السلام عليكم ورحمة الله وبركاته
في البداية ودي اشكر كل الاخوان في هالمنتدى الرائع على اللي قدموه ويقدمونه من معلومات وتجارب واللي فادتني كثير في موضوع الفيزا وفي مقدمتهم اخونا وحبيبنا امباكت
انا واحد من محبي كندا وخاصتن فانكوفر بحكم اني سافرت لها اكثر من مره لكن من فتره شفت مواضيع الاخوان والاخوات اللي سافروا لامريكا وتحمست اني اسافر لها خاصتن بعد ماسمعت ان الاجراءات اصبحت اسهل للحصول على الفيزا وقلت خل نشوف هل امريكا راح تسرق حبي لكندا ولا لا هههه طبعا قريت موضوع اخونا امباكت حق الفيزا وطبقت المطلوب دخلت على الموقع تقريبا على منتصف فبراير واخذت موعد في 14 ابريل وكان هو اقرب شي في وقتها طبعا 14 ابريل كان يوم الثلاثاء الماضي قمت من النوم وصليت الفجر رجعت للبيت افطرت فطور خفيف بعدين توكلت على الله وانطلقت للسفاره وصلت للسفاره على الساعه 6 نزلت ومشيت مسافه بسيطه الين ماوصلت للطابور عند بوابة السفاره كان قدامي 7 اشخاص اللي جاي الحاله واللي معاه عايلته المهم انتظرنا تقريبا حتى الساعه 7 الا عشر بعدين بدأو في إستقبالنا في البوابه كانت فيه وحده امريكيه ومعاه السكيورتي في الغرفه اللي عند البوابه المهم شوي وجا دوري عطيتها الاوراق كامله خلوني اذكرها لكم من باب الفائده
Forms DS-156 and DS-157
ورقة الموعد اللي تطبع من الموقع بعد ماتنتهي من تعبئة معلوماتك
تعريف من العمل
كشف حساب لثلاث شهور
إيصال دفع رسوم الفيزا
الجوازات الجديد ومعه القديم
والصوره
المهم شافت الاوراق وقالت اوراقك يامستر ام تمام بس عندك مشكله في الصوره قلت في نفسي ياسلام من اولها قالت رح للاستديو القريب وخذ صوره وارجع لي النكته ان الصوره اللي شافتها كانت تمام وهي ثاني صوره اخذها خلال اسبوع لاني صورت صوره وكانت خلفيتها بالكمبيوتر ولما شفت بعض الاخوان يذكرون في مواضيعهم ان الصور حقتهم رفضت لهالسبب خفت ورحت صورت مره ثانيه وقلت للعامل في الاستديو خل الخلفيه بيضاء عاديه ولاتسوي اي تعديل عليها بالكمببوتر المهم نرجع لسالفتنا سئلت الحرس السعوديين اللي برا عن مكان الاستديو ودلوني عليه رحت هناك وصورت المهم قلت لراعي الاستديو كم الحساب قال 40 ريال !!! طبعا هو يعرف انك مضطر فما راح تقول لا تصدقون ياخوان بعدين يوم رجعت للبوابه لاحظت ان هالامريكيه مرجعه ناس كثيره عشان الصوره عاد هذا الشي خلاني اشك ان بينها وبين راعي الاستديو اتفاق هههه لان بحسبه بسيطه ماراح يقل عدد اللي تردهم عشان الصوره عن 30 شخص نضربها بـ 40 ريال يطلع ب 1200 ريال في اليوم يعني في الشهر اذا شلنا ايام الويكند 24 الف ريال مبلغ مهوب سهل كأني شطحت عن الموضوع هههه ماعلينا المهم اني رجعت للبوابه وتخيلوا يااخوان حتى ماشافت الصوره اللي اخذتها بس اشر لي السكيورتي اللي معها في الغرفه جيت له قال معك جوال قلت ايه عطيته الجوال بعد ماطفيته مع ريموت السياره وحطهم في ظرف بعدين فتحوا لي الباب كان فيه تفتيش مثل تفتيش المطارات حطيت اغراضي في الصندوق بما فيها الاوراق ومررتها اللي كانت عند الجهاز وحده كبيره في العمر من جنسيه عربيه المهم قالت اوكيه سئلتها قلت احتاج احط المحفظه حقتي في الظرف مع الجوال والريموت قالت لا وعطتني رقم عشان لما اطلع بعدين اخذ اغراضي بعد كذا دخلت على ساحة السفاره ثمين مشيت حتى دخلت لمبنى السفاره وكان فيه تفتيش ثاني مثل الاول عديت التفتيش ودخلت كان فيه سكيورتي يوزع ارقام عطاني رقم