الموضوع: مشاورة مهي محاورة

السلام عليكم ورحمة الله وبركاته
اولا: معليش ياشباب على عنوان الموضوع لاني بصراحة أحس ان الردود كلها صارت زي المحاورة هذا يقول انصح بالديرة الفلانية والمعهد الفلاني والثاني يقول لا ماعليك منه رح على الديرة ذي والمعهد اللي انا اقوله والثالث يقول نفس الكلام لدرجة انه الواحد لامنه دخل موضوع مايسكن راسه الا حبة بندول (ماعلينا).
المهم – بدأت المعاناة منذ أكثر من شهر عندما قرر عجيب انه يروح يدرس انجليزي لمدة ستة شهور(عقدة اغلب الطلاب السعوديين الانجليزي وأنا منهم)ومن ذاك اليوم وهو مسنتر على هل المنتديات يقلب المواضيع يبي يرسيلة على دولة أو معهد يجتمعون على مدحه أهل الخبرة من الأعضاء الكرام سلمهم الله بس اتفق العرب ألا يتفقوا (يرضوا ماعلينا) ولاكن بقرار شجاع اتخذه عجيب بين نيوزلندا وكندا اختار الله يوفقه كندا (عديت إلى عشرة وطلعت كندا) وبعد فحص وتمحيص دقيقين في كندا ومدنها ومقاطعاتها اختار مدينه يقالها هالفكس في مقاطعة يقالها نوفا ويقولون انها باردة بس انا احس انها مهي ابرد من نجد (نجد ابرد منطقة في العالم البررررد في العظام على طول بس مافيها ثلج مافيها الى الطعوس الرملية) يعني ماشلنا هم البرد عندي فروة تفي بالغرض هناك وهاذي المدينة رخيصة بس عندنا مهي رخيصة نعنبوهم حلق الشعر ب 16 دولار يعني ب 50 ريال (ماعلينا) حلها موجود ابحلق صفر من السعودية قبل اطلع المهم انها ارخص الموجود واختياري لها كان بسببين رئيسيين:
أولا:مافيها عربان واجد.
ثانيا: مدينة صغيرة ورخيصة.
ولأن عجيب يحب الشورى من أهل الخبرة من إخوانا اللي درسوا في كندا وخاصة في هاذي الديرة يبي يستشيرهم في كم سؤال ويتمنى من اللي عنده معلومة انه مايبخل عليه ويجزاه الله خير ويوفقه ويسكنه فسيح جناته ولا يوري مكروه في نفسه أو في من يعز عليه.
ملحوظة(اسأل في نقاط وأتمنى انه تكون الأجوبة في نفس أرقام النقاط).
1- وش رأيكم في اختياري مدينة الفكس؟ (الميزات والسلبيات)
2- وش أفضل معهد فيها ill أو call ؟ (اذا فيه معهد أفضل من هل المعهدين اذكره)
3-كم بتكلفتي المعيشة هناك ؟ باختصار خمسين ألف تكفي الدراسة والمعيشة والتذكرة
4-مدينة غير هاذي المدينة تنصحني فيها بشرط مايكون فيها عرب كثير.
5- جامعة قوية لتدريس الانجليزي في غير فانكوفر ولا تورنتو.
وهذا كل اللي عندي والله يجزاك بالخير باللي ماقصرت وأفدتني بخبرتك ومعلوماتك.

مواضيع عشوائيه ممكن تكون تعجبك اخترناها لك:

• رحلات ربيع العمر العائلية في أمريكا الساحرة
• مطلووووووووب سوبر ماركت ومطاعم عربية في نيويورك
• تكفون وتراها تهز أهل النخوة
• إلى فانكوفر وانتم ايضا معي
• استفسار سريع
• صلاحية جواز السفر في مطارات أمريكا؟
• استفسار بسيط من الاعضاء والمشرفين الاعزاء
• استفسار عن تغيير مكان موعد المقابله ؟
• تم رفض فيزا خويي لاسباب غريبة
• مشكلتي مع السفاره الامريكيه ،، تكفون الفزعه
• ورقة التعريف العربية
• الى خبراء اورلاندو ؟
• عاجل عاجل ولا راح تعبي هدر يا
• استفسار لما حصل لي بالمقابلة اليوم
• محتاج خدمتكم
• لوسمحتوا وين صور تكساس؟؟؟
• الخطوط السعودية قريبا بشهر مايو ستفتتح خط مباشر الى لوس انجلس
• تحديد جامعه
• استفسار اهبل شوية بخصوص المقابلة
• خريطة الولايات المتحدة

:109: :109: :109: :109:

أتوقع يا أخ عجيب أنك بحثت وتمحصت وقررت الاختيار ......... والحين جاي تسأل عن اختيارك ورضا الناس عليه ؟؟؟؟
إذا فتحت الباب راح تبدأ المحاورة مرة أخرى وتبدأ تسمع النقاشات الحادة والفروقات الكثيرة في اختياراتك ولا تنسى أن الاختلاف بالرأي لا يفسد للود قضية وكلها آراء واجتهادات شخصية عن واقع تجربة أو معلومات من ثقات
فأنت امام أحد أمرين : أما أنك تقتنع باختيارك ولا تشاور فيه أحد ، أو أنك تسمع لكل واحد رأيه وتحط جنبك علبة البنادول وجيك المويه وهي الأفضل لكي لا تندم
:107:

والله يكتب لك اللي فيه الخير والفايدة وأتمنى أن تسافر وترجع لنا سالم غانم ( دخترة انقليزي ) :113:

وتقبل تحياتي

ياشباب معليش على الغلط اسم المعهدين illi و cllc (الله لايجزي اللي نقلنياها خير)
وهذي مواقعها
http://www.illi.ca
http://www.cllc.ca

السلام عليكم ورحمة الله وبركاته :
أول شي كل سبع حبات بندول قبل قراة الرد :
أخي عجوب المنطقة التي اخترتها رخيصة لكنها باردة جداً تصل إلى تحت -20 تحت الصفر ، وليس المشكلة في تحمل البرد لكن المشكله في تبعات البرد ، طبعاً مافهمت تبعات البرد قصدي أن ميزة التعلم في الخارج وعاشرتهم في لغتهم يعتبر امراً مهما في سرعة التعلم لكم لما تصل درجة البرودة تجد أن الناس في وقت الشتاء لايرغبون الخروج والاجتماعات الا في الاوقات الضرورية مما يؤثر في تعلم اللغة ، بعدين أنت قلت في غير تورنتو وفانكوفر ليش فانكوفر لالالالالا !!!!!! انا مسجل في معهد تابع لجامعه في فانكوفر على بداية يناير 2005م أن شاءالله وتعتبر هذه الجامعة هي الثانية في فانكوفر ومعتمدة من وزارة التعليم العالي بالسعودية ، أكيد أنك تبتقول غالية طيب أكيد أنت تبي تسكن عند عائلة في هالفاكس وسعر العائلة في هالفاكس وفانكوفر تقريباً نفس السعر وسعر كرت الباص نفس السعر . يعني مافيه فرق بين المدينتين ، واللغة الاساسية هي الانجليزية .
ويجب في السفر الجمع بين التعلم والسياحة حيث أن فانكوفر اختيرت افضل مدينة بالعالم 6 مرات متتالية من ناحية الجمال والطبيعة ودرجة حرارتها متوسطة على مدار العام اقل ماتصل إليه 5 درجات يعني أحر من درجة حرارة الرياض عز الشتاء .
وتقبل تحياتي ،،،،

مرحبا أخوي ,,,,
اذا عزمت على حاجه تأكد انك اخترت الصح وعزم على الامر وتوكل على ربك ,, لاكن لاتنسى خبرات غيرتك لانك رايح تتفادا اخطاءهم الي طاحوا فيها بدون قصد وبذلك يمكن توفر على نفسك اشياء كثيرة
بصراحة لما قريت موضوعك تذكرت من فترة طويله لما كنت محتار مثلك ماعرف وين اروح ولا اختار والناس متضاربه في الكلام والاراء وعشان كذا ودي ارد عليك واعطيك نصائح ورايح انزل موضوع اليوم للاخوان الي محتاجين اي حاجه في فانكوفر خصوصا اني متواجد الان فيها
بنسبه لاختيارك اعرف زملاء من الجنسيه الكنديه من نفس المدينه هالفيكس جايين هينا في فانكوفر عشان يدرسون انجليزي مثلنا بالضبط ؟؟ رايح تسغرب طبعا لان اصول السكان هناك لغتهم فرنسيه انا مارحت هناك لاكن اتوقع انها مثل الي يسافر لمونتريال ويدرس فيها انجليزي يعني تخيل في مونتريال اعلانات الشوارع بالفرنسي تخيل اركب مع راعي التكسي واتكلم معه بالاشارات او اضطر اني اغيره لاني ماعرف اتواصل معه لان لغته فرنسي فقط او يمكن تصدف معك وتطيح في عربي وبتالي ماتوقع أحد يلاقي فرصه يتكلم انجليزي بشكل سليم هيناك ؟؟؟!!!
هذا من جهة ومن جهة ثانيه , غرب كندا عكس الشرق تماما في كل الاحوال ,,, بصراحة انا ماودي اغير وجهة نظرك لاكن ياليت تتأنى شوي وتسال اكثر
بنسبه للجامعات عندك جامعة البرتا
وبنسبه لكثرة السعودين مادري ايش ارد عليك يعني بنسبه لي افضل اسمع سعودي يتكلم انجليزي في الفصل اكثر من الجنسيات الاسوية الاخرى الي ممكن يؤثرون على لغتك بسبة اختلاف لهجاتهم وصعوبة نطق الانجليزي عليهم
بنسبه للتكاليف ,, ترجع لك ,, الاساسيات هي السكن واحتمال يكلفك 840 دولار شهريا والدراسه يمكن تكلفك في حدود 900 شهريا تقريبا وترجع على المعهد وجودته ويبقى مصاريف الجيب الي انت تتحكم فيها
أخوي المتعاون اهلا وسهلا بك بيننا في فانكوفر وتوصل بالسلامة بنسبه لدرجة الحراره الله يعين بس ويرحم برد الرياض ولا اوصيك بالملابس والشتا يعني في بدايته عندنا ودرجه الحراره قبل اربعة ايام الساعة 2 في الليل كانت عندنا واحد فوق الصفر :110: والان وانا قاعد اكلمك خمس درجات ولاحظ الشتا في بداياته انتبه وعليك بالجاكيتات

