الموضوع: أرغب في السفر الى بوسطن عن طريق نيويورك

مرحبا اخوي ابو علي

انا اشوف انك تجلس على الأقل يوم أو يومين في نيو يورك ترتاح وبعده تسافر لبوسطن .

نيويورك افضل من واشنطن يعني ما تسوى روحتك لواشنطن .


بالنسبة لنياقرا أتوقع ان فيه شركات سياحية أسأل عنها في الفندق لهم برامج سياحية حلوة اطلع عليها وشوف المناسب وروح له.

بالتوفيق يالغالي

السلام عليكم ورحمة الله وبركاته

أشكرك أخي الكريم fms نجم البوابة الأمريكية على ردك وعلى معلوماتك التفصيلية
وأشكرك أخي الكريم placeplace على ردك

أرجو التكرم باعطائي اسماء فندقين مناسبين في كل من نيويورك وواشنطن وبوسطن يكون قريب من هارفرد بزنس سكوول

اللي أقصده بالحجز عن طريق شركة سياحية هو الحجز لرحلة لعدة أيام تكون بالباص مع السكن خارج نيويورك مثلا شلالات نياقرا وواشنطن وفيلادلفيا

ولكم جزيل الشكر

اخوي fms

بخصوص اتلانتك سيتي في نيوجيرسي

ماهي معالمها السياحية المعروفة ؟ وهل تستاهل الزيارة؟

تحياتي ،،

عفوا .. بالنسبة للفنادق ..
ياليت عنوان البزنس سكول حقت هارفرد .. لان الجامعه كبيرة وابي اعرف موقعه ..

أخي الكريم

اللي أعرفه عن الموقع انه قريب Walking distance من Harvard Square
مادري هل المعلومة تكفي أو لأ

واذا ممكن سؤال عن شلالات نياقرا كم وقت تبعد بالباص من نيويورك

وجزيت خيرا

اخوي fms

الله يعطيك الف عافية والله ماقصرت

تسلم وجهد متعوب عليه

و أقدر فيك خدمتك لاخوانك الاعضاء ووقتك لهم

الله يوفقك إن شاءلله ،،

أخي الكريم fms

بخصوص الفنادق في نيويورك أنا حصلت حسب الترشيحات 3 فنادق هي W و westen و Marriot Marquis وكلهم تقريبا بمعدل سعر 280 دولار الليلة ايش تشور علي

أذا ممكن أبغى فنادق أو اسم منطقة في واشنطن ترشحها لي لمدة ليلتين وجزيت خيرا

هلا ابو علي .. لا تحسب نسيتك بخصوص فندق بوسطن .. انا كتبت رد ولكن لمن كتبته خفت اني مضيع بالعنوان حق البنزس سكوول لان ماشاء الله هارفرد كبيرة ..

اول في كامبريج ..

انا لمن رحت بوسطن سكنت في كامبريج .. ما بينه وبين بوسطن الا نهر .. ولكن عيبه مو قريب من هارفرد.. الفنادق الي قريبه من جامعه هارفرد ما شفت شي معروف .. وعلشان كذا اقرب شي المرديان ياليت تشيك عليه لو يعجبك . اخترته لانه قريب وبنفس الوقت جنب محطة سب واي بتسهل عليك الروحه للجامعه لانها محطة وحده وبنفس الوقت لو بتاخذ تاكسي قريب .. و تقدر تروح لبوسطن الداون تاون بالسب واي ..





ولكن بديت اشك ان السكول من الجهه الثانية .. من النهر .. وحتى لو كانت من الجهه الثاني ما في محطات سب واي هنا .. و لازم تاكسي او تمشي ..

http://www.starwoodhotels.com/lemeri...ropertyID=3253

بالنسبة لنيويورك ..
كل الفنادق الثالثه حلوة من ناحية الموقع .. ولكن انا افضل W times square انته في اكثر من W في نيويورك .. يعجبني ستايل غرفه W و موقعه في نص التايمز سكوير ..

صورة من الموقع ..




اما واشنطن ..