وقال رح لاول غرفه يمين وانتظر رقمك الغرفه كان فيها ثلاث شبابيك ماانتظرت طويل على طول طلع رقمي رحت للشخص وعطيته الاوراق اخذ الفورمز ودبس الصوره عليها والتعريف وكشف الحساب وإيصال دفع رسوم الفيزا والجواز الجديد وشاف ورقة الموعد بعدين رجعها لي مع الجواز القديم من دون حتى مايشوفه وقال خلاص رح للصاله وانتظر رقمك طبعا هو نفس الرقم اللي اخذته من السكيورتي في بداية دخولي المهم رحت للصاله وانتظرت اقل من 10 دقايق طلع رقمي على الشاشه بجانبه رقم الشباك 6 رحت للشباك كان الموظف عربي قال صباح الخير قلت صباح النور اخذ بصمات الاصابع كلها بعدين قال لي انتظر مره ثانيه الين مايطلع رقمك عشان المقابله رحت وانتظرت ايضا اقل من 10 دقايق طلع رقمي على الشاشه وكان بجانبه رقم الشباك 11 رحت للشباك هنا كان فيه مشكله بسيطه لما جيت للشباك وكان الموظف امريكي شاااايب قال لي رقمك ماطلع قلت له رقمي طالع على الشاشه قال اوكيه لحظه راح دخل وجاب اوراقي ثمين قال لي انتظر شوي عشان بدخل معلومات الشخص اللي قبلك في الكمبيوتر قلت اوكيه بعد ماخلص بدا يشوف ارواقي وهنا كانت المفـــــاجـــــأه شاف اوراقي على السريع وبدون أي سؤااال !!!! عطاني الورقه الخضراء والورقه الخاصه بفديكس وقال مر فديكس وادفع الرسوم قلت يعني خلاص قال ايه كل شي تمام وخلال اسبوع الى اسبوعين تخلص الفيزا وقال لي have a good trip رحت لفديكس وانا مذهول واقول في نفسي معقوله خلاص انتهى الموضوع بهالسهوله الحمدلله دفعت الرسوم لفديكس وطلعت من مبنى السفاره ومريت على البوابه واخذت اغراضي اللي في الظرف وانا طالع شفت ذاك الطابور الطووويل برا ينتظرون دورهم وصلت للمواقف ركبت سيارتي وكانت الساعه 8 وربع يعني الشغله اخذت مني مدة ساعتين ولو ماتاخرت عشان موضوع الصوره كان صارت اقل والحمدلله ان الامور تسهلت وانا في انتظار اتصال فديكس
المهم نصيحتي للاخوان اللي يبي يخلص اموره بسرعه يجي مبكر يعني على الساعه 6 تكون موجود هناك عشان تكون من الاوائل في الطابور وراح تخلص امورك بسرعه لكن كل ماتأخرت في الوصول للسفاره راح تتأخر امورك وبالتوفيق للجميع إن شاء الله
سؤال لاخوي امباكت خارج عن الموضوع انا سويت حجز على الاماراتيه الرياض – دبي – لوس انجلوس والعوده نيويورك – دبي – الرياض وطلعت علي التذكره ب5200 ريال تتوقع ان المبلغ مناسب ولا لا وشكرا لك.مواضيع عشوائيه ممكن تكون تعجبك اخترناها لك:
- أستفسار من مشرفنا العزيز
- أخر اجراءات الفيزا معاي محتاج منكم ثواني بس
- اسئلة لاهل الخبرة عشان اخطط لشهر العسل
- محلات ملابس ماركات مخفضة بأورلاندو
- كل شي اوكي
- تكفون لاتردوني ساعدوني
- الاخ ممكن توضيح
- للضرورة ياشباب أريد ترجمة لعتبئة نموذج الفيزا
- مطار جون اف كينيدي
- تكفون احتاج المساعدةايها الأعضاءالأعزاء
- للسعودينن هل تتوقف الخطوط السعوديه في غير وقت الحج في جده في طريقها من الرياض الى
- الى امباكت واعضــــاء المنتدى مواصلات نيويورك
- مسافر جديد الى أمريكا أرجو المساعده العاجله
- جاني رسالة من السفارة بعد يوم اشهر من المقابلة عجب
- الفنادق في اورلاندو
- عاجل أرغب بسكن جيد في سان فرانسسكو
- السفر بالسياره الى تورينتو
- استفسار عن بقاليات عربية في منهاتن
- ياحظك ياللي سافرت لامريكا
- ارجو المساعدة اخوانى
رد مع اقتباس
المشاركة الأصلية كتبت بواسطة Impact
المشاركة الأصلية كتبت بواسطة الذكرى الجميلة
المفضلات