بسم الله الرحمن الرحيم
السلام عليكم ورحمة الله وبركاته
الاخوان الاعزاء في بوابة امريكا الشمالية و الجنوبية
هذي ذكريات غير مرتبة التقطها من ذاكرتي عن رحلتي للولايات المتحدة الامريكيه عام 1998 م يا رب تعجبكم , ولو ما عجبتكم اسمني زدت رصيد مشاركاتي في المنتدى .
المهم نبداء بسم الله
بدئت الفكرة عندما زارني صديق فلسطين من مواليد السعوديه وهو زميل دراسة في المرحلة الثانوية كان قد رحل الى الولايات المتحدة الامريكية لإكمال دراسته الجامعية , و كانت زيارته لي بعد سنة من سفره لأمريكا , و اول ما جلس معاي قام ينفخ راسي و امريكا و امريكا الين ما خلاني في حالة من الشوق للبلد , الحاصل ايمها انا كنت طالب في الجامعه ثاني سنه و طبعا لابد آخد اذن اهلي للرحله فأخذت صاحبي ورحت على اخي الأكبر الله يطول عمره و يبقيه و قلتله انا ابغى اسافر مع ابو اللول لأمريكا , بدون مقدمات شد نفس من الشيشه و قال ما يخالف سافر , طبعا انا ما صدقت اني أخذت منه الموافقه قمت بدون شكرا بدون تفاهم قلتله سلام عليكم و طلعت من المكتب (اخاف يغير رأيه) المهم سافر لؤي وكان الوعد في الصيف بعد ثلاثه اربعه شهور .
كيف قضيت الفترة من وقت رحيل ابو اللول الين وقت السفر !!!
اقلكم كيف
ايامها ما كان فيه انترنت بس كان فيه ايميل في جامعة الملك عبدالعزيز و طبعا انا اول مره اعرف ايش هوا الايميل و كان بالنسبه لي اختراع ولا في الاحلام يعني كيف ممكن ترسل رساله و توصل في نفس الوقت كأنه فلم خيال علمي , المهم صرت اراسل ابو اللول على البريد الالكتروني و الله اننا خليناه تشات يعني رساله وراء رساله , المهم و هو يحمس فيا و امريكا و ما ادراك ما امريكا و ورحلة العمر و ما راح تنسى رحلة امريكا الين والله العظيم يا جماعة الخير اني صرت انام احلم بأمريكا و ياريت الفترة قصير الى لمدة اربع شهور الين ما انسليت من التفكير تقول عشقان بنيه مو سفره
المهم يا طويلين العمر و السلامه قرب وقت السفر قمت هزيت طولي و توجهت للسفارة الامريكيه و كانت ايامها الامور لاباس احسن من الآن بكثير , رحت عندهم الظاهر اعطوني بطاقه صغيره و اعطوني موعد ثاني يوم , بالفعل ثاني يوم كنت عندهم ادخلوني و رحت بالجواز على الشباك الي فيه الموظفه قالتلي ايش رايح تسوي بأمريكا , قلتلها اجازه طبعا اللغة على كيف كيفك (مي امريكا ترفل فيكيشن) المهم انها فهمت قصدي طبعا كنت مجهز الاجابه سلفا لأني لو ما جهزتها والله لو تسأل منا للصبح ما رديت عليها (ثقافتي فرنسي) الحاصل قالت يعني ما راح تدرس في امريكا قلتلها لأ قالت أكيد قلتلها يس شور والله العظيم شور , برقت عيونها في و جلست تزاغر فيا ابو دقيقه الين ما خلت اعصابي تتوتر , الحاصل بعد كم يوم رجعت و اخذت الجواز منهم مأشر عليه بالدخول للسياحه لمدة ستة أشهر قلت خير , و رحت للسوق و اتسوقت .
بس ملحوظه كذا على السريع انا ما ادري يا جماعة الخير قبل هذا العام كان الوضع عجيب و بعده اتغيرت الأحوال على المستوى الشخصي على الأقل لأني اتذكر يوم رحت اتقضى للسفره رحت السوق و عبيت شنطتين بنطلونات و تيشيرتات والازم منه بألفين ريال لكن اليوم لو تدخل محل واحد تطلع صارف الألفين في طقمين ثلاثة و اسألوا اهل جدة و الرياض .
