الموضوع: هذا ما حصل بالضبط في مقابله السفاره الامريكيه بالكويت

السلام عليكم ورحمه الله وبركاته
حددت موعد للفيزا وكنت ادور على اي ملاحظه بخصوص المقابله والاجراءات
لقيت مواضيع كثيره ولكن مو دقيقه للدرجه المطلوبه خصوصا مقابله السفاره في الكويت
من المنطلق هذا حبيت انقل تجربتي في المقابله وشرح كل شي بالدقه والتفصيل (علشان الناس الي كانت تحاتي مثلي ويدورون اي شي بهالخصوص)
طبعا الكل عارف طريقه تعبئه الابلكيشن الخاص
بعد ما تعبي الابلكيشن تدخل على الموقع (النظام الجديد) وهو بالرابط التالي
https://cgifederal.secure.force.com
وتحدد الدوله الكويت وتسجل يوزر جديد باميلك وتعبي البيانات وترفق بيانات الي معاك
طريقه تحديد الموعد بهالنظام الجديد ارتب من النظام القديم
بعد التعبئه توصل لنقطه (جدوله موعدي)
تدخل عليها يفتحلك رسوم الدفع (ضروري تطبع الصفحه علشان توديها لبنك برقان لان ماراح يستقبلونك بدونها)
يكون فيها رقم حساب لك مربوط بنظام تحديد الموعد
مجرد انك تدفع ببنك برقان بعدها ب24ساعه يوصلك اميل انه تم ايداع المبلغ بالحساب وتقدر تحدد موعد
تحدد موعد وتروحلهم
-------------------------------------------------------------------------
موضوعنا
تروح للسفاره باليوم المحدد وضروري تجي قبلها بنص ساعه على الاقل
تصف دور عند البوابه الرئيسيه ومعاك صوره الابلكيشن وصوره من تحديد الموعد
يستقبلك الي على الباب وعلى طاولته نفس الايباد مربوط فيه سيستم المواعيد مجرد انه يحط رقمك الخاص الي بالابلكيشن يتاكد ويطلع ستيكر باركود ويلزقه بجوازك
بعده على طول غرفه تفتيش (كل شي ممنوع فانت مو بحاجه اي شي غير نظارتك خلها معاك ومفتاح السياره انا ردوني لان المفتاح كان فيه فلاش مومري ورحت رديته ورجعتلهم)
تدخل على اليسار دريشه (للحين انت ما دشيت السفاره) تعطيه الاوراق والجوازات و(بطاقتك المدنيه وبطاقه منو معاك الحاضر بس ويعطيك رقم تعلقه بثوبك )
يساره على طول باب كهرباء يفتحونه لك وتدخل نفس الموضوع تفتيش جهاز وانت ماشي
تطلع من هالمكتب تكون داخل السفاره تروح للباب الي على اليسار (مافي غيره)
تدخل تلقى نفسك بالشارع لالالا اضحك
تدخل تلقى بوابه تاخذ رقم و ادخل الصاله الي على اليمين
زحمه وزحمه وزحمه
انطر لين يجي دورك تروح تعطيها الاوراق من غير ما تكلمك تقولك صف بالدور علشان تروح لكاونتر (5او6او7) وهذولي حق البصمه
توصل طريقه البصمه سهله من تقولك الموظفه حط اصابعك حطهم اليسار وبعدين اليمين وبعدين الاثنين
تذكر هالنقطه : الرقم الي اخذته اول مره وانت داخل الصاله الي على اليمين راح تشوف اول موظفه تكتب الرقم على الابلكيشن مالك
بعد ما تخلص من البصمه اقعد على الكراسي وانطر لين يجي نفس الرقم الي اخذته اول مادشيت ونفس الرقم الي كتبته الموظفه على الابلكيشن
تروح للمقابله طبعا الصاله كلها درايش وانت واقف بكل الحالات الي ذكرتها اللهم انتظار الرقم بس تقدر ترتاح اما البصمه تصف سرا مع الناس
الموظف الي يقابلنا بالكاونتر رقم 8 طول اليوم يلعلع ويحقق مع الناس بشكل استفزازي وطول اليوم قاعد ادعي اني ما اطيح بايده لاني كلمه انجليزي و20 كلمه عربي
قدر الله وماشاء فعل وحصلت مشكله مع احد الاخوان تعاند هو مع الموظف واسمعه يقوله انت مو دكتور ومو بكيفك طبعا بالانجليزي وهذا الي قدرت افهمه لان الصوت كان عالي ونادوا الامن وطلع الولد وهو يسب ويلعن بالسفاره
مصائب قوما عند قوم فوائد شلون؟؟؟
الموظف طول اليوم يحقق وهو الوحيد الي فاتح المايك وصوته بالصاله والناس اجباري تطالع شنو في بعد الي صارله من الاخ الي صراحه الله يجزاه خير وتناشب معاه صار الموظف هاااااادئ جدا لدرجه انه طفا المايك
جا دوري طلع عنده عطيته الاوراق وانا قاعد افكر بطريقه الطرده شلون بيطردني بادب ولا بخربها معاه
طالع الشاشه والواضح انه كان يقرا الابلكيشن الي بالموقع
سالني بالانجليزي (ركز بالانجليزي مو مثل ماكانو يقولون الاخوان كل شي عربي طلع السفاره محد يتكلم فيها عربي الا اشخاص انت مو بحاجتهم مثل الامن وحرس البوابه )
سالني ليش بتروح قلت بشوف امريكا
شنو تشتغل قلتله عسكري بالداخليه
كم تبي تقعد بامريكا قلتله شهر قالي انت كاتب بالابلكيشن 3 شهور (توهق البطل) قلتله بشوف اذا عجبني الوضع بقعد 3 او 5 شهور وبثقه طبعا
قالي اوكي فنش
طيب شنو فينش قال 3 ايام ويتصلون عليك ورجعلي الصور الشخصيه وما عطاني ولا ورقه للعلم اني شفت ناس فيهم البجيه وبيدهم اوراق حمر
طلعت ورجعت للبوابه الاولى وعطيته الكرت الي عطاني اياه واخذت بطاقتي المدنيه

