الموضوع: فيدوني لو سمحتوا

بسم الله الرحمن الرحيم
صباح / مساء الخير لكل اعضاء المنتدى الرائع الي يخدم كل عشاق السفر العرب
بصراحه ما انسى ردودكم الحلوه على موضوعي لسفرة اوروبا
ولهالسبب ابيكم اتساعدوني في سفرتي اليايه
طبعاً هالسنه اخترت امريكا
لاني وايد اسمع انها دوله حلو واتونس
بس مع الاسف ما عندي معلومات عنها
طبعن انا لاني ابي اتفادا زحمة الصيف
رحت وطلعتلي فيزا من الحين وفيزتي جهزة انا والاهل
والحين صرت اخطط للسفره علشان احجز الفنادق والتذاكر
لانه قالولي الحين ارخص من الصيف
فحبيت اخذ رايكم بوايد اشياء وان شالله تساعدوني
طبعن انا سفرتي راح تكون مدتها شهر
وراح تكون في شهر سبعه
طبعن احنا الي بنروح عددنا كبير اكثر من عشرين نفر وفي بينا اطفال رضع واطفال اقل من 12 سنه
بس الميزه هو انه ما معانا اشخاص كبار بالسن
الاشياء الي ابي اعرفها هيا كالتالي :
1- شنو افضل ولايه في امريكا ( من ناحية الوناسه طبعاً والتسوق)؟
2- هل مدة شهر تكفي اني اروح اكثر من ولايه؟
3- شنو اهيا افضل الاماكن الي تستاهل اني ازورها في الولايه الي ترشحلي اني اروحها؟
4- ما هي افضل وسيله للتنقل هل استئجار سياره ام تاكسي ام الباص ام المترو ؟
5- هل التنقل من ولايه الى اخرى مرهق ام سهل ومريح وبأي وسيلة نقل تفضل ان اتنقل من ولايه الى اخرى؟
6- بالنسبه لمكان السكن ما هو افضل مكان للسكن هل الفندق ام المنتجعات ؟
7- كم تكلف السفره للشخص الواحد ولمدة شهر(تقريبي)؟
8- كيف هو تعامل الشعب الامريكي ؟

ادري طولت عليكم
بس بليز ابي رد واي شخص اعرف اي شي اتمنى انه مايبخل علي بالرد لانه على ردودكم بجهز مخطط سفرتي

وشكراّ ,,,
دمتم بود ,,,
ايمان العصفور,,,

مواضيع عشوائيه ممكن تكون تعجبك اخترناها لك:

• اللي كانت مقابلته ابريل هذا ما حصل معاي
• شبااااااااااااااااب ممكن؟ضرررررررروري
• اوهايو سينسناتي الفزعه؟؟
• فقط للخبراء ما هي أفضل الفنادق في منتصف التايم سكوير ؟؟
• افضل وسيلة نقل من مطار الى الفندق في التايم سكوير
• تذكرة بمعلومات جواز قديم
• مواقع رائعه ومفيدة للجميع
• حنين للماضي
• كيف اطلع فيزا لامريكا لي ولريلي ولدي من الامارات
• طالب مشورتكم ونصايحكم
• ابي مساعدة من اهل الخبرة الله يدخلكم الجنة اللي تردون
• أستفسار عن استخراج تاشيرة زيارة للاهل في أمريكا عاجلة
• مطارات امريكا و الاغذية المسموح دخولها
• عاجل كل شئ عن سان انتونيو
• أسئلة عن الفيزا ألأمريكية من مصر
• مشــــــاهد من بيـــــفرلي هيلــــــــز
• استفسار بسيط يا شباب؟؟؟؟
• سؤال هالصورة وين مكانها اي مدينة ؟؟؟؟
• شركة لتأجير السيارات
• شيكاغو

هلا والله حبيبتي
انا راح اسوي لج تعبير وان شالله يفيدج
بالنسبه حق أسإلتج انا راح اجاوبج من منطلق انكم عايله وعددكم وايد، من وجهة نظري هذا راح يناسبكم
1- شنو افضل ولايه في امريكا ( من ناحية الوناسه طبعاً والتسوق)؟
دام عددكم وايد يبيلكم ولايه التاكس فيها اقل من الباجي وتجمع المتعه والتسوق والترفيه،، انا اقترح لكم اورلاندو في ولايه فلوريدا حيث تجمع حدائق ديزني وسي وورلد واليونيفيرسال بالإضافه إلى فنادقها الكبيره فإذا حجزتي في احدى هذي الفنادق راح يعطونج اما شقه كبيره او فيلا تكفي لعدد 5 إلى 8 اشخاص واسعارهم من 45 دينار إلى 53 :
- ماريوت سايبرس هاربور Marriott's Cypress Harbour
- شيراتون فيستانا فيليج Sheraton vitana villages villas
وهذي الفنادق تقع على شارع انترناشيونال درايف إلي اهو اهم واحسن شارع في اورلاندو
وعندج مولات حلو وايد باورلاندو بالاضافه إلى المطاعم اللذيذه ...

