الموضوع: حط طلبك وابشر باللى يسرك عن المانيا

المشاركة الأصلية كتبت بواسطة ABO KUNOOZ

الله يعطيك العافية أخوي بوسلمان ، بالنسبة للوصول والمغادرة فأنا مضطر ولا يمكن تغييرها لظروفي الخاصة.
بالنسبة للمواصلات ، في باريس ما أعتقد أحتاج سيارة لأنها ثلاثة أيام وأقدر أقضيها بالمترو،
أما من باريس إلى ميونيخ أو روست ، ما هي أفضل طريقة للتنقل بينهما وكم تأخذ وقت؟

أتمنى منك أخي الكريم رسم المسار المناسب لي بعد (3) أيام باريس - طبعاً أنت الخبير الأوروبي -
أحتاج جداً لمساعدتك في ذلك ، مع تخطيطي المسبق لاستئجار سيارة مرسيدس فان من ميونيخ وتسليمها في فيينا (محطة المغادرة).
وماهي الفنادق المناسبة وخاصة في ألمانيا,

أشكر لك سعة صدرك لكثرة التساؤلات وروحك الطيبة لا حرمك الله الأجر ....

الله يجزاك خير يالغالي
بوضحلك شغله
اذا رحت لميونخ من باريس فصعب الرجوع الي روست لانها 450 كم تقريبا من ميونخ
وبالطريقه هذي يفضل الغائها لانك راح تاخذ قطار من باريس الى ميونخ صحيح
ومدة القطار تقريبا ست ساعات ونص
ومن محطة ميونخ تستاجر السياره ولا تروح الا وانت عندك حجز اوكي فمن الصعب الحصول علي السيارات الا بحجز مسبق

وان رغبت الذهاب الي روست فيفضل النزول بالقطار من باريس الى ستراسبورغ الفرنسيه وتبعد عن روست الالمانيه 40 كم

ويفضل حجز فندق قبل الوصول ويفضل السكن لفترة ليلتين علي الاقل
ومن بعدها مواصلت الرحله الي ميونخ لاستلام السياره
والذهاب من ستراسبورغ الي روست اما عن طريق استاجار سياره مثلا او تاكسي

المشاركة الأصلية كتبت بواسطة ABO KUNOOZ

الله يعطيك العافية ،،
ما أدري كنت أفكر أطلع من باريس إلى ميونيخ بالطيران الداخلي ،
تعرف كم قيمة تذاكر القطار وهل هناك محطات كثيرة أو هو قطار واحد (محطة واحدة) إلى ميونيخ.

سؤال ثاني إذا ماعليك أمر:
كم ليلة تكفي لكل من ميونيخ وقارمش
تسلم يالغالي،،،

هذا يفيدك للقطارات بالوقت والسعر
http://www.raileurope-gcc.com/

بالنسبه لغارمش والله ياشيخ يوم يكفي وشهر مايكفي للى يعرف يتسيح والاماكن من حولها كثير ومناطق جميله وبالنسبه لميونخ
فهي تسوق ويمكنك ان تسكن لمدة 3 ليالي الى 4 بالكثير وهذا رايي

المشاركة الأصلية كتبت بواسطة Alba

الله يسلمك يابوسلمان والله ما قصرت يالغالي
والله ما ندري من دونك وش سوينا بتخطيط الرحله
الله يعطيك كل عافيه والله انقذتنا بكثير من الامور

المقدمه ذي والله بخاطري وقلت لازم اقولها لك يالغالي

عندي استفسار طال عمرك حنا رحلتنا حتكون المانيا والنمسا وشبابيه باغسطس
الزبده طال عمرك حنا بتخطيط الرحله راح ننزل بميونخ ليلتين وبعدين نطلع لقارمش ومنها الى الريف النمساوي تقريبا راح نجلس حوالي 7-8 ايام فيها
راح يبقى من الرحله حوالي 4-5ايام قبل العوده لميونخ
الشباب اللي معاي اقترحو يقولون ودنا نقضي الايام المتبقيه بمدينه تكون حيه بالليل ونقدر نسهر فيها ما يكون كل شي يتقفل بالليل

انا بحثت خفيف حصلت فرانكفورت ولقيتها حوالي 4 ساعات من قارمش
بس ابي رأيك هل المدينه ذي توفي الغرض او فيه ديره ثانيه افضل

بالنسبه لفرانكفورت يالغالي صحيح تلقالك اماكن وقهاوي مفتوحه بالليل وللعلم انها تبعد عن ميونخ 450 كم تقريبا او اقل بشوي
وفي مناطق اقرب ولكن حدهم اعتقد الى ال 11 بالليل وتسكر وبالنسبه لميونخ ياشيخ فيها مطاعم وقعدات الى غاية الساعه 5 الفجر تقريبا ومنها مالمطاعم التركيه وغيرهم
وبرايي ياشيخ انكم ترجعون الى ميونخ ومنها تقدرون تطلعون الى سالزبورغ من الصبح وترجعون لميونخ افضل لكم من تعب طريق فرانكفورت
بمعنى انكم تطلعون بره ميونخ بالنهار وترجعون بالليل لميونخ والمناطق من حول ميونخ كثيره وقريبه

.