اما واشنطن .. يعتمد هل بيكون معك سياره او لا .. اذا ما كان معك اطبعا اكيد افضل شي انك تسكن في المدينة بس عيبها اسعار المواقف غالية .. كل المدن الثلاثه الي اخترتها المواقف فيها غالية .. من المناطق الحلو للسكن تعجبني منطقة M st في جورج تاون .. و او تسكن في الداون تاون او منطقة البيت الابيض .. ما في موقع اشوف انه ممتاز في واشنطن لان المدينة اهداء من نيويورك ولا في مكان تجتمع الناس فيه كسواح ..

بارك الله فيك أخي الكريم
ونور دربك ووفقك دنيا وآخره

امين .. وياك ..

اي استفسار يجي في بالك قبل او وقت الرحله لا تتردد .. الاعضاء ما يقصرون ..

لو رحلتك الشهر هذا او الجايه اقدر اقول توفقت بالجو ان شاء الله .. لان هالفصلين ربيع بالنسبة لنا ..

فهد ..

ذكرتني أخوي فهد الله يذكرك بالشهاده
اشلون الجو الآن في بوسطن ونيويورك
أنا ان شاءالله مسافر السبت القادم
واذا توصي شيء من الشرقية ترى انا حاضر

أخي فهد

بالأضافة للسؤال الماضي عندي كم سؤال لو تكرمت:

1- كم وقت ياخذ المشوار من نيويورك الى واشنطن وأحسن طريقة للذهاب باص أو قطار
2- ايش أحسن وأوفر طريقة للأتصال من والى السعودية خلال فترة اسبوعين
3- هل تنصح بشراء لاب توب من أمريكا من ناحية السعر والجوده لو حبيت ما أجيب جهازي معاي

ولك جزيل الشكر

هلا ابو علي .. ما ابي الا سلامتك ..

بالنبسة للجو والطقس في نيوروك .. امس الجو كان رهيب جدا .. ولكن اليوم مطر .. ومتوقعين يوم السبت راح يكون ممطر .. يوم وصولك بس ان شاء الله يصير العكس ويصير دافي وحلو .. هالايام الجو تحسن كثير .. بالنهار الجو حلوو وبالليل يميل للبرد يعني جاكيت او بلوفر تكفي ان شاء الله .. لو عندك مظله كويسه وكبيره وتقدر تجيبها جيبها للاحتياط .. او اشتر من نيويورك لو في مطر ...

٢ المشوار بالسياره الى واشطن تقريبا ٤ ساعات وشركه البصات الي قلت لك عليها فيها خط نيويورك واشنطن و حلوه بصراحه انا جربت هالخط كان مريح جدا وكنت استخدم الانرتنت و سوالف مع اخوياي ما دريت الا انا واصل. القطارات في امريكا مهوب مستوى اوروبا .. وخدمتهم عاديه و اسعارهم غاليه .. علشان كذا ارشح الباص ..

٣ بالنسبة للاتصال للسعودية .. الظاهر ان شركه الاتصالات السعودية مسويه اسعار حلوه لخدمه جود بلس .. او جود تكلفة المكالمه للدوله الي تخطها يكون اقل من ريال سعر معقول .. بس تاكد من الشركه قبل ما تسافر علشان توفر هالخدمه لاهل .. او عن طريق شراء كروت سواء من الكشكات والبقالات الصغير و كل كرت له تسعيره خاصه للسعودية شوف الافضل و تسعيره الجوال تختلف عن الثابت .. ومدينة الرياض غير سعر الشرقية .. او تقدر تشتريها عن طريق الانترنت تكون متوفرة .. وارخص وسيله لو الاهل عندهم انترنت تحمل برنامج سكاي بي و تشحن له رصيد و يتصلون عليك بالفندق او الجوال لو طلعت رقم .. اذكر تكلفة الدقيقة لامريكا من سكاي بي تقريبا سنتين .

٤ انا افضل انك تجيب الاب توب حقك معك لانه هو الي يونس الواحد بالسفر خصوصا لمن يكون لحاله .. وتقدر تدخل وتشيك على الايميل و الحساب البنكي و وسيله اتصال مع الناس والمنتدى ..
انا شريت من امريكا جهازين واحد سوني بداية 2007 وكان تمام ولكن ما في حروف عربي على الكيوبرود وانا ما تهمني لاني حافظ اغلبها .. و الصيانه كانت حلوة هنا .. و شريت ماك من ابل و بصراحه مبسوط فيه وسعره في امريكا ارخص من السعودية ولكن ما ادري هل عليه ضمان دولي او لا .. بس لازم قبل ما تفكر تشتري ماك و اي جهاز يشتغل على نظام ماكنتوش تقرا قبل عنه وتحدد هل تقدر تغير من وندوز الى ماكنتوش !!

