأحداثيات من موضوع العضو مهندس كويتي خاص بالإحداثيات وبتلقونه في قسم التقارير وبالضبط وصلنا للمواقف اللي تطلعنا عالسنتر )



اول شي لفت نظري هي محلات الورد ، تنسيقهم روعه على انهم صغار بس فيهم تفاصيل وايد وطالعين حلوين
بعد ماوصلنا السنتر خذنا جولة فيها ودخلنا بيت ( بتهوفن ) وشفناه صدفه بس للأمانه ماتذكر شلون عرفنا ان هالإتجاه يوصلنا لمنزل بيتهوفن
البيت من برع صغير بس من داخل كذا قسم وفيه غرف كثير ، والأحلى تسمعون صوت الخشب وانتوا تمشون فتحسون انكم صج في بيت قديم ، وللأسف التصوير ممنوع داخل البيت لكن خذت لكم صوره وطاحت علي الموظفه وعصبت ، لكن تصوير المنزل من الخارج + الحديقه عادي مب ممنوع .
بالإضافه ان البيت في محل تذكارات صغير يبيعون كل شي يخص بيتهوفن .







هذي الصورة اللي حصلت هوشه بسبتها



هذي الصوره تبين لكم ان البيت اللي يشوفه من برع مايقول ان فيه حديقه وكذا قسم ، فالبداية فكرته عماره صغيره من 3 ادوار





وبعدها كملنا جولتنا في السنتر








سباق دراجات كانوا مارين وسط السنتر



وهذي خلفيه كبيره شكلهم كانوا حاطينها من أيام كاس العالم تشجيع للمنتخب الألماني













وفي وسط السنتر كانوا مسوين كذا ملعب رملي حق لعبة الطائرة + عروض تسويق لسيارات جديدة
ومخصصين فعاليات حق الأطفال والكبار بس من الزحمه في الصور ماقدرت ادرج لكم الا هالصورة وتعتبر اوضح صورة


بعدها قررنا نتغدى ورحنا ماكدونالدز ، وكانت وجبة الهابي ميل عندهم على سبونج بوب ، كل شي على سبونج بوب حتى الشعب صاير عنده إدمان شي اسسمه سبونج بوب



والوجبات الثانية عندهم أشكال وانواع مب موجوده عندنا وماتوقع ينزلونها عندنا ، وخذنا ربيان



بعدها قررنا نروح الحديقة اللي ورا المبنى الأصفر ( ياريت اللي يعرف هذا مبنى شنو يقول لنا )













وهذا ممر مشجر يفصل بين الحديقة + قسم الألعاب ( قسم الألعاب فيه مراجيح وزحليقات والعاب رمل )





----------------------------------

وعند هالصوره تنتهي جولتنا في سنتر بون ، وبعدها نطلع لدويسبرغ
ملاحظة :
بعضهم يعتبرون دويسبرغ هي بون ، ويقولون احنا ساكنين في بون مش دويسبرغ ، والبعض يسمي بون بالأرقام ، يعني بون 1 بون 2 بون 3 ، بس هذي كلها تسميات قديمه .
والسنتر اللي احنا فيه + دويسبرغ ماعرف كانوا يتسمون ب( بون 1 او بون 2 او بون 3 ) طبعاً هالمعلومة خذناها من ناس لهم خبرة في بون وسنوياً لازم يمرون على بون
ودويسبرغ يكثر فيها الخليجين والعرب اللي جايين للعلاج وتتعبر منطقة صغيرة وسنترها صغير وفيها محلات عربيه وتركيه كثيرة ، حتى الشقق المفروشة لافتاتها كلها بالعربي واساميها عربية ، والموظفين العرب موجودين فيها وبكثثثثثثثثثثثرة

بعد ماخلصنا من سنتر بوينت والاماكن اللي فيه طلعنا على دويسبرغ ، وخذنا فالطريق أقل من ربع ساعه بالسيارة



واخترنا اقرب موقف للسنتر و وقفنا فيه ، واستغربت في معظم مواقف المانيا وجود باركات مخصصه للنساء فقط ، وفي باركات مخصصه للعوايل اللي عندهم عربات تسهل نزولهم وركوبهم السيارة ، بس للحين ماعرفنا سر المواقف المخصصة للنساء



وكانت المدينة نايمه كل شي صاك لان الويك إند بعكس سنتر بون ، وهذي المدينة اللي ذكرت لكم يكثرون فيها العرب والخليجين بشكل ملفت للنظر وان المحلات اغلبها مكتوبه لافتاتها بالعربي ، والشي اللي يضايق فيها كثرة الناس اللي يطلبون فلوس ومساعدة ، حسيت أني في وحده من الدول العربية





هذا مجمع سينمات



وهذا الطريق اللي يودي لسنتر يقعدون فيه الخليجين وبكثررررره ، صج في هالمكان بتنسون انكم في اوروبا ، بس وقتها مثل ماقلت كل شي صاك وكان عددهم محدود لكن مسيطرين عالمكان هههههه







وبعدها طلعنا وقررنا نرجع دووسلدورف ، وفالطريق كان في عرس لناس مسلمين ، والأخ يصور الزفه



واذا شفتونا تعشينا من هالمطعم اعرفوا ان رجعنا هلكانين وقررنا نقعد فالفندق ونسنغني عن التمشي في دووسلدورف من كثر التعب ، بس ابتعدوا مثل ماقلت لكم قبل عن التبوله و ورق العنب لان فيهم طعم مروره



------------------------------------

اليوم الخامس :
للأسف للأسف اني صورته بالتلفون والتلفون اخترب وبعد مصوره فيه كم لقطه حق الأيام الجايه وراحت كل الصور علينا للأسف لكن كل شي مصكر لان كان الأحد فأخترنا نروح مدن صغيره نضيع اليوم فيها و زرنا Recklinghausen سنترها حلو على انه صغير بس كالعاده في محلات مشهورة وطلعنا منه رحنا حديقة حلووه للتمشي والقعده اسمها ruhrfestspielhaus كلها مسطحات خضره واشجار عاليه والناس تلعب كوره واللي فارش مع اهله وياكل + فيها حديقة حيوانات مصغره والعاب كأنكم في مزوعة .
وبعدها رحنا Haltern am see تبعد عن المدينة السابقه 10 دقايق وقررنا نروح البحيره بس وصلنا عالساعه 6 وكل الفعاليات صاكه للأسف .
فرجعنا دووسلدورف وكملنا باقي يومنا في شارع الملوك والمدينة القديمة


تقريرنا الجاي اللي هو اليوم السادس عن كولون ( تابعونا لأنها مدينة روعه واللي يكون قريب منها لايفوت زيارته

افتراضي

في هاليوم قررنا نزور ( كــولــــــــــون )

لما طلعنا من الفندق كان الجو بااااااااااارد ومطر مطر قوي من قلب ، واساساً يومها مقررين نروح كولون بالقطار وعطينا السيارة إجازة ، توكلنا على الله وخذنا تاكسي ورحنا محطة القطار ( وهذي صور توضح شلون كان الجو ) مع ملاحظة ان كل نص ساعه يتحرك قطار من دووسلدورف رايح لكولون .