المشاركة الأصلية كتبت بواسطة Faisal

السلام عليكم ورحمة الله وبركاته
متوجه لالمانيا ثالث ايام العيد باذن الله لمدة 22 يوم. برفقتي زوجتي و ابني يبلغ من العمر 20 و 4 اطفال (17-14-12-8).
النزول بفرانكفورد و العودة منها ايضا.
اريد منكم مساعدتي في توجيه خط الرحله لان هذه اول سفره لي لدولة المانيا. مع العلم انه لا بأس بالمرور بالدول المجاوره.
(تم حجز سياره للمدة كامله)

وعليكم السلام والرحمه
يا مرحبا فيك اخ فيصل والله يعيد رمضان والعيد عليكم بخير والله يخليلك العيال وانتم بصحه وسلام امين يارب العالمين

يا اخ فيصل بالنسبه لخطوط السير يوجد كذا خط وخاصة للمناطق السياحيه والمشكله يا اخ فيصل بالنسبه لفرانكفورت اغلب السياح ينزلون بمطارات بعيده والمشكله يخلون العوده منها ومع ذلك يبون مناطق سياحيه
والمناطق السياحيه اغلبها قريبه من مطار ميونخ وسالزبورغ وزيورخ وجنيف
بمعني لو كان نزولك فرانكفورت والعوده من هذي المطارات افضل من عناء الطريق والعوده
فمثلا لو اني بحطلك خط سير هذا بالنسبه اذا كان في مجال لقطع مسافات بعيده من 5 ساعات تقريبا وحولها
فمثلا يمكنك الذهاب بالترتيب
الى
- غارمش او المناطق المجاوره لها 450 كم تقريبا من فرانكفورت - وبعد غارمش الى كابرون اوزلمسي او المناطق المجاوره لها وتبعد 200 كم
ومن بعد كابرون - انترلاكن وتبعد حوالى 550 كم - ومن بعد انترلاكن الى روست مدينة الالعاب الالمانيه - ومن بعد روست الطريق للعوده الى فرانكفورت حوالى ال 240 كم
والسكن بكل منطقه اربع ليالي
وهذا افضل الطرق للسياحه في كل من المانيا والنمسا وسويسرا
والمشلكه بالسكن بالوقت هذا لانها مناطق سياحيه ومقصد للسياح وصعب الحصول على السكن بالعدد هذا الله يخليهم لك والمفروض الحجز بوقت كافي يعني من ثلاث اشهر واكثر لتوفر السكن
او يمكنك المشي عكس هذا الخط

وبالنسبه للاماكن لكل منطقه يوجد العديد من الاحداثيات لكل منطقه موجوده بالمنتدى تم وضعها ويمكنني ارشادك اذا رغبة
واي استفسار انا حاضر باللى اقدر عليه

المشاركة الأصلية كتبت بواسطة Alba

بوسلمان يالغالي
حبيت استفسر اذا كان عندك خبره بموقع car rental حاب اضيف اني ابغي السياره بمحرك الديزل ومش لاقي خانه تفيد بهالغرض

ومعليش يالغالي في حاجه ثانيه ايش رايك بشركة avis حجزت بموقعهم سياره ولا سألو عن بطاقة ائتمانيه ولاشي بس كتبت اسمي وايميلي وبعدين ارسلو لي ان حجزك مؤكد ههههههههه مادري ليش مو مصدق .

هلا فيك يالغالي \

ايفيس من الشركات المفضله ومن الاكثر انتشارا

والموقع هذا موقع وسيط

انت حجزت سياره وارسلو لك ايميل بالتاكيد دون دفع رسوم ولا دفعت عن طريق الموقع
اذا كنت دافع رسوم فهي لازم ان تكون عن طريق الفيزا يالغالي ومااعتقد انهم اكدوا الحجز دون الدفع
ويالغالي بالنسبه للديزل مافي شركه تضمن لك استلامك ديزل انت وحظك وحتى ناقل الحركه مو مضمون ( الجير ) عادي او اتوماتيك وهذي طريقتهم

ومعلومه لاتتوهق فيها اللهم اني بلغت اللهم فشهد ( هههههههههههه ) اذا كنت حاجز عن طريق الموقع ومدخل فيزا او ماستر بسم شخص ثاني مايصير لازم باسم صاحب السياره اللى راح يستلمها
ومايسألونك عن اي شي لكن اذا وصلت لهم عند الاستلام راح يسألونك عن ثلاث شغلات واذا وحده ناقصه ماراح تستلم السياره يالغالي لاتتوهق
1 - الفيزا او الماستر اللى حجزت منه السياره عشان الخصم ( لازم يكون الاسم مطابق للى بيستلم السياره )
2 - الاجازه الدوليه
3 - اجازة القياده الخاصه لك في دولتك

وروح لشركة ايفيس في بلدك وخلهم يشوفون الحجز واسئلهم عن اللى قلتلك ---------- لاتوهق عمرك

على فكره انت من بلدك اذا من الكويت ابلغك وين تروح بالضبط واذا من دول الخليج اسأل عن شركة ايفيس وروحلهم واستفسر

المشاركة الأصلية كتبت بواسطة Alba

الله يسلمك ويعافيك يالغالي
ما قصرت والله يابوسلمان رحلتي ضبطت مخططها بفضل الله ثم فضلك يالغالي
حبيت استفسر عن نقطه بخصوص الحجوزات ببوكنق
بعض الحجوزات اعملها فيه ويطلب بس الرقم الطويل للفيزا وما يطلب الرقم اللي وراء المكون من ثلاث ارقام يعني معناته ما راح ياخذ اي شي ابدا
و يرسل لي رساله بوكنق ان حجزك مؤكد والدفع بمكان الاقامه ، فهل الوضع كذا اوكي ؟

وفي حاجه ثانيه معليش 😁 انا سويت حجز برضوا بفندق وطلب مني الرقم الطويل للفيزا والرقم السري المكون من ثلاث ارقام
طبعا وضعتهم لهم بس الفيزا مافيها يمكن الا 20 يورو وارسلو لي اني الحجز مؤكد فمادري الوضع هل هو ماشي كذا حتى لو مافيها مبلغ
مع انهم حاطين ملاحظه انهم ممكن يقتطعون 40٪ من المبلغ بأي وقت .

