بسم الله الرحمن الرحيم ..
قبل عيد الأضحى كنت في قطر لمدة خمس أيام وقمت بزيارة لمجمع السيتي سنتر في الدوحة ..
كنت متجه لصالة السينما فمسكني واحد مصري وقالي فيه مسابقة سريعة وبسألك سؤال لك وسؤال للمدام وإذا جاوبتو صح لكم ثلاث هدايا ..
سألني ما هي أكبر القارات في العالم ؟ .. قلت له آسيا قال ماشاء الله على طول كداا وانتم عارفين الكلام المعسول المصري ..
سأل زوجتي ماهي أطول سورة بالقرآن .. قال لنا سورة البقرة فقال لنا فزتوا بالهدايا علبتين عطر وجهاز كهربائي للمطبخ وإقامة 7 ليالي مجانية في (بيروت أو شرم الشيخ) بمنتجع سافانا
سألني وين سافرت من قبل ؟ وهل تحب السفر ؟ وكيف تحجز الفنادق والخ ..
عموما من الأختيارات أنا أخترت شرم الشيخ بعدها أخذني على مكتب صغير على الواقف بس طاولة بجانب ساحة السينما في المجمع وسألني عن الأسم والرقم وين ساكن والخ حتى يسجل بياناتي ..
بعد ماخلصت من تسجيل البيانات قالي تعال لنا في المكتب حق الشركة بكرة الساعة 11 تفضل استلم هداياك الثلاث في مبنى الخليج التكافلي مقابل البنك العربي على طريق حمد الكبير بالدور الخامس ..
قال تجي تجلس معنا ساعة ونص ونضيفك عصير ونشرح لك عن شركتنا ونقدم لك عرض للسياحة مفاجأة لك ..
لا أخفيكم كنت مبسوط انا والمدام على الآخر ونحمد الله ونشكره على هالهدية الحلوة اللي ماتوقعناها أبد ..
بعد مارجعت الفندق كنت ناوي أبحث عن اسم الشركة ( جولدن جيت ) في قوقل ..
لكن كنت تعبان وتكاسلت ونمت .. وصحيت متأخر وطلعت للشركة مباشرة .. وتركت المدام بالفندق .. قالت بروح معك لأنهم كانوا مصرين على حضورها وكأنهم شارطين هالشيء لاستلام جوائزنا .. المهم أنا ما كنت مرتاح آخذها معي لمكان مجهول .. فتركتها وقلت لو احتجتي شيء اتصلي بي .
وأنا طالع للشركة في الطريق كنت في شك بمصداقية الشركة وراودتني أفكار أنهم عصابات مثلاً ..
المهم وصلت ودخلت المكتب وضيفوني وكانوا متضايقين أن المدام ما جات معي ..
دخلوني صالة كبيرة فيها خمس طاولات .. كل طاولة عليها ثلاث كراسي .. كرسي فيه المصري المسوق للشركة .. يقابله كرسيين عليه الضيف اللي هو الزبون وبجنبه المدام حقته ..
جلست على طاولة منهم .. وبدا مسوق الشركة يبيع علي كلام عسل يعني يقولك دور في بوكينج أو أجودا عن أي شاليه في هالأماكن ماراح تحصله بأقل من 2000 ريال لليلة الوحدة واحنا بنعطيك اياه بسعر 260 ريال مثلاً لليلة الوحدة بشرط تدفع 1800 ريال تكاليف إقامة أسبوع كامل .. حتى لو تبي تجلس ليلة وحدة ..
وتقدر تسافر حول العالم عن طريق شركتنا وفيه شخص يستقبلك من المطار وتحصل على خدمات vip والخ ..
وتخفض ميزانيتك بدل ماتسافر ب 7 أيام تكلفة رحلتك 14 ألف تقدر تسافر بتكلفة 1800 ريال بس عليك الطيران والأكل والباقي علينا إذا وقعت معانا ( العقد )..
طبعاً العقد فيه تملك أسبوع لك بكل سنة لمدة 50 سنة .. الأسبوع هذا مجاني لو صار بشرم الشيخ .. و ب 1800 ريال لو صار بأي مكان بالعالم .. وتقدر تأجره على أحد غيرك لو ما تبي تسافر في ذيك السنة ..
