الموضوع: «الـــمـــجـــلـــس الـــنـــيـــوزلـــنـــدي»

بسم الله الرحمن الرحيم

السلام عليكم ورحمة الله وبركاته

أحبتنا أعضاء وزوار البوابة البوابه النيوزيلنديه الكرام، أسعد الله جميع أوقاتكم بكل خير

نطرح بين أيديكم مجلسكم المجلس النيوزيلندي

والذي نطمح أن يكون خير معين لأخواننا المسافرين إلى الأراضي النيوزيلنديه

ونتمنى أن يتم فيه التقارب بين الأعضاء والتواصل فيما بينهم

الهدف من المجلس

يهدف المجلس في المقام الأول على معرفة جديد نيوزلندا .. والتواصل بين الأعضاء في أمور السفر إلى نيوزلندا

مثل تواريخ سفرهم .. تجهيزاتهم .. مشكلاتهم .. ولا مانع من الدردشات الجانبية بين الأعضاء

ويحق للمشرفين الحذف أو التعديل على أي دردشة تتعدى حدود الأدب أو الحد المسموح به.

أيضاً من أهداف المجلس طرح تقارير ومواضيع رواد البوابة النيوزلندية في البوابات الأخرى ليطلع عليها الأعضاء

في المجلس نرحب بأي نقد أو اقتراح الهدف منه تطوير البوابة .. وبإذن الله سوف نحاول جاهدين تلبية ماتريدون

( على قدر الاستطاعة )

شروط المشاركة في المجلس

1- يمنع وضع الإيميلات وأرقاام الهواتف.

2 - يمنع طرح اسماء المكاتب السياحية وطرق التواصل معها.

3 - الالتزام بأدب الحوار .. الحق مكفول للجميع بطرح وجهة نظره.

ولا ننسى كفارة المجلس

(( سبحانك اللهم وبحمدك ، أشهد أن لا إله إلا أنت أستغفرك وأتوب إليك ))

محبـيـكـم

الــمــظــلـــوم

أسامة العتيبي

مواضيع عشوائيه ممكن تكون تعجبك اخترناها لك:

• اي المدينتين افضل لدراسه اللغه دنيندن أو كرايستشيرج ؟
• إستفسارات لدراسة اللغة بنيوزلندا عدة إستفسارات ؟
• بالنسبه لموضوع الشتااااء بنيوزلندا
• من له خبرة في مدينة نابيير بنيوزلندا
• تصحيح معلواتي
• اجرءات المتبعة في مطار نيوزلندا مهم
• كوينزتاون ؟؟
• نيوزلندا قد تكون أغلى من امريكا خلونا نتناقش
• مساافر للدراسه ارجوا المساعده
• سؤال عن جامعات نيوزلندا رجاء المساعد ضروري
• اول مرة راااح اسافر خارج السعودية انا في مشكلة سااعدووني
• زلزال يضرب كرايس شيرش انا واخوانكم السعوديين
• سؤال للي سافرو لنيوزلندا
• بليززززززززززز يا شباب أبي خدمه ضروري جدآ
• تبي لغه ومحتار وين تسجل في نيوزلندا تفضل
• استفسار عن الخطوط الإماراتية
• مجمعات مونت روسكل السكنيه
• مساعده يا شباب اوكلند
• الضمان المالي
• كيـف يتـم إستخراج الفيـزا السياحيـة ؟

يالله على بركة الله

وما أوصيكم بالمواضيع الطيبه .. والحوار المفيد .. والمعلومات اللي تفيد المسافر إلى نيوزلندا

تفضلوا

اللي ما تعجبه قهوة البدوي المظلوم

يتفضل يختار قهوته



تحيتي‘ . . للجميع

بارك الله فيكم ..

بالنسبة لي وصولي إلى أوكلاند يوم الأثنين الساعة 10:30 صباحاً ... على الطيران السنغافوري ...

الرحلة عبارة عن ( دراسة لغة + إستجمام + إستمتاع ) ... تعرف على مجتمع أخر ...

لمدة ( 6 ) أسابيع ... إن شاء الله ...

بما إني راح أصل صباح يوم الأثنين .... جالس ألفلف النت ... أبحث عن غرفة في فندق لمدة يوم واحد ..

نريح فيه بعد الرحلة الطويلة .. لكن على كثر لفلفتي ... لقيت أغلب الموجود .... حمام مشترك ... أو مكان دش ... بس ...

إن شاء الله نلقى مبتغانا ... بس نزيد اللفلفه شوي ,,,

بسم الله الرحمن الرحيم

رحلتي الى مدينه روتروا 24 جون للدراسه بالدرجه الاولى وتقويت لغتي اللي تقتصر على كمن كلمه .. تغيير جو .. اعداد للمستقبل

المده شهرين الرجوع بيوم 20 اوغست رمضان .. سبب اختياري روتروا اني الكل نصحني بالابتعاد عن اوكلند تعبت عشان اختار هالمدينه اخترتها لوجود قريب لي هناك نصحني بالمعهد اللي هو فيه ولا شاورت على طول حجزت مره وحده ..

انا , عندي تفكير قوي انّي في خلال دراستي فالمعهد اللي حجزت فيه , اني ادوّر قريه مناسبة بمساعدة الطلاب السعوديين اللي هناك ان وجدت ان شا الله, و ادرس فيها الشهر الثاني و يمكن ازيد ان ارتحت ^^"

بالتوفيق للجميع

بسم الله الرحمن الرحيم اللهم صلى على محمد وعلى آل محمد

رحلتي الى نيوزلندا 17 سبتمبر دراسة لمدة سته شهور ان شاء الله
اذا قررت بروح نيوزلندا وفي العودة بأخذ لفة على الصين من اجل شراء الهدايا ووالتسوق
بس الى الان لم يتأكد شيء

الهدف من السفر :- الدراسة والسياحة والتسوق

المعهد :- الى الان ادور على معهد معتمد من وزارة التعليم العالي في قرية او مدينة صغيره وتهت من تقارير الاعضاء كل شوي اقول بس وجدت ضالتي القاء موضوع ثاني اغير اقول بس هذا المدينة اللي تناسبني ههههههههههههههه

يالله حي الشباب عايش دور المجلس

أسامه

شرط أنك تدور الدله والتمر بأمريكا .. وخل ستاربكس ينفعك


||


الله يوفقكم وتروحون وترجعون بالسلامه وأنتم محققين أهدافكم

أهم شي أنكم تحسنون صورتنا هناك



noo924

دامك بتقعد يوم واحد فلا تدقق واجد بالسكن أهم شي تكون بغرفة خاصة ونظيفه


يوسف

فيه معهد بمدينه مدري قريه شمال أوكلند يقال لها Warkworth

وهذا رابط المعهد

http://wisel.co.nz/

ماعندي أي معلومة عن المعهد .. لكن من فرفرتي حصلته

مسيهم .. صبحهم الله بكل خير

ارررحبي يا علوم نيوزيلندا .. احس ان الكل بيستفيد من هالموضوع

والله يسلم اعماركم على الترابط والتناصح وخدمة بعض


وأنا ان شاء الله رحلتي قبل الرمضان بأسبوع تقريباً
وحتى بدايات أكتوبر .. تقريباً 70 يوم
عن طريق الخطوط السنغفورية

المعهد ان شاء الله هين امره هو والعائلة

لكن القرار مابعد اتخذته بأني أسكن بمدينة أو قرية ..

أوكلاند شلتها من راسي من بعد كثير من النصائح

لكن خوفي من القرى ما أدري إذا كان لها مواصلات سهلة للمدن بحيث أقدر كل نهاية أسبوع أزور مدينة .. ولا أدري عن سهولة المواصلات بين المدن والقرى ؟

وبالنسبة للمصاريف المعهد والعائلة ... هل فيه فرق بين معاهد المدينة و القرية ؟؟


وبالنسبة للي بيوافقون رمضان بينوزيلندا .. كيف أقدر أشحن كمية تمر لتجمعات الإفطار الجماعي
وبالنسبة للشتاء .. كيف شتاهم .. مثلنا هبايب وجفاف ولازم تدق لثمة والعظام ترجف

ما شاء الله تبارك الله ..
الله يسلمكم حبايبنا..
هذا الموضوع راح يفك أزمة ..
المظلوووم .. أســـامة..
الله يبيض وجيهكم..
كذا راح يكون الواحد مرتبط مسنتر قدام الجهاز..

الله الله الله والله بدا الشغل عسى الله يوفقكم

شباب الله يحفظكم إيش رايكم أختار أي رحله فيهم

الرحلة الأولى : تطلع من دبي الساعة 8 مساءً وتوصل سنغافورة الساعة 7.30 الصباح وتطلع من سنغافورة الساعة 8.45 الصباح وتوصل أوكلاند الساعة 11.25 مساءً أي الإنتظار في مطار سنغافورة ( ساعة وربع )

الرحلة الثانية : طلع من دبي الساعة 11.45 مساءً وتوصل سنغافورة الساعة 11.15 الصباح وتطلع من سنغافورة الساعة 9.05 مساءً وتوصل أوكلاند الساعة 11.45 صباحاً أي الإنتظار في مطار سنغافورة ( تقريباً 10 ساعات )

ومشكورين على هالمجلس

المظلوم ,

تسلم ع ذا المعهد , رح احطّه بعين الاعتبار ’ بس اوّل اخلّص من ذا المعهد اللي سجلت فيه ,
لانه خلصت كل شي معهم و حت العايله اليوم جاتني تفاصيلها ,
ان شا الله بعد ما نبدا الدراسه , نشوف الاوضاع , وان ما صلحت , شكل البقيّه بتكون في المعهد اللي حطّيته ,

تسلم اخوي ,


خيالك ..

يا رجّال بتتعب مثل ما تعبت , و فالاخير قلت يا رجال خذ ارب معهد فوجهك و ريّح بالك ,
لان اللي بيتابع كلام كثير من فلان و فلان و فلان بيضيع

قليل من وجهات النظر اللي تكون متوافقه , الاغلب تكون مختلفه .

الله يوفّقك ,


من ناحية اسئلتك , طبعا لاني ما بعد رحت , فـ ما ادري

لكن ببالي كوم اسئلة عن الاشياء اللي آخذها معي و الاشيا المسموح و اللي ممنوع و غيره
لكن ودّي اخليها ليما قبل السفر , يعني بعد اسبوعين , بـ اجلس افرفر ان لقيت اجوبتها ولا بسئل هنا ,


....

دلّة رسلان ,

حلو ان الخطوط الاماراتيه صارت تخلّي الترانزيت بـ مكان غير استراليا

لكن مهما كان مكان الترانزيت ,
نصيحتي لك , دوّر الرحلات اللي ترانزيتها قليل مرة

بالتوفيق

^
أكيد الي بلا إنتظار طويل أفضلك

بس غريبة انا عجزت ألقى رحلة على السنغفورية بدون إنتظار أقل من 11 ساعه
كل الرحلات الي بالأيام القريبه لوقت روحتي فيها ترانزيت 11 ساعه
والرجعه 17 ساعه

انت رحلتك بشهر جولاي ؟

ارحب يا يوسف وعسى الله يوفقك
وان احتجت شي وحنا هناك ابشر وانا اخيك
و العيد لزوم نسوي عيد العرب النيوزيلنديون

موضوع رائع وجاي في وقت ممتاز
سبحان الله زي هذا الوقت قبل سنة كنت ادور في المنتدى وأسأل عن نيوزلندا
والان انا جاهز في الرد على أي اسئلة عنها

ههههههه,

ع اي اساس انا قلت الخطوط الاماراتيه مدري , وانا ارد ع "دلة رسلان"
ممكن عشاني بروح عليها خخخخ