الله يوفقكم يالغالي ويسعدكم
بالنسبه للاول وماحطيت الثلاث ارقام ان الفندق يضمن حقك بالحجز دون الخصم بالوقت الحالي
فقط عند الوصول والثاني طلب الرقم عشان يخصم نسبه اول ما يتم الحجز بفتره قليله
وارسال بوكنج فقط للتاكيد من طرفهم وانهم سوف يراسلون الفندق وان العمليه ناجحه ولكن اذا تم الخصم وماحصلوا بالفيزا النسبه المطلوبه راح يرسلون لبوكنج وراح يرسلك بوكنج بان الفيزا لا يوجد بها المبلغ ويجب وضع المبلغ كامل والمهله اللي يعطونك فيها 24 ساعه تحط المبلغ وتحدث البيانات للبطاقه عن طريق ايميل يتم ارساله من بوكنج
فيفضل المسارعه بوضع البلغ الكافي قبل لايتم التعامل بالفيزا من قبل الفندق
وان تم التاخير ولم يتم ايداع المبلغ راح يتم الغاء الحجز

والامر عادي وعليك متابعة الايميل للتاكيدات او المطالبات ان لزم الامر

المشاركة الأصلية كتبت بواسطة ABO KUNOOZ

حبيبي الغالي / بوسلمان
الله يجزاك بالخير،
بعد مراجعة مواضيعك في المنتدى وبالأخص بوابة النمسا ومناقشتي معك بخصوص خط سير (((رحلة العمر))) خرجت بالمسار التالي وأتمنى أن تضيف لمساتك الأخيرة فيه قبل حجزي للفنادق الأسبوع القادم بإذن الله:

(1) أوكتوبر الإقلاع من جدة
(2) وصول إلى باريس الساعة 5:45 صباحا
(3،4) باريس
(5) مغادرة باريس (طيران داخلي لاستغلال الوقت، أو قطار، لسا ما حددت) / وصول إلى ميونيخ (استئجار سيارة)/ مغادرة إلى قارمش
(6) قارمش
(7) مغادرة قارمش / وصول إلى راوريس, النمسا
(8) راوريس, النمسا
(9) مغادرة راوريس, النمسا / وصول إلى كابرون
(10،11) كابرون
(12) مغادرة كابرون / وصول سالزبورغ
(13,14) سالزبورغ
(15) مغادرة سالزبورغ / وصول فيينا
(16) فيينا
(17) مغادرة فيينا الساعة 6:15 صباحاً والرجوع إلى أرض الوطن.

(3) ليالي --- باريس
مرور واستئجار سيارة ---- ميونيخ
(2) ليلتين قارمش
(5) ليالي --- زيلامسي ,, (2) ليلتين --- راوريس ,, (3) ليالي --- كابرون
(3) ليالي --- سالزبورغ
(2) ليلتين --- فيينا

هذا هو المخطط ، بانتظار لمستك النهائية عليه
ولك مني جزيل الشكر , وجزاك الله خيراً.

بو كنوز حياك الله يالغالي والله يبارك فيك في شغله بالنسبه لبعض المناطق عندك ليش تتنقل بالطريقه هذي
هل بخصوص الحجز ما حصلت وانك مجبر عليه او انك مو عارف المسافات بين المناطق هذي

بالنسبه للخط هذا ليش التنقل فيه بالطريقه هذي وبالنسبه ل راوريس اللى تقصدها هذي Rauris ولا قصدك غيرها
(5) ليالي --- زيلامسي ,, (2) ليلتين --- راوريس ,, (3) ليالي --- كابرون

المجموع 10 ليالي صح
يالغالي بين زلمسي وكابرون 5كم فقط وبينهم وبين راوريس 25 كم
وبصراحه ماني عارف ليش التنقل هذا فالافضل الاستقرار بمنطقه وحده ولا التنقل بالحقائب من مكان الى اخر مزعج والله ياشيخ وبالنسبه لى افضل انك تستقر في كابرون مثلا 5 او 6 ليالي وتوزع الايام الباقي على غارمش مثلا فيوجد بالقرب منها مناطق جميله تستحق الزياره ومنها انسبورك وسيفلد وغيرهم من الشلالات والخوانق
وباقي الامور مضبوطه ان شاء الله
والله يوفقكم وردلي خبر باي استفسار تامرنا فيه وانا حاضر باللى اقدر عليه

المشاركة الأصلية كتبت بواسطة ABO KUNOOZ

الله يعطيك العافية يابوسلمان ،
آسف فهمتك خطأ
المقصود زيلامسي كلها 5 ليالي ، ليلتين منها في راوريس، والثلاثة الليالي الباقية في كابرون.

الحين بعد ما نورتني وفهمتني لأنه تلخبطت علي المسافات،
الحين اللي فهمته منك بين راوريس وزيلامسي 25 كم وبين زيلامسي وكابرون 5 كم.

وكلامك على متمة، راح ألغي كابرون، وأسكن الليالي الخمس كلها في راوريس لأنه حصلت على فندق أعرفه قبل عن طريق واحد من الشباب وسعره مره حلو وبما أن الوقت بين راوريس وزيلامسي وكابرون هو نص ساعة بالكثير أحسن إني أسكن في منطقة وحدة وهي راوريس.

بالنسبة لقارمش والله نفسي إني أطول فيها بس (العين بصيرة واليد قصيرة )هههه، ما فيه وقت، وبصراحة ودي أطول في زيلامسي أكبر وقت.

إذا فيه إمكانية وعلى حسب خبرتك ماشاء الله عليك إني ألغي ليلة من سالزبورغ لتصير ليلتين بدل من ثلاثة و أزود ليلة في قارمش لتصير 3 ليالي بدل من 2

وآسف على كثرة التساؤلات،
الله ييسر لك أمورك ويفتحها بوجهك ....

يا مرحبا يابوكنوز وحياك الله بالطريقه هذي انت صح والله يوفقك ويسهل اموركم يارب

ويالغالي اسئل باللى تبي ولا تحاتي وانا بالخدمه باللى اقدر عليه والله اني افرح اذا طلبني احد اي استفسار وعدلته اي شغله اقدر عليها

وبالنسبه ل راوريس منطقه جميله وهاديه وبين واي وعندها خانق زلمسي قريب وابي اذكرك عن منطقه قريبه من عندها ما ادري تعرفها ولا لأ لازم تمر عليها
فيها شلال يمر بمنتصف القريه منطقه Bad Gastein لا تنسى زيارتها تبعد بحدود ال 30 كم والله يوفكم ويسعدكم يالغالي

المشاركة الأصلية كتبت بواسطة Faisal

الله يجزاك خير يا ابو سلمان افدتني كثير خط سير جميل بس بسال عن هالمدن كيف جوها الان هل هي بااارده كثير لآني لما جيت بحجز الشقق لاحظت بعضها ارتفاعها 1500 و احنا مانبي مكان بااارد كثير تعرف معاي اطفال والا لقيت شقق باسعار حلوة بس قلت اسالك قبل ما احجز فانتظر ردك و لك مني جزيل الشكر

الله يسعدكم ويهنيكم يارب يااخ فيصل
بالنسبه للجو والبروده بآخر الليل واول الفجر بارد بروده عاديه واغلب النهار جو حلو وبعض الاماكن حار نسبيا
وبعض الاحيان يميل للبروده العاديه اذا كان الجو غيم وامطار وكله بامر الله طبعا ولكن هذا اللى يمر علينا بكل سفراتنا واللى نعرفه
وبالنسبه للمناطق الثلجيه فوق الجبال مناطق الثلج فهي بارده طبعا والباقي اجواء عاديه

المشاركة الأصلية كتبت بواسطة Alba

يعطيك العافيه بو سلمان لا انا ما دفعت رسوم ابدا ولا سأل عن البطاقة الإئتمانيه
وأنا حاجز من موقعهم الرسمي
رحت لشركة Avis عندنا بالرياض قالي انا مجرد وكيل للشركة هنا بالسعوديه بس رح للموقع الرسمي حق الشركة يمكن يفيدونك
رحت للموقع حق الشركة ووضعت ال Confirmation number واسم العائله وطلع لي انه عندي حجز .
قعدت افتش بخدمات العملاء لقيتهم كاتبين كذا
Avis does not require a deposit to reserve a car. However, an Avis honored charge card must be presented at the time of rental. Acceptable charge cards are as follows:
Avis Charge Card
American Express
AT&T Capital
China Union Pay
Diner's Club International
Discover
GE Capital
JCB
MasterCard
Sears
Visa


تتوقع يالغالي وضعي اوكي كذا

يا مرحبا فيك يالغالي باذن الله الوضع اوكيه لكن مثل ماقلتلك راح يطلبون منك الفيزا والاجازه الدوليه والاجازه لبلدك

المشاركة الأصلية كتبت بواسطة Alba

يعطيك العافيه بوسلمان
الله يسلمك انا حاجز شقه عن طريق بوكينق من اربع ايام تقريبا
اليوم جتني رساله من صاحب الشقق موجهه من موقع بوكنق
يطلب فيها تحويل مبلغ 30٪ من القيمه الى حسابه البنكي عن طريق الايبان لتأكيد صحة الحجز .
بصراحه استغربت من هالاجراء اول مره اواجه زي هالإجراء

لا يالغالي الامر عادي بالنسبه للشقق اذا كانت مملوكه لاشخاص او حجز الشاليهات او الاكواخ وهذي طريقتهم بالتحويل
عن طريق بنكك يحولها عن طريق الابان او عن طريق مكاتب الصرافه اللى تعمل تحويلات دوليه
وبعدها ترسل وصل التحويل عن طريق البريد الالكتروني اللى ارسله لك تاخذ على الوصل سكان scan واكتبله بالرساله اذا تم ايداع المبلغ ان يقوم باخبارك
وهذا الامر المتبع ولا تحاتي ولا زم ترسله لتاكيد الحجز

المشاركة الأصلية كتبت بواسطة Faisal

الاخ العزيز ابو سلمان الله يعينك علي انت عطيتنا خط سير من فرانكفورت الى غارمش ثم كامرون ثم انترلاكن ثم روست ثم فرانكفورت بس قالوالي المسافه طويله وتعتبر لفه كبيرة و مسافة 500 هناك متعبة ماهي مثل عندنا وتعرف معاي اطفال يعني متعبة عليهم فما ادري صدق هالكلام او لا واذا كان صدق طيب وسط وشمال المانيا حدد لي فيه خط سير حلو علما باني حجزت مسبقا شقة باير فورت قبل ما اراسلك والله اني مقدر مجهودك الله يجزاك الجنة

يا مرحبا فيك اخ فيصل وحياك الله واسئل على راحتك وانا حاضر بالرد على جميع استفسار اقدر عليه

يا اخ فيصل انا وضحتلك بالرد السابق المسافات عشان تعرف الطريق
ووضحتلك ان المشكله انك تنزل في فرانكفورت وترجع منها وهذا اللى يخلى الطريق في مسافه
وانك تبي الاماكن السياحيه والطبيعه والجو والالعاب للشباب معاك وابي اوضحلك شغله بالنسبه للسياحه بالقرب من فرانكفورت والمناطق المجاوره لها غير خط السير اللى بينته لك
ولو انه في بعض المسافات من اربع الى خمس ساعات وللعلم انك راح تريح فبل كل مسافه وبالنسبه لاوربا انا مشيت نفس هذي المسافات واكثر ولكن الامر عادي يكون الخروج من الصبح واذا حسيتم في تعب تغدر تريحون باي استراحه بالطريق والله الشي هذا ممتع باوربا
وللعلم ماعندك الا مسافتين اللى هم من فرانكفورت الى غارمش ومن كابرون الى انترلاكن والباقي الامر عادي ساعتين ونص او اقل
واذا تبي خط ثاني انا حاضر اقربلك ان بغيت ولكن ماراح تقدر تروح للاماكن السياحيه مثل غارمش وكابرون فهي الافضل بالنسبه للسياح تقريبا

فمثلا تروح روست من فرانكفورت ومن بعدها ترجع الى بادن بادن ومنها الى مناطق فرنسيه على حدود فرنسا ومنها الى بلجيكا على حدود المانيا ومنها الى مناطق على حدود هولندا والمانيه وترجع الى فرانكفورت
وان رغب ابلغني وان انسقلك خط ثاني
وبوضحلك ان طبيعت الخط هذا غير طبيعة الخط الاول من حيث الطبيعه والجو وانت على راحتك وناطر ردك