وصلنا محطة القطار ، وكبيره ماشاء الله وزحمه من قلب



ورحنا نقص تذاكر والنظام بالترتيب ، تاخذون رقم وتوقفون عند الخطوط السوده والبيضه ماتعدونها ، وتنتظرون لين يطلع رقمكم فالشاشة مع رقم الكاونتر وبعدين تقدرون تروحون للكاونتر وتقصون التذكرة .







هذا مجسم لمحطة القطار ، تحطون فيه اعتقد 1 يورو وتلعبون



بعدها قررنا نطلع فوق عشان ننتظر القطار ، وطبعاً وقتها زاد المطر وزادت برودة الجو ( عموماً يومياً كان يطق مطر في دووسلدورف بس هاليوم كان واحد من أكثر الأيام اللي طق فيها مطر وايد وكان الجو بارد )



لاحظوا شلون المطررررررررررررررررررررررر والضباب



الحمدلله وصل القطار وفالطريق إلى كولون الساحره



محطة كولون حلوه وفيها محلات وايد بس ممراتها اضيق من محطة دووسلدورف ، وهنا في طريقنا للدوم متبعين الإشارات في المحطة



-----------------------------

بكرة أكمل لكم إن شاء الله المناظر اللي خارج محطة القطار




وبعدها تبتدي جولتنا فالحديقة ، ولاحظوا السور عند بعض الحيوانات ( الله يعزكم ) مجرد سلك حديد















لا حظوا الفهد يمشي على هالخط رايح راد ومايطلع عنه





في طريقنا حق الفيل ، ولاحظوا السور نفس جلد الفيل





الفيله موجوده في مكان مصكر ( والريحه لا تطاق ) وعالجهه الثانيه موجوده في مكان مفتوح







بعدها دخلنا عند الغوريللا ، نظراتهم تخوووووووف ومن الخوف ماخذت لهم صور حسيتهم حاقدين لكن صورت لكم المكان المصكر اللي هم فيه














هذا الخط معناته ممنوع الدخول ( فقط لموظفين الحديقة )



واهم اهم شي فيها العاب أطفال ( هذي الالعاب كنت اسميها برنامج غصبن عنك )









و وقت ماكنا عند الالعاب طق مطر قووووي فطلعنا من الحديقه ، ورحنا نتسوق بس نهائي الجو مايساعد ، لكن خذنا فكره عن السوق والمحلات وقررنا نرجع لكولون مره ثانيه ( نصيحه اللي يحب الناس والحشرة والحياة يسكن في دووسلدورف او كولون والمسافه بينهم نص ساعه بالسيارة والقطار )
بعد مازاد المطر والبرد قررنا نرجع حق حبيبتنا دووسلدورف





الحمدلله وصلنا وخذنا تاكسي عشان يوصلنا مطعم ( كرشنا ) مطعم هندي لذيييذ يصير في نهاية المدينة القديمه ، بحط لكم صوره في الأجزاء الجاية



وبعدها رجعنا الفندق مروراً بشارع الملوك وهذي صورة ليلة له ، مش واضحه بس عموماً إضاءة الشارع تكون بهالطريقة في الليل



مروراً بالحديقة اللي مقابله الفندق ، اللي كراسيها تولع في الليل



--------------------------------

مع السلامه واشوفكم فالجزء الجاي
بس نصيحه اللي بيروح كولون لايفوت زيارة حديقة الحيوان ممتعه للصغار والكبار حتى اللي مايحبون الحيوانات ( الله يعزكم ) مثلي ، بيستمتعون فيها خاصه لو شافوا الفرحه في عيون الصغار

اليــــوم بتكلم عن زيارتنا ل ( موفي بارك )

خذنا فالطريق أقل من ساعه ، ومدينة الملاهي حلوة انصحكم بزيارتها تصلح للكبار والصغار ، فيها قسم قناة ( نيكولوديان ) + قسم الكاوبوي واعتقد فيها قسم ثالث بس مب متذكرته .
وفيها العاب وايد تناسب الكبار + عروض تصوير الأفلام يراوونكم شلون يصورون الأفلام + سينمات الخيال عندهم 4 مباني وكل مبنى خاص بعرض .
انا جربت العرض الخاص ب( آينشتاين واختراعاته ) وفيها شاشة عرض سينمائيه واحلى مافيها ان الكراسي تهتز وتتحرك .
بس نصيحه اول ماتدخلون اخذوا بروشور العروض عشان تعرفون الأوقات لأن ممكن يصادف وقت عرض وتضيعون وقته في الألعاب ، الألعاب موجوده طول اليوم بس العروض لها ساعات محدده ، فالأحسن دخلوا العروض اللي تعجبكم قبل وبعدين لعبوا .
وماشاء الله هاليوم كان زحمه مع ان مش ويكإند فإضطرينا نوقف فالمواقف الخارجيه للحديقه وتمشون تقريباً 10 - 15 دقيقة عشان توصلون البوابات .

خلنا الحين مع الصور ( بداية الإنطلاق عالخط السريع اللي يمر عند مطار دووسلدورف ) وناسه هالخط



لاحظوا موقفهم الإضافيه



فالطريق نمشي رايحيين جهة البوابات ، ومرينا على مناظر تفتح النفس





البوابة اللي بعد شباك التذاكر



المحلات وماادراك مالمحلات ، بتستخفون كبار وصغار جهزوا جيوبكم













تصوير مع شخصيات فلم ( آيس إييج ) بس للأسف مالحقنا مع سبونج بوب وشلته ودورا وشلتها


بداية دخولنا قسم الألعاب الخاص بنيكولوديان ( فيه العاب للصغار والكبار ) هذي ميزتها ان الاهل يلعبون مع عيالهم في الألعاب المخصصه لهم ، وملاحظه ان اي طفل طوله اقل من الطول المطلوب ( اللي هو مادري كم لاني نسيته خخخخ ) اهله لازم يركبون معاه اللعبه ، عموماً اللي عيالهم اقل من 5 سنوات خل يعملون حسابهم ان بيركبون معاهم اللعبه ، وهذي جوله فالقسم وصورت لكم الألعاب اللي فيه اللهم 3 لعبات ماصورتهم .