تو يجي ع بالي انه دام الترانزينت في سنغافورة , في الغالب رح تكون السنغافورية,
ع العموم مثل ما قلنا لك , و لانه اللي اعرفه انهم ما يعطونك فندق تريّح فيه لا كان الترانزيت وقته طويل, يعني يا تريّح في العراء :/ او تأجّر فندق ,

الله يوفّقك ,

...............


funman

ما نستغني عن خبراتكم ياخوي ,

خصوصاً اللي مثلي عليميّة :/

بالتوفيق للجميع

اخوي "خيالك"

تسلم تسلم , كلّك خير و بركه,

و دام انّي بروح قبلك , انت اللي لامن بغيت شي , انا بالخدمه

بالتوفيق

الله يسلم عمرك يا يوسف و ماتقصر يالغالي
ونبي سلامتك نفداك




*
*
*


خيالك يا مهرتي راحل .. يعلن حالة الطوارئ القصوى

انا منب طالب خدمه تدورون لي معهد ولا من هالطلبات الصعبه وخلاااااااااص رتبت كل شي حتى اسامي الشوارع والمدن والقرى و .. و .. وكل شي

بس انا الحين طايح على حشتي بمشكلة كبيرة و توهيقه محترمه

قعدت اتميلح تو وقلت بحجز .. وطق طق بموقع الخطوط السنغفوريه .. وما دريت الا البنك يرسل رساله .. تمت عملية شراء على بطاقتك الإئتمانية فيزا .. من السنغفوريه

وانبسطت رحت للوالدة ابشرها .. بس حسيت من نظراتها انها حاقده علي هع ماعمري غبت اكثر من عشر ايام

وكأنها تقول طيب خير ياطير فرح انت ووجهك انك تبي تروح لنيوزيلندا


المهم رجعت للجهاز أجر أذيال التحطيم ووجهي الي طاح .. ويوم قابلت الجهاز قلت بتأكد واحفظ بيانات الحجز

مادريت الا ان الترانزيت مدته عشررررررررررررررررررين ساعه ..

وش رايكم .. بعطيكم درس

الأول .. فتحوا عيونكم زين
والثاني خوذوها سهالات مثلي الحين .. عقب ماقمت اهاوش عمري صرت راضي ومتقبل انطق بسنغفوره عشرين ساعه
وياليها من عشرررررررررري ياهي بالحيل صعبه

.. من خلال تجارربكم .. كم تتوقعون أسعار الفنادق بالمطار
وكيف أحصل على فيزا واخذلي فرتين بسنغفورا ؟؟



الله لايهينكم أقربووووووووووووووو فأنا محتاج قربكم

المشاركة الأصلية كتبت بواسطة خيالك يامهرتي راحل!
http://www.arabtravelersforum.com/tr...0/#post5320270

مسيهم .. صبحهم الله بكل خير

صباحك ممطر بها الجو الرايق..

ارررحبي يا علوم نيوزيلندا .. احس ان الكل بيستفيد من هالموضوع

الموضوع مكمل لبقية التقارير ان شالله...
والله يسلم اعماركم على الترابط والتناصح وخدمة بعض

فعلاً يستحقون الشكر بعد الله ,,, " أسامة ’’ المظلوم "

وأنا ان شاء الله رحلتي قبل الرمضان بأسبوع تقريباً
وحتى بدايات أكتوبر .. تقريباً 70 يوم
عن طريق الخطوط السنغفورية

ماشالله , تصل بالسلامة ....
المعهد ان شاء الله هين امره هو والعائلة

لكن القرار مابعد اتخذته بأني أسكن بمدينة أو قرية ..

أوكلاند شلتها من راسي من بعد كثير من النصائح

المدن الكبيرة ميزتهاا كثرة الناس خصوصاً اذا انت اجتماعي , تحب صخب المدن , العيب الوحيد هو انك اكثر الاوقات بتحس نفسك في تحلية جدة والرياض ,,,,, القرى فللله تكوين علاقات والاميز انها تستمر لان صغيرة وتعاملك بفرض على الغالبية احترامك والتحدث معك لتقوية لغتك , طبعاً انا من مؤيدين القرى او المدن الصغينونة .

لكن خوفي من القرى ما أدري إذا كان لها مواصلات سهلة للمدن بحيث أقدر كل نهاية أسبوع أزور مدينة .. ولا أدري عن سهولة المواصلات بين المدن والقرى ؟

لا لا لا استفسارك هذا لاتفكر فيه بنووووب بنووووب , المواصلات متوفرة سواء داخل القرية او اذا تبي تتجول خارجهااااا , طبعاً مثل مالجميع عارف فيه مكاتب في كل المدن والقرى تسمى الانفرميشن سنتر " يرحبون ويمنون خدمتك ويوضوحون لك اي شي تحتاجه " بصراحة ينحسدون على هالخدمات والرقي في التعامل " بعض المرارير بتعتقد انهم مسلمين بلا اسلام من تعاملهم "
وبالنسبة للمصاريف المعهد والعائلة ... هل فيه فرق بين معاهد المدينة و القرية ؟؟

اعتقد ان الفرق بسيط اذا فيه فرق .... بالنسبة لي العائلة 190 دولار المعهد 350 دولار والباقي اختلف العلماء في ذلك .
وبالنسبة للي بيوافقون رمضان بينوزيلندا .. كيف أقدر أشحن كمية تمر لتجمعات الإفطار الجماعي

رمضان الله يشرفه بنجربة هنا لأول مررة والامور تساهيل ان شالله.
وبالنسبة للشتاء .. كيف شتاهم .. مثلنا هبايب وجفاف ولازم تدق لثمة والعظام ترجف



الان على بدايته تقريباً ومتقلب الجو يوم حر يوم برد يوم حر وشمس ومطر يوم برد ورياح ومطر , لاكن كل ما اتجهت نحو الجنوب اشتد البرد " عليك باللملابس الثقلية خصوصاً ان موعد جيتك برررد "

تقدر تروح لمكتب السنغافورية وتطلب منهم يعطونك غرفة بفندق المطار لانك الترانزيت اكثر من تسع ساعات , خلك نشبة عندهم اقل شي بيعطونك مكان للراحة خلال الترانزيت ,

الفيزا ماعندي علم فيها لاكن اطمر عند بوابتهم وتلاقي الجواب الكافي ان شالله.