مواقع لمحلات اكترونيه في امريكا .. ادخل وشيك على الاسعار ..

http://www.bestbuy.com/

المحل الثاني مشهور في نيوورك بس ما شريت منه شي

http://www.jr.com/

لمنتجات ابل ..

http://www.apple.com

هذي اهم المحلات المعروفه في نيوورك وموجود لها فروع في نيويورك - منهاتن

أخوي fms نجم البوابة الإمريكية

الله يعطيك ألف عافية على هالمعلومات القيمة والمفيدة، :113:

أنا أول مرة أسافر لأمريكا الأسبوع الجاي بزور بوسطن ونيويورك نازل في بوسطن أول شي
فعندي طلبين واستفسار أتمنى ألقى الإجابة الوافية الشافية عندك:

1. ما هي أفضل الفنادق (2 او 3 بالكثير) في بوسطن ونيويورك بحيث يكون موقعها حلو وخطيييييييييييير وهي حلوة بعد؟ :24:

2. حاب استأجر سيارة، من وين تنصحني وهل أقد آخذها من المطار وإلا لا

2. بحكم إني أول مرة أجي، هل تنصحني أجيب اللابتوب حقي وإلا لا، علما أنه لابتوب الشركة والبرامج اللي فيه كلها مصرحة بس خوفوني بعض الشباب من احتمالية إني أطول بالمطار واحتمال يفتشون اللابتوب وياخذون صورة من كل المعلومات اللي فيهن أفيدونا أفادكم الله؟ :114:

الله يعافيك اخوي نائد .. اتمنى الاسم صح ..

بالنسبة للسكن اصعب سؤال بالنسبة لي وحتى وانا لمن ابي اسافر مع اهلي اشيل هم السكن .. تعرف لازم سعر معين وما يقل على مستوى معين و تبيه يكون فيه موقع ممتاز ..



بالنسبة للنيويورك افضل مكان للسكن هو الميد تاون midtown من شارع 34th الى 60th بالمنطقة هذي يكون فيها مطاعم ومحلات و فنادق كثيرة .. بنفس المنطقة هذي فيه منطقتين وحده التايمز سكوير وحذي زحمه دايم و الي يفضلونها السواح و دايم زحمه وفيها مطاعم و صيدليه وبقاله و سينما وكل شي .. الزحمه الى الساعه ٢ تقريبا و بعدين يبدا يهدا الوضع.. وفي منطقة ثانية موضحها بالخريطه هذي اهدا وجنبك اسواق و مطاعم السنترال بارك ميزتها للي يحب الروقان بينبسط فيها او الي جاي بزنس ما يبي الزحمة وفيها فنادق فخمه و ٥ نجوم ..

انت لازم تحدد مستوى الفندق "٤ نجوم " بالنبسة لي كويسه بصراحه و اسعارها تكون من 150 دولار الى تقريبا 400 دولار - هذا في نيويورك
وابي تحدد اي المنطقتين تفضل التايمز سكوير ولا الثانية ..
وكم المبلغ الي تبي تدفع على الفندق شامل الضرايب وكل شي ..
و التواريخ بالضبط .. علشان يفرق السعر بين يوم و ثاني.

اما في بوسطن المدينه صغيره بس نفس الشي ياليت تحدد عدد النجوم والمبلغ.. لان ما ودي اعطيك فندق سعره مغري و يكون اقل من المستوى الي تبيه ولا ابي اعطيك فنادق غاليه تكون بالنبسة لك اسعارها مبالغ فيها.

٢- اجار السيارات انا انصحك من المطار .. بخصوصا من مواقع شركات معينه ..

اولها والمفضل عندي بدجت .. لمن تحط انك سعودي يطلع لك سعر مغري بالاضافه انه يشمل التامين .. بس مهوب كل انواع السيارات ..

بس غير I reside in اختار السعوديه لو انت بالسعودية ..

