الموضوع: أول مرة بسافر أمريكا وعندي العديد من الاستفسارات ، الرجاااااااااااء المساعدة

السلام عليكموالله يعطيكم العافية على هذا القسم المميز
ناوي على السفر لأمريكا وعندي العديد من الاستفسارات ، وأتمنى من المشرفين وخبراء أمريكا وكل من لديه معلومة من الأعضاء الكرام ان يساعدني لأن هذي أول سفرة لي لأمريكا إن شاء الله


قبل ما اسأل بوضح ان السفرة ان شاء الله بعطلة نص السنة ، يعني بشهر فبراير القادم لمدة 3 أسابيع تقريبا
والسفرة عائلية ، انا وزوجتي وعيالي الأربعة الله يحفظهم ( 9 , 8 , 6 , 1 سنوات )
الوجهات المطلوبة ( نيويورك 5 ليالي ، اورلاندو 16 ليلة )
والحين صار دور الأسئلة :
1- هل 5 ليالي كافية على نيويورك ولا وايد عليها ؟ خصوصا ان الجو بيكون بارد ومعاي أطفال ، لكن هي الزيارة الأولى لنا وودي أشوف كل معالم نيويورك !

2- هل سهل إني أحصل تاكسي من المطار إلى الفندق بنيويورك يكفي لعائلتي ( 6 أشخاص ) مع جناطنا ( أتوقع بتكون 5 جناط !! مع عربانة أطفال ) ولا أحجز تاكسي أو باص من قبل السفر عشان يوديني الفندق ؟

3- لقيت تذاكر على خطوط طيران الاتحاد وسعرهم لكامل أفراد الاسرة ( 2 كبار + 3 صغار + 1 رضيع ) يساوي 1217 دينار من الكويت إلى نيويورك ، فهل هذا السعر مناسب ولا غالي ولا رخيص ؟ طبعا هذا السعر مع وجود عرض من البنك الوطني مع طيران الاتحاد بس مادري متى يخلص هذا العرض ، فهل أحجز الحين مع ان ماعندي فيزا ولا انطر لين اتأكد من صدور الفيزا ؟؟ ( مقابلتنا بالسفارة تاريخ 10/12/2012 )

4- على طاري الفيزا ، هل بالمقابلة آخذ عيالي معاي ؟ ولا بس انا وأمهم نروح للمقابلة ؟؟؟

5- بالنسبة للسكن بنيويورك ، ناوي أحجز فندق
DoubleTree Suites by Hilton NYC - Times Square ، هل أحجزه عن طريق موقع بوكنق ؟ ولا أحجزه من الموقع الرسمي ؟ ولا عندكم موقع أخر ؟؟؟ مع العلم ان سعره في موقع بوكنق أرخص من سعره بموقعة الرسمي !!

6- بالنسبة للطيران الداخلي ، أغلب الاعضاء يقولون ان طيرن الجت بلو أفضل طيران داخلي لأمريكا ، شفت سعرهم وقارنته مع طيران الدلتا وطلع ان دلتا أرخص بوايد من الجت بلو ، لكن ..... الجت بلو يعطيني حقيبة لكل راكب مجانا أما الدلتا فلازم أدفع مبلغ 25 دولار على كل حقيبة ، السؤال هو هل أدفع 25 دولار على الذهاب و 25 دولار على الرجعة ؟ ولا فقط 25 دولار شامل الذهاب والرجعة ؟؟؟

7- بالنسبة للسيارة في اورلاندو ، هل لازم أأجر سيارة كبيرة ( 7 راكب ) عشان يقعدون عيالي كل واحد بكرسي منفصل عن الثاني ؟ ولا عادي أأجر سيارة صالون وخلاص ؟

8- أيضا بالنسبة للسيارة ، هل لازم أأجر كرسي لطفلي الرضيع ؟ ولا عادي أخليه مع اخوانه يقعد ويربط الحزام ؟