موفق ,,

دلة رسلان

بالنسبة لحالتك .. انصحك إذا كان فيه أحد بيستقبلك خذ الأقل ساعات ترانزيت (لأن وصولك بيكون بالليل وممكن تتوهق شوي بدون أحد يستقبلك)

واذا مافيه أحد بيستقبلك .. خذ الترانزيت الأطول والوصول بيكون بدري فيمديك تدبر عمرك



خيالك

هههههههههههههههههههههههه

شف هذا رابط فندق المطار

http://www.athmg.com/index.htm

بالنسبة للفيزة .. قرأت أن أمرها سهل .. شف بوابة سنغافوره بيفيدونك أكثر


||


تروني رديت على اللي تذكرته من اللي قريت .. الذاكره ميح نسأل الله السلامه خخخ


||


http://www.almlf.com

واناكا أمس نزل على جبالها ثلج بيروح يصيح خخخ

الأخ القدير \ شرق و شرق
الله يجمل احوالك يالوافي وعسى الله يوفقك ويسهل امرك








تقدر تروح لمكتب السنغافورية وتطلب منهم يعطونك غرفة بفندق المطار لانك الترانزيت اكثر من تسع ساعات , خلك نشبة عندهم اقل شي بيعطونك مكان للراحة خلال الترانزيت ,



تقصد مكتبهم هنا بالسعودية ولا بالمطار وقت الرحلة لاوصلت انشبلهم ؟؟

عجزت ألقى مكتبهم بالرياض
لكن أعتقد لهم مكتب بجدة


الأخ العزيز \ المظلوم
تسلم يالسنافي وماقصرت الله يعطيك العافية



تحيتي وجلّ إمتناني لكرم أخلاقكم

http://www.singaporeair.com/saa/en_U...fo/contact.jsp

هذا الرابط فيه عنوانيهم بالسعودية من الان شيك معهم " قبل الرحلة اكيد " , وعليك الباقي يابطل ,

موفق ,

تسلم تسلم يالغالي
وما أقول الا الله يوفقك وييّسـر أمرك



جنات من الورد لروحك الطيبة

حيا الله الجميع .... كلن بنكه ورقم عضويته

والله يذكرك بالخير يالمجلس النيوزيلندي على ايام المشرف احمد مسوي قديم في البوابه

والله يسقي ايام المحشات اللي قامت بين حساس والمظلوم وانواع الذب على السمان من فصيله ذوات الدم الخفيف

المظلوم ... وش تعني لك هذي الصوره ...



( هذي صوره للمظلوم كان حساس راسمها له في خياله الحالم قبل يقابله فيس تو فيس ... ههههههه )

والله ييسر ونحسن تواصلنا مع البوابه واعضائها وروادها في هذا الموضوع وبقيه مواضيع البوابه مايحس انه مقصر مع البوابه واعضائها ابد

واحلى مايك للي بعدي ...

لحظه ... لحظه ...

اشوف الشباب قهووكم بس , اجل تفضلوا ...





الملعقه هذي للمظلوم ... مااقدر اقوله شي , صاحب الدار ماينحكى معه , بعدين قدروا ظروف الرجال ... ترى الجوع كافر ... هههههههه ( وش آخر اخبار مطعم الرومانسيه يابو حميد ؟؟ )

وللي بيحلي ( ممنوع إقتراب اصحاب الاوزان الثقيله ) ....




واحلى مايك للي بعدي ...

ياشباب انا عندي مشكلة في نيوزلندا.
ما ادري هي المشكلة فية او في الجو في نيزلندا عشان طبقة الاوزون.
انا سافرت دول اوروبيا في البرد وشي عادي مافي مشكلة.
لاكن في نيزلندا عشان الجو متقلب صيف وشتاء وخريف في نفس اليوم ههههه
تمسك معايا زكام و(block nose) طول السفرة شهر كامل هههه
انا في العادة في السعودية الزكام ما يخذ معاي إلا ثلاث ايام فقط
مادري هل احد منكم يحصل لة نفس المشكلة ولا فقط انا...علي فكرة خشمي ما هو كبير ههههههههههه
انا سافرت مرتين الي نيزلندا وكلها حصلت ماعي نفس المشكلة من ثاني او ثالث يو م الي اخر يوم من السفرة
بعد ماجي السعودية بثلاث ايام يروح ازكام

المشاركة الأصلية كتبت بواسطة المظلوووم
http://www.arabtravelersforum.com/tr...8/#post5327048

^^

هههههههههههههههههههههههههههههه

ياخي ليه الفضايح .. صدقت المجلس السابق له ذكرى لا تنسى .. كان قبل سفري بفتره بسيطه

وهذا رابطه للي يبي ياخذ فيه فره

http://www.arabtravelersforum.com/travel257142/


مطعم الرومنسية لقيت بحايل مطعم يطق له اصبع خخخ .. اسمه التراثي .. أن شاء الله تشوفه بتقرير حايل قريب


||


الخطوط القطرية فتحت خط لنيوزلندا (أوكلند فقط) من السعودية (الرياض وجدة والدمام) .. الدمام متوفره رحلاتها أكثر من الرياض وجده

خط سير الرحلة الرياض أو جده أو الدمام - الدوحة - ميلبورن - أوكلند

أسعارها شوي مرتفعه .. والترانزيت يختلف من رحلة لأخرى




إنت متأكد من هالكلام لأني دخلت على موقعهم وحطيت الرحلة من قطر إلى أوكلاند قالي لايوجد خط سير