ملاحظه يا اخ فيصل بالنسبه لمنطقة بايرن فورت ماني عارف وين تقصد بالضبط ممكن تكتبها بالانجليزي والاسم الصحيح لها
لاني اللى اعرفها عند ميونخ وميونخ عن فرانكفورت حوالى الاربع ساعات ولا انها لمنطقه ثانيه ارجوا توضيحها لى

وفيه خط ثاني بعد انك تروح روست ومنها الى حدود سويسرا مع المانيا والنمسا وترجع الى المانيا ثم فرانكفورت
فمثلا
- فرانكفورت - روست - بحيرة كونستانس المشتركه بين المانيا وسويسرا والنمسا - هايدلبيرغ - فرانكفورت
- فرانكفورت الى روست 240 كم
- روست الى البحيره 170 كم
- البحيره الى هايدلبيرغ 270كم مرورا بشتوتجارد ان رغبت فيها
- ومنها الى فرانكفورت حوالى ال 80 كم

المشاركة الأصلية كتبت بواسطة moh91

السلام عليكم ورحمة الله وبركاته

يعطيك العافية أخي بو سلمان

استفساري هو حول فيزا الشنغن حيث اني استخرجتها من السفارة الايطالية بينما وجهتي الأولى ستكون ميونخ ، فهل سأواجه أي مشاكل عند وصولي الى ميونخ ؟

السؤال الثاني هل اسئجار السيارات أفضل من استخدام القطارات و التاكسي بالنسبة لشخص لم يسبق له القيادة خارج بلاده أبداً ولا يعرف القوانين العامة هناك ، وهل الـ navigation المرفق بالسيارات دقيق ويغني عن طلب المساعدة ؟

ولك جزيل الشكر

يا مرحبا فيك ياشيخ
بالنسبه للشنغن واستخراجها من ايطاليا والنزول في ميونخ مافيها مشكله اذا كان لك حجز سكن في ميونخ يوم او يومين وان مدة السكن في ايطاليا هي اكثر فترة سكن
واذا هذا الامر غير وارد يمكنك استخراج الحجز الوهمي والغاءه واخذ نسخه بان السكن بايطاليا اطول مده وتتسهل اموركم باذن الله
وان يكون السكن بميونخ صحيح واغلب الوقت الامور هذي غير وارده ولا احد يسأل وخاصة مطار ميونخ اسهل من باقي المطارات بشوي كمعامله

- وسؤالك الثاني يالغالي مافي شك السياره افضلك واسهلك بالتنقل وبالنسبه للقوانين اول مره الامور سهاله وغيرك تعلم والقوانين واضحه في اغلب الشوارع كرسومات او علامات على الطرق والسياقه سهله
وبالنسبه للجارمن اللى بالسياره يالغالي يبيله اللى يعرفله والافضل انك تاخذلك واحد وتتعلم عليه ويتم تركيب الاحداثيات اللى تبيها من اماكن سياحيه وغيرها
وتتنقل على راحتك ويكون معاك وخاص لك فمثلا اذا حصلت اي شي جميل تقدر تخزنه للذهاب له مستقبلا مثلا

المشاركة الأصلية كتبت بواسطة Faisal

الله يجزاك الجنة بالنسبة لايرفورت تبعد عن فرانكفورت 250 وهذا السبلنق حقها Erfurt
واللي فهمته من كلامك ان الطريق بين المدن بالخط الاول مافيه صعوبه و ممتعه لانا فعلا راغبين الخط الاول بس خفنا من الطريق

يا مرحبا وغلا اخ فيصل وحياك الله
- اخ فيصل بالنسبه ل Erfurt شفت موقعها وهذي من المناطق اللى تقع فوق فرانكفورت وتبعد اكثر من 250 كم وليس قريبه من المناطق السياحيه ولا اعتقد انها من المناطق السياحيه لعدم وجود اي معالم مشهوره فيها فهي تعتبر مدينه صغيره عاديه ولا لي علم ان كان تم الحجز فيها من قبلكم عن طريق معرفه للمنطقه او لا
واغلب المناطق اللى يقصدها السائح هي امتداد جبال الالب بين النمسا وايطاليا والمانيا وسويسرا لجمال الطبيعه والاجواء وتفهم هذي المناطق للسياحه


وبالنسبه يالغالي الطريق مافيه اي مشاكل تذكر فاغلب المرور على خطوط سريعه والطرق ممتازه ومثل ماقلتلك ان رغبتم بالذهاب على الخط الاول
فعليك الخروج باكرا لكسب الوقت فقط يعني لايكون المشي الساعه 2 او 3 فيفضل من العاشره تقريبا لكي يكون هناك وقت للتمتع بالطريق والاستراحات لبعض الوقت فهذا الافضل ولا تحاتي اخ فيصل اغلب الطرق ممتعه


فان رغبت اخ فيصل بالخطوط الثانيه بالنسبه لى لا افضل الاتجاه في جهة Erfurt فالافضل باتجاه كولون ودوسلدوف على الحدود الهولنديه البلجيكيه لوجود اماكن اجمل للسياحه وهذا الامر على رغبتكم

واي استفسار يلزمك انا بالخدمه

---- ملاحظه اخ فيصل الله يعينكم على ايجاد السكن بالوقت هذا فالامر صعب بعض الشي واتمنى تحصلون مرادكم .
ويا اخ فيصل اذا كان نزولكم في فرانكفورت متاخر بعد فمثلا وقت العصر فيفصل السكن ليله للراحه بعد عناء السفر وتكملة المشوار في الصباح اريح لكم

المشاركة الأصلية كتبت بواسطة ABO KUNOOZ

أخوي بوسلمان ، السلام عليكم ورحمة الله
الله يعطيك العافية على كل شيء،
وكل عام وأنتم بخير قبل الزحمة

عندي استفسار بخصوص قطار (raileurope) ,
حصلت حجز من باريس إلى ميونيخ،
لكن بعد ما دخلت في تفاصيل الرحلة حصلتها ترانزيت : (باريس - شتوتغارت / شتوتغارت - ميونيخ) والمشكلة الرئيسية هي المدة بين الرحلتين وهي فقط: 14 دقيقة،
وهي مدة لا تكفي بالتنقل بين القطارين،

إذا فيه توضيح لطريقة الحجز ياليت تساعدني.

