المشاركة الأصلية كتبت بواسطة أبو رامز990
http://www.arabtravelersforum.com/tr...2/#post6363642

الله يعطيك العافية .۔ كلامك مريح و ممتاز .۔ طيب ..۔ و الله مالي خاطر بالمالديف بس أبي يكون شهر عسل ( عسل حقيقي ) و ما ابي زي كل العالم ماليزيا و انتهينا قلت نغير شوي و حطيت قبلها المالديف
و مادام رايك كذا و انتي مجربة قبل أوروبا كشهر عسل فشكلي نويت آخذ برأيك و يقولون أسأل مجرب و لا تسأل طبيب ..۔ فبودي آخذ رايك في الدول المناسبة لشهر عسل بأوروبا و كم يوم يكفيها و ما ابغى دول كثيرة يعني دولتين فيها اربع مدن و اربع فنادق فندق في كل مدينة اعتقد أنها كافية ..۔ شكلك من جد خربتيني .۔ بس خراب ان شاء الله انه زين و مفيد .۔ طيب اعطيني الله يطول بعمرك دولتين مناسبة مرة و كم مدينة في هالدول و من وين أحجز هل شهر العسل الأفضل لازم يكون له بكج من مكتب سياحي و لا اظبط نفسي بنفسي و أحجز فنادق من النت و برضه السيارة ...
و الله يعطيك ألف عافية .۔ و ما قصرتي .۔ أتعبتك معاي .۔ بس بإذن الله كله في ميزان حسناتك .۔ و شكرا ..





مرررحبا ابو رااامز

زين سويت تدري انا يوم كان زوجي يقولي شنو خاطرج اقترح علي ماليزيا صار وجهي كذا وبعد لاني قبل رحت تايلاند حررر مش طبيعي ماتصلح شهر عسل كلش .۔

وبعدين انا دوم اخرب خخخخخخ ومن ناحية الحجوزات ابدا مايحتاج اتروح مكاتب سياحيه عن نفسي زوجي حجز من موقع بوكنق واجر سياره هناك وامورنا كانت واااااو واذا احترت في فندق شوف اراء النزلاء او اسال الاعضاء وان شاءالله ماراح يقصرون ... واحلى مده لشهر العسل اسبوعين حسب ميزانيتك وصدقني ماراح تخسر واجد اوروبا اسعارها معقوله بس لازم تختار فنادق عدله لانه شهر عسل يمكن الشي اللي بيخسرك الفنادق اما باقي الامور والله عاديه والاسعار معقوله في المطاعم والرحلات واللي بيوفر عليك ان عندك سياره حط القارمن وامش والله يستر عليكم


اما اني اقترح عليك مادري اخاف اختار شي مايعجبك وبعدين تدعي علي

برشح لك وانت قرر .. عندك جنيف والريف الفرنسي انسي واللي حول انسي انت رحت لهم واتذكر انك قلت انهم حلوووين وانك حبيتهم وبعدها خذ جوله على زيرمات وانترلاكن واللي حولهم والحلو انك رايح من قبل وعارف وين الاماكن الحلوه .. صدقني مرتك بتستخف وبطير من الفرحه سويسرا حلوه وتصلح لشهر عسل واذا رحت سويسرا لازم اتمرون اليورب بارك واختمها في باريس والحلو انك توك جاي من باريس وعارف وين احلى الاماكن وعارف البلد اشلون واذا تبي اماكن جديده عليك انصحك بالنمسا اذا ماقد رحت لها احسهم يصلحون لشهر العسل اكثر من غيرهم


وبعد النمسا مشروع حلو اقولك شنو الحلو فيها شعبها جدا محترم وطيب والكل يعرف انجليزي ماتتوهق وبصراحه هي بلد حلوه وهاديه ممكن تقعد كم يوم في فيينا وفي منطقه لاتفووووتك جنب فيينا اسمها برنو هي في التشييك رخيصه من قلب وفيها سنتر حلووو حبيتها والحلو انها تبعد ساعه يمكن اقل بشوي او اكثر بشوي مش بعيده ممكن تقضون فيها يوم وتتغدون فيها من جد وناسه .. بس لوفكرت في النمسا حط في بالك انها مليانه عرب واذا ماتبي اتشوفهم لاتروح زيلامسي وكابرون اتقول في الخليج قاعد خصوصا شهر 7 واذا خاطرك فيهم عادي روح ولاعليك من حد وعيش احلى ايامك انت وزوجتك ونصيحه اسكن في كابرون وخذ سياره ولف على المناطق وادخل قارميش قريبه مش بعيده واجد واذا دخلتها كانك رحت المانيا بعد لوفكرت اتروح زيلامسي لاتسكن فيها ازعاج وماتصلح للسكن من باب التجربه كابرون وانت مغمض حتى شوف تقريري عن مطعم في كابرون صرت اعرف اسوي تقارير خخخخخ علشان اذا رحتوا هناك اتمرون عليه .۔ واذا اخترت فيينا برشح لك فندقنا اللي كنا فيه يوم شهر العسل بصراحه حلو وموقعه رهيب كل شي عندكم وان شاءالله راح يعجبكم


بعد فنيسيا مشهوره بالرