الموضوع: رايحين لبنان وسوريا وخاييفة من ؟؟؟؟

السلام عليكم
انا وزوجي واعيالي رايحين سوريا عن طريق البر من الشرقية وانا ميتة من الخوف من الطريق ومتخوفة اكثر من سوريا ولبنان
اول مرة اروح سوريا ماادري عن طبيعة البلد كيف الحياة فيها كيف تعاملهم انا قريت كثير بالمنتدى بس ما توصلت للي ابية كيف اول ما نوصل وين نروح دمشق ولا بلودان ولا الزبداني ترى ماادري عن هالاماكن بس قريتها بالمنتدى ؟؟؟
وكيف نحجز شقة او فندق او فيلا عن طريق مكتب ولا ايش الطبخة عندهم وياليت الي عندهم شقق موثوق فيها للعائلات مافيها حركات بايخة ويكون سعرها زين او فندق يكون مكانة زين ورخيص يعني ابية وسط زحمة وناس نو موحش وبعيد عن العرب ويصلح للعائلات . للحين ما خلصت مو منها من الخوف
المهم طيب اول ما نوصل ونرتاح وين نروح الي عنده خبرة ياليت ترتبون برنامج نروح علية وبالاسماء والاماكن وانا اهم شي عندي السوق....
لا تخلوووني امانه تردون علي بسرعة انتظركم
وراح اكتب نفس الموضوع في بوابة لبنان الي عندة معلومات عن لبنان يلحقني هناك بااااي

مواضيع عشوائيه ممكن تكون تعجبك اخترناها لك:

• ما هو افضل مكان للتمركز بالشمال
• استفساااار مهم وسريع وياليت الاجابة
• طالب الفزعــة منــكم
• هل اجد ثلوج بسوريا بعيد الاضحى؟
• سعر صرف الليره
• في المسجد النوري بحمص تقام صلاة الظهر بعد صلاة الجمعة حكم ذلك ؟
• يعفور وبيت جن وبـأبوالشهيدين راح أجن قصة مصورة
• أصحاب الملاهي الليلية في مدينة التل متعاملين مع عصابة سرقة
• طلب عاجل من الخبراء في سوريا
• قسطل معافمصيف رائع بين سد بلوران و كسبتقرير مصور
• عيون التمساح جايب لك عيدية خاصة من نفس الفصيلة أرجو قبولها
• تفصيل الطريق الؤدي الى سوريا
• ارجو التوجيه من خبراء سوريا
• ممكن سوأل عن القوروبات الي لبنان وانا بسوريا
• صور نادرة لدمشق بالقرن التاسع عشر
• مهم مهم الجميع يدخل ويدلي بدلوه
• رحلة مفتوحة الي سوريا
• استفسار مهم جدا
• استفسار للخبراء بسوريا
• العمله السوريه

أختي لوحة غريبة أنا سبق وقلت أن دمشق مو حقت عوائل حقت يوم واحد تسوق وبس والريف الدمشقي بلودان والزبداني هو المكان المفضل للعوائل والخليجيين فيه بالهبل لتوفر الطبيعة والمطاعم بانواعها والمنطقة صغيرة وتنعرف من أول يوم وبخصوص الأستئجار أنا افضل عدم الذهاب للمكاتب السياحيه لرفعهم الأسعار وتحطيم الشخص بقولهم الشقق قليله يا تلحق يا ماتلحق وأشكال من أمور النصب المهم لدي طريقه وهي أنا تسألو صاحب بقاله أوعمال بوفيه أو مطعم وخلافه وأكيد راح يدلوكم على شقه بس أرجو تنتبهوا ما تكون بمنطقه معزولة أو جوا حارة أوأو الأفضل على طريق رئيسي وبالنسبة لتحديد الأماكن السياحية اعملوا بمبدء (طقها وألحقها)والتسوق معروف في دمشق سوق الحميدية وبالتوفيق

انا انصح تسكنون فندق القصر الذهبي في دمشق اول ماتصلون لانكم بتاصلون تعبانين والفندق حليو واسعاره معقوله وهو بالبحصه وجنب جسر فكتوريا وارجعي لموضوع اخونا الهروي مصور الفندق وافضل شى انكم تعملون حجز قبل تاصلون علشان ماتوهقون لان الآن موسم وكل شى مليان واذا حجزتم اول يومين من الشرقيه افضل لكم.
وتورن شقه وانتم مرتاحين ولاتحسين انكم مظغوطين.
وفيه خيار ثاني وانتم رايحين لزبداني تلقون فيه فندق مستواه متوسط لاكن تاخذون يم اويومين حتى تدبرون سكن ممتاز.
بانسبه للبنان فيه رحلات سياحيه من مكاتب سياحيه بالزبداني ودمشق اسألوا عن المكتب الزين ولاتروحون اي مكتب ترى بعضها خدماتهم مهيب زينه ومواعيدعم مهيب مضبوطه خذوا بكج كامل من هناك ارخص واحسن وتروحين وانتم على خطوه ثابته والله يوفكم.

انا انصح تروحون دولة ثانية

لاتستعجلون لأن الوضع في لبنان وسوريا غير مطمئن والصورة غير واضحة وكثير من السياح في سوريا راجعين وهذا الشيء لوحظ في ازدحام مكرز نصيب وجابر الحدودي للي راجعين من سوريا عكس الداخلين مافيه زحمة

تريثو والوضع غير مطمئن خصوصا مع التصعيد الاخير

انتظرى اختى الكريمه شويه حتى تهدي الاوضاع

باي باي سوريا لبنان ابتعدوا عنها الكيان الصهيوني خرب كل شيء

الوضع يخوف وامريكا تحرض اسرائيل تضرب سوريا عشان تقوم امريكا على سوريا وتلقاها حجة0000

انا كنت ابسافر الاربعاء هذا بس انضربت لبنان وتأجلت سفرتنا مع ربعي000 ولاتنسين اختي الكريمة ان اللبنانيين أغلبهم نزلوا على دمشق يعني الأجارات ناااار مرة وحتى الشقق صغيرة وأجارها باليوم هذا اذا لقيتوها فاضية مثل أجار الغرفة بفندق خمس نجوم في باريس0000ولاتنسين ان العراقيين كثار في سوريا
يعني ماشاءالله سوريا مستضيفة دولتين000
اصبروا اسبوعين وشوفوا الوضع بعدين قرروا لاتستعجلون بعدين تندمون ويهون زوجك ويحرم السفر طول عمره000 الاجازة طويلة وبعدين اذا الله ماكتب يمدحون مكة اخذي عمرة فيها تسوا الدنيا ومافيها000

في التأني السلامة

تعالوا مكة ياهوه زحمة وحر وقلق وجبال وخيلان والشام راحة عليها هذا الصيف

حتى لو قبل الضربة اصرفوا نظر عن هذه البلاد

اقضبي ارضك احسن لك ولعيالك هالايام

الوضع في لبنان حرب ماهو لعبة بلايستيشن وادعو بالتصر للمسلمين والدل لاعدا الاسلام

هلا اخواني وبالي ردو علي كلهم لكم الف تحية مني
اليوم رجعنا من سوريا صراحة رحلة حلووة وومممتعه بس فيها شي من الخوف..
انا ماشفت ردودكم الا بعد ما جيت من سوريا لاني انشغلت قبل لااروح ولما رحت هناك مااعرفت كيف اتصل بالانترنت مع اني ماخذة الاب توب معي بس ماعرفت طريقة لشبك
المهم الطريق كان طويييييييييييييييييييييييييييييييييييييييييييييييي ييل لو اتم لي بكرة مااوفية حقة وانا اقول طويل بس فية شوي متعة لتعرف على الاماكن الجديدة قعدنا يوم كامل بالسيارة لما مشينا يوم الاربعاء كان اول يوم لضربة لبنان بس كنت حاطة ببالي انها ضربة عادية ومشينا كل ما مشينا كم ساعة سمعنا خبر اقوى لما وصلنا الحدود ضربو المطار قلنا لا اسرائيل ناوية نيه قشرى هالمرة وقعدنا محتارين نرجع ولا لا وزوجي مصر ولزم الا نكمل لا وبعد ندخل لبنان المهم وصلنا الفجر الساعة 5 وعلى طول التكسي ودانا سهل الزبداني وسكنا شقة صراحة حلوووة ومكانها حلو وشرحة وصاحبها يخاف ربة ولا يأجرها على ناس مو كويسيين ودايم يشغل القران ........المهم قضينا رحلتنا سبع ايام تقريبا في تمشية مطاعم واسواق مثل سوق الحمراء الصالحية الشهداء والحميدية ورحنا مجمعات تاون سنتر حلو والثاني ستي مول حليو عادي ورحنا مرتين الحدود البنانية نشوف الناس وهم نازحين بس هذا رحلتنا كلها بس كان الخوف مسيطر علي بشكل فضييع فكنت مااخلي زوجي يروح اماكن ما فيها ناس خفت يغلط وندخل اماكن عسكرية ولا اماكن تخوف صراحة سوريا بشكل عام حلوة....

الحمد لله على السلامة وكويس انك ما شغتي الردود قبل لا تروحين لان كل الشباب متخوفين من الوضع هناك ولو قريتي الردود كان ما رحتي ...


بالنسبة للسكن في الزبداني كم كلف لليوم الواحد من ليرة؟؟

هلا بدبد والله كلفتنا ما يقرب خمسة الاف ليرة باليوم ..

حمدالله على السلامه

الله يسلمك اخوي

هلا بالاخت غريبه والحمدلله على السلامه وحنا مثلكم رحلتنا لبنان وسوريا وبعد الضرب الله يهدهم ويمحاهم هاليهود..رجعنا بلودان والزبداني من لبنان يمكن شفتونا عالحدود ؟؟؟ بس والحمد لله انبسطنا بسوريا واحسن شقه خذناها ب3000 ليره فقط لان المساومه مهمه بهالاماكن ورجعنا بسلامة الله وحفظه