Silom

أنا بالعكس ما جاني أي شي مع أني متوقع تغير الجو بيبهذلني


دلة رسلان

أيه متأكد .. ادخل على موقعهم

http://www1.qatarairways.com/global/ar/homepage.html

وغير بالتواريخ .. لأن أحياناً مايكون فيه رحلة بالتاريخ اللي اخترته

وأن شاء الله بتأكد من مكتب سفريات وأرد لك

تدرون وش احلى شي في ايام الدراسه في اوكلاند

الحلو وقت انتظار الباص الصبح والتحديق في وجوه الركاب على الصبح

سبحان الله ربي خلق وفرق ربعنا الصبح مكشرين والاخلاق زيرو وذولا منشرحين ومبسوطين ؟؟

كأنهم هم المسلمين واحنا الكفار ؟؟ شي غريب

والي يبهرك اكثر انهم مايحطون عطووور ماعمري مريت من عند احد وشفته حاط عطررر سبحان الله

لاني كل ماجيت اطلع ابخ عطرر وتخبرون عطورنا كلها اودي برفيوم .. يستغربون لما نحط عطور

بس الشي الوحيد الي ندمت عليه اني مارحت كرايست شيرج

[font="comic sans ms"][size="6"]يووووه قلبتو علينا المواجع

حي الله الجميع به المجلس العامر,,,,

عسى الكل بخير وصحة

انا عاد قلت برد هنا لاني شفت حبيبي المظلوووم كاتب ان القطرية لها خط لاوكلاند.

[font="Comic Sans MS"][size="5"][color="darkred"]حبيبي المظلوووم ولايهونون باقي الاعضاء ترى القطرية ما تأصل نيوزلندا ابد. توقف باستراليا وتنزلك وتقولك دبر عمرك

ياشباب فيه أحد قد أخذ فندق بمطار سنغفورا ؟؟

دخلت على البوكينق بس ما عرفت اذا القندق بالمطار ولا برى المطار لان ممنوع الخروج من المطار الا بفيزا

اخي خيالك

تقدر تأخذ فندق من نفس الخطوط السنقافورية انشب بحلقوهم الين يعطونك الفندق لان كل تيرمينل فيه فندق وبيفدك اكثر المظلووم لان طلع على الخطوط هذي بسفرته

اخوي الاسير , الخطوط القطريّه توصل لـ نيوزلندا , وانا كنت بحجز عندهم 90% لمّن لقيت الاماراتيه ارخص , و ما عليهم شروط , هذي حقّت إلغاء الحجز و مدري وش

المهم

ترا رقم الرحلة متغيّر , بسبب الترانزيت , موب بسبب ان شركة الطياران تتغير

مستحيل شركة خطوط رسمية دولية , تحوْلك ع خطوط ثانية ,

و فرعهم في الخبر , افضّل اللي مشكك , لا يدفع عن طريق الانترنت ع طول , يحجز اونلاين بدون دفع , و يدفع في المكتب و يتأكّد من سالفة الطيارة قبل الدفع


بالتوفيق

اخوي خيالك انا كان الترانزيت اكثر من تسعة ساعات ورحت لمكتب الخطوط السنغافورية وقلت لهم ان من حقي انكم تعطوني سكن وفعل اعطوني سكن في فندق المطار ....

الاسير

والله ما شاء الله عليك .. أنا ما دققت أبد بس شفت خط سيرها من السعوديه لأوكلند قلت بس خخخ

بس كلام يوسف مقنع الصراحه .. وكلامك ممكن بعد

بس أهم شي أنك تاصل لأوكلند


خيالك

أتمنى يعطونك فندق زي ما حصل مع رايح

لكن اللي حصل معي الآتي .. حجزت الطيران من مكتب .. الذهاب 8 ساعات ترانزيت والعودة حوالي 20 ساعة

طلبت منه يشوف اذا بيعطوني فندق .. اتصل عليهم .. قالوا مافيه

وقبل السفر أتصلت انا عليهم ونفس الكلام رفضوا

عموماً هذا موقع الفندق اللي داخل المطار

http://www.athmg.com/



رايح نيوزلندا

أنت طلبت منهم الفندق من فرعهم بالسعودية أو بالمطار نفسه ؟؟

يمكن ربعنا مايعطون

الأخ يوسف والأخ المظلوم

كلام الأخ الأسير صحيح لأني إتصلت على القطرية اليوم وقالوا لي نفس كلام الأخ الأسير حيث توصل الخطوط القطرية إلى ملبورن وبعدها تقوم شركة أخرى بنقلك إلى أوكلند بالإتفاق بين الشركتين

وأنا جالس من أمس شغال وأدور على القطرية
ما حصلت أوكلاند!!
حصلت على أستراليا..بس
شكل المظلوووم باله على مباراة اليوم

عافاك الله دلة رسلان .. بس ما سألت بكم ؟؟

ممكن السعر يختلف عن اللي بموقعهم


الحر

تاصل لنيوزلندا لكن زي ماقالوا الأخوان مع طيران ثاني

بس أهم شي أنت تاصل محاولة ترقيع هههههههههه

والمباراة بالمخبى بحول الله

ماشاء الله ايش الموضوع الفله هذا
سفرتي باخر شهر 6
وسبب السفره سياحة ودراسه بس مو لي لاولادي وهم 4 واعمارهم 8 و9 و13 و17
كانت اغلب المعاهد تاخذ اصغر شي 10 سنوات ولم اجد معهد ياخذ الي اعمار 8 و9 الامعهد واحد
ذهابي على الخطوط الامراتيه
كنت مرشح الامراتية والسنغفورية بس ارتحت لالمراتية
بانسبة لالترانزيت على اي خطوط يعطونك فندق اذا كان الترانزيت اكثر من 8 ساعات اذا كان بيوم حجزك انت اخذت اقل ترانزيت يعني اذا كان في عندك 3 خيرات واحد ترانزيت 5 ساعات واحد 9 واحد 10 واخذت الي انتظاره 9 علشان نوعية الطيارة او ما اعجبك وقت الطيران ما يعطونك فندق اما اذا كنت حاجز باقل وقت ترانزيت وكان الوقت اكثر من 8 ساعات فانت تستحق فندق علشان كيذا تحسون بالتضارب مرة يعطون ومره لا
عموما اذا شفتو باوكلاند 4 اولاد مهبل فانا ابوهم