وتقدرين تروحين نيويورك دام انتي واصله امريكا بس مشكلتها غاليه وفنادقها صغيره بالنسبه لفنادق اورلاندو الكبييييره،، بس قعدوا فيها 3 ليالي واخذو باص يوديكم رحلات حول نيويورك وخاصه تمثال الحريه، والصراحه مولاتهم رووووووووعه ،، وأهم شي تسكنين في تايم سكوير عند برودواي (هذا الشارع فيه كافيهات ومطاعم ومجمعات ووو.. وايد حلوووو) وعندج فندقين يقعون في هذا الشارع روعه ميلينيوم وسعره يعتبر مناسب بالنسبه إلى الفنادق هناك ، واذا تبين فندق ضخم عندج ماريوت ماركيز

واذا تحبون الكاكاو تقدرون تروحون مدينة الكاكاو (Hershey) كل شي فيها عن الكاكاو وعندهم مصنع كاكاو رهييييييييب وتقع هذي المدينه في ولاية بنسلفينيا جنوب نيويورك وتقدرين تروحين لها بواسطة السياره (طبعا اجري سياره اذا تبين تروحين من تايم سكوير إلى هيرشي) وتاخذ 4 ساعات تقريبا بالسياره ، بس نصيحه مني إخذو فندق قريب من الفعاليات عشان ماتضيعون وقت بالتنقل،، وعندهم باص للرحلات حلو وايد ينقل لكم بكل المناطق السياحيه بالمدينة ..

2- هل مدة شهر تكفي اني اروح اكثر من ولايه؟
تكفي ونص وتقدرين تروحين 3 إلى 5 ولايات بس المشكله عددكم وايد يعني تنقلكم من مكان إلى آخر ياخذ وقت طويييل سواء داخل الولايه او خارجها ،، رايي تروحون ولايتين إلى ثلاث واذا تبون تغيرون جو روحو رحله بحريه في كروز لمدة 3-5 ايام
اورلاندو تاخذ مو أقل من 14 حيث تزورون معظم المولات والمنتزهات السياحيه
نيويورك مو اكثر من 3 ليالي
مدينة هيرشي مو اكثر من ليلتين

3- شنو اهيا افضل الاماكن الي تستاهل اني ازورها في الولايه الي ترشحلي اني اروحها؟
4- ما هي افضل وسيله للتنقل هل استئجار سياره ام تاكسي ام الباص ام المترو ؟
اورلاندو لازم تأجرون فيها سياره فيها GPS تطلعون وتروحون على راحتكم وارخص لكم،

نيويورك اذا سكنتي في التايم سكوير ماله داعي تاكسي وطبعا لا تفكرين نهائيا تأجرين سياره في نيويورك، حيث كل شي يمج،، بس اهم شي تحجزين رحلات عن طريق النت للرحلات الجماعيه ومن وجهة نظري حجزي من Gray line ..

هيرشي اذا كنتي نبين تروحين لها روحي عن طريق سياره من نيويورك احس حيث تستمتعين بالمناظر الجميييييييييله جداااا اثناء الطريق

5- هل التنقل من ولايه الى اخرى مرهق ام سهل ومريح وباي وسيلة نقل تفضل ان اتنقل من ولايه الى اخرى؟
اذا الولايات بعيدة طياره طبعا
يعني مثلا من نيويورك إلى اورلاندو طيران داخلي
ومن نيويورك إلى هيرشي سياره

6- بالنسبه لمكان السكن ما هو افضل مكان للسكن هل الفندق ام المنتجعات ؟
هالسؤال تلاقين جوابه بالاسئله السابقه
7- كم تكلف السفره للشخص الواحد ولمدة شهر(تقريبي)؟
طبعا يعتمد على مصروفاتكم وعلى سعر الفنادق والاكل والرحلات ،، بس من وجهة نظري اذا زاد عددكم يصير السعر معقول حيث السكن واحد والتنقل واحد خاصه بالسياره
يعني لما راحو صديقتي وكان عددهم 5 كلفتهم الرحله لمدة 3 اسابيع في اولاندو مع المصاريف والسكن والرحلات والاكل ولاطيران والسياره بس اهم ماقصرو على روحهم كل شي سووه 4 الاف كويتي
8- كيف هو تعامل الشعب الامريكي ؟
من وجهة نظري ووجهة نظر العديد من معارفي ان الشعب الامريكي حبوب بس كل شعب فيه الزين والشين مابي امدح لج وتشوفين شي ثاني وبعدين تدعين علي

وان شالله اكون فدتج وباجي الاعضاء يفيدونج ان شالله

تحياتي وسلامي

http://www.arabtravelersforum.com/user257861/
يعطيج العافيه حبيبتي وماقصرتي على التقرير الي كتبتيه لي
واكيد راح اخذ بنصايحج

http://www.arabtravelersforum.com/user245036/
يعطيك العافيه اخوي وماقصرت وان شالله اخذ بنصيحتك