9- أدري اني كثرت بالأسئلة بس ميخالف انتوا طيبين وانا استاهل ان شاء الله ، أتمنى الي عنده إجابة عن هذي التساؤلات أو اي نصيحة أو اي تحذير أو اي شي ان ما يبخل علي فيه



ومشكورين مقدما

مواضيع عشوائيه ممكن تكون تعجبك اخترناها لك:

• في كشف طبي ولا مفيش ؟
• استفسار عن تأشيرة سياحة الى الولايات المتحدة
• مطلوب مساعدتكم للسفر لامريكا
• ما يحتاجه المسافر من اللغة الانجليزية
• ياشباب الرياض محتاج مساعدة منكم
• تغيير الموعد
• مسافرة علي طيران الاتحاد الي نيويورك امريكا
• مشكله
• احتاج رقم السفارة في امريكا وكندا
• اخي ممكن استفسار ؟؟
• فاتورة
• لحاملي الجرين سؤال من فضلكم
• سؤال مهم يااخوان
• اول سفره لي الي امريكا و اود منك رائكم في برنامجي
• يا شباب انتبهوا الرجاء الدخول ضروري من كل المسافرين الى امريكا
• تفاصيل المقابلة ليوم في السفارة الامريكية بالرياض
• خطاء في الابليكيشن حرم الله وجوهكم عن النار
• استفسار عن أخذ موعد في السفارة
• استفسار عن منطقة
• استفسار هام عند دخولك أمريكا

أولا حياك اللة

السعر للتذاكر اكثر من ممتاز ، وايد رخيص ، ما يتطوف
...
نيويورك ماتصلح وايد لليهال ، وغالية ، والجو بيكون بااااااااارد وايد ، نصيحة خلها ليلتين او ثلاث ليالي فقط ، كل معالم نيويورك المهمة تقدر تشوفها بيومين ..
....
التكسي من المطار ، الأفضل تحجز من النت قبل السفر بيومين ، تحجز سيارة كبيرة وسائق والسعر ماهو غالي
....
بالنسبة للسيارة في اورلاندو الافضل تحجز ميني فان لان ماشاء اللة أنتوا وايد وعلشان يشيل الشنط كذلك..
....
الطيران الداخلي في امريكا متشابة ، اختيار الأرخص ( شوف تقريري بالتوقيع ( امريكا للمبتدئين فية مقارنة للطيران الداخلي والشنط))
.....
بالنسبة للفندق في نيويورك أحجز من بوكنق او مباشرة من موقع الفندق ، مايفرق ، انت اختار المناسب لك
.....
لاتحاتي ، انت خلص من الفيزا واحجز الطيران وان شاء اللة بنساعدك بالباقي من الموبايل

http://www.viator.com/New-York-City-...f=02&aid=g1428

احد شركات التكاسي من الموبايل

و عليكم السلام و رحمة الله وبركاته
اول شي و اهم شي
لا ثم لا ثم لا تحجز اي شي الحين انطر تطلع الفيزا بالاول بعدين احجز
1) 5 ليالي وايد على نيويورك " الجو برد وثلج " خلهم 3 ليالي
2) في شركات تاجير سيارات "تحجز عن طريق النت تحدد وقت الوصول ورقم الرحله ويكون في استقبالك بالمطار"
http://www.arabtravelersforum.com/travel769443/
http://jfkairportlimousine.net/home
http://www.supershuttle.com/

3) ابحث بالمواقع المذكورة "تعطيك بحث لاغلب شركات الطيران"
http://www.kayak.com
http://www.expedia.com

4) تحت 14 سنه ما يحتاج الحضور

5) مواقع
http://www.hotelcombined.com
http://www.priceline.com
برايس لاين في عنده عروض للفنادق فترة الشتاء توصل لي 45%

6) الطيران الداخلي يحسب عليك الجناط بالروحه والرده "تدفع 25 بالروحه و 25 بالردة"