يا حبّي لك يا ليث ,

اجل اذا 4 اولاد مهبّل


طيب اذا شفت باوكلاند واحد ضايع ما يدري بالدنيآ , و فالملابس صاير ترقييع , لانه موب متعوّد ع البدل و حدّه شمآغ
فـ هذا انـآ , خخخخخ


بالتوفيق للجميع

و الله يخلّي لك عيالك و عقبال ما تشوف اللي تمنّاه و تفرح فيهم

المشاركة الأصلية كتبت بواسطة yousef_a_
http://www.arabtravelersforum.com/tr...4/#post5334104

اخوي الاسير , الخطوط القطريّه توصل لـ نيوزلندا , وانا كنت بحجز عندهم 90% لمّن لقيت الاماراتيه ارخص , و ما عليهم شروط , هذي حقّت إلغاء الحجز و مدري وش

المهم

ترا رقم الرحلة متغيّر , بسبب الترانزيت , موب بسبب ان شركة الطياران تتغير

شلون بسبب الترانزيت وضح اخي يوسف رقم الرحلة او غيره مايتغير مع شركة الطيران ابدا حتى لو ترانزيتك وصل الى 24ساعه رقم رحلتك موحد يتغير اذا تغير الناقل فقط

بالنسبة للقطرية فـ الى الان لم اسمع انها تأصل الى نيوزلندا فهي متعاقدة مع خطوط اخرى تنقل الركاب الى نيوزلندا

مستحيل شركة خطوط رسمية دولية , تحوْلك ع خطوط ثانية ,

لا ياخوك معلومتك خاطئة صحيح طيران القطرية طيران عالمي ويكفي انه قبل فترة احتفلو بخطهم الجديد رقم 100 ولكن من الممكن انها تحولك على طيران ثاني وانت شيك على الموقع واحجز يوم كل تاريخ يكون جديد ولاحظ انه رمز الرحلة متغير يعني الشركة متعاقدة مع طيران اخر سوا الكونتاكس الاسترالي او الطيران النيوزلندي لاكمال توصيل الركاب. وياعزيزي اغلب نظام شركات الطيران كذا تتعاقد مع شركات اخرى كي تتكفل بتوصيل الركاب.مثلا عندك طيران البرتش يأصل الى نيوزلندا لكن ليس مباشر يوصلك الين هونغ كونغ وهناك يستلمونك الكاثي باسفيك ويوصلونك الى نيوزلندا والبرتش طيران عالمي كمان الملكية الاردنية تأصل نيوزلندا لكن بنفس طريقة البرتش متعاقدين مع الكاثي باسفيك يعني انزل بهونغ كونغ وثمن متكفلين فيك شركة اخرى. وكلآ الاثنين شركات عالمية لهم خطوط طيران طويلة المدى. لكن نظام تعاقد بين الشركات.

و فرعهم في الخبر , افضّل اللي مشكك , لا يدفع عن طريق الانترنت ع طول , يحجز اونلاين بدون دفع , و يدفع في المكتب و يتأكّد من سالفة الطيارة قبل الدفع


بالتوفيق



تقدر تتأكد بنفسك اخوي وترد لنا والى الان الطيران الخليجي الوحيد الذي يأصل الى نيوزلندا هو طيران الاماراتية وله 3محطات في نيوزلندا طبعا بعد ماينزل استراليا لساعه ونصف تقريبا ولهم 3رحلات يوميا تنزل في اوكلاند. والمدن الثانية رحلة واحدة وفي الغالب تروح مع طيران اخر.

من بعد كلامك يا اخوي " الاسير " و كلام الاخوان

مافي اي شك ان معلومتكم هي الصحيحه ,

و ان الطيران القطري ما يوصل لـ نيوزلند

شكرا ع تفاعلكم جميعْ , و ان شا الله اللي بيحجز من اخواننا يستفيد من هالشي

بالتوفيق للجميع

ودي اشارك معاكم هنا
بس اخر مره كان فيه نفس الموضوع
وانواع المشاركات والطبخات والنصايح


وبعدين تقفلّ الموضوع بحجّة انه خارج عن آلية نظام العرب المسافرون

ياترى نشارك بقلب جامد
ونضمن ان الموضوع بكبره ماينحذف
؟

حساس

خذ راحتك ع الآخر .. بس الادارة مأكدين على أننا ما نفلها واجد بالسواليف اللي ما تتعلق بنيولندا أو السياحة بشكل عام

ويقولون ممنوع الحش بالسمان هذي من عندي خخخخ


ليث .. noo924

موفقين

ويقولون ممنوع الحش بالسمان هذي من عندي خخخخ



ههههههههههه
الموضوع اللي فات ما انقفل الا بسببك
خصوصاً اني علمتك كيف تطبخ السليق خخخخخخخخ

طيّب يا T.R.A.N.Z.I.T ,

كذآ من كلامك عن اوكلاند, بتخلّيني اتحسّف اني رتبت المعهد و الهوم ستاي فيها ,
بس الحلو انّي رتبتها لـ شهر واحد , و الشهر الثاني مافيه اي تخطيط له الحين , مدري اكمل فيها ا ارح لـ مكان ثاني
(طبعاً انا رح اروح لـ مدة شهرين بس , لاني ماتوقع انّي اقدر اجلس رمضان هناك :S )