شاكر ومقدر لمجهوداتك الطيبة،،،
ودمتم بخير،،،

يالغالي ما اعتقد انه في تغيير للقطار انت متاكد
وبالنسبه للوقت خاصة بين المناطق الداخليه اغلب القطارات مدة وقوفه دقيقه تقريبا

المشاركة الأصلية كتبت بواسطة ABO KUNOOZ

هذي هي تفاصيل الرحلة

CONNECTION DETAILS
.
.


05/10/2015 07:25 PARIS EST

05/10/2015 11:04 STUTTGART HBF

TGV France-Germany 9571 - Reservation included


..


05/10/2015 11:12 STUTTGART HBF

05/10/2015 13:18 MUENCHEN PASING

ICE 1091 - Reservation not included


.
Important! You have less than 20 min connection time.
We advise families, tourists and elderly to make sure they have at least 45 min when changing trains within the same station.
If you think you may require more, you can book journeys separately and choose the train times that best suit you.
.

يا مرحبا ابو كنوز

ان شاء الله انك ما حجزت تذاكر على الموعد هذا
بو كنوز الموقع يحذرك بان الوقت قليل للتنقل فيجب ان لا يقل عن 45 دقيقه
فالافضل انك تحجز من باريس الى شتوتجارد
ومن شتوتجارد الى ميونخ خط ثاني وشوف فرق الوقت قبل الحجز وشوف هل في وقت مناسب بين شتوتجارد وميونخ بالاول وبعدين احجز من باريس الى شتوتجارد لتنسيق الوقت

المشاركة الأصلية كتبت بواسطة Nour_

يعطيك العافية اخوي..
بنزور ألمانيا ان شاءالله هالصيف برحلة عائلية لمدة شهر تقريباً..
من 3-8 لي 1-9 ..
و شقتنا بتكون بهايدلبيرغ...
ياريت تخبرنا بافضل الاماكن عندهم ..
احنا 7 أشخاص و بدون أطفال و مأجرين سيارة...
ودي اعرف اذا في اوت ليت حلو عندهم او قريب من حدود فرنسا ..
مدينة ملاهي ؟
سمعت ان عندهم حديقة زهور ..
أفضل المطاعم الحلال؟
مع العلم ان مفكرين نمر فرنسا و إيطاليا لجم يوم .. و نرجع
ويعطيك العافية على المجهود ،،

حياك الله يا اخت نور
بالنسبه يا اخت نور لمدينه هايدلبيرغ تقع على نهر جميل والتمشي عليه يعتبر متعه بمطاعمه المنتشره والقهاوي على اغلب النهر وتعتبر مدينه جميله
ويسكنها الكثير من المسلمين الاتراك وتوجد فيها المطاعم العربيه والتركيه خاصة بكثره وقريب منها مدينة مانهايم وفيها سنتر جميل ويوجد فيها ايضا المطاعم التركيه والاتراك بكثره وتبعد بحدود ال 20 كم عنها
وبالنسبه يا اخت نور للاوت لت لا علم لدي الا ل 3 اوت لتات يمكن زيارتهم وراح ابين المسافات لكل منهم
1- out let - Wertheim Village
ويقع بحدود ال 180 كم ويعتبر فيه بعض البعد
n 49° 46.544
e 9° 34.592
وهذي احداثية مواقفه ان رغبتم بالذهاب له
2 - Designer Outlet Zweibrücken
n 49° 13.904
e 7° 24.233
وهذي الثاني ويبعد حوالى ال 130 الى 150 كم
الاول والثاني في المانيه
3 - ويعتبر في فرنسا وهو الاقرب
وقريب من ستراسبورغ وبادن بادن
Roppenheim The Style Outlets
n 48° 50.285
e 8° 5.158
ويبعد حوالى ال 100 كم او اقل ويقع بعد النهر الفاصل بين المانيا وفرنسا

هذا بالنسبه للاوت لتات اللى اعرفهم بالقرب من سكنكم

وبالنسبه لمدينة الملاهي القريبه منكم هي ال Holiday Park
هذي احداثية مواقف المدينه
n 49° 19.037
e 8° 18.076
وتبعد حوالى ال 45 الى 50 كم عن سكنكم

ويمكنكم زيارة مدينة شتوتجاردت وهي مدينة جميله ويوجد بها سنتر جميل
n 48° 46.458
e 9° 10.761
وهذا موقع السنتر
وتبعد حوالى 120 كم
وهذي احداثية لحديقة الزهور والحيوانات بشتوتجاردت
المواقف
n 48° 48.234
e 9° 12.418

وبالنسبه للزياره الى ايطاليا فيا اخت نور تعتبر بعيده بالنسبه لسكنكم
وبالنسبه لفرنسا فالاقرب لكم هي مدينه ستراسبورغ والمناطق المحيطه بها على الحدود الالمانيه
واي استفسار يا اخت نور انا حاضر باللى اقدر عليه والله يوفقكم

المشاركة الأصلية كتبت بواسطة ابوفيصل KSA

ابوسلمان اسعد الله صباحك وصباح الجميع بكل خير وشكر الله سعي كل من يٌقدم نصائح ... انا عضو جديد وابي معلومات عن (هامبورغ ) وبالأخص سكن قريب من المستشفى الجامعي .. واعذروني لاني ما ادري هل كتابة رسالتي بهالايقونه صحيحه والا لا ...


