كانت طيارتنا يوم الثلاثاء الساعه 8 صباحاً
طلعنا من البيت الساعه 5 و نص الصبح و توجهنا الى مطار الكويت الدولي
كان الشعور جدا رائع و الشوق الى رؤية أرض كاليفورنيا ( بصراحه سميتها ارض الخيال )
وصلنا إلى مطار هيثرو لندن ( ترانزيت ) قعدنا فيه 3 ساعات
صورة من سماء لندن قبل الهبوط
صوره داخل مطار لندن كنا ننطر الطياره ، و اللي واقفه هذي بنتي
بعدها ركبنا الطياره لكن للأسف كنا في المقاعد اللي بالنص و كانت يمي وحده اجنبيه
بصراحه ظاق خلقي لاني احب اقعد يم الدريشه اخذ راحتي اكثر ، فطوال رحله مدتها تقريبا 11 ساعه مانمت ولا كنت مرتاحه ، فتعبت حيل خلال هالرحله و حاشني صداع ولا اكلت شي .
وصلنا مطار لوس انجلوس تاريخ 29 بالسلامه ، و كنا متخوفين حيل منهم من الكلام اللي سمعناه انهم يشددون التفتيش عالعرب و المسلمين لكن الحمد لله اجراءات الدخول ماخذت منا الا نص ساعه و يمكن اقل و كانوا جدا فريندلي معانا ، حتى جناطنا مافتحوها و لا فتشوها الحمد لله .
أول ماطلعنا شمينا الهوا الأمريكي و كانت النسمات البارده رااائعه ، شفنا باصات شركات تأجير السيارات تصفط عند بوابة الخروج من المطار ، نطرنا باص شركتنا و اثناء الانتظار حسينا بالبرد لبست بنتي جكيت و انا لبست الشال
اخذنا الباص و رحنا لمبنى الشركة ، مثل ماقلت لكم من قبل ان حجزنا من خلال الانترنت ميني فان و كان فيه عرض اسمه (رحله سعيده) فاخذنا العرض بـ 2000 دولار امريكي
المفاجأه الحلوه اهي ،،
سألنا الريال جم جنطه معاكم قلنالهم 5 ، فقال ميني فان ماتكفي جناطكم راح اعطيكم سيارة جمس XL
خفنا يكون غالي فسألنا بجم ؟
قالنا بما انكم حجزتوا عالعرض .. راح نعطيكم بسعر العرض شامل التأمين و كل شي
بصراحه استانسنا لأنها سياره موديل السنه رااهيه و كبيره و يديده و فل اوبشن و ماطلعت إلا مره وحده يعني مو ماشيه شي و كنا شايفين نفسها بالانترنت غااااليه ، أخذنا السياره و احنا مستانسين و هذا توفيق من الله الحمد لله .
هذي صورة السياره بس كان لونها ابيض و من داخل جلد أسود :
ركبنا جهاز القارمن و توجهنا بعدها للفندق في منطقة أناهايم و من داخلنا متخوفين لأن اول مره نحجز من خلال الانترنت .
إحداثية الفندق في القارمن : N33ْ 51.790'W117ْ 52.820'
أول ما وصلنا الفندق كان بالليل شفنا دورية شرطه استانسنا حسينا بالأمان ، بسرعه خلصنا اجراءات الجيك ان و رحنا السويت
و هذي لقطات من الداخل :
حطينا أغراضنا و غسلنا و نمنا بسرعه من الإرهاق عشان نستعد ليوم جديد حاافل
الجزء القادم ( ديزني لاند )
تابعوني
رد مع اقتباس
المشاركة الأصلية كتبت بواسطة كسرة بخوور
المشاركة الأصلية كتبت بواسطة كسرة بخوور
المفضلات