الموضوع: اسئلة بخصوص السفر الي البحرين

انا اشوف مطعم لنترز في البديع في منطقة المغشع يجنن بصراحه بس لايغرك من بره شكله شين بس لادخلتيه تتغير نظرتك واجد... كثير اللي يشوفونه من بره يهجون بس يوم انهم يدخلون تتغير نظرتهم.... هو زين بصراحه مره بس سعره اشوي مدري وش يحسون به....واذا ضيعتوهم هذا تليفونهم
17590591
اما شارع العدليه بوصفه لك من وانتي جايه من الجسر لاتلفين جهة السيف يعني لاتطلعين الكبري وتدخلين السيف ابتلي سيده لين تجيك اول اشارة راح يجيك عندها ع اليسار شارع الكويت ادخلي معه لين ثالث اشارة اطلعي معها يمين منطقة العدليه يسار فيها مطاعم تجنن بصراحه وكافيهات تجنن...
على فكرة انا انصحك بمطاعم في الجفير على شارع المطاعم من اوله لين اخره مطاعم فيه مطعم اسمه الابراج مرسوم عليه ابراج الكويت... زين والله الجلسه فوق واجد حلوة... وفيه مثل ماعلمتك كذا مطعم يمديك تختارين لان الخيارات متاحه.. وهذا الله يسلمك تطلعين مع مسجد الفاتح يمين اول اشاره تخلينها ثاني اشارة تخلينها تمشين عشره متر يمين دخلة شارع المطاعم....واحسن شئ تبدون من اوله لفه بالسياره فكره تاخذون وبعدين تقررون وبجنبها فنادق كثيره ماشاء الله وكافيهات حلوة وجلسات بره حلوة اذا الجو يساعد...
وبالتوفيق يارب ترى البحرين ماتضيع ابد....

تذكرت فيه مطعم هندي زين بعد هذا وانتي ماشيه على شارع الملك فيصل ابتلي لين تجيك دخلة الهوليدي ان اذا دخلتي الدخله حقت الهوليدي ان اول اشاره تقابلك تشوفينه ع الزاويه يمين بصراحه بريانيهم يجنن وفيه اماكن للعائلات ستاره الجو داخل هادي وحلو...شموع وحركات واسعاره زينه...
بوصفلك اسهل امممم شوفي تاخذين دخلة الريجنسي مع الاشارة اللي تدخلك ع باب البحرين وبعدين تخلين بابا البحرين على يمينكبعد ماتاخذين الدوار حقه بيجيك كنتاكي يمين ابتلي اول اشاره خليها وابتلي ثاني اشاره قبل توصلينها بخمسة امتار المطعم يمين بالزاويه... كلي برياني ربيان من عندهم....يم يم بصراحه....وعندهم لبن غريب حليو بس عجزت اسميه لبن....مدري كنه حليب كيكوز حق الاطفال لاتقربينه علشان مايخرب جووووووووك هههههههههه
ونصيحة في البحرين نصيحه نصيحه نصيحه لاتقربين اي شئ لحم... خلك على دجاج او اسماك وربيان.. لحمهم مجمد واسترالي مدري شلون ماينوكل ولونه اسود.....
ايه تذكرت بدليك على مطعم شعبي والله ياتوبليرون ان وديتي ليه شيبانك انهم يتعلقون به... تكفين طالبك روحي له لو تتفرجين ماتاكلين
مطعم شعبي وخبز هولي يجنننننننننننننننننننننننن الخبز الهولي حقه خطير....احنى نسميه خبز هولي مدري وش تسمونه انتم
اسمعي لفي يمين مع الريجنسي لين يصير باب البحرين على يسارك...امشي اشوي بتجيك اشارة مشاه... امشي شوووووي بيجيك مسجد على يسارك بجنبه فتحه ادخليها فيها هالمطعم... الاكل بالشارع... وفيه للعوايل بس اغلب الناس تاكل بالشارع وماغير تردين السلام مع كل لقمه هههههههعلى فكرة اغلبه اجانب ويستحق التصوير وتراااااه رخييييييييييييييييييييييص مره,,,, يعني لو تاكلين انتي واسرتك اكل لين تشبعون يمكن حسابكم مايوصل 10 دينار بحريني...يعني سبعه ونص دينار كويتي يعني يمكن مية ريال سعودي يعني عشره ريال عماني هههههههههه و كلي من عنده مشويات دجاج وسمك وشوربات بس اذا تبين نصيحتي اطلبي منه روب يعني زبادي وخبز هولي بسسسسسسسسسسسسسسسس وشوفي الجو وربي وناسه .... وناسه يعني فله ....وكراسيه شعبيه ويجونه اجانب والخبز حار طالبك روحي هالمطعم لو تتفرجين بس.....وتراه يفتح بعد الفجر للفطور على قولتكم للريوق لين تسع بالليل يقفل ويقفل يعني يبند...لاتشكروني ع الترجمه ههههههه واللي يباشرون بوزار وطاقيه... اشكالهم حقين غوص....وناسه وربي.... واشربي شاي الحليب حقهم زين.....