ملاحظات بسيطه : غير صحيح الي يقولك المقابله بالعربي
غير صحيح الي يقولك ان كل شي مرتب
غثه وحر وبعض ناس الله يجزاهم خير يبط الراس من السوالف
صفطت بمصافط السفاره الساعه 8:10 موعدي كان 8:45 طلعت من السفاره 10:00
اتمنى اكون وصلت بعض النقاط للاخوان الي متخوفين من المقابله
طبعا انا تعديت مرحله الخوف وصرت من مجموعه الانتظار

مو ضروري ترد بالموضوع لكن طيب منك تدعيلي بالتوفيق اذا كنت افدتك باي شي

اي استفسار انا حاضر ان شاء الله
ودمتم بود

مواضيع عشوائيه ممكن تكون تعجبك اخترناها لك:

• مشورتكم يا الربع
• الورقة البيضاء الي في الجواز
• هل بركان ايسلندا بيكنسل الرحله
• استفسار قبل الموعد
• والزيارات الخاصة
• وين اسكن في لوس انجلوس
• افضل ارخص التذاكر من الدار البيضاء الى نيويورك
• لحاملي الجنسية الأمريكية من السعوديين توجيهات و نصائح
• سؤال عن ولاية
• بخصوص برامج اللاب الاصلية التأشيرة
• ايهم الافضل
• اسال محامى متخصص بالمجان وقيم تاشيرتك بالمجان
• عاجل للخبراء سجلت علي مخالفة سرعة بفلوريدا مالحل ؟؟
• جزر هواي جمعت سحر الجزر الاستوائيه والخدمات الامريكيه العجيبه
• اللي ما يحضر موعد المقابلة ايش يصير فيه ؟
• فيزا دراسية
• سلام بالنسبه للفيزا
• سؤال بخصوص المقابلة
• طلب مستعجل الله يخليكم ساعدوني
• عن الفيزا السياحية

