عزيزي navvaf ...

مرحباً بك مرة أخرى .. ولعلي أمر مرور على استفساراتك وأحاول أخدمك باللي أقدر عليه ...
إذا كان البرد ما عندك أي مشكلة فيه فتوكل على الله وعسى الله ييسر لك أمورك ...
في الغالب في الشتاء ينقص أعداد السياح بشكل كبييير جداً بسبب شدة البرد ... وفيه بعض الأيام تنشل الحركة تماماً في المدينة بسبب تساقط الثلوج وشدة البرد ... لكن يبقى في البرد والثلج متعة خاصة .. خصوصاً في مناطق التزلج في المناطق القريبة من كيوبك وبعض مدن مقاطعة أونتاريو ...
وفي الغالب الناس ما تحب تتمشى في البرد .. لكن تبقى المجمعات التجارية فيها سياح وزوار .. والشي الجميل إن عدد الطلاب الأجانب من اليابان والمناطق القريبة لها يكون جيد في الفترة هذي ... وهذا الشي يحرك الدنيا شوي ..

وأما بالنسبة للحجز والتكاليف .. فبعض الناس يحبذ يمسكها مكتب ويفتك من الهم ومتابعة وش صار على الحجز وغيره .. والبعض – مثلي - ^_^ ما يهناه إلا إنه يتابع أموره بنفس ويخلص كل شي بنفسه وعلى اللي يبغى ...

ميزة إنك تنهي إجراءاتك بنفس إنك تحصل على خصوم ما يعطيك إياها مكتب السفر .. لأن بعض مكاتب السفر يعطيك السعر قبل الخصم وبس .. وهي تختلف من مكتب لمكتب .. وثاني شي مكاتب السفر تتعامل مع معاهد محددة .. وفي الغالب يكثر في المعاهد هذي العرب .. وهذا أسوء شي لقيته هناك ..

بالنسبة للتكاليف .. فتقريبا الشهر يكلف من 6000 إلى 7000 ريال شهرياً .. شاملة المعهد والسكن وثلاث وجبات يومية وبغرفة مستقلة .. طبعاً التكاليف تتأثر بسعر الصرف ... ولا تنس كلما طالت المدة قلّت التكلفة .. فإذا كنت بتسكن مع عائلة لمدة شهر واحد فراح تكون التكلفة تقريباً 800 دولار – تنقص ما تزيد - ... وأما إذا كنت تبي تسكن شهرين أو ثلاثة فتنزل إلى 700 دولار ... طبعاً هذا كله شامل 3 وجبات يومياً ... ولو حبيت تستغني عن الغداء – وهو الأفضل – قد ينزل لك 100 دولار في الشهر ... والأفضل إنك تنسق أول شهر مع المعهد أو المكتب وبعدها تتفاوض مع البيت اللي ساكن فيه على المبلغ ..

وأما العائلة .. فهذا يعتمد على اللي تحب .. بالنسبة لي افضل إنهم يكونون شباب أقدر أتفاهم معهم وادردش معهم في موضوعات شبابية نتوافق فيها .. بس مشكلة الشباب طلعاتهم كثيرة في الغالب .. إما في العمل أو برا يوسع صدره .. بس يبقى تلقى وقت تجلس معهم فيه .. وفي الغالب يكون وقت العشاء ...

وأما بخصوص المحلات التجارية .. ففي الغالب ما يحبذون إنك تجلس داخل المحل بدون حاجة – خصوصاً إذا كان المحل صغير - .. لكن بإمكانك تجلس في المجمعات الكبيرة وتدردش مع اللي تحب .. وبإمكانك تزور البب نايت وراح تلقى ناس فاضين كثير ... وفيه المكاتب والأماكن العماة راح تلقى فيها من تتكلم معاه ...

وأما الاستقبال في المطار فهذا يعتمد على تنسيقك مع المكتب أو المعهد .. وبحكم تجربتي ففي الغالب يصدقون .. خصوصاً إذا كان المعهد معتمد وله سمعته .. ولا تنس إنهم ياخذون تقريباً 100 دولار للاستقبال ...

اتمنى إني وفقت لخدمتك ولو باليسير .. وكلي استعداد لتقديم أي معلومة أعرفها واستطيع أن أخدمكم بها ..
أرحب باي سؤال أو استفسار وأفرح به أشد الفرح ...

وتقبل فائق تقديري واحترامي ...

مواضيع عشوائيه ممكن تكون تعجبك اخترناها لك: