الموضوع: اتلانتا في جورجيا أو شارلوت في كارولاينا الشمالية؟

معقوله ما في ولا رد

ابشري والله بالرد..
ليه ما تروحين لفرجينيا ؟؟
هناك حوالين العاصمه واشنطن.. المكان روعه والاهم الاكاديميه السعوديه ..
صدقيني ماراح تندمين على الاختيار.. خصوصا ان عندك اطفال داخلين مدارس..
وللمعلوميه.. الاكاديميه السعوديه 95% من موادها باللغه الانجليزيه..عدا ماده ثقافه اسلاميه وماده لغه عربيه..
اما الرياضيات والعلوم وغيرها من المواد فهي بالانجليزي .. وممنوع على الطلاب التحدث فيما بينهم بالعربي ..حتى في اوقات الفسح ..
نصيحه.. روحي لفرجينيا وماراح تندمين..هذولا عيالك..مستقبلك

واحد طويل
جعل عمرك وعمر من تحب طويل
من جد نصيحة حلوه

جزاك الله خير على هالدعاء يا الفارسه
ان عزمتي تروحين لفرجينيا , عطيني خبر.. عندي معلومات ان شاء الله تفيدك من حيث السكن والاكاديميه وغيرها
الله يكتب الي فيه الخير

اخوي واحد طويل

عندك معلومات عن الاكاديمية

كيف نظامهم؟ سمعت انه طلباتهم كثيره بعكس المدارس الحكوميه

انا عيالي تعودوا على النظام الامريكي

يا فارسه..
اذا كنتي سعوديه.. فما اتوقع تلاقين اي مشكله لتسجيل اولادك
حتى لو ماكنتي سعوديه ما اتوقع تلاقين اي مشكله ايضا..
الاكاديميه فيها طلبه من جميع الدول العربيه والاسلاميه..
بل فيها طلبه امريكان ايضا لان اهلهم اعجبوا بنظام الاكاديميه وسجلوا عيالهم فيها..
......
هذا رابط الاكاديميه .. ان شاء الله ينفعك..

http://www.saudiacademy.net/
...
على فكره .. حتى لو لقيتي اي مشاكل , خاطبي وزارة التعليم ولازم يساعدونك..
واذا احتجتي مساعده مافيه مشكله.. انا اعرف وزير التربيه والتعليم.. بس المشكله انه ما يعرفني !!!!!!!
توكلي على الله وربك يسهلها ..

أضحك الله سنك اخوي واحد طويل
من جد ضحكتني

انت تعرف الوزير انا اعرف بو متعب بكبره

انا شيكت على السكن حوالين الاكاديمية لقيتها نااااااااار

ولما كلمت الاكاديمية قالوا لي ان الباصات لعيالي الاربعة ب 5500 دولار

والملحقية طبعا ما تدفع للنقل

يعني لازم اسكن قريب من الاكاديمية

وش رايك؟

افهم من كذا انك نويتي فرجينيا ان شاء الله
اولا اضمني قبول لعيالك.. بعدها كل شي يهون
بالنسبه للسكن ماهو لازم تسكنين جنب الاكاديميه ..اسكني بعيد شوي بس خذي تاون هاوس اذا وضعكم المادي جيد
بالنسبه للمواصلات , لها الف حلال.. اذا انتي ماتقدرين توصلينهم كل يوم , اكيد بتلاقين وحده من هالمسلمات الي يدورون القرش قبل الريال مستعدين يوصلون العيال ويرجعونهم بمبلغ مقبول
وفيه الف طريقه وطريقه عشان توصلين لوحده منهم
واذا حبيتي مساعده مستعد اشوف لك احد
( ترى انا في الرياض.. لاتفكرين ان عندي بزنس هناك.. الله يخلف علي وعلى بزنس من وراي )

الله يجزيك كل الخير يارب اخوي واحد طويل
انا بالفعل قاعده افكر جديا بفرجينيا بس متخوفة من الغلا هناك
طبعا ودي اخذ تاون هاوس بس المكافأة بتروح فيها
تعتفد بتكون فرجينيا ارخص من نيوجيرزي؟

وعلى فكرة كلمت الاكاديمية اليوم وقالوا اني لازم اقدم للعيال من الان
بسوي الابليكشن والله يسهل (كني غثيتك)