المهم ارجع للموضوع
طبعا يوم الرحله كان بعد آخر اختبار لي بالجامعه بساعتين
يعني رحت الاختبار و الشنطه في السياره
والله ما ادري ايش عملت في الاختبار من كثر الحماس ما حليت شي جالس اناظر الساعه وليه مستعجل احدا مع خله يناظر الساعه
المهم طلعت من الاختبار و على المطار الخارجي بمدينة جدة و كانت الرحله للأسف على الخطوط الاردنيه عشان اوفر 300 ريال بس , المهم طلعنا على الطياره و كانت فاااااااضيه حسيت اني مسافر لوحدي والله اول رحلة اركب فيها بالشكل هذا , المهم الرحله استغرقت تقريبا ساعتين او ساعه و نص ما اتذكر المهم وصلنا المطار و نزلت بالباص الين الفندق و جاني ولد عمي على الفندق و اخذني معاه لفلفنا شويه في عمان و اتعشينا ورجعني نمت متأخر و الساعه ست الصبح طلعت على الطيارة متجه لمطار جي اف كاندي بنيويورك .
المهم بدئت الرحله وانا في غاية الحماس و قاعد اتخيل كيف راح يكون استقبال ابو اللول ليا و الشباب الي معاه بعد خاصة اني عملت علاقات معهم عن طريق الايميل , المهم و مع استغراقي في التفكير جاني النوم و نمت , و ما اصحالك غير على واحد يدقني على كتفي بعنف و يقول ( كوووم كوووم شو بدك دجاج ولا لحمي ) قلت سلام قول من رب رحيم ياخويا انت قاعد توزع وجبه في رباط غلابه ؟؟ احترمني شوي انا راكب على خطوط جويه , تركني و مشى و طبعا جلست بالجوع ولا ذقت ذيك الوجبه , ولا طلبت منهم اصلا لأنه تقول عمالين يتصدقوا على الركاب بالوجبه , المهم بعد تقريبا عشر ساعات و صلنا بحمد الله على مطار نيويورك و بيني وبينكم كنت متلهف للوصول بسبب اني كنت وحدي و مليت من الرحله و الرحله كانت كلها سيخ مدري هندوس مدري وشو المهم الي لابسين زي الدلاي لاما تبع التبت و يحطون حاجه على جباههم صفراء كنها هرد مخلوط بماء المهم هو توه يحط الكوره على وسط جبهته الى و السائل الاصفر يبداء يسيل على وجهه و انواع القرف الين ما وصلت , والغريب في الموضوع انه معظم الي كانوا موجودين من هذه الطائفه كانوا امريكان و ما ادري ايش سالفتهم مع الاردن ما ادري هم عندهم مزار هناك ولا رايحين سياحه في الصحراء , أيــــــه ما علينا , المهم اني و صلت بالسلامه , و نزلت من الطياره و اتبع الناس الي ماشين ماني داري ايش الهرجه , الين ما وصلت لموظفة الجمارك طبعا اعطيتها الكرت الي عبيته و الله العظيم بالبركه و التخمين و كله شخمطه و تصليحات كنه دفتر الحصه حق الرياضيات ايام المدرسه , المهم الآدميه شافت الجواز وقامت تراطن انجليزي و انا مركز على الآخر بس والله اذاني مسدوده مع الرحله و الضغط ما فهمت منها كلمه بعدين جاني واحد اردني كان معانا في الرحله قالي تقلك فين العنوان في امريكا قلتلها راح اسكن في نيوجرسي , قالت ما ينفع نبغى عنوان محدد قلتلها مافي , قالتلي آسفه انت راح ترجع مع اول رحله راجعه على بلدك طبعا الترجمه عن طريق الاردني وانا عيوني بدت ترطب بالدموع لاني كنت راح ابداء مسلسل التوسلات لكن هي الظاهر لاحظت و قالتلي اوقف على جنب الين ما اخلص بعدين اشوف حكايتك , المهم بعد ما انتهت يعني تقريبا بعد نص ساعه قالتلي اقبل يا ولد قلت يا لبيه يا مدام , قالت يا ولد انت لمين جاي بهالديره قلت جاي لصاحبي ابو اللول قالت هو ايش يعمل هنا قلت طالب قالت وين عنوانه قلت نوجرسي قالت فين بالظبط قلت الله اعلم , قالت ما ينفع لابد يكون عندك عنوان محدد قام الأردني قالي اكتبلها عنوان أي فندق و خلص نفسك كذا قدامها و عيني