شكراً

وعليكم السلام والرحمه يا مرحبا فيك اخ بوفيصل
والله يا بوفيصل ماعندي فكره عن مدينة هامبورغ كافيه لاني لدي معرفه بالمناطق السياحيه القريبه من الحدود النمساويه والسويسريه والفرنسيه والايطاليه والبلجيكيه والهولنديه
اما هذي المناطق ليس لدي معلومات كافيه عنها
وخاصة هامبورغ وبرلين ومعلوماتي قليله وان وجد اي شي اقدر افيدك فيه راح اذكره لك واسمحلي يا بوفيصل
ومعرفتي فقط انهم مدن كبيره مثل باقي المدن
وان شاء الله يتم الرد عليك من الشباب بالمنتدى

السلام عليكم ورحمة الله وبركاته

لوسمحتوا انا ناوي اسافر لألمانيا والنمسا لمدة 6 ايام ان شاء الله

وابي جدول مناسب للسفره تاريخ السفر راح يكون الوصول 26/8/2015 وتاريخ الرجعه 31/8/2015 المغادر بيكون وقت الطياره الصباح تقريباً الساعه 8 والعوده بتكون الساعه 8 مساءً

اذا تكرمتوا ابي جدول للاماكن الي اروح لها واسامي الفنادق الي بسكن فيها وانا ودي بالطبيعه يومين او ثلاث ولتكرمتوا افضل طريقة تنقل بين المانيا والنمسا وداخل المانيا وداخل النمسا

وابي اعرف كم يوم اقعد في المانيا وكم يوم اقد في النمسا ، وهل تنصحوني أنزل مثلاً في المانيا ووقت العوده اطير من مطار النمسا ، وكم تقريباً راح يكلفني

اذا امكن ايش افضل مطار انزل فيه والافضل في العوده

ترا اول مره ازور هالبلدين وموب عارف وين اروح

الفيزا من اي سفاره اطلعه ( شنغن )


واكون شاكر لكم :11:

المشاركة الأصلية كتبت بواسطة Abu-6loob

السلام عليكم ورحمة الله وبركاته

لوسمحتوا انا ناوي اسافر لألمانيا والنمسا لمدة 6 ايام ان شاء الله

وابي جدول مناسب للسفره تاريخ السفر راح يكون الوصول 26/8/2015 وتاريخ الرجعه 31/8/2015 المغادر بيكون وقت الطياره الصباح تقريباً الساعه 8 والعوده بتكون الساعه 8 مساءً

اذا تكرمتوا ابي جدول للاماكن الي اروح لها واسامي الفنادق الي بسكن فيها وانا ودي بالطبيعه يومين او ثلاث ولتكرمتوا افضل طريقة تنقل بين المانيا والنمسا وداخل المانيا وداخل النمسا

وابي اعرف كم يوم اقعد في المانيا وكم يوم اقد في النمسا ، وهل تنصحوني أنزل مثلاً في المانيا ووقت العوده اطير من مطار النمسا ، وكم تقريباً راح يكلفني

اذا امكن ايش افضل مطار انزل فيه والافضل في العوده

ترا اول مره ازور هالبلدين وموب عارف وين اروح

الفيزا من اي سفاره اطلعه ( شنغن )


واكون شاكر لكم :11:

وعليكم السلام ياشيخ
يالغالي رحلتك ايامها قصيره والافضل لك النزول بميونخ والعوده منها
والذهاب اول الوصول الى كابرون او زلمسي والسكن اربع ايام والعوده الى ميونخ والسكن يومين
والتنقل عن طريق القطارات بين ميونخ وزلمسي او كابرون من محطة ميونخ
والفيزا يتم استخراجها من النمسا
لان اكثر مده فيها
والاماكن السياحيه كثير ارجع على اول المشاركات في المانيا والنمسا وراح تحصل كثير من الاماكن ويفضل قيادة السياره للسياحه
وبالنسبه للفنادق يمكن حجزها من مكاتب السفريات اذا ما عندك معرفه باحجز عن طريق النت

المشاركة الأصلية كتبت بواسطة Nour_

مشكووووور
يعطيك العافية اخوي بوسليمان ...
الأهل كلهم انبسطوا عالمعلومات الطيبة ..
ماقصرت و جزاك الله خير ..

ربي يوفقكم يا اخت نور وتسعدون برحلتكم واي معلومه اقدر عليها انا حاضر

شاكرلك ردك على سؤالي يابو سلمان

ايش تفضل لي كابرون ولا زيلامسي ووين ممكن اروح اتمشى في احد المدينتين وشنهي المعالم الي ممكن امر عليهم وممكن اسامي افضل الفنادق هناك واخيراً اسامي المطاعم الي تنصحني فيها سوا في ميونخ او كابرون وزيلامسي

رحلتي قصيره بحكم العمل

راح اكون انا وزوجتي بدون اطفال

المشاركة الأصلية كتبت بواسطة Abu-6loob

شاكرلك ردك على سؤالي يابو سلمان

ايش تفضل لي كابرون ولا زيلامسي ووين ممكن اروح اتمشى في احد المدينتين وشنهي المعالم الي ممكن امر عليهم وممكن اسامي افضل الفنادق هناك واخيراً اسامي المطاعم الي تنصحني فيها سوا في ميونخ او كابرون وزيلامسي

رحلتي قصيره بحكم العمل

راح اكون انا وزوجتي بدون اطفال

يا مرحبا فيك يالغالي
الله يسعدكم يارب
يالغالي بالنسبه لكابرون وزلمسي المسافه بينهم 5كم فقط والمطاعم تحصلهم بسهوله لانه المنطقتين صغار والجو فيهم روعه وخاصة كابرون وبالنسبه لميونخ بالمطاعم منتشره بالسنتر طب وتخير من ايراني وتركي وغيرهم والفنادق على راحتك تختار من اللى في السنتر لاي منطقه وخصوصا انكم شخصين تحصل بالسنتر بسهوله