ارخص وافضل من نيوجيرسي

الله يسامحك وين غثيتيني معه ؟
الا ابرك ساعه والله
هالمنتدى نعمه من رب العالمين لي ولك ولكل من يحتاج مساعده
....
المهم.. اسمعي مني زين :
قبل كل شي .. اضمني قبول لعيالك في الاكاديميه ..
ثانيا .. اذا تاكدتي انهم قبلوا .. ساعتها توكلي على الله وروحي لفرجينيا ..
بس بامكانك من الان تدورين على بيت هناك..
يوم كلمتي الاكاديميه اليوم اكيد ردت عليك وحده ( ماهو واحد ).. .. اذا هي تتكلم عربي اتصلي من جديد واساليها عن البيوت ووش الاماكن المناسبه للسكن بحيث لاتكون (غويليه) وكم اسعارها ..
واذا هي ما عندها معلومات كافيه قولي لها تحولك على اي وحده سعوديه و (اقرقي) انتي وياها الين تاخذين كل الي تبين تعرفينه.. حتى موضوع المواصلات اذا هي تعرف وحده مضمونه توصل عيالك.. وبكم ؟؟
الله يسهل الامر

طمنينا يا فارسه ..
اش صار عليك انتي وعيالك وفرجينيا والاكاديميه السعوديه

؟؟

سلام اخوي واحد طويل
الله يجزيك خير على اهتمامك وسؤالك
بعد البحث المكثف والسؤال لقيت انه فرجينيا ما تتناسب مع وضعي المادي ابدا
السكن غالي وماتفرق كثير عن نيوجيرزي
عشان كذا قررت اما فلوريدا او نورث كارولينا
ايش رايك؟

ممكن سؤال..انتي مقيمه في امريكا والا تدرسين ؟

وبعدين تبين نصيحه ما تخرش الميه ؟

القطي العائله الكريمه هالويك اند الى واشنطن او فرجينيا يعني
غيروا جو
شوفوا المنطقه على الطبيعه
اسالي عن البيوت ..
وشي تشوفينه بعينك احسن من الي تسمعين عنه
الويك اند الجاي جربي روحي..
وانصحك بعد..قبل تروحين صلي صلاة استخاره
وربك يكتب الي فيه الخير

صح كلامج اختي انا درست في امريكا وعارف الوضع شلون !!

طبعا انا شفت موضوعج من قبل كم يوم بس ماحبيت ارد لين مالقا ولايات فيها مدارس اسلاميه ويكون مستواها ممتاز ومعترفه فيها سفارتكم , وفي البداية بعطيج لمحة عن الولايات الرخيصه

اولا اذا تبين الرخص ابتعدي عن الولايات الشرقيه والغربية لانها لصاحب الدخل المحدود غاليه , فالافضل منها هي الولايات اللي تقع في الوسط الميد ويست مثل اركانساس وكانساس والالباما وتكساس وايوا ويوتاه الخ ..
في هالولايات راح تلقين الاسعار ارخص بفرق شاسع من الولايات الاخرى وفيها امان والبعض منها يوجد به مدارس عربية واسلاميه ..
اهم هالمدن هي مدينة هيوستن في تكساس لان فيها اكبر تجمع اسلامي على مستوى امريكا وفيها مدارس اسلاميه يمكن فوق 8 مدارس واشهرها مدرسة دار الارقم
http://www.darularqamschools.org/
وتعتبر من افضل المدارس الاسلامية في امريكا , وتشرف عليها منظمة اسلامية كبرى
http://www.isgh.org/
وفي مدارس اخرى ومستواها طيب يعني امورج ميسرة ان شاء الله
غير هذا الجامعات بكثره هناك ومعترف بها لدى دول الخليج عموما
والسكن متوفر واخوانا الخليجيين هناك بكثره والمدينه بكبرها مب غاليه
والاهم من ذلك ان الجو احسن من نيوجيرسي وبردها اللي ماينطاق

اذا احتجتي معلومات اكثر عن هيوستن او اي مدينة في الميد ويست انا حاضر له اختي

اخوي Stranger Man
الله يعطيك العافية ويوفقك ويجزيك خير
المدارس روعة بس المشكلة انها خاصة وانا مبتعثة

اخوي واحد طويل
(وانصحك بعد..قبل تروحين صلي صلاة استخاره)

احلى نصيحة والله

عرفت معلومة صعقتني عن نورث كارولينا

صحيح الافاعي تلقاها في البيوت عادي؟

السلام عليكم
اسموحوا لي ان ابدي رأي في الموضوع
بالنسبة لفرجينيا ولاية جيدة وآمنة بنسبة كبيرة ولكنها غالية نسبيا , لا سيما الأماكن القريبة من العاصمة واشنطن وهي التي فيها الأكاديمية , وبالنسبة لدراسة الأولاد فإن كانوا دون المرحلة المتوسطة ما تفرق كثير , وإن كانوا في المتوسطة أو الثانوي فلا أنصح ابدا ان يدرسوا في مدارس أمريكية , والأكاديمية السعودية في فرجينيا هي الحل المثالي لمن في مثل وضعهم , وأنا درست عيالي فيها وهي افضل مرحلة دراسية مرت عليهم , ارجو لك التوفيق .