عرض حق الشخصيات المحبوبه عند الصغار والكبار ، بالتحديد سبونج بوب ادمان عليه الالمان ولو تتذكرون وجبات ماكدونالدز الهابي ميل اللي صورتها لكم على شخصية سبونج بوب .







أما الجزء الثاني ( للأسف للأسف الشديد صورته بالجوال والقهر غيرت الشريحه وبعد ماطلعت الصور شكلها متخزنه على التلفون ) صج صج قهر لأن القسم الثاني يناسب الكبار أكثر ومحلاته حلوه خاص محلات الأكل
بس لين دخلتوا قسم الكاوبوي في بريطاني مع ولده يبيعون بطاطس كيرلي يلفها على قطعة خشب طويله ويقليلها وبعدين تختارون النكهات ياملح او خل وملح أو باربكيور أو جين أو مكس كل الأنواع اللي ذكرتها ، الطعم روووووعه وماينشبع منه

بعد ماخلصنا جولتنا فالملاهي قلنا بنزور حقول الفراوله بس مشينا عالأسهم و وصلنا حق محل وماشفنا مزارع نقطف منها ونشتري ( طبعاً هذي صوره ثانيه للمواقف واحنا طالعين ، شوفوا الترتيب شلون والنظام ، للعلم المواقف بفلوس لين جيتوا تقطعون تذكرة بلغوهم انكم واقفين فالمواقف )

















----------------------------------

بعدها قررنا نرجع دووسلدورف ونقضي باقي اليوم في شارع الملوك والمدينة القديمة ، عاد الحين استاذنكم وبكره إن شاء الله أكمل لكم باقي الصور الخاصة بهاليوم ، وعد بكره إذا الله احيانا راح تشوفون الصور .

نكمل اليوم الخاص بزيارتنا ل( موفي بارك )

بعد ماطلعنا من حقول الفراولة قررنا نرجع دووسلدورف ، وعلى طول على شارع الملوك وبما أن عدت الساعه 8 فكل المحلات صكت ، تمشينا فالشارع وتفحصناه عدل ، الصبح من كثر الزحمه والناس ماتبين روعة الشارع بس فالليل مع الهدوء تكتشفون اشياء مريتوا عليها الصبح لكن ماشفتوها .
عاد هالشارع اللي يبي الماركات وغيرها بيلقاها فييييه ، ومرينا على محل خاص بالكيك والتشوكلت والحلويات وحاطين ممنوع التصوير بس بما ان صاكين استغليت الفرصه وصورت ، لأن شغلهم روعه ودقيق









بعدها كملنا جولتنا لين آخر الشارع وبالتحديد عند بوتيك إسكادا بيصير على يمينكم ، لفوا يمين وبتلقون واجهة مجمع شادو أركادان





لين قابلتوا واجهة المجمع لفوا يسار وبتلقون شارع طويل كله محلات بعد غير اللي على شارع الملوك وامشوا لين نهايته وبتقطعون شارع رئيسي وكملوا سيده بتلقون شارع رئيسي على يمينكم ويساركم كله محلات من ضمنها ( كرشتاد + الكافهوف + c&a ) بس ترى تعب ومشي جامد لان المسافه مب بسيطه خاصه لو بديتوا من اول الشارع





بعدها رحنا المدينة القديمة عشان نتعشى وهذي صور من جولتنا السريعه وبوصف لكم شلون توصلون مطعم كرشنا ( هندي ) اكلهم لذيييييييذ





وعشان توصلون المطعم تطلعون على الساحه اللي فيها تمثال الحصان واعتقد مبنى البلديه ، وخلكم مقابلين التمثال وبعدين لفوا يمين وامشوا سيده بتلقون محل متخصص بالخوص على يساركم



وكملوا مشي بتشوفون مطاعم وبعدها ساحة تكاسي



بعد ساحة التكاسي بالضبط بيجيكم شارع لفوا معاه يمين وامشوا اشوي وبتلقون المطعم الهندي ( كرشنا ) طبعاً هو له كذا طريقة للوصول بس انا شرحت لكم من وسط المدينة القديمة ، ورحنا له من بعد الساعه 11 وكان فاتح ، عموماً مطاعم المدينة القديمة اتم لين 11ونص او 12 .









وبعدها رجعنا نمشي لشارع الملوك عشان ناخذ السياره ونروح الفندق نرتاح ( وهذي ملكتنا متربعه على عرش الملوك في شارع الملوك )



---------------------------

طبعاً مافي صور للاكل لانها بالتلفون للأسف الشديد ، بس صورت لكم اكل مطعم تاج محل بالكاميرا وهالمطعمين متشابهين في كل شي ، حتى راعي كرشنا قال لنا روحوا تاج محل اخوي يشتغل هناك بس يوم رحنا تاج محل ماسوا دعاية حق كرشنا
عموماً هالمطعمين احلى من تندوري اللي مقابل فندق نيكوو ، مانصكم بزيارته .

وإلى اللقاء بجزء جديد

الجزء هذا راح يتكلم عن رحلتنا لمنطقة ( أوبرهاوزن ) فيها مجمع ومدينة ملاهي وجلسات مطاعم وكافي شوبز خارجيه بالإضافه لمبنى الحياة البحريه ( سي لايف ) يبيلكم يومين عشان تغطون كل هالأشياء وانصحكم وبقوو تزورون هالمجمع وملحقاته ، واسم المجمع ( سنترو ) .



جزء من البحيره اللي يطل عليها المجمع وتكون فالطريق إلى ( سي لايف ) وتشوفون جزء ظاهر من الملاهي اللي تصكر ( عالساعه 6 )



قربنا من ( سي لايف ) وياريتنا ماقربنا بالنسبة لي اعتبره مكان لايستحق الزيارة لأنه ممراته ضيقه ومع ان يدخلون الناس على مجموعات لكن من كثر ضيق الممرات الناس يغطون الأحواض الزجاجيه وماتقدرون تشوفون شي ، والمكان مظلم وكتمه وحر ، نهائي نهائي ماستمتعنا ، واللي مجرب وشايف مثل هالأحواض من قبل فأنا مانصحه يضيع وقت ويدخل ( سي لايف ) خاصه ان الإنتظار ممل وياخذ أكثر من ساعه
وفي بديل له في دووسلدورف راح تشوفونه في الأجزاء الثانيه ، صحيح تصميمه عادي ومافيه ديكورات وايد كانهكم داخلين متحف بس احلى واكبر وبيستمتعون فيه الأطفال لأنه بيشوفون كل شي بوضوح بعكس ( سي لايف )



شي وحيد شفناه وكان مشهور في هذيك الفتره ، والله لايوريكم الزحمه اللي عنده اللي الكل لازم يوقف ويصور معاه



عرفتوه ؟؟؟ ( بول ) اخطبوط كاس العالم ، قبل السفر قرينا فالجريده انه موجود في مركز الحياه البحريه في اوبر هاوزن ، وصدفه كانت نازله اوبرهاوزن في مخطط سفرتنا .



بعدها صادنا ظرف مع الصغيره واضطرينا نرجع دووسلدورف وقلنا نرجع للمجمع مره ثانيه ، وابشركم احلى صور كانت للمجمع وماحواليه بس للأسف الصور مادري وين راحت قهر قهر على الصور .
لكن انصحكم لاتفوتون زيارة هالمنطقه واختاروا وم يكون الجو حلو وغير ممشمس وبتستمتعون كبار وصغار

----------------------------------

ثاني يوم رحنا منطقة ( إيسن essen ) وتبعد تقريباً 35 كيلو ، فيها حديقة كبيره ومجمع على تشبيه احد الأعضاء انه نفس مول الإمارات لكن للأسف ماكان حاط الأسم ، فأخترنا مجمع ثاني ومتأكده مش هو اللي يقصده العضو مع ان كان ممتع وحلو والتسوق فيه مش بطال .

هذا اسم الحديقه ومدخلها وهي كبيره كبيره كبيره







لين دخلتوا روحوا يسار وبتلقون كافي شوبز عنده هالتمثال



جنبه راح تلقون مكينة قص التذاكر وموضح عليها كل شي ، واللي ماعنده خرده عادي يحط اللي عنده والمكينة بترد له الباقي ( ياريت يسون عندنا هالشكل )



وبعد ماتقصون التذكرة بتشوفون هالبوابة ، واللي عنده عربات اطفال يكلمهم عن طريق جهاز مخصص بهالشي وراح يفتحون له الباوبة الكبيرة
صـــــور من جولتنا في الحديقة













شياب يلعبون شطـــرنج









قسم الألعــــــــــاب







نكمل جولتنا في الحديقــــــة
هذا المسرح موجود فالحديقة وكبير وايد ومافيه سماعات ، لأن صدى الصوت فيه عالي





هذا مبنى وسط الحديقة اسمه ( ماكدونالدز هاوس ) وهو فالأساس فندق وتصميمه من داخل غريب



هذا فندق يصير على يمين البوابة الرئيسيه للحديقة واللي ساكن هالفندق مايحتاج لاسياره ولامشي عالشارع عشان يوصل الحديقة ، لانهم قراب من بعض واااااااااااايد



بعدها طلعنا من الحديقة ودورنا على مجمع نروح له ، واخترنا rhein ruhr zentrum festival وشكله مجمع مهم عندهم لان طول الطريق كان في لافتات توضح اتجاه المجمع ، وهذي صورة واحنا فالطريق



واول شي سويناه هو أكل وجبة الغدا





بتشوفون على يمين الصوره فوق ، مقدمة قارب لونه أصفر ، هذا مكان للعب الأطفال اقل من 5 سنوات تقريباً والساعه بمبلغ رمزي





هذي صوره من المجمع



وكل مجمعاتهم ماتخلى من الصالونات النسائية



الناس اللي تهتم بتربية الحيوانات فالبيت ، بتلقى في هالمحل أشياء ماتخطر لا عالبال ولا عالخاطر



الطريق إلى صالة البووولينق



بعدها طلعنا وقررنا نرجع لحبيبتنا دووسلدورف ، وشوفوا بيوتهم شلون صايره





دخلنا دووسلدورف وهالمبنى يطل على النهر



وطبعاً لازم نطبق ( برنامج غصباً عنك ونروح الحدايق اللي منتشره في دوسلدورف ، هالحديقة تصير جنب الحديقة اللي مجابله فندق شتايغن بيرغر ) يعني لازم تقطعون حديقة شتايغن بيرغر مشي وبعدين تقطعون شارع رئيسي وبعدها توصلون للحديقة اللي بتشوفون ألعابها ، وأبشركم فيها فيران





بعدها رجعنا الفندق نرتاح ويوم ظلم الوقت قررنا نروح المدينة القديمة نتعشى

طبعاً هدوء قاتل جهة المحلات لكن جهة المطاعم حركة وناس وحشرة ، وبما ان صادف ويك إند فالوضع صار مخيف بعدها ، فبعد الساعه 10 لحد يدخل المدينة القديمة يوم السبت











سيارة مستر بييييين



وبدت الزحمه والحشره والهيصه



دخلنا بيتزاهت نتعشى وماكان أكلهم لذيذ يمكن من الزحمه والحشره ومب ملحقين عالطلبات والناس





هذا ورد من وحده تبيع وفي غيرها بعد ، طول الأسبوع مانشوفهم الظاهر يطلعون بس فالويكإند



وبعدها رجعنا الفندق للنوم والراحة


----------------------------------------------------------

في ملاحظة مهمه عن ( سي لايف ) اذا قصيتوا تذكرتها من الفندق او النت أو أنكم قروب سياحي تقدرون تدخلون بسرعه ( كويك باس ) مب لازم توقفون فالسيد الطويل ، عاد ماكتشفنا هالمعلومه الا واحنا هناك لما شفنا ان في ناس تدخل قبلنا وبسرعه مع ان توهم جايين

