الموضوع: استفسار حول السكن وجدول لرحله عائليه

السلام عليكم يا اخووان

انا ناوي بإذن الله على السفر لاندونيسيا هذي الصيفيه مع العايله
حجزنا على الخطوط القطرية والحمدلله تم الحجز
يوم 8 يونيو والرجوع 26 يونيو
عدد الايام الفعليه 18 يوم
كلنا عددنا 6 اشخاص ( كبار )
الميزانيه بحدود 25 الف ( ان شاء الله كافيه !! )

طبعا جدول رحلتنا ماني عارف انظمه !! بس العين على جاكرتا وبونشاك وباندونق
ياليت منكم المساعده في تنظيم الرحله علما بأن موعد رحلتنا يوافق يوم الجمعه واخذ راحه يوافق يوم السبت فانا متخوف من هذا النقطه بسبب اجازتهم !!!
فأطلب منكم المساعده

2- خلال تصفحي لتقارير الاعضاء طاحت عيني على كم فندق سأطرحها هنا ويالييت تفيدوني

جاكرتا :
1- استون مارينا
2- استون راسونا
3- قراند تروبيك
4- استون كونقانق

بونشاك ( اخترت عدد من الفلل )

1- بوري سراس

2- دانيال

3- باليكو

4- ريناد

5- اورينتي

6- ساجهترا

7- جيري

8- ريكي

9- كوندول

ياليت ترشحولي افضلهم واكثرهم مناسبه للعايله

ونبى اهم شيء يكون المسبح خاص لنا وتتمتع الفله بخصوصيه العايله

باندونق :
1- استون باندونق
2- هاريس
3- بوب
طبعا هاريس وبوب اخترت 3 غرف منفصله كل 2 بغرفه
وطلع مجموعهم ارخص فياليت تفيدوني !!


معليش هذي مشاركتي الاولى وكثرت عليكم الطلبات
بس عارف انكم ماراح تقصرون معي جزاكم الله الف خير

واي احد عنده نصايح للمسافر اول مره ياليت يساعدنا

مشكورين

مواضيع عشوائيه ممكن تكون تعجبك اخترناها لك:

• الله يرزقكم الجنه فزعه على عجااااله واللي يرحم وااالديكم
• استفسار عن طيران بالي
• استفسار عن المسافه من سورابايا الى بالي
• رايكم بخصوصية المسبح في منتجع
• هونج كونج الساحرة بعدستي الخاصة
• اول مرة وحيداً الى بالي ومحتار في الفنادق
• ساعدوني في فندق بالي
• سبع أشخاص عائله لبلاد العمه أستفسار وأنا جديد على العمه بأنتظار الرد
• استفسار عن جو بونشاك
• وش رايكم بفندق ميرلان بارك في جاكرتا
• مسافر اول مره
• استفسار عن فنادق ف بالي الله يجزاكم خير
• اندونيسيا و عيادات الاسنان
• ياهل الخير والمعروف طلب مشورة لاهل التجربه
• رحلة شبابية لأندونيسيا
• ما الارخص الحجز بالانترنت ام بالمكاتب السياحيه في جاكرتا وبالي ؟
• إستفسار أول سفرة بحياتي مع المدام
• رحلة شخصين لمدة يوم
• الله يرحم والديكم ساعدوني انكبت في حجز مؤكد
• استفسار الله يفرج لكم

اهلاً وسهلاً وحياك الله
اولاً
اختيار الخطوط ممتاز
ثانياً
للأسف ميزانيتكم لاتكفي 6 اشخاص تحتاجون زيادتها 5 آلاف اخرى للإحتياط ورسوم الاماكن السياحية مكلفة لعددكم الكبير (ماشاء الله)
ولاتنسى انكم تحتاجون سيارة يومية في كل الاماكن وربما سيارتين ايضاً فواحدة لاتكفي لكم وللعفش
ثالثاً
الشقق اللي اخترتها كلها مناسبة واكثرهم مناسبة هو استون مارينا وراسونا وانا ارشخ لكم اريودتا سمنقي فهي الأفضل
رابعاً
الجبل ارشح لكم فلل تكساس وفيلا شاهدتها اخيراً اسمها بونشاك 2 وفيلا دانيال كبيرة وخصوصيتها ممتازة وبجانبها فيلا اخرى لو احببتوا تتطلعوا عليها
خامساً
شقق باندونق جيدة واضيف لكم استون براقا ومنتجعات لمبانق
تحياتي

