مشت كل الاجراءات بيسر وسهوله ، وعقب ماخلصنا سرنا نستلم شنطنا
المقلب الثاني 
بعد ما استلمنا الشنط ، سألني بوعيسى :
هاي كل شنطنا ؟
قلتله لا بعد ناقصه شنطة الاولاد
انتظرنا وانتظرنا 
الناس اللي معانا روحوا ونحن نننتظر ، وعقب مال الأمن يونا واسألونا اذا عندنا مشكله
خبرناهم انه شنطة وحده ما أستلمناها
طلبوا منا الاستكرات الخاصه بالشنط ، واللي عطتنا ياهم اللي ع الكاونتر في مطار دبي عقب ماسلمناها الشنط
وتفاجأنا أنه استكر واحد ناقص 
وهو خاص بشنطة الأولاد .. خذانا المسؤول ع مكتب عشان نقدم بلاغ ع اختفاء الشنطه ، وعطيناهم كل البيانات المطلوبه ووصف للشنطه
واخذنا منهم ورقه وهي المرجع وفيها رقم تيلفون عشان نتابع وياهم ، وطلعنا من المطار بدون شنطة عيالي 
وايد تضايقنا وتنكدنا ومب عارفين كيف بنتصرف ولا شو لازم نسوي
أنا سويت اتصالاتي للامارات عشان يراجعون مطار دبي اذا في خبر عن الشنطه
طلعنا من المطار بعد ما تأخرنا ، والسائق اللي تابع لطيران الامارات عيز وهو ينتظرنا ...
كانوا مجهزين لنا سياره فان أم 9 راكب ، توكلنا ع الله وأتجهنا لبادن بادن واللي تبعد تقريبا ساعتين عن مطار فرانكفورت
هام جدا
بعد ماتسلمون شنطكم عند الكاونتر اتأكدوا دايما من عدد الشنط اللي سلمتوهم وعدد الاستكرات الخاصه بالشنط
عشان مايصيرلكم اللي صارلنا
كيف انحلت مشكلتنا
* الحمدالله اني ماخذه لدودي ولدي الصغير شنطه صغيره في الطياره فيها غيار واحد ( ملابس داخليه ولبس طلعه )
* اول ماوصلنا سكنا طلعت أنا وعيسى وركبنا الباص وسرنا سنتر المدينه عشان نشتري غيارات لعيسى وبجامه لدودي حق يوم واحد
لين ماتتضح الصوره ، وبوعيسى والبنات فتحوا الشنط ورتبوا الاغراض
* بالليل غسلت لهم الغيارات ولبسهم حق ثاني يوم
* اليوم الثاني بلغونا في المطار انه الشنطه في دبي وما انشحنت أصلا ، وما أدري كيف صار جذي وبلغونا انه اليوم بتوصل الشنطه وانتظرنا ولكن ماوصلت الا اليوم اللي عقبه
يعني تموا عيالي بدون لبسهم يومين واليوم الثالث وصلوها لنا لين الفندق
وماتتصورون كيف كانت فرحتنا 
وتفاجأنا انه كاسرين قفل الشنطه
اعتقد فتشوها
مواضيع عشوائيه ممكن تكون تعجبك اخترناها لك:
رد مع اقتباس
المفضلات