ملاحظه ثانيه :
إذا وقفتوا فالباركات لاتخلون البطاقه فالسياره وتقولون بندفع عند بوابة الخروج ، لأن مافي ناس عند البوابات ياخذون المبلغ اللي عليكم ، نزلوا البطاقه معاكم واهم شي لاتضيع لان بتلقون مكاين مخصصه للدفع ، مجرد ماتبون تطلعون من المواقف بتلقونهم حواليكم عند الأصنصيرات او في كل دور مخصص للوقوف بتلقون مكاين دفع ، حطوا الكرت فيها وبيطلع لكم شكثر قعدتوا وشكثر تدفعون ، ولين جيتوا عند الخروج حطوا الكرت مره ثانيه عشان تفتح لكم البوابة

مساااااااااااااااااااء الخير

مستعدين للجزء الجديد بس تراه جزء بسيط ومافيه اكشن ، لكن بذكر فيه البديل ل( سي لايف ) اللي هو ( اكوا زوو دووسلدورف )

بداية اليوم نزلنا نتسوق في دووسلدورف لين الساعه 2 وشي تقريباً وهالمره طلعنا بالسياره لان ناويين بعد التسوق نروح فيها للأكوا زوو ، وهذي صورتين من جولتنا في المدينة القديمه ( عشان الشوبنق )





ريوق خفيف وعالماشي قبل مانطلع من المدينة القديمة



آخر دور فالمواقف عشان ناخذ السياره ( المظلات تغطي الأكشاك اللي فالمدينة القديمة )



بسم الله انطلقنااااااااااااا







وعاليمين في حديقة كبيره ( بس مادخلناها لأن صادنا تشبع من الحدايق )



احلى شي فالموضوع ( قص التذاكر )



بسم الله نبدا جولتنا ( مثل ماذكرت لكم قبل ان هالمكان تصميمه عادي وتحسونه مثل المتحف او مركز علمي )



سمكة نيموووو ( حجمهم صغير وايد )



ماشاء الله ألوانها شدتني وحسيتها قطعة قماش ولما شافتها بنتي قالت ماما نفس الفستان



فرس البحر ( صغيييييييييير )
طبعاً إجباري في كل مكان تزورونه تلقون محلات تبيع تذكارات خاصه بهالمكان ، وهذا تمهيد للزوار انهم قربوا من المحل



بعدها قررنا نطلع ونرجع نتمشى حوالين الفندق ونتغدى ونتعشى مره وحده لكن ( تجري الرياح بما لاتشتهي السفن ) ووقفنا عند برنامج غصبن عنك







وبما اني ماحب هالبرنامج ، وفنفس الوقت احب تصاميم بيوتهم والهدوء اللي حواليها قررت اتمشى فالمنطقه اللي حوالين الحديقه واتخيل نفسي عايشه في هالمنطقة الراقية













وفجأه شفت بيت محد فيه وقلت بس هذا بيتي وقفت مده اتأمله وبعدين تخيلت بنت شعرها طويل ومن غير ملامح ولابسه ابيض توقف عند الدريشه وتشوفني سميت بالرحمن وتعوذت من الشيطان ورديت الحديقه و ودعت بيتي للأسف الشديد



سيارتنا الظاهر هي بعد كرهت برنامج غصبن عنك



بعدها قررنا نطلع من الحديقه ، ونسيت اقول لكم هالحديقه قريبه من اكوا زوو وجداً هاديه وشرحه ، اول ماتطلعون بتلفون اجباري يمين ، بعد اول إشاره لفوا يمين على طويل وبتلقون الحديقه على يمينكم ، واذكر زرناها مرتين وأكيد غصبن عنك هههههههه

وفي طريقنا مرينا عند البرج والعمارات الغريبه بس نلقي عليهم نظره عالسريع





وماحبيت فكرة ان ندخل البرج ونطلع فوق ، لأن مافي أي اكشن فالموضوع بالإضافه ان عاملين حسابنا نروح برج ( الأتوميوم في بلجيكا )



بعد هالجولة السريعة بالسيارة رحنا نتعشى في مطعم ( تندوري ) اللي مقابل فندق ( نيكو ) ومانصحكم بزيارته عندي تاج محل وكرشنا احلى واطعم أكلهم



احلى مافي الموضوع ( كوكاكولا ) دووسلدورف





وبما ان ويكإند فتنتشر هالسيارات في المنطقه ، والصوره تعبر عن كل شي



--------------------------------------

تابعوني الجزء الجاي بتكلم عن ( ماستر خت في هولندا )

في آخر جزء قلت لكم راح انزل لكم عن ( ماسترخـــــت ) في هولندا

فالبدايه قبل السفر سألنا وايد فالمنتدى عن المناطق الهولندية القريبة من دووسلدورف ومحد قصر معانا ، بس في آخر الأيام شلت هولندا من البرنامج وخليت بلجيكا وألمانيا بس ، لكن لما شفت عندنا وقت وعندنا كثير مناطق هولنديه قريبه من دووسلدورف ، قررنا نغير البرنامج ونزور هولندا ، وبتدينا ب( ماسترخت ) بس للأمانه مادري شكثر تبعد لأني مثل ماقلت ماحطيتها فالبرنامج ولا كتبت عنها معلومات وشكثر تبعد .
وإذا تبون معلومات عنها دخلوا على معرفي قسم المواضيع وشوفوا موضوع اسألتي عن هولندا .

بسم الله نبلش بالصور :

فالبدايه هذا جزء من اللوبي ماشفتوه من قبل ، شفته هدوء قلت أصور الزوايا اللي ماصورتها من قبل





صوره من سنتر ماسترخت ( هذي ساحه كبيره كبيره وحواليها مطاعم وكافي شووبز ماينعدون ) والمكان مليان ناس وحشره والأسواق والمحلات كلها فاتحه مع ان يصادف يوم الأحد



















الحين دخلنا جهة المحلات ( يوم الأحد تصك الساعه 5 عندهم ) وطبعاً محلاتهم غريبه عجيبه مب نفس اللي في ألمانيا وبضاعة هولندا أغلى من المانيا
هالمحل 90 بالميه من بضاعته أقطان ساده وبكل الألوان ، اللي تبونه واللي ماتبونه من قطنيات تلقونه في هالمحل ، وموجود منه في المانيا راح اذكر لكم في اي منطقه موجود بس بعدين



وهذا محل ثاني نفس ( الكافهوف + كرشتاد + ........ إلخ ) بس صغير ، مادري اذا له افرع ثانيه كبيره ، لكن عند قرطاسيه عجيبه غريبه شخصيات ورسومات حلوه تصلح للطلاب والطالبات والموظفين بعد ، انصحكم بزيارته بس ترى اسعاره اشوي مرتفعه .