بالنسبه لموعد وصولك وانه يصادف يوم اجازه انا اشوف انك تبدأ فى باندوق ويكون ذهابك لها صباح الاحد عن طريق القطار كنوع من التغير
وبعد باندوق تتجه للبونشاك بالسياره

او البقاء فى جاكرتا السبت للراحه .. والاحد لمنطقه انشول ( ولو انها بتكون زحمه ) والاثنين صباحا التوجه للبونشاك

المحتسب وحيو .. كلام سليم كفو ووفو لكن عندي كم نقطه بفيدك فيها ...

عوائل ابعد كل البعد عن استون مارينا وانا ارشح استون راسونا والسعر مافي فرق

اتوقع الغرفتين تطلع عليك 395 ريال ... تجلس فيها الجمعه والسبت والاحد 8.9.10والخروج 11 يعني 4 ايام وثلاث ليالي

بعدها نصحيه رح باندوق خل بونشاك الاخيره الاماكن كثيره هناك ..
بالنسبه لسكن في فندق استون باندوق { ما انصح بشده , مدخل من السوق ,وجنبك صناعيه وزحمه طوال النهار } عليك لمبارق فيه منتجع بنفس السعر او ارخص بعد اسمه سب يولدي رخيص وحلو

ممتاز نظامه فلل فندقيه وكل الفلل تفتح ع البحيره وتجول بقارب وسعرها 600 ريال لليوم الواحد
وفيها نظام بوكيج شامل وصيد السمك ,
وفي منتجع جدول بس غالي ع مزانيتك ممكن ياصل اليوم الى 750 للغرفه الوحده
تجلس فيها منـ 11.12.13 والخروج 14 يعني ثلاث ليالي واربع ايام .

وتطلع لبونشاك ما جيت الا فلتين وبنظري حلوه باليكو ,دانيال { طبعاً ماسكنتها }مجدر اطلاع
عندك فلة بونشاك حلوه ولها خصوصيتها وعندك تكساس
وتجلس هناك 14.15.16.17.18.19.20 وتطلع بعدها 21 ع جاكرتا

وهناك بنفس الفندق ان حبيت او اذا تبي تغير احرص ع ان يكون قريب من منقا دوا او شمال جاكرتا
وتجلس لين وقت العوده بكون عندك سبوع هناك

ثلاث ايام الاولا تخليها تمشيه والمشتريات العوده
بالنسبه للمزانيه ما اتوقع تكفي زدها شوي فعلن صادقين

اذا سفاري دخول السائح من 120 الف تقريباً
وسايق واحد لمدة 18يوم 210=3780 ريال
وكل تنقل من مدينه لمدينه تحتاج سياره للعفش =4*210=820

جزاكم الله يا اخواني الف خير

بإذن الله سوف يتم زياده الميزانيه لتصل الى 27 الف الى 30 الف -بإذن الله-

انا سويت جدول ياليت تطلعون عليه وتعطوني ارائكم

الجمعه: الوصول
السبت : الراحه + شراء المسلزمات من شرائح وغيرها وتحويل العملات + السفاره ( ياليت احد يفيدني كيف احول نسخه للسفاره بدون ما اروح لهم )
الاحد : الى بونشاااك والبقاء فيها الى الاحد المقبل
الاثنين الذهاب الى باندونق __ الى يوم الجمعه

الجمعه الى جاكرتااا حتى يوم الثلاثاء المغادره

والفناااااادق التي تم اختيارها

جاكرتا :
اليوم الاول : استون راسونا
والايام الاخيره في جاكرتا : قراند تروبيك اخترته لرخصه ومناسبته للميزانيه فحاب اسأل اذا احد جربه !! لاني لا اريد فيه الا قضاء النوم

باندوق :
neina gust house
رأيكم فيه !! واذا ترشحولي واحد افضل يكون احسن

بونشااك :