فـ لاهنت نصايحك , وانا فـ اوكلاند , و نصايحك اذا في مجال انّي اروح مكان ثاني لـ الشهر الثاني ,
او تحس المدة ماهي كفايه انّي اتنقّل ؟ :/

و ع فكرة , العايلة اللي رح اسكن معاهم , مكانهم عند الـ one tree hill
يمكن ذا المكان يذكرك بـ شي ,


ادري هذرتي كثيرة لكن تحملني ,:P

فـ انتظار نصايحك ’ كل اللي باقي على روحتي اقل من اسبوعين

سبق لي السفر عام 2009 لمدينة نايبير لمدة شهرين
وكذلك عام 2010 لمدينة كوينز تاون لمدة شهرين

وحقيقة هالسنة ان شاء الله رحلتي بــــ 6 جولاي لمدينة تابو
في بالي الشئ الكثير لكن عند تصفح مواضيع الشباب مثل حساس والمظلوم يشعر انه يعجز عن مافي باله من طرح اي موضوع لانهم وبدون مجاملة ما قصروا

للجميع تحية احترام وتقدير لأن احب الخلق لله انفعهم لعباده

انا طلبت منهم الفندق من مكتبهم في جدة قبل ما اسافر

السلام عليكم ورحمة الله وبركاته

ماشاء الله المجلس مشعلل

أعتذر لعدم التواصل
مشاكل مع الإنترنت






المشاركة الأصلية كتبت بواسطة خيالك يامهرتي راحل!
http://www.arabtravelersforum.com/tr...8/#post5333558

ياشباب فيه أحد قد أخذ فندق بمطار سنغفورا ؟؟

دخلت على البوكينق بس ما عرفت اذا القندق بالمطار ولا برى المطار لان ممنوع الخروج من المطار الا بفيزا



نصيحة لوجه الله لا تجلس في مطار سنغافوره بدون فندق

أسوء 19 ساعة في حياتي في هالمطار . . ندمت أني ما أخذت فندق من بدري

وإذا بغيت مساعدة فالحجز ولا يهمك

تحيتي‘ . . لك

سعر الصرف اليوم من الدولار النيوزيلندي للريال السعودي

1 دولار نيوزيلندي = 2.92 ريال سعودي


الطقس



روابط مفيده

http://yellow.co.nz/index.jsp

الورقات الصفراء
بكل بساطه دليل لكل ما تريده في نيوزيلانده

- - -

هنا كم موقع يعطون كوبونات تخفيضات والعروض اليوميه المخفضه

http://www.freecouponcodes.co.nz/

http://www.ezycoupons.co.nz/

http://www.grabone.co.nz/home

- - -
وهنا كم موقع للي يبحثون عن هومستي ( عائلة )

http://www.homestaybooking.com/

http://www.homestayweb.com/nzhome.html

أوكلاند فقط
http://www.aucklandhomestay.org/

كرايستشيرج فقط
http://www.christchurchhomestay.org/



تحيتي‘ . . للجميع ولا تحرمونا من دعواتكم

تسلم مشرفنـآ ,

هالمواقع رح تفيدنا كثير , اهم شي الجو انا اللي ما قد شريت ملابس شتويّة ولا عندي من الاصل, متعوّد ع ذا الثياب بس , شكل مافي ألا اشتري من نيوزلاندا , لان ما عاد في شي بالاسواق الحين :/


الله يوفّق الجميعْ ,


و الايام تركض , و ما عاد باقى شي ع لقياك يا نيوزي , :$

حيا الله الجميع كلاً بأسمه ...

و بارك الله فيك أخو ي ( أسامه ) على المواقع ..

بالنسبة لمطار سنغافورا ... أعتقد ما فيه مشكله الآن في الغرف ..

لأني حجزت الـ ( 6 ) ساعات ... و هي الأقل ... بما يعادل ( 220 ) ريال

هي الأقل لأنك ما تقدر تأخذ مثلاً ساعتين أو خمس ساعات ...

بالنسبة للأجواء اليوم في أوكلاند ... الهواء البارد بهذل فيني ... لكن برودة الجو ممتعه ..

و غير قارصه ... يعني تمشي حالك ...

و رش المطر خفيف يعني ( رذاذ ) ...

أنا أضطريت أحجز بفندق بوسط المدينة لأني حجزت بكره إلى ( تارونقا ) الساعة ( 7:30 ) صباحاً ...

يعني لي يومين الآن في ( اوكلاند ) الأول راح كله نووم ... و اليوم إستطلاع على المحلات و بعض معالم المدينة ...

نلقاكم قريباً ...

المشاركة الأصلية كتبت بواسطة yousef_a_
http://www.arabtravelersforum.com/tr...6/#post5346386

تسلم مشرفنـآ ,

هالمواقع رح تفيدنا كثير , اهم شي الجو انا اللي ما قد شريت ملابس شتويّة ولا عندي من الاصل, متعوّد ع ذا الثياب بس , شكل مافي ألا اشتري من نيوزلاندا , لان ما عاد في شي بالاسواق الحين :/


الله يوفّق الجميعْ ,


و الايام تركض , و ما عاد باقى شي ع لقياك يا نيوزي , :$



أذا كنت من أهل الرياض عندك مجمع الشعله على شارع الوزارات وفي مجمع فينيسيا جنمب الشعله وعندهم شغلات كويسه للشتاء . . رحلهم وقل أبي ملابس شتويه وبيطلعونها لك

بالتوفيق

السلام عليكم
ايش رائيكم استاجر سيارة احسن ولا ادبر حالي بالباصات
شايل هم الباص خصوصا نحن عيله

المشاركة الأصلية كتبت بواسطة Yousef_A_
http://www.arabtravelersforum.com/tr...6/#post5339686

طيّب يا T.R.A.N.Z.I.T ,

كذآ من كلامك عن اوكلاند, بتخلّيني اتحسّف اني رتبت المعهد و الهوم ستاي فيها ,
بس الحلو انّي رتبتها لـ شهر واحد , و الشهر الثاني مافيه اي تخطيط له الحين , مدري اكمل فيها ا ارح لـ مكان ثاني
(طبعاً انا رح اروح لـ مدة شهرين بس , لاني ماتوقع انّي اقدر اجلس رمضان هناك :S )