طبعاً قيمة العقد 44500 ريال قطري .. تدفع مقدم 10.000 ريال قطري والباقي أقساط 500 ريال قطري كل شهر .. ولو حبيت تفسخ العقد بتكون ملزم تدفع لهم 35% من قيمة إجمالي العقد ..
المهم أنا كنت مثل المخدر .. مو مقتنع بكلامهم لكن جالس أمشي معهم للنهاية .. مدري أيش اللي حصل وقلت له خلاص هات العقد خل أوقعه وتوكلنا على الله .. أتوقع لما قال لي أن العقد بيكون رسمي وقانوني وموقع ومختوم من وزارة التجارة في قطر .. فكأني اطمأنيت شوي .. المهم هو طار من الفرحة وقال تفضل اسلتم هداياك على ما يجهز العقد .. شوي وجاب العقد لي ووقعته وأعطيته 500 ريال عربون وأعطاني سند قبض .. وطلعت وأنا متضايق من اللي سويته .. بشكل غريب ندمت أني وقعت على العقد ..
الندم هذا خلاني أول ما وصلت للفندق قلت للمدام وين اللابتوب .. وفتحت على قوقل وبحثت عن الشركة وتعاملها مع زباينها ..
فلقيت مواضيع تتكلم عن مواقف نصب واحتيال من هذي الشركة .. من المواقف اللي قرأتها أن الشركة لما تتصل عليها وتبي تحجز في أسبانيا مثلاً لمدة أسبوع ب 1800 ريال قطري مثل ما هو متفق عليه في العقد .. تبدا الشركة تقولك ما فيه حجوزات بالفنادق المشتركة بالإنترفال .. كلها فل في التاريخ اللي أنت تبيه .. وعلى هذا المنوال .. ممكن تعطيك تواريخ بالأيام الميتة أو في عز الشتاء مو وقت تمشية وسياحة ..
باختصار الشركة تعطيك اسبوع تمليك لغرفة شخصين بمنتجع سافانا في شرم الشيخ بمصر
ويمكن يحصل تبادل خارج مصر مع دفع الفرق 1800 ريال قطري
ويمكن تاجير هذا الاسبوع أو بيعه أو توريثه ..
اسم هذه العقود ( التايم شير )
السؤال المهم الآن .. أنا كيف أتخلص من العقد هذا ؟
أبي أفسخه بأي طريقة بدون ما أدفع لهم الشرط الجزائي 35% من قيمة العقد
وهل فيه أحد منكم تعرض لهذا الموقف وقدر ياخذ حقه منهم ؟ وكيف ؟
هل أوكل محامي في قطر ؟ علماً أن أحد بنود العقد مكتوب فيه أن محاكم مصر هي المرجع في حال الخلافات المالية بالعقد .
هل أبلغ السفارة السعودية في قطر بقصتي ؟
ساعدوني جزاكم الله خير .. أخوكم / أبوفيصلمواضيع عشوائيه ممكن تكون تعجبك اخترناها لك:
- اسعار فندق الشيراتون الدوحه
- النوري والتميز المستحق
- السكن في فندق الجمرك سوق واقف
- برنامج سياحي في قطر ايام
- طالع على قطر ان شاء الله الاحد القادم
- قطر تنفق مليار دولار لاستضافة مونديال
- استفسار لاهل قطر
- سكن عائليمدرسه اجنبيةفيزا شغاله
- استفسار عاجل لاهنتم مسافر غدا بإذن الله
- تخفيضات كبري وجوائز قيمة تعدها المطاعم المشاركة في مهرجان الصيف
- فنادق
- استفسار قادم لقطر اول مره ان شاء الله
- مساعدتكم لا عدمتكم
- استفسار عن شرايح الهاتف النقال
- استفسار بشأن بطاقة الهوية الوطنية ومدى قبولها في حجز الفنادق
- استفسار عن فنادق قريبه من مطار الدوحة
- تكفى تهز الرجاجيل ؟
- جدولي المتواضع ما رأيكم ؟؟
- شكرا يالقطريين
- قطر الاولى عربيا والرابعه عالميا في مجال التعليم
رد مع اقتباس
المفضلات