تم اختيار فله دانيال


ارائكم يا اخواني ما استغني عن خبراتكم
تعرفون اول رحله ومبتلش

هلا والله اخوي سعد
جاكرتا خليك في استون راسونا او بتافيا
جراند تروبيك لك عليه شوي واتذكر خدماته ماهو بذاك الزود
باندونق
أي موقع تجد فيه كلمة (قست هاوس) انتبه منه لأنه غالباً يكون مكان غير مناسب (وجهة نظر) فقط ولك الحكم..خليك في اماكن معروفة ولاتغامر باللي ماتعرفه
فيلا دانيال بالرغم من ترشيحي لها إلا اني متحفظ عليها وياليت تفكر في غيرها
موقعها جميل وخصوصيتها ممتازة وواسعة لكن....!!!!!
في الليل ربما لاتكون مريحة..وربما تشعر ببعض الامور الغريبة تحدث فيها
انا اتكلم وانا جاد تماماً
انا سكنتها ولمست هذا الشئ..وهناك من وضع عنها موضوع قديم هنا..تكلم عن الامور التي تحدث فيها
فكر في غيرها وريح نفسك
انا لا اريد الإرجاف والتخويف لكنها امنة ولابد ان اخبرك بها حتى لاتلوموني مستقبلاً
تحياتي

هلا اخوي المحتسب
جزاااااك الله خير على النصيحه اصرفت النظر عن فيلا دانياااال

والحين محتار بين ذي الثلاث
ريناد

اورينتي

ساجهترا

باليكو

اتمنى تنصحني يا اخوي بمعرفتتك

وياليييت تفيدني متى احجز بالضبط !! هل قبل السفره بشهر ولا الحين ولا متى !! الله يعطيك العافيه

وبعد يا اخوي انا شايف 18 يوم اقضيها ب 3 مدن قليل وش رايك نروح لم بوقر وتسوكابي !!
ولا يمدينا نروحلها من بونشاك نقعد فيها يوم كامل

وبعد بسألك بخصوص السفاره كيف نرسلهم جوازات سفرنا !!!

معليش كثرت عليك الاسئله بس تعرف اول سفره ومبتلش

في تخطيطك تقول تبي تروح لبونشاك يوم الاحد شوف من واقع تجربه لا تسافر يوم الاحد والسبت وبالاخص لبونشاك لن كل اليوم تبي تجلسه بالطريق

لن بتحصل زحمه تبي تقول جعل زحمه الرياض للجنه والمزانيه 30 اشوفها حلوه ولازم يكون عندك رصيد احتياطي بالبنك لضروره ان حصل شي


واتمنى لك رحله سعيده

لك كل الشكر اخوي المحتسب بنحاول نساعد باللي نقدر عليه





المشاركة الأصلية كتبت بواسطة سعد البدر
http://www.arabtravelersforum.com/tr...3/#post6693453

هلا اخوي المحتسب
جزاااااك الله خير على النصيحه اصرفت النظر عن فيلا دانياااال

والحين محتار بين ذي الثلاث
ريناد

اورينتي

ساجهترا

باليكو
انا رشحتها من اول {{ وعندك منتجع كوتا بونقا }} بس بنظر الناس انه بالليل موحش بالعلم اني سكنت فيه مرتين واحس الوضع عادي جداأ واصلن كل بونشاك بالليل تطفي عكس النهار تماماً

اتمنى تنصحني يا اخوي بمعرفتتك

وياليييت تفيدني متى احجز بالضبط !! هل قبل السفره بشهر ولا الحين ولا متى !! الله يعطيك العافيه
بالنسبه لـبونشاك الحين ولا بعد شهر كلها واحد { بس شوف لا تتكل ع كلمة مافيه عطله ولا فيه زحمه } الشباب توهم جايين يقولون والله اننا نعربن الفله قبل لا يطلع صاحبها بيومين
وبعد يا اخوي انا شايف 18 يوم اقضيها ب 3 مدن قليل وش رايك نروح لم بوقر وتسوكابي !!
لا مو قليله وخصوصاً ان فيك شي مميز تقرا تقارير وتبني عليها جدول وهذا شي ممتاز بالنسبه لبـوقر قريبه من بونشاك اصلن تعتبر من الجبل اذا فيه زحمه الناس تسكن في بوقر وتتمشى في بونشاك .. يوم تتمشى فيها حلو
ولا يمدينا نروحلها من بونشاك نقعد فيها يوم كامل