الف شكر ياغالي

وبالتوفيق ان شاء الله

وبالفعل الرابط الجديد والنظام الجديد ارتب من القديم

بالتوفيق ,,

العفو والشكر لمرورك الكريم

السلام عليكم يعطيك العافية اهم شي مشت أمورك وغريبة في جدة بالسعودية الوضع مرتب والمقابلة بالعربي والمكيف علي الكيف ممكن عشان تاشيرتكم أكثر من خمس سنين هههههههه نتمني لك التوفيق

وعليكم السلام ياهلا ومرحبا بابو شعيل
اي والله اهم شي مشت اموري وعندنا الفيزا 10 سنوات
يمكن لهالسبب فرق المعامله

والله حتى احنا بالبحرين كلهم يتكلمون أنجليزي مثل ما أنت قلت

ان شاء الله تطلع لك الفيزا وتبشرنا يا رب
وتسافر وتستانس
أمريكا تستاهل التعب صراحه

بس ان شاء الله ما يسوون لك مثل أبوي

لأن ابوي مسكين قالوا له موافقين بس المسأله تاخذ وقت
يعني بعد اسبوعين بالكثير ثلاثه
تطلع له الفيزا
وهذا احنا سافرنا ورجعنا وللحين ما طلعت له فيزته !!
3 شهور انتظار وللحين لا حس ولا خبر
للأسف الشديد

سالفه الأجراء الأداري هذي أخس منها ماافي

يخلونك على أعصابك لا انت طايل سما ولا انت بالأرض

لا ان شاءالله ما اوصل للمرحله هذي

ها بشر

عسى بس تيسرت لك وطلعت لك الفيزا

يعطيك العافية و ما قصرت
و إن شاء الله راح اكتب تجربتي بالمنتدى و أخلي الكل يستفيد

بس ما أدري ليش وترتني

سؤال يا الغالي

غير ورقة الابليكيشن و ورقة الموعد و صور شخصية أحتاج شي ؟؟
شهادة راتب ؟ كشف حساب ؟.

المشاركة الأصلية كتبت بواسطة bourgn
http://www.arabtravelersforum.com/tr...7/#post8049627

سؤال يا الغالي

غير ورقة الابليكيشن و ورقة الموعد و صور شخصية أحتاج شي ؟؟
شهادة راتب ؟ كشف حساب ؟.

تحتاج ورقة سداد رسوم الفيزا من البنك
تحتاج خطاب تعريف من العمل
وتحتاج كشف حساب لاخر 3 اشهر

وجميعهم باللغة الانجليزية

تحتاج الجوزات القديمة للاحتياط

بالتوفيق ,,

الله يجزاك خير والله يوفقك بصراحه اخذت فكره عن الموضوع وكنت متخوف منه الايام القادمه راح اقدم على الابليكيشن ..
ضحكتني بسالفه الباب يطلعك ع الشارع

اسف للتاخير بالرد ولله الحمد استلمت الفيزا بعد 3 ايام عمل من شركه ارامكس الي بالعارضيه
الطلبات يا اخوان للي بالكويت صوره الابلكيشن وصوره الموعد فقط فقط فقط
لان ورقه البنك قبل يحتاجونها لان كان النظام تحجز موعد قبل لا تدفع لكن الحين ما يفتحلك صفحه تحديد الموعد الا تكون دافع الرسوم وقلت لكم ان بعد ما تدفع الرسوم يفتحلك حسابك على الموقع الي حاط الرابط ماله
للعلم حتى الصوره الشخصيه ردوها لي ما يبونها لان صورتك بالابلكيشن من الموبايل

شكرا اخوي بالتوفيق لك

العفو اخوي ولله الحمد اشوف ان بعض الاخوان تفاعلو بعد موضوعي وقامو يكتبون تجاربهم وهذا كله بمصلحه الاخوان الي بيقدمون عالفيزا ومو عارفين الاجراءات وانا كنت منهم ولا لقيت احد كاتب اي شي علشان هالشي حبيت انقل ما حصل معاي علشان غيري يستفيد

جزاك الله خير وما قصرت
بسطت الأمور ووضحتها

وإن شاء الله راح أطبق كل ما ذكرته وربك يسهلها

بالتوفيق اخوي برنس واهم شي طمنا شيصير عليك من الموبايل