فـ لاهنت نصايحك , وانا فـ اوكلاند , و نصايحك اذا في مجال انّي اروح مكان ثاني لـ الشهر الثاني ,
او تحس المدة ماهي كفايه انّي اتنقّل ؟ :/

و ع فكرة , العايلة اللي رح اسكن معاهم , مكانهم عند الـ one tree hill
يمكن ذا المكان يذكرك بـ شي ,


ادري هذرتي كثيرة لكن تحملني ,:P

فـ انتظار نصايحك ’ كل اللي باقي على روحتي اقل من اسبوعين



والله ياصديقي مدري وش اقولك اوكلاند مو مره كبيره يعني انا بصراحه ماعجبتني تحسفت اني قعدت فيها
مع العلم اني كنت ناوي اروح كورو ماندل بس سبحان الله مدري وش جاني واستقريت في اوكلاند
مع اني كنت مقرر اني اروح كورو ماندل ..؟؟
بس شي غرريب ..او يمكن عشاني انغريت بنوار لمدينه

لاكن لو تبي تروح لاتسكن في اوكلاند وحاول انك تروح يا كورو ماندل او اي ديره غير اوكلاند

قدر المستطاع حاول

لان اوكلاند بتشوف سعوديين كثر شعر راسك


والمكان ترري هيل مااتذكره مرره بس كنه مر علي

المشاركة الأصلية كتبت بواسطة ليث1
http://www.arabtravelersforum.com/tr...8/#post5346708

السلام عليكم
ايش رائيكم استاجر سيارة احسن ولا ادبر حالي بالباصات
شايل هم الباص خصوصا نحن عيله



خذ باصات احسن لك وااوفر لك

بطاقه لكل فرد من العائله وتريح عمرك وليش تستاجر سياره وليش تخسر نفسك

المشاركة الأصلية كتبت بواسطة أسامة العتيبي
http://www.arabtravelersforum.com/tr...4/#post5345844

سعر الصرف اليوم من الدولار النيوزيلندي للريال السعودي

1 دولار نيوزيلندي = 2.92 ريال سعودي

الطقس

روابط مفيده

http://yellow.co.nz/index.jsp

الورقات الصفراء
بكل بساطه دليل لكل ما تريده في نيوزيلانده

- - -

هنا كم موقع يعطون كوبونات تخفيضات والعروض اليوميه المخفضه

http://www.freecouponcodes.co.nz/

http://www.ezycoupons.co.nz/

http://www.grabone.co.nz/home

- - -
وهنا كم موقع للي يبحثون عن هومستي ( عائلة )

http://www.homestaybooking.com/

http://www.homestayweb.com/nzhome.html

أوكلاند فقط
http://www.aucklandhomestay.org/

كرايستشيرج فقط
http://www.christchurchhomestay.org/

تحيتي‘ . . للجميع ولا تحرمونا من دعواتكم

الله لا يخلينا تكفى

بيض الله وجهك

اقولك على شي ماتضحك علي

من الثواره فيني اول مارحت نيوز لندا احسب ال 100 ريال تعادل 500 دولا نيوزي
انا مدري وش كنت احس فيه

وتخيل طول سفرتي وانا سحب من بطاقة الصراف السعوديه وكل يوم افكر اسحب اشيل هم اقول الله يستر لا يسحبون بطاقتي

مع اني فاتح حساب في بنك مدري شسمه الاصفر ذاك ناسي اسمه ab شي زي كيذا
ولا حولت فلوسي


بس من المواقف الي حسيت اني سطل فيها اني حاولت اسحب فلوس في يوم من الايام
وعيت البطاقه تسحب وكان برد ومطر وجو بايخ وجايع وفيني النوم والباصات راحة
ووقتها حسيت اني انتهيت وشوووي وهيك فهمت

بس وقتها حاولت مره ثانيه ودخلت بطاقة الصرافه حقتي ولاعاد طلعت
طارة عيوني وابيها تطلع وابيها تطلع ماش عيت تطلع مسكت راسي
وتكيت جمب الصرافه وخنقتني العبره مامعي فلوس والصرافه انسحبت
حسيت اني بمووت من الروعه وحقت الهوم ستي تبي فلوسها وجايع والجوووو زفففففففففففت
وخلاقي تعبانه وقتها

الا سبحان الله لبطاقه تطلع من نفسها شكل مكينة الصراف تكلم نفسها تقول والله رحمتك رح لهلك

على فكرة ميزة نيوزيلاندا ... بطبيعتها ...

أوكلاند بالنسبة لي ما فيها زود ... ما أبغى مدينة ... الجمال يكون في الريف و المدن الصغيره ...

بالنسبة لي الطبيعة من أهم أسباب إختيار نيوزيلاندا ..

ثانياً ... نصيحة لازم تعرف وين تبي تروح علشان ما يضيع عليك الوقت و تصرف فلوسك ...

حط لك خطة سير ... اليوم هنا .. و بكره هناك ... خذ فكرة كاملة عن المكان ...

حاول تجرب أماكن ... لا تتبع طريق اللي قبلك ... مجرد إنك هنا ... لا زم تعيش جوه ... و تكتشفه ..

بس أهم شيء تعرف وش تبي ...

بالنسبة للبنك .. اليوم مريت فرع بنك ( nb ) أعتقد كذا إختصاره ... أنا مدة إقامتي ( 6 ) أسابيع ...

مع إن مالي حاجة بالحساب ... لكن كنت قريب حاولت أجرب ... إتضح لي بأنهم ما يفتحون حساب

إلا للي فيزته من ستة أشهر و فوق .... اللي اقل ... أعتذروا ... بكل آدب وإحترام ...

....

نلقاكم ...