وبعد بسألك بخصوص السفاره كيف نرسلهم جوازات سفرنا !!!
تقدر ترسلها عن طريق الفاكس من الرياض وتقدر من هناك وتقدر تروح بنفسك كلها عن طريق الفاكس
ولا تنسى اذا ارسلتها لهم وانت في اندونيسيا حط رقم جوالك الاندونيسي ورقم اهلك بالسعوديه {تحسبأ الله لا يجيب ساعة الشر }
معليش كثرت عليك الاسئله بس تعرف اول سفره ومبتلش
من ابسط حقوقك




نصحتي واتوقع المحتسب والكوكب الطاير ييدوني

باندوق لا تتعدا 3 ليالي و اربع ايام لن الاماكن فيها محدوده {اقصد اهمها } ولا الشلالات في بنشاك افضل

يعني البركان والمزارع وكم مطعم وصلى الله وسلم .

بونشاك تستحق اكثر 6 ايام صراحه خصوصاً انكم راح يكون عندكم يوم حر.

انصحك في يوم حر في بونشاك بين الفله ومقاضي تجيبها من السوق وطبخ وسعت صدر الله الله


متمني لك سفره سعيده واي سوال انا حاظر

مرحبا اخي سعد
وبيض الله وجهك يالشمالي
بالفعل كلام الشمالي صحيح وترشيحاته مناسبة
انا اقترحت عليك فيلا تكساس لو حبيت وفيلا بونشاك2
اما موضوع السفارة فلاتهتم له كثير...المسألة كلها ثواني وانت واقف يأخذون رقم الجواز وصورة منه وتتوكل على الله بعدها
تحياتي

هلا يا اخوان جزاكم الله الف خيرر

انا وش خلاني ما ابي باليكو لاني يوم شفت صورها مافيها جلسات وانا اخوك
اما الفلل الثانيه اللي رشحتها فيها مطل رائع و عشب للجلوس عليه وبعد فيه مسبح على حسب طلب الاهل !!

اما بالنسبه لتكساس وبونشاك والله انها فوق الميزانيه وانا اخووك سعرها بالليله 1000 !! انا ابي وحده اكثررر شيء سعرها بالليله 500-600 واذا اقل افضل وانا اخوك

ومشكورييين يا اخوان تعبتكم معي انا الحين ابى اقرا تقارير للاعضاااء وابى ازبط جدول مناسب وبإذن اطرحه هنا واشوف ارائكم

بس ما قلتولي متى افضل وقت لحجز فنادق جاكرتا و باندونق و فلل بونشاك !!!

الحجز للفنادق كل مايكون بدري يكون افضل
بالنسبة للفلل فإذا لم تجد طلبك او الميزانية غير مناسبة فالبحث الشخصي افضل وستجد فلل غير معروفة وموقعها ممتاز
تحياتي وفي إنتظار جدولك

كلام المحتسب صح .... بس المشكله في بونشاك صاير نظام الفلل اكثرها محجوزه من قبل ناس

لكن انا بذكر لك كم فله واتوقع لو بحثت عنها راح تكون مناسبه جداً لطلبك

فلة ديدي 3 غرف 2 حمام = 425 ريال الى 500 ريال وماتوصل بعد {بمسبح} لني اذكر سعرها كان 750 الف يعني بالسعودي تطلع 320 ريال

انصحك في مجمع كوتا بونقا انا حجزته من مكتب الرياض من يوم 25 /ابريل خمس ليالي بـ1750 بمسبح بخصوصيه تامه وانا اطلعت ع الصور

وبنتظار الجدول

اخوي سعد فيه موضوع سبق ان اخوي النقوه حطه وهي لفله فيها مميزان حلوه .. منطقه هادئه جداً وتبعد عن الخدمات 2 كيلو وغير هذا كله مساحه شاسعه والفله مجدده مالها تقريباً 9 شهور { 3 غرف وحمامين اجلكم الله } والمساحه 3 كيلو تقريباً
http://travel.maktoob.com/vb/travel654756/


للاحاطه الموضوع لخبيرنا النقوه وجميع المعلومات نسختها من موضوعه