7) لازم سيارة كبيرة "لا تغامر وتبتلش بالمخالفات" ...
موقع
http://www.carhire3000.com
السعر يشمل " الاجار + تامين شااااااااامل" بس دق السيارة سلف ولا تشيل اي هم ... لكن لا تنسى تطبع و تسلمهم voucher التاجير عند استلام السيارة

8) ضروري الكرسي للاطفال "الكرسي قبل السيارة" بامكانك تاجيره من الشركة او تشتري من وولمارت و باقي المحلات

9) جهاز gps ضروري للسيارة " الافضل ان تخزن الاماكن اللي ناوي تروح لها من الحين "
http://www.arabtravelersforum.com/travel370671/
من الموقع السابق حدد رحلاتك اللي تبيها في اورلاندو + لا تنسى حسبة تذاكر الالعاب و تكلفتها + تكلفة السكن

16 يوم لاورلاندو "من وجهة نظري اوكي" يوم رحلة ويوم تقضي بالتسوق والرحلات الصغيرة (رحلات ابو 3 ساعات او نص يوم)
بامكانك تقسم الايام
3 نيويورك
15 اورلاندو
3 ميامي

أشكر الأخوان

http://www.arabtravelersforum.com/user343540/ وhttp://www.arabtravelersforum.com/user448149/

على تجاوبهم مع استفساراتي والرد عليها ، ولا يهونون باقي أعضاء القروب


ان شاء الله باخذ بنصائحكم وبقلل فترة نيويورك إلى 3 ليالي ، وبستأجر سيارة كبيرة 7 راكب مع كرسي للأطفال

بس عندي جم استفسار مرة ثانية

1- ميامي هل تستاهل إني أروح لها وأضيفها بمخطط السفر ؟
خصوصا وإن السفرة عائلية حق اليهال ! والجو بيكون مائل للبرودة ما ينفع للسباحة أتوقع !
وإذا كانت تستاهل فكم يوم تحتاج ؟ هل 3 ليالي كافية ولا لأ ؟


2- المصروف .....إن شاء الله بحجز وأدفع قيمة التذاكر الدولية والداخلية والسكن وقيمة تأجير السيارة من الكويت ، لكن بعرف كم أحتاج للصرف في أمريكا ؟
أدري ان المصرف يعتمد على حسب كل شخص وطبعه والأماكن الي بيزورها
لكن بشكل تقريبي ، هل تكفي 10 آلاف دولار كمصرف للعائلة المكونة من 6 أشخاص ؟
( المصرف شامل أكل 3 وجبات + بانزين للسيارة + زيارة الأماكن الترفيهية والسياحية في نيويورك واورلاندو لمدة 21 يوم )
وإذا كانت لا تكفي شنو الطريقة الي أدخل فيها أكثر من 10 آلاف دولار إلى أمريكا ؟ لأني حسب ما قريت ان يسألوني بكارت تعبئة البيانات الي يوزعونة بالطيارة عن كمية الفلوس الي معاي وهل هي أكثر من 10 آلاف ولا لأ !!


3- بالنسبة لحليب الأطفال الرضع ، هل عادي أدخل معاي حليب لولدي الصغير ؟
لأني بحتاج تقريبا 6 علب للفترة كاملة ، عادي أدخلهم أمريكا ولا ممنوع مثل استراليا ؟؟


هذا كل شي حاليا ، وأتمنى المساعدة من الجميع
والي عنده نصائح زيادة أو تحذير أو اي شي ما تطرقت له يتفضل يقوله وكلي آآآآآذان صاغية

هلا بو سعود

1) ميامي انا ما رحت لها "بسبب ان الكثير يقولون فيها مناظر تخدش و تحرج " ففضلت فورت لودرديل عليها ... بالنسبة لزيارتك راح تكون في الشتاء ما عندي علم

2) المبلغ مناسب للمصرف لان لو تقسمها على 6 اشخاص و تقسمها على 21 يوم يطلع مصرف الشخص الواحد 80 دولار يعني الشخص يكلف 23 دينار باليوم ... ثاني شي والاهم المبلغ ما انصحك تاخذ كاش 10 الاف "حط لك فيزا و كل ما احتجت مبلغ حول بالبطاقة " انصحك ببطاقة فيزا عادية + فيزا مسبقة الدفع "انت تحط فيها رصيد كل مل احتجت" ... على فكرة انا اذكر اني استخدمت بطاقة ال كي نت العاديه ومشت تقريبا 90٪ في كل الاماكن "بطاقة بيت التمويل ما ادري عن باجي البنوك" والاماكن اللي ما تنقبل فيها استخدم الفيزا ... بطاقة التعبئه بالطياره تكتب جم معاك من الكاش بس و ما يعدي 10الاف .. اما رصيدك بالبنك او الفيزا لو فيهم تريليون مالهم شغل فيهم

3) الحليب عادي يدخلونه بس ممكن التفتيش ياخرونك " لاجراءات السلامه " ... حاول تخلي الحليب و كل الاكل في جنطة وحده او ثنتين و يكون بمكان سهل " لا توزعهم على كل الجناط و تاذي نفسك و تفتحهم كلهم و ترد تسكر و عفسه"

تذاكر الاماكن السياحيه تقدر تدخل على مواقعهم و تجيك على الاسعار و جم تكلفك ...

بالنسبة للكاش لا تاخذ اكثر من 2000 دولار " بامكانك استخدام جزء من هذا المبلغ للايداع عند الفنادق للتامين بدل ما يسوي block على الفيزا و انطر 5 ايام على ما يشيل البلوك "

الحليب عادى جدا , ما راح يضايقونك ولاكن اذا سالوك قول الطبيب قايلى ان الولد لازم فقط يشرب هذا النوع
.....
ميامى وايد حلوة لاكن ماهى ذاك الزود للصغار .. اذا بخاطرك روح لها ليلة وارجع ( مثلا روح يوم من الصبح بالسيارة من اورلاندو الى ميامى وبات ليلة وارجع ثانى يوم بالليل )
شوف تقريرى تحت بالتوقيع عن ميامى
......
المصروف
اليوم اللى بتروح فية مدينة ملاهى بتدفع حوالى 450 دولار لتذاكر الدخول و بتدفع حوالى 200 للاكل و200 مثل اشياء ثانية ( مواقف سيارة , ايس كريم,بانزين,العاب ...الخ) يعنى 850 تقريبا
.......
يوم ثانى بدون ملاهى بتصرف بحدود 500 دولار
....

الحمد الله اليوم وصلتني الجوازات مع الفيزه الأمريكية وكل شي كان سهل ولله الحمد

حجزت الطيران الدولي بسعر 1217 د.ك : كويت - نيويورك على الاتحاد
وحجزت الطيران الداخلي بسعر 1305 $ : نيويورك - اورلاندو على الجت بلو

والحين قاعد أشوف أسعار الفنادق

أسعار الفنادق زادت بشكل كبير بكل من نيويورك واورلاندو ! ، آخر مره مجيك على الأسعار قبل 3 أسابيع بس الحين ارتفعت وايد لدرجة ان لما أحط التواريخ بموقع بوكنق يطلعلي مسج مكتوب فيه :

المكان مزدحم في نيو يورك في هذه التواريخ، لذا فإن الأسعار قد تكون أعلى من العادة.

نصيحة: اختر تاريخاً مختلفاً إذا أمكن.