نفس الشي ناشونال اختار السعودية و شوف الاسعار .. والحلو انك تقدر تحجز بدون كريدت كارد او شي ولو رحت ولا لقيت السياره الي انت حاجز يسون لك اب قريد ..

http://www.nationalcar.com

هذي الشركتين حلوات خصوصا لمن تقولهم انك من السعودية ولمن يكون التامين مشمووول.

انت حدد حجم السياره الي تبي و من وين تبي تستلمها وين تبي ترجعها و التواريخ وانا بدور لك وانت تدور وافضل سعر تحجزه

بس ترا المواقف في المدن الي انت مختارها غاليه و السواق في منهاتن شوي متعبه من الزحمه والتكاسي.

٣ جيب الاب توب ولا تخاف انت ما سويت شي غلط. اكثر الاوقات الي كنت فيها بالمطار ما فتشوا احد. بس يمكن يفتش عند الخروج لمن يمسح علىه علشان اختبار المتفجرات ولا يفتح الاب توب ولا يشوف المعلومات ولا شي. انا ما ادري كيف يطاوعك قلبك تسافر بدون لاب توب

شكرا أخوي fms

أنا أفضل الخمس نجوم في كل المدينتين وأهم شي يكون مكانه حلووووووو، أنا عارف تعبتك شوي معنا، الله يعطيك ألف عافية. وشكرا

The Plaza
موقعه رهيب .. بمعنى الكلمه جنبك السنترال بارك قريب من الشوارع المهمه الي فيها اسواق .. مثل 5th ave 57st Madison Ave المنطقة كلها محلات
قريت الرفيوو حق الفندق يمدحونه خصوصا انه مجدد ..
الغرف كلاسيك شوي بس فيها لمسات تكنلوجيا و الفندق مشهور في نيويورك ..









http://www.tripadvisor.com/Hotel_Rev..._New_York.html

الخيار الثاني ..

لو انت ما تحب الغرف الكلاسيك في خيار حلوو و موقعه بطل بعد ..

Mandarin Oriental, New York

ميزته انه في ادوار مرتفعه اللوبي موجود في الدور ٣٥ و المسبح في الدور ٧٥ او ٣٦ لو قررت تسكن فيه احرص انها تطلع على السنترال بارك ..

بعض الصور من اشخاص سكنوا فيه ..







وتحت الفندق فيه مجمع تجاري صغير و مكتبه و كافي شوب و في مطاعم. الفندق في عماره جديدة.

انا حبيت هذا اكثر من البلازا لان ما احب الفنادق الكلاسيك .. وفي صور بروفشنال لقيتها للغرف ..



ومن الخيارات في The Ritz-Carlton New York, Central Park بس برضوا كلاسيك .. و موقعه حلوو مقابل السنترال بارك ..







وفيه الفور سيزن موقعه حلو بس غرفه اشوف انها عادية ..





في فنادق غيرها ٥ نجوم ..
___________

اما في بوسطن ..

في Mandarin Oriental, Boston
جنب مجمع تجاري وبنفس الوقت قريب من شارع مشهور في بوسطن بالقهاوي والمطاعم وحلو تتمشى فيه .. Newbury st





الصور شكلها عادية بس موقعه حلوو و لكن ما يمنع تشوف الموقع حقهم وتشوف الصور



في Taj Boston موقعه حلو بس ما اعجبتني غرفه ..

والخيار الاخير Four Seasons Boston

تقيمه حلو من الي سكنوا فيه و الغرف الظاهر كلاسيك ما لقيت صور من تصوير الي سكنوا فيه .. بس تقدر تشوف الصور الموجوده في الموقع .. وموقعه حلوه اصلا بوسطن صغيره نسبيا.




بكذا نيويورك :
The Plaza
Mandarin Oriental
The Ritz-Carlton New York, Central Park

بوسطن :
Mandarin Oriental
Four Seasons Boston

كل الفنادق هذي موقعها حلوو و خمس نجوم ..

ان شاء الله تختار فندق يعجبك منها ..

و بالسياره ما ادريت سويت الحركه الي قلت لك عليها انك تحط انك من السعودية ؟
واذا في شي مهوب واضح ياليت تسال انا والاعضاء ان شاء الله نساعدك ..