عينك قلتله ما اعرف أي عنوان ولا اعرف اسم شارع في امريكا قالي انا اديك العنوان و عبالي هو الورقه قدامها لما اخذت الورقه قالتلي تعرف هذا العنوان قلت لا والله الكذب خيبه قالت يا ولد الحلال انتوا العرب فيكم ويخطيكم طبعا ما فهمت بالظبط الي قالته لكنها كانت تساخط على الاردني انه كيف مستهبلها لهدرجه ويحاول يخدعها و هي تناظر طبعا الاردني لم نفسه ومشي و تركني , قمت انا بادرت للحرمه و قلتلها (مدام مي نو انجلش بت ماي فرند آوت سايد ) يعني صاحبي ينتظرني بره قالت وش اسمه صاحبك طبعا كررتها اربعميه مرة و على اقل من مهلها الين ما فهمت قلتلها ابو اللول , طلعت و غابت ربع ساعه و جاتني قالتلي يا لله اطلع صاحبك بره و عطاني العنوان قلت الحمد لله و الطع برا لمكان ما يستقبلوا الركاب القادمين و الاقي ابو اللول الدب (على فكره ابو اللول وزنه 180 كيلو بدون مبالغه) جالس ينتظرني و على وجهه علامات المرض الشديد , طبعا رحب بابتسامه بارده و قالي انا مريض لا تسلم علي عشان لا اعديك , طلعنا السياره و رمالي المفاتيح و قال سوق انت قلت ممتاز راح اسوق , المهم الي شفته معد كذا الين ما وصلنا صراحه صعب وصفه (مدينة نيويورك) مدينة عظيمه سبحان الله علم الانسان مالم يعلم و الله يا جماعة الخير اني انبهرت بالمباني و الكباري و لا كله كوم و لما مرينا بانفق الي تحت المحيط الي يربط ولاية نيويورك بولاية نيوجرسي طبعا انا سبق شفت النفق لذلك من يوم ما دخلته قلت لابو اللول هذا مو نفق (من ان بلاك) ضحكلي ضحكة مودع قلت دخيلك لاتموت غير بعد ما ارجع بلدي قال خير انشالله , المهم , لما كنا في نيويورك كان الناس بيض و شقر و حلوين بس عدينا ذاك التنل الى الناس بدؤوا يسمروا شويه شويه قلتلها هنا كأن الناس من امريكا الجنوبيه و بعد عشره كيلوا قلتله هنا كن الناس عرب , المهم ما كنا و اصلين البيت الى و كننا في غانا , والله يا جماعة الخير تقول انك في حارة منصور في جدة , أو في مدينه في قلب افريقيا , مافيه واحد ابيض ولا حتى واحد فاتح شويه , المهم قلت عباد الله اخوان و انا ايش عليا المهم و قفنا قدام عماره زي الي في سسم استريت الي كان يجي في القناة الثانيه السعوديه زمان , ودخلنا البيت و طلعنا الدور الثاني الدرج كنه درج عمارة صاحبها مأجرها على عمال بنقاليه عندنا في البلد , وسخ و حالته حاله قلت معقول فيه بيوت كذا في امريكا شيء عجيب , بس دخلنا الشقه و كانت الصدمة الكبرى .................................................. ........... المكان غير صالح للاستخدام الآدمي الأرضيه عباره عن خشب باركيه فيه فتحات مثل فتحات الجولف و هذي الفتحات عباره عن ابواب لبيت الفيران الي تحت الخشب و الخشب نفسه يتدرج لونه من البني الفاتح (لون الخشب الأصلي) و حتى الأسود (لون السخام الي مكوم على الخشب) قلتله ابو اللول انا اظن لو امسح الارض وجهين اطلع ملابسك القديمه الي رميتها السنه الي فاتت على الأرض يا رجل الوسخ طبقات , قالي عاد انا مريض ما قدرت انظف البيت بعدين انت لك اكل ولا بحلقه قلت مفهوم , المهم الغرفه الي مخصصه له كانت عباره عن سرير واحد و طاوله صغيره مقارنة بحجمه اعتقد انها تصلح كرسي له وليس طاولة مكتب , المهم قلتله طيب انا فين راح انام قام مد يده تحت السرير وسحبلي مرتبه حقت سرير من ابو سست بس المشكله انها مخروقه من اكثر من مكان بعض الأخراق كانت من الفحم المتساقط على المرتبه وبعضها كانت من