هذي مكسرات للطريق من نفس المحل





للأسف كان صاك وصادني احباط لأن خاطري فيهم ، بس رحنا منطقه هولنديه ثانيه ولقيتهم



التدخين سبب رئيسي لسرطان القلب والرئه





مباني صورتها واحنا طالعين من منطقة السوق







شخص يقدم عروض ، كأنه ورق أو رسمه
بعد جولة حلوه في ماسترخت قررنا نرجع لدووسلدورف ، شوفوا مواقف سنتر ماسترخت ( نظيفه ومكيفه )



الطواحين الحديثة ( مولدات الطاقة )



طبعاً كملنا يومنا في دووسلدورف وبعدها قررنا نروح نتغدى ونتعشى في





















هذا السنوت اللي يقدمونه دايماً مع نهاية وجبة العشا ، بس هذا ملبس بحلاوه وطعمه احلى من العادي ، ماقد شفته في مطاعمنا الهنديه وكان فيني فضول اسأل من وين لكن غيرت رايي وللحين متحسفه .



--------------------------------------

الجزء الجاي بيكون من ملاهي ( فانتاااااااااااااااااااازيا لاند )

جزء خاص ( بفانتازيا لاند + كولون )

تبعد فانتازيا لاند عن مدينة كولون 20 دقيقة فقط ، وفي شوارع اوروبا ماتحسون بالساعات فشلون لو صارت دقايق ، عشان هالسبب قررنا نروح الملاهي وبعدها كولون للتسوق .
ومن حضنا في كل مره نروح فيها كولون يطق مطر ويخترب البرنامج ، بس لجل السوق يهون كل شي ونستحمل المطر

بسم الله نبدأ نشوف الصـــور :

مواقف فانتازيا لاند التابعة للملاهي



فندق ( ماتامبا ) عالطراز الأفريقي وله مواقف خاصه اذا وقفتوا فيها تدفعون قيمة الموقف في الفندق نفسه ، والفندق حاصل على جائزة أفضل فندق يمثل الجو والديكور الأفريقي وحتى الموظفين ولبسهم يمثل أفريقيا



بعد شباك التذاكر تنزلون تحت عشان الملاهي ، وهذي صوره عامه من فوق





بعد مانزلنااااااااااا





ممر طويل كله محلات ومطاعم وكوفي شوبز

















رسام يرسم للأطفال ( مجاناً )



والملاهي تنقسم قسمين ( يمين عالديكور الصيني والكاوبوي ) ويسار ( مدينة قديمه او فانتازيا ) بالضبط ماعرفت شنو بس جهة اليسار كلها تصاميم غريبه وتناسب الأطفال من 4 سنوات ورايح ، واليمين للكبار أغلبها العاب خطره .

نفس الأخطبوط يطلع دخان ويرش ماي عالناس





كل شي تصميمه مختلف في هالملاهي حتى لبس الموظفين









هاللعبه حلووه كل اللي فالمركب يلعبون مع المراكب الثانيه برش الماي ، عاد برد ومطر وماي شيصير ؟؟





لعبه مثل السيكل تعتمد على السرعه في تحريك الرجل عشان ترتفع العربه فوق ، حتى طريقة اللعب يبيلها مجهود يحسسونكم انكم عايشين فالماضي



الضفدع من شكله عادي بس يضحك خاصه الأطفال وبعد الكبار



عاد هاللعبه عجيبه ، بس ماتصلح للوزن الثقيل ، يبيلها ناس خفاف عشان تمسكون الحبل وبقوة الدفع ترتفعون فوق وفجأه تهدون انواع الضحك للكبار والصغار



بوابة المدينة المغلقة فيها تقريباً 4 ألعاب بس لعبتين مصكرين ماقدرت اصورها لكم



هذي نفس اللعبه القبليه بس وانتوا واقفين ولاحظوا لعبة العربات السريعه داخله وسطها



طريقة تصميم المدينة من داخل ملفته وحلوه



بعد ماطق المطر وانتشروا العالم استغلينا الفرصه وجا دورنا للرسم عالوجه



خلصنا من المدينة القديمة ورايحين على منطقة الكاوبوي والصينين والأفريقين





ياكلون ناتشووووز ، يبيله في هالبرد



احلى شي الشواية الكبيرة ، بادي يجهز للشوي











لعبة القطارين المتعاكسين ( سريع بس ماينقلب ) ومتداخل مع لعبه ثانيه بتشوفونها في ثالث صوره

خلصنااااا من القسم الصيني والكاوبوي ( على فكره في العاب وايد بس من سرعته او كثرة الزحمه الواحد مايقدر يصور ، والألعاب مثل ماقلت لكم تناسب الكبار واللي يحبون الألعاب الخطره ) ورايحين عالقسم الأفريقي





عرض لرقصة أفريقيه ( وفي البروشور بتلقون اوقات كل العروض )







هاللعبه قريبه من مكان العرض وقريبه بعد من رووس الناس





هذي اللعبه معرف ايش يسمونها بس الأكيد الكل يعرفها ، تحت المكان المخصص للدخول ، وفوق المكان اللي احنا فيه مخصص للتصوير ، يعني اللي يبي يصور هله وهم فاللعبه او يشوف ردة فعلهم من قريب يوقف في هالمكان







شخصيات موجوده في الملاهي













أهم شي الأكل

وفالأخير أهم شي الشوووبنق ، مع ان مرينا عالمحلات اول مادخلنا بس ماشدتنا الا بعد مالفينا الملاهي وحبيناها ، دخلنا غصب نتسوق





أهم شي البنات لهم نصيب الأسد









المواليد بعد مانسوهم



باص الملاهي ، اكيد انه يتحرك من وإلى محطة الباصات ومخصص فقط حق ملاهي فانتازيا لاند



بعد ماطلعنا من المواقف لفينا من ورا فندق ( ماتامبا ) عشان نشوف الفندق الصيني





وبعدها مرينا على طريق زراعي هااااااااادي وطلعنا على هالبيوت









ومسكن خط كولووووووووون



----------------------------------

جزء كولون بسيط وقصير بس وقتي ضيق راح انزله لكم بالليل إن شاء الله او بكره إذا الله احيانا