المشاركة الأصلية كتبت بواسطة أم عبدالله

السلام عليكم ورحمة الله

احتاج اخي الكريم

أقرب مول من مطار فرانكفورت

وأقرب اوت لت من منطقة شتوتغارت

وشكرا لكم

بالنسبه يا اختي للاوت ليت بشتوتجاردت
- Outletcenter Metzingen
ويبعد حوالى ال 35 كم ويقع في متزنجن ( Metzingen )

- والثاني يقع في فرنسا على حدود المانيا بالقرب من بادن بادن ويبعد حوالى ال 110 كم
Roppenheim - the style outlets
ويقع بالقرب من منطقة روبينهيم (Roppenheim ) الفرنسيه قبلها من بعد الجسر الفاصل بين المانيا وفرنسا

وبالنسبه للمولات بفرانكفورت
- فهذا السنتر كبير ويقع بسنتر المولات ويقع بشارع التسوق لفرانكفورت
Frankfurt Zeilgalerie Baulücke

المشاركة الأصلية كتبت بواسطة Alba

يعطيك العافيه اخوي بوسلمان
حبيت اسألك هل سبق وتعاملت مع موقع car rental
حبيت اسألك عن مصداقيته وايضا طريقة التأمين هل التأمين شامل عندهم
لاني قريت بالتعليمات اي شي تدفعه لو حصل شي راح يعوضونك هم

يا مرحبا فيك يالغالي
بالنسبه car rental

هذا الموقع يعتبر موقع وسيط للشركات انا حجزت منه مره وحده من فتره واموره طيبه ولكن بالاونه الاخيره سمعت عنه معلومات توهق الناس مثل انك تحجز سياره بكيلوات مفتوحه وعند دفع المبلغ يوصلك الايصال بان الكيلوات محدده وبعض الاحيان امورك تمشي عدل وتوصل عند استلام السياره تحصلها اصغر او غير متوفره ويعطونك سياره ثانيه
وبالنسبه لي احجز من الشركه الام او اذهب الى المكاتب او اقوم باتصال معارف لي بالدول اللى ارغب فيها وهذي طريقتي
والموقع هذا فقط لمعرفة الاسعار والمقارنه بالنسبه لي

المشاركة الأصلية كتبت بواسطة JOUDY

السلام عليكم ورحمة الله
الأخ الفاضل بو سلمان اشكرك على جهودك في المنتدى بس عندي استفسار مستعجل ياليت ترد علي
حجزت موعد لاستخراج الفيزا الألمانية بكره ان شاء الله وسددت الرسوم وكل شي تمام
اللي ناقصني تعبئة النموذج وطباعته حتى تكتمل الأوراق
المشكلة اللي تظهر لي في خانة التاريخ أن الصيغة اللي كتبته فيها غلط
جربت جميييع الطرق ماضبطت معي من أكثر من متصفح مثلا 12 / 10 / 2013 أو 12 . 10 . 2013 أو 12 10 2013
كلها تطلع غلط ماعرف ايش المشكلة اللي عندي وكيف اكتبه بطريقة صحيحة

بانتظار الحل او الطريقة الصحيحة اذا تكرمت لاني فقدت الامل

يا مرحبا فيك يالغالي وحياك الله
بالنسبه للتواريخ هذا يرجع الى نظام الكمبيوتر غالبا بتحويل اللغه الى انجليزي
وبالنسبه للتاريخ اللى انت حاطه 2013 ونحن في سنة 2015 يمكن هذي اول مشكله
وللحل يوجد طرق جربها يمكن تمشي معاك انت تقصد انك تكتب بالطريقه هذي 12/10/2013
فاذا كانت هذي الطريقه فالحل
- انك تكتب بالاول اليوم وبعدها الشهر وبعدها السنه وهذي الطريقه الصحيحه
واذا ما مشت معاك
- اعمل عليها كوبي والصقها
واذا ما مشت معاك
- اضغط على ستار او ابدأ وادخل على الستنج settings
وادخل على كنترول بانل control panel راح تحصل شكل الكره الارضيه مكتوب تحتها Regional and language options افتح عليها وراح تحصل مربع مكتوب فيه arabic واسم البلد غيره الى اللغه البريطانيه او الامريكيه واضغط على كلمة applay و ok وان شاء الله تضبط معاك باحدى الطرق هذي وبنفس الطريقه رجع اللغه اللى كان عليه الجهاز


وبالاخير اخر العلاج الكي ههههه مثل مايقولون خلها فاضيه واكتبها يدوي

المشاركة الأصلية كتبت بواسطة youcef1985

السلام عليكم أخي الكريم
جزاك الله خيرا على هذه المساعدات التي تقدمها للمنتدى و اعضاءه
انوي السفر لألمانيا و النمسا
للسياحة لمدة أسبوع مع زوجتي و ابنتي ذات 3سنوات
فهل من مساعدة في كتابة جدول السفر
بحيث أزور أهم المدن

يا مرحبا فيك اخ يوسف
المدن كثيره في المانيا والنمسا ومدة اسبوع قليله بحقها
وبالنسبه لسفرك فيفضل لك النزول في ميونخ ومن ثم الذهاب الى زلمسي او كابرون دون المبيت في ميونخ والمسافه بينهم 170 كم ويفضل وجود سياره معاك لتسهل عليك التنقل والسكن باحدى المنطقتين 3 ليالي والبعد بينهم 5 كم ومنهم الى غارمش الالمانيه والسكن فيها ليلتين وتبعد عن زلمسي 200 كم
ومنها الى ميونخ وتبعد 80 كم تقريبا للعوده والمبيت ليله ويفضل ان تكون في ميونخ فتره الصبح لكي يكون لديك وقت للتسوق فيها
وللعلم يوجد بالقرب من غارمش منطقة انسبروك وتعتبر منطقة تسوق ان رغبت بالذهاب لها

المشاركة الأصلية كتبت بواسطة youcef1985

جزاك الله خيرا يا الغالي
احد اصدقائي نصحني ايضا ب Wolfgang
فايش رايك فيها

يا مرحبا فيك يالغالي
Wolfgang
بلده حلوه جبليه تقع فوق انترلاكن وتبعد حوالى ال70 كم