الفأر و طبعا فيه انواع البقع عليها بقعه صفراء كبيره باين يا شاهي يا قهوه غير البقع الصغيره ،المهم قلتله يا اخي انا كيف انام على الشي هذا قالي مافي غيره المشكله انه كان فيه السرير وانا ضيف بس لاحظت انه مرتبة السرير في نفس الحاله , قلت طيب وين الغطاء قالي هاه خد ويروح ينبش في قفه مخصصه للملابس القذره استعداد لأخذها للغسيل و يسحبلي شرشف ضايعه ملامحه من كثر الاستخدام و نفس الوان بقع المرتبه , طبعا انا استسلمت وقتها و سلمت امري لله و قلت انا الي جبته لنفسي , الحاصل بعدها فكرت قلت يا ولد البيت للنومه بس وبعد كذا انت طول اليوم برا و غير كذا و كذا ابتهج انت في امريكا و بالفعل رحت فتحت الشنطه على اساس اغير ملابسي و سألت ابو اللول ايش الشي المناسب للبس قالي شوف في هذي البلد لو بتمشي بلبوص ما عندك احد قلت لا بلبوص مالي غرض فيه , واروح البسلك ذاك البنطلون الأبيض مع التي شيرت الأبيض و اطق القبوع الابيض , و افتح باب الشقه و اقله انا نازل البقاله الي تحت اشتري شوية اغراض ما ارد عليا قفلت الباب و نزلت , و اول ما نزلت الشارع صراحه حسيت بخوف كل العيون متوجهة نحوي لأني ابيض و كل الحي امريكين من اصول افريقيه أو هكذا ظننت و لكن في الحقيقه اكتشفت ان سبب النظرات مختلف تماما عن لون بشرتي , المهم دخلت البقاله الى وتجيني ذيك الحرمه الي والله انا راسي عند صدرها من كثر ماهي طويله و تلصق في و تبداء تسب وتشتم ***** المهم من هذا القبيل و اخوكم راعي افلام و فهمت انها زعلانه بس ما عرفت ليش المهم ما اصحى غير تدفعني من صدري من قوة الدفعه طحت في الارض و بدون مقدمات ركبت الريح و اجري و على البيت لانه البيت كان قريب و اوصل البيت وانا اناهج من التعب و التوتر ما فهمت ايش الي صار , المهم حكيت لأبو اللول عن الحكايه قالي يا غبي السبب هو لبسك لأنه فيه منظمه اسمها (kkk) مدري ايش كوكلس كلاين هذي المنظمه معاديه للسود في امريكا و زيهم ابيض في ابيض فالظاهر انه الحرمه ظنت اني منهم , قلت الله يعميها الغبيه الي يسمع يقول الواد الاشقر ابو عيون زرقاء قال عاد نصيبك قلت خير ربي يستر من الي جاي .
الخلاصه الرحله طويله و مدتها تقريبا ثلاثة اشهر مليااااااااااااااااااااااااااااانه بالمتناقضات و خلاصتها انها اسواء رحلة في حياتي .
راح اكتفي بهذا القدر واذا لقيت تجاوب من الاعضاء و تشجيع راح اكمل بقية الحكاية للنهاية .
تحياتي للجميع .مواضيع عشوائيه ممكن تكون تعجبك اخترناها لك:
- الحمد لله وصل الجواز اليوم والفيزا مجهزه لمدة خمس سنوات بس لي سؤال
- مساعدة للتخطيط ، رحلتي بشهر نوفمبر باذن الله
- مطلوب صور للبيت الأبيض
- باركولي صدرت الفيزا بعد خمس سنوات من الانتظار الحمد لله
- مساعده يميامي
- السكن ف اورلاندو ف ديسمبر
- استفسار هام وعاجل عن رحلة علاجية للولايات المتحدة الامريكية
- امباكت واحمد وكاكاشي ووليد وعاشق اللوفانزا ارجو الدخول
- الرجاااااااء عااااااجل
- سكن شهري في la
- أي شي عن سان دييجو
- الاجواء المتقلبه في امريكا
- فوائد الجواز الأزرق ؟
- عدة استفسارات ارجوا الرد
- مشورتكم في برنامج اورلاندو ليالي
- ايش رايكم في فيرجينيا؟؟؟
- الإنترفيو بتاعي في السفارة بعد أيام أطلب نصائحكم و خبرتكم
- استفسار عن الهجره الي امريكا في سفارة ابوظبي
- الحي الصيني في نيويورك ضروري
- واخيرا ممرض مبتعث يستلم الفيزا
رد مع اقتباس
المشاركة الأصلية كتبت بواسطة اعتماد
المفضلات