تكملــــــــة جــــزء ( كولـــــون )
أول ماوصلنا كولون دخلنا محل ( كرشتاد ) وبالتحديد نزلنا السوبر ماركت ندور لنا شي خفيف ناكله ، وصورت لكم هالصورتين





بعدها رحنا حق محلات الرحلات المشهور وتكلموا عنه فالمنتدى وااااااااااااااااااااااايد ، صج حلو هالمحل وكل شي فيه وأحلى شي تجربة الأغراض اللي تشترونها بطريقه قريبه من الواقع







يدوسون عالضفادع



بعدها طلعنا نتسوق في سوق كولون ، منطقة الأسواق كبيره وشامله واكتشفت ان 90 إلى 95 بالميه من محلات كولون هي نفسها في دووسلدورف ونفس البضاعه ، بس اللي يميز كولون ان كل المحلات متجمعه على شارع واحد لكن دووسلدورف منتشره فيها المحلات ، عشان هالسبب الناس يمكن تحس ان التسوق في كولون أحلى .
بس مثل ماذكرت هي هي المحلات ، ونفس هالملاحظه اصلاً موجوده في أغلب مناطق المانيا ان المحلات نفسها متكرره في كل منطقه .





كشك خاص بمحل حلويات ، وهالمحل منتشر عندهم وبكثره بس حاسبوا بعض الحلويات اذا مب كلها فيها دهن من جلد الخنزير وبعضهم ينبهون المسلمين على هالنقطه





محل ليقووو للتركيب ( في الأجزاء الجايه ) بوديكم مركز إكتشاف ليقوو لاند صح صغير بس ممتع للكبار والصغار



بعد مازاد البرررررررررد والمطر الخفيف ، دخلنا النورد سي نتعشى ونتغدى ، الخضار سوتيه مب حلو طعمها



يمممممي يمممممممممممممي



باي بااااااااااااااااااااااااااي كولون





------------------------------------------------------

الجزء الجاي بيكون من بلجيكااااااااااااا

جزء ( الأوتلت الموجود على حدود بلجيكا + العاصمة البلجيكية بروكسل )

الأوتلت حلووو وفيه محلات وايد لكن اللي يتوقع وجود الماركات العالميه ( ديور + فندي + شانيل + لوي فيتون ........ إلخ ) مراح يلقاها في هالآوتلت ، لكن في محل متخصص بملابس الأطفال يبيع بعض هالماركات ومنها ( بربري + إسكادا ..... إلخ )
والبنات اللي يحبون ماركة ( جوسي كوتيور ) بيلقون لها محل في هالآوتلت ويبيع بعد للبنات الصغار .
واسمه maasmechelen village.

نهاية الحدود الألمانيه ومقربين عالحدود البلجيكية





عبارة تنقلنا للحدود البلجيكية بسعر رمزي ، وخذنا أقل من دقيقه فالعباره حطوا جسر وبرسوم وخلاص



دخلنا بلجيكا وكان الجووو موووت برررررررررررد



وفي الطريق إلى الآوتلت ، وبتلقون بعد لافتات ورديه حق آوت لت للأطفال بس مارحنا له





الحمدلله وصلنا الآوتلت وماكان زحمه





بعد برنامج غصبن عنك بس حاولنا بكل الطرق أنها ماتشوفه عشان مانضيع وقتنا في هالبرنامج

















طلعنا من الآوتلت ورايحين على العاصمة البلجيكية ( بروكسل ) وبالتحديد برج الآتوميوم



صرنا وسط بروووووووووكسل



وهذا الآتوميوووووم ، وبما أن احنا نبي الأتوميوم + الميني يورب فقصينا تذكرة شاملة المكانين





وعلى طول في اصانصير ياخذكم فوق كلش وتاخذون نظره على بروكسل وبعدين تنزلون ، اللي يبي يطلع الكور ويشوف اللي فيها يستخدم السلم الكهربائي .





الميني يورب من فوووق





بعدها قررنا نشوف اللي موجود في الكور الكبيره وقلنا بس بنروح لوحده وبنزل ، لكن اكتشفنا انهم مصممينه بطريقه ان اجباري نروح كل الكور وبعدين ننزل ، مع ان بعض الكور فيها سلالم للنزله بس صاكينها .
وصراحه انواع المعاناه والتعب لأن بعض السلالم تكون عاديه مب متحركه وطلعتها متعبه وايد ، لدرجه بعد ماخلصنا حسينا ريولنا تهتز من التعب ومافي توازن
وهذي صور من داخل الكور :











هذي السلالم المتعبه



وهذي السلالم الكهربائيه طوييييله وايد وتخوف تحسون انكم نازلين سيده مش مايلين ، ولاحظوا الصورة الثانية صايرين على زاوية قايمه الناس اللي نازلين ورانا ، الواحد وده يغمض عينه من الخوف





--------------------------------

بعدها بنتكلم عن الميني يوووووووووووورب

نكمــــل جزء بلجيكــــــــــا

بعد ماخلصنا من ( الأتوميوم ) رحنا حق ( ميني يورب ) والمسافه قصيره تروحون مشي واللي يفصل بينهم فقط مواقف ( الأتوميوم )
فالبدايه تدخلون على ساحه كلها مطاعم وكافي شوبز وألعاب للأطفال وبعدها تروحون لل( ميني يورب )









وهذي صور للميني يوورب







هذا البركان فكرته حلوه توقفون عنده واذا ثار تهتز فيكم الأرض



سباق قواااارب ( بس اشوي بطيئه لين تتحرك وقت اللعب )









صورة للأتوميوم من الميني يورب

























يصبغون ويضبطون المجسم


مجسمات للتصوير ، بس تحطون راسكم وتصورون





لعبه حلوه توقفون مقابل الشاشه وتنعكس صورتكم فاللعبه ، وتصيرون داخل اللعبه وتلعبون بنفس شخصياتكم



طبعاً لازم كل مكان فيه محل للتسوق ، وبعد عند المدخل يصورونكم وبعدين تستلمون الصور مع ميداليه ، عاد الواحد يصور صوره لكن هم يستغلون الوضع ويطبعون منها 3 نسخ واللي يبي يدفع يدفع وهو مجبور واللي مايبي يخلي الصور طايحه عندهم



بعدها طلعنا وفطريقنا إلى ساحة ( جراند بليس أو جراند بلاس ) اشوف فالمنتدى كلمن يسميها بأسم