وعليكم السلام ورحمة الله وبركاته

حيالله أختي توبليرون (أم حسين)

- طويلة العمر بالنسبة عن أفضل مطعم هندي أنا جربته مثل ما قالت أختي (فالها بقوه) مطعم لنترس وانتي على شارع الهايوي أول ما توصلين الكبري إللي قبل كبري السيف تنزلين تحت بتجوفين مطعم برجر لاند بيكون مطعم لنترس يمه على الزاويه ... وهذا رابط المطعم:

http://www.lanternsrestaurant.net/

وثاني مطعم أنا جربته في الجفير في شارع المطاعم أسمه (موتي محل) البرياني ماله روعه بس مشكلته صغير ومافي مكان للعايلات...

http://www.bahrainmenus.com/place/221/Moti_Mahal.html

- بالنسبة عن شارع البديع نفس اللي الكبري اللي قلت لج عنه تنزلين تحته وعلى الدوار تاخذين يسار ومن بعدها تمشين سيده (على طول) بيكون مطعم برجر لاند على يمينج تروحين سيده (على طول) بتلاقين الدوار الأول بعد تروحين سيده والدوار الثاني سيده ومن بعدها راح يكون على يدج اليسار مكان فيه مجموعة من الكوفي شوبات والمطاعم (بس نصيحتي لج لا تروحين هذا الشارع إلا في النهار لأن في الليل في بعض الأحيان يكون غير آمن)

- بس عندي اقتراح لج روحي فيلا ماما في سار يعني وانتي في الهايوي كأنج بتروحين حق جسر الملك فهد قبل اللفه اللي توديج حق الجسر في لفه مكتوب عليها سار تاخذينها على طول وفي نهاية الشارع تاخذين يمين وفي علامة مكتوب سينما سار تروحين جهة السينمات بيكون المطعم قريب منها، وهذا الرابط راح يساعدج:

http://www.bahrainipreneur.com/2012/...lla-mamas.html

- وأخيراً بالنسبة عن الحيه بيه إللي يقطونها البنات والأولاد في ليلة عيد الأضحي عندنا في المحرق كل سنة يسوون احتفالية بهذه المناسبة عادةً تكون في كورنيش الغوص الموجود في المحرق بالقرب من جسر الشيخ حمد (الجسر القديم) بس بتأكد إذا في السنة هذي الاحتفالية أو لا وراح أخبرج إن شاء الله..

وحياج الله في ديرتي وديرتج البحرين

فالها بقوة اخوي
الحين يوم انك تترجم الكلمات اللي اعرفها
وتخلي كلمة ابتلي ؟؟؟؟ لا وكل شوي ابتلي ابتلي ياخي صعبه ما فهمتها هههههه والله جد شنو يعني
يعطيك العافيه على كل المطاعم اللي ذكرتها
شارع الشباب اعرفه اللي بالجفير ومسويه منه تقاريري الاخيره
المهم بنجرب الهولي اذا الله راد

mahmeed99
شكرااا كثيرااا للوصف
ويعطيك الف عافية على النصايح عن المطاعم والاماكن
وبالانتظار أخبار الحية ان شاءالله