السؤال الحين :

1- شسوي ؟ أنطر ولا أحجز ؟؟ وإذا نطرت هل راح تنزل الأسعار ولا لأ ؟

2- نيويورك خليتها 3 ليالي من تاريخ 8/2/2013 إلى 11/2/2013 مثل ما نصحتوني ، بس أبي السكن هل أتوكل على الله وأحجز بالدبل تري باي هيلتون ؟ ولا عندكم إقتراح ثاني ؟ مع العلم ان الدبل تري سعره 763 $ بدون الضرايب

3- السكن في اورلاندو كنت ناوي على Sheraton Vistana Villages Resort Villas بس الحين شيكت على السعر وطلع زايد وااااااااااااااااااااايد !! تقريبا 600 دولار زيادة ، ما عندكم منتجع حلو وراقي بس مايكون غالي ؟؟؟؟؟

أهم شي عندي السكن باورلاندو ، أبي نظام شقه مو فندق ، ياريت لو تقترحون علي منتجعات مجربينها وتنصحون فيها كموقع وفخامة وسعر

4- ميامي ليلحين مو مستقر عليها ، هل تستاهل الروحة وأقعد فيها 3 أيام ؟ ولا أظل بس باورلاندو ؟ لأن صعب اني أزورها وأرجع بنفس اليوم خصوصا ان معاي يهال ، فشنو تقترحون ؟؟

5- هل أجار السيارات راح يزيدون أسعارهم نفس الفنادق ولا لأ ؟ يعني أحجز السيارة من الحين ولا تو الناس ؟؟؟

هذا كل شي حاليا ، وأتمنى منكم الإجابة

السؤال الحين :
1- شسوي ؟ أنطر ولا أحجز ؟؟ وإذا نطرت هل راح تنزل الأسعار ولا لأ ؟

احجز و لاتنطر .. الاسعار ما اعتقد بتنزل
2- نيويورك خليتها 3 ليالي من تاريخ 8/2/2013 إلى 11/2/2013 مثل ما نصحتوني ، بس أبي السكن هل أتوكل على الله وأحجز بالدبل تري باي هيلتون ؟ ولا عندكم إقتراح ثاني ؟ مع العلم ان الدبل تري سعره 763 $ بدون الضرايب
فى اكسبيديا اليوم تشيكت على الدبل ترى هيلتون لقيت سعر الغرفة ب 228 بدون ضرائب !!! يعنى غرفتين ب 456 دولار بدون ضرائب ولقيت غرفة مسموح 6 اشخاص ب 254 دولار !!!! و لقيت بفندق الميلانيوم برودواى وهذا ممتاز بسعر 219 دولار للغرفة بدون ضرائب .
3- السكن في اورلاندو كنت ناوي على Sheraton Vistana Villages Resort Villas بس الحين شيكت على السعر وطلع زايد وااااااااااااااااااااايد !! تقريبا 600 دولار زيادة ، ما عندكم منتجع حلو وراقي بس مايكون غالي ؟؟؟؟أهم شي عندي السكن باورلاندو ، أبي نظام شقه مو فندق ، ياريت لو تقترحون علي منتجعات مجربينها وتنصحون فيها كموقع وفخامة وسعر ممكن تسكن فى منتجع فلوريدايز شقه 3 غرف نوم وصالة ومطبخ ب 234 دولار بالليلة بدون ضرائب Bedroom3 Grand Suite ....Floridays وهذا انا سكنت فية قبل سنتين .....
او ممكن تسكن فىvista cay resort by millenium وهذا منتجع الشقة ال3غرف ب 143 دولار .....بصراحة الخيارات وايد وبكل المستويات وبكل الاسعار..... او ممكن تاخذ فيلا كبيرة 3 غرف وحمام سباحة بمنطقى كيسيمى اتوقع بسعر 150 بالليلة
4- ميامي ليلحين مو مستقر عليها ، هل تستاهل الروحة وأقعد فيها 3 أيام ؟ ولا أظل بس باورلاندو ؟ لأن صعب اني أزورها وأرجع بنفس اليوم خصوصا ان معاي يهال ، فشنو تقترحون ؟؟