على العموم اي استفسار انا حاضر

تعقيب سريع بس :101:

اللي اعرفه وقرأته عن هاليفاكس انها ليست مثل مونتريال اصولهم فرنسية بل بالعكس اصولهم انجليزية اصلية وتتميز بعراقة النفس الانجليزي فيها (هذا الموجود في الكتيب عن المدن الكندية السبع الجميلة اللي توزعه السفارة على ما اظن... تقدر تروح وتطلبه وتطلب كتيبات عن اي مدينة تريدها تراهم خدومين)

بالنسبة للبرد فالكلام اللي سمعته نفس الشئ : انها بارررررردة مرة في الشتاء.

ملاحظة: عندما كنت اعمل الفحص الطبي الالزامي قبل سفري الى كندا قابلت واحد صغير في السنة مخلص الثانوية وقابلته التأمينات الاجتماعية او الشؤون الاجتماعية (مااذكر) وباعثينه كندا الى هاليفاكس



بشكل عام توجد بعض المدن المميزة في كندا غير مونتريال وفانكوفر وتورنتو مثل ادمنتون وكالجري


اذا كانت راعي دراسة صحيح وهدفك الانجليزية بس مو الدراسة الجامعية وعادي تعيش في مدينة اقرب الى البلدة ولا فيها سينما واسواق لكنها في عمق الطبيعة والطلاب العرب معدومين فيها فهناك مدينة تدعى (نانيمو) في جزيرة فانكوفر وتقع الى الشمال من مدينة فكتوريا تقريبا ساعتين بالسيارة ... تقدر تسأل عنها !!
بس أمانة اعرف شباب راحوا يبون يعاينون المدينة وبطلوا عنها لانهم قالوا مدينة صغيرة جدا ولا فيها ملاهي واسواق وسينما ووو من شغلاتنا احنا الشباب


السلام عليكم

والله ان كانك معزم فتوكل على الله بس احس انك ما جمعت معلومات كفاية

عزيزي مدينة هاليفاكس اللغة الاساسية فيها انجليزي وهي مدينة صغيرة فيها 3 جامعات مما يجعلها مدينة طلابية نوعا ما

اما عدد العرب فيها فهو كثير وكثير جدا بالذات الطلاب

ويعيبها جوها السيء جدا .. يعني بدا الثلج وباقيله يمكن 5 شهور

بالنسبة للمعاهد المذكورة فوالله ما عندي اي خلفية عنها

اذا تبغى نصيحتي اجمع معلومات عن فيكتوريا وجامعتها

مدينة دراسية جميلة واحسن طقس في كندا وبرنامج اللغة في جامعتها لا يعلى عليه واسال الاخ cnn لانه مجربه

مجرد نصيحة اخوية والخيار الاول والاخير لك والله يوفقكوين ما توجهت

تحياتي
فيكتوري

اولا: زي ما توقعت السالفة صارت محاورة وقام كلا يدلو بدلوه وبعضهم يرمي حجر وبعضهم ماله لزوم داخل عرض ومطفي نوره.
ثانيا :الشكر واصل الى كل من عطانا وجه (بغض النظر عن اجابته ).
ثالثا: انا اسال شرق وبعضهم يجاوب غرب برضوا نقوله شكرا ومبروك انحسبتلك مشاركه.
رابعا: انسوا الكلام القاسي اللي فوق كله.
خامسا: كان او فكتوري الله لا يهينك عطنا من معلوماتك عن فكتوريا وعن افضل محل فيها لتدريس الانجليزي.
سادسا:نجد والله انك سنايدي تحمس الواحد ولا تلخبطه (شكرا خاص لك)
سابعا :اي معلومات حلوه لا تبخلون علينا فيها .
تاسعا: اكرر شكري
عاشرا: مع السلامة.
ودمتم سالمين