حيا الله ام حسين في البحرين
ما قصروا الشباب كفوا ووفوا بس بزيد كم نقطه عليهم
لنترز مميز جدا ويستحق التحربه وفيه له فرع في العدليه المنطقه الى فيها كوكوز توه يديد وديكوراته هنديه بحته تعيشون الاجواء بس عيبه انه فيه شرب وفي الليل بالذات يصير شي استغفر الله ما ينوصف
العدليه فيها مطاعم وايد وكلها ممتازه عندج كوكوز ليلوز سالاد بوتيك باشن ميت كو وغيرهم بس راح تكوووون فل في فترة العيد حاولو تروحون مبجر
بخصوص الحيه بيه فهي من العادات الشعبيه في البحرين واظن معظم دول الخليج باختلاف مسمياتها
اول يوم العيد في اي بحر تمرون يمه بتلقون يهال واقفين يقطونها
بخصوص احتفال رسمي ما عندي فكره

وحياكم في البحرين من الموبايل

هههههههههه
ابتلي يابعد راسي يعني حطي رجلك سييييييييييييييييده ابتلي يعني ادعسي بتله يعني دعسه سيييييييييييييييييييييييييييييييييده قمت اضحك والله .....بالكويتي ماعرف معناها بس يعني سيده يسيده... بدون لف يمين ولا يسسار....اتمنى اوصلت.... بس توبليرون تكفين لاتنسين الخبز الهولي بي رايك.....

يعطيييج العافيه فاندا
بس انا خابرتها رابع مادري ثالث يوم العيد الحية بية
طيب الاقي احد يبيعها والا لازم انا ازرع حيتي ههههههه ابي شي جاهز خخخ
يعطيكم لعافيه على هالموروث الجمييل
اما كوكوز رايحه له بس اخاف اضيع الطريق
وان شاءالله بنبتل على قولة فاااالها بقوة
نبتل يعني روح سيدا
امسك الخط
لايمين ولا يسار
اوكي فهمتها اخيرااا
نقول حق حسين يبتل الله كريم

اهلين وسهلين مشرفتنا توبليرون

للتذكير ان شاء الله اذا حجزكم في رامي جراند

فيه 5 مطاعم

وترى فيه مطعم هندي
واذا حابه تغيرييين مايمنع


اخوك : http://www.arabtravelersforum.com/user364264/

أختي توبليرون
السموحه ما قدرت أرد عليج عن الحيه بيه لأن كنت مريض
على العموم الحيه بيه متوفره في معظم أماكن بيع الخضره على نص دينار بتلاقينها في المحرق وفي الرفاع الشرقي بكثره
بالنسبة عن الاحتفال محافظة المحرق ما أعلانوا عن احتفالية هذي السنة بس على حسب علمي في كورنيش الغوص وفي عند قلعة عراد
وفي في منطقة الزلاق العضو البلدي هناك مسوي احتفالية صغيرة عند ساحل الزلاق
بعد على حسب ما سمعت فيه احتفالية في الرفاع بمنطقة الحنينية قريبة من قلعة الرفاع

راح تكون بكره الاثنين يوم الوقفة بس ما أدري الساعة جم

إن شاء أكون أفدتج ببعض المعلومات

وحياج الله في ديرتي وديرتج البحرين

الحيه بيه بتلاقينها في محلات بيع الخضار واوقات بتلاقين عند الاشارات اسيويين يبيعونها
ومثل ما قلت فهي عاده شعبيه مرتبطه بعيد الاضحى يعني اهي تكون اضحيه الاطفال في هالعيد فمالها وقت معين ناس اول يوم وناس ثاني او ثالث ناس تروح الصبح وناس العصر من الموبايل

تسلموووون يا أهل البحرين الكرام
كانت سفرتنا حلووووة
بس حسافه الحية بية ما قدرنا نروح
لان تعرفون عوايل وعلى ما نتجمع الا الوقت رايح وكل عايله ببالها شي
ان شاءالله نشوف الحيه بيه من تقاريركم

اما اغلب اللي قلتوا لي عليه رحنا له ومشكورين على النصايح
ترقبوا تقريري

انشالله ساعدوك الاخوان

الحمدلله اي والله ما قصروا الاخوان والخوات من اهل البحرين
يعطيك العافيه