حياكم الله
بالنسبه للفندق موقعه فوق الممتاز وبس داخل الغرفف ماعندي معلومه تقدر تشوف الاراء في بوكنغ
اليوم الاول: يوم الوصول
اذا قلنا وصلتوا الصبح ورحتوا الفندق وريحتوا وصليتوا الظهر تطلعون وتروحون اتغدون في
الغدا : مطعم ملنزاني ايطالي لذيذ يم سكنكم ،
بعد الغدا تروحون المارينا مول اتمشون واتسوقون فيه وتقعدون في الكافيهات اللي على المرسى وعقب تطلعون منه وتروحون ..
متحف بيت ديكسون ( بيت المقيم السياسي البريطاني في الكويت ) منطقة شرق مقابل وزارة الخارجيه وبجانب وزارة التخطيط ، او اتمشون في المجمعات السالميه اللي في شارع سالم المبارك .
وبعدين ترجعون الفندق اتريحون بو ساعه وتطلعون على مارينا مول و تحجزون فيلم وقت متأخر دشون بعد العشا ..
العشا مطعم ماكي (ياباني) في مارينا ويفز تطلع من جسر مارينا مول يوديك على جهة المطاعم على البحر في مكان بالنص شكل خيمه بنص البحر المطعم موجود اهناك اكله واايد حلو او المطعم اللي يمه ايطالي واكله حلو ..
وبعدها اتحلون في living room cafe تحتهم القعده مو طبيعيه بس لبسوا عدل (اذا كان الجو شتوي ) 
وبعدين دشوا الفيلم اللي حجزتوا له ..
اليوم الثاني :
الصبح على ال 9 اتريقون في مطعم واايد حلو اسمة ريوق ، منطقة الشعب البحري ، قطعه 8 بجانب مطعم فيلا فيروز ،، اذا كنتوا ماشين على خط فحيحيل باتجاه مدينه الكويت راح تصير الشعب على ايدكم اليمين الفرعي الثاني تدخلون وتمشون اشوي سيده تشوفون فيلا فيروز يمينكم دشوا يمين وبتشوفون المطعم ..
وبعد الريوق اتروحون تطلعون على خط فحيحيل باتجاه مدينه الكويت وتروحون سوق المباركيه بما ان الجو حلو ويحتوي على كل شي ( الذهب ، الملابس ، البشوت ، المسابييح ، العطور ، المكياج ، الخضار ، الفواكة والخ .... ) بعد ما اتخلصون تسوق وتمشي اتغدون في احد المطاعم الشعبيه اكلهم ترا واااااايد حلو عندكم ( دلق سهيل ، السيخ البحريني- تكا ولومي والخ ... من مطااعم ) ..
العصر تروحون متحف طارق رجب : عنوانهم الجابريه ، قطعه 12 ، شارع 5 ، اوقاتهم من 9-12 الظهر ومن 4-7 المسا تليفونهم 25317358 او 25339063.
او اتمشون في سوق شرق اذا ماتبون متحف
بعد المتحف المغرب تروحون سوق السالميه الاحمر مكانه عند دوار الجوازات الدائري الخامس اتسوقون واتمشون فيه اذا ماتبون سوق السالميه عندكم 360 في جنوب السره ..
العشاء على الساعه 10 مطعم الصنوبر (لبناني ) السالميه شارع البلاجات على البحر او p+f في 360 ..
اليوم الثالث :
الصبح الريوق على 9 في مطعم مركز سلطان بوفيه على البحر ، السالميه ، شارع الخليج العربي وبعدها اتاجرون طراد يتمشى فيكم من نفس المكان بس بره
http://www.silsan.net/silsan/ ..
بعد الرحله البحريه تروحون الافنيوز وتضون يومكم كله اهناك والغدا عندكم المطاعم وطبوا وتخيروا وكل واحد يقول الزوود عندي ( الطربوش ل- الحمرا- ردلوبستر- شيزكيك فاكتوري - بزه- نينو والخ ,,
وبعد صلاه العشا تختارون تروحون مسرحيه او حفله .. وراح تلقون في الجرايد اليوميه فعاليات هلا فبراير والامسيات والحفلات والندوات الدينيه ..
واذا ماتبون جذي تقدرون تروحون مجمع الصالحيه راقي وكله ماركات في مدينه الكويت شارع الجهراء اتمشون فيه وبعدين اتعشون في جوني روكتس (امريكي) بره مع المطاعم اللي عند النافوره او برج الحمرا ..
http://www.arabtravelersforum.com/travel487746/
رد مع اقتباس
المفضلات