نصيحة لان ماشاء اللة معاك اطفال وايد روح يوم من الصبح وبات ليلة وارجع ثانى يوم بالليل ( نسويلك برنامج يومين تشوف فية اهم اماكن ميامى)
5- هل أجار السيارات راح يزيدون أسعارهم نفس الفنادق ولا لأ ؟ يعني أحجز السيارة من الحين ولا تو الناس ؟؟؟من الحين ادخل على موقع شركة المو او ناشونال او من موقع بوكنق كار www.alamo.com ...http://www.nationalcar.com...http://www.bookingcar.com. واحجز مينى فان او تاهو مثلا ( انصح بالمينى فان) ... المطلوب اسمك وايميلك ونوع السيارة و التواريخ ومكان الاستلام ومكان التسليم( ما يبون بيانات او معلومات عن الفيزا او ماستر...يعنى تقدر تحجز و تلغى بدون اى التزام

الأخ

http://www.arabtravelersforum.com/user343540/

الحمد الله حجزت فندق الدبل تري بنيويورك ، سويت فيه سريرين دبل وأريكة بسعر 892$ لمدة ثلاث ليالي شامل الضرائب
وأيضا حجزت السيارة من موقع ناشونال وهي من نوع 7 راكب اوتوماتيك وأظفت عليها كرسي للرضيع ، طلع الحساب 1028$ لمدة 17 ليلة
بس مثل ماقلت ما خذوا مني بيانات الفيزا او الماستر ! مجرد اسمي وايميليي وخلاص !!
فهل هذا الحجز أكيد ومظمون ؟؟؟
ولا أروح هناك يقولون ماعندنا سيارات ؟؟
بصراحه متخوف من هالشي
وإذا رحت هناك هل راح يخصمون نفس المبلغ المذكور ؟ ولا بيقولون ادفع تأمين وانشورانس وشغلات زيادة ؟؟؟
مع العلم إني ماظفت ولا لغيت أي نوع من التأمين في السياره
فمادري هل هي مؤمنه جذي ولا لأ ؟؟؟؟


وعندي سؤال بخصوص ميامي ، الحين صارة الفترة حق فلوريدا 17 ليلة
شرايك أقسم الفترة 7 - 3 - 7 بحيث أقعد اسبوع اول شي باورلاندو بعدين 3 ليالي بميامي بعدين ارجع اسبوع اورلاندو ؟
إذا تشوف ان هالشي صحيح وينفع ياريت لو تعطيني أسامي فنادق في ميامي
ودي بفندق عالبحر إذا أمكن أو بالسنتر ، يعني بمكان المعمعة


وانا حطيت استفسار عن منتجعات اورلاندو ، إذا تعرف عنهم شي أتمنى تقولي عليه


ومشكووووور وماقصرت

حجز السيارة مضمون ومؤكد 100 فى ال100 .. لاتحاتى ... والسعر صحيح لانى تشيكت علية وهو شامل الضرائب و شامل التامين , اول ماتطلع من مطار اورلاندو تشوف باص ناشونال , تركب انت واهلك والشنط ويروح فيكم مقر الشركة( 5 دقايق).. سعر السيارة معقول جدا ...
...
الدبل ترى كذلك سعرة معقول على نيويورك ( انا اخر مرة فى نيويورك مع الاهل سكنت فية وهو بوسط التايم سكوير)...
....
بالنسبة لميامى .. اكرر نصيحتى ...ميامى انا احبها اكثر بكثير من اورلاندو , لاكنها ماتصلح لليهال ... احجز فيلا او شقة باورلاندو لمدة 17 ليلة و بنص الفترة روح ميامى ليلة او ليلتين ( ماتسوى تشيل وتحط بالشنط وتسوى تشك اوت وتشك ان ) واسكن بالساوث بيتش والفنادق هناك وااايد

شوف تقريرى عن ميامى ولايطوفكم الطراد السريع ( اليهال بيستانسون وايد )