وصلنا المواقف وحركتهم حلوه عشان الواحد مايدور ويعور راسه ، بس يشوف الليتات ويعرف غذا الموقف فاضي ولا مشغول



طبعاً بلجيكا نشهوروه بالتشوكليت فنصيحه لعشاق التشوكليت والحلويات والكيكات ، اللي بيروح بلجيكا وبيرد في نفس اليوم يخلي غداه وفطوره وعشاه من هالأشياء الحلوه



هذا ( the royal galleries ) واغلبه محلات تشوكلت



وفيه محل اسمه نيوو كان توه منزل ( ميني آيس كريم ) أشكال وأنواع الواحد يحتار إيش ياخذ



وبعدها ررحنا للساحه













وبعدها دخلنا محل حلويات وعجبنا وخذنا منه هدايا للأهل











هذي فرصه للي يبس يشوف ديكور السرير ( هوليدي إن دوسلدورف سيتي سنتر )



وهذا محل حلويات عربي



صور لمحلات تفتح النفس بالذات اللي يحبون الأشياء الملونه وعندهم أطفال









بعدها طلعنا من الساحه ورحنا عند القصور نشوفها من برا واحنا رادين دووسلدورف ، وشفنا هالمحل ومن الأغراض اللي عنده حسينا انه خاص بعرب ههههه او فاتحه مخصوص للعرب
بعدها وصلنا دووسلدورف وتعشينا في مطعم سي فود موجود في المدينة القديمة ( بالضبط جنب المطاعم العربية ) بس مانصحكم بزيارته







الشوربه ماااااااااااالحه وثقيله بسبة الكريمة









--------------------------

عند هالصوره انتهينا من جزء بلجيكا وسامحونا عالتأخير بس كان في مشكله فالمنتدى
والأعضاء اللي ردوا علي فالجزء السابق راجعه لكم إن شاء الله
وتابعونا الجزء الجاي بيكون من ( ليقو لاند دسكفري سنتر )

بعد ماينتهي الفلــــم ومدته 15 دقيقة فقط ، نطلع على قاعة المجسمات للتصوير

باتمــــــان



الكنيسة اللي مدينة كولون ( الدوم )



شخصيات فلم هاري بوتر





آينشتاين ( نفس المجسم موجود في ملاهي ليقو لاند القريبة من ميونخ )



بعدها نروح في جولة داخل قصر الأميرة ، الجولة قصيرة بس حلوه وتبين لنا الحياة شلون كانت في العصور القديمة مع إضافات بعض التأثيرات اللي تخلي الجولة ممتعة ، وللأسف ماقدرت أصور أكثر لان التصوير ممنوع









بعدين انتقلنا لقسم المصنع ، نشوف شلون يصنعون قطعة الليقووو ، وهذي بوابة الإنتظار وفيها توقيت للعد التنازلي عشان تفتح البوابة



على يمين البواية ، ونفس هالأركان موزعة في كل مكان عشان الأطفال مايملون الإنتظار مع أن الإنتظار بسيط وماتحسون بالوقت



وعلى يسار البوابة



داخل المصنع





وبعد نهاية الجولة يقدمون للأطفال اللي مشاركين فيها قطعة ليقوو مختومه بختم المصنع إثبات انهم زاروا المصنع


بعد جولة المصنع ننتقل مباشرة حق قسم البحر والقراصنة وحق هالقسم يعطونكم ( كوين ) عشان تلعبون لمرة وحده بس





هذي السفن الشراعية اللي تلعبون فيها



بعدها وآخر جولة ننتقل لقسم الأدغال والمكان يتكون من دورين بس مشكلته مظلم والصور والفلاش ظالمه المكان ، بس المكان روعه ومسوينه بطريقة متقنة









ضفادع تتحرق وتولع فالظلام









بحيرة كلها تماسيح





قسم فيه اهم الألعاب اللي انتجها المصنع من أول إنشائه





طاولات مخصصة للعب ومنتشرة بكثرة



بعدها ننزل على قسم الألعاب والمطعم وللأسف الألعاب ماقدرت أصورها



وصلنا للمطعم وكل الصور اللي بحطها موجوده في قسم المطعم















وأخيراااااااااااااااااا محل التسوق صغير بس حلوووو ومن الزحمه ماقدرت اصور لكم أكثر من هالصورة



بعدها قررنا نركب هالوزات بس للأسف كانوا صاكين ومكانها بالضبط بالضبط على يمين الليقو لاند وتروحون لها مشي ومايحتاج تقطعون الشارع لأنها على نفس الرصيف



صورة أخيرة لزرافة الليقو لاند



----------------------------

انتهت جولتنا عند هالصورة ، وبما أن احنا في دويسبرق وانا دايماً اسمع عن ايكيا بس مادخلته ولا مره قررت ادخل اللي في المانيا ، وافرعه منتشره بكثرة بس اخترنا فرع دويسبرق ، وكان اختيار موافق





طبعاً وقت التسوق مافي تصوير وبعد جولتنا الممتعة قررنا نتغدى من غداهم اللذيذ ، بس السويت ماعجبنا



---------------------------

تابعوني في جزء قادم ، وعلى فكرة قرب التقريــــــر يخلص للأسف

هذا الجزء قصير وبيتكلم عن منطقتين الأولى في ألمانيا والثانية في هولندا

اليوم الأول كان خاص بالتسوق وزرنا ( الكافهوف + كرشتاد + سي آند أي ) يصيرون في نهاية شارع الملوك تقطعون شارع رئيسي وتنتقلون حق منطقة ثانية فيها هالأسواق الكبيرة ، تقريباً مشي من بداية شارع الملوك لين هذي المحلات تاخذون نص ساعه .

طبعا وقت التسوق مافي تصوير الكل لاهي



بعد ماخلصنا من التسوق وبدا الجوع ينتصر علينا قررنا نروح مدينة Neuss قرية صغيرة تقع بجانب دووسلدورف تقريباً ملتصقة بها ، حيث انها أقدم مدينة سكنها الرومانيين ، بالمره نتمشى ونتعشى فالسنتر مالها بس كان الوقت متأخر بعد ال7 فخلاص كل شي صك ونامت المدينة وهذي صور بسيطة منها .







وعلى طول على أقرب مطعم فاتح











هذا اسم المحل وصورة للشارع الحيوي بعد مانام





--------------------------------------

الجزء القادم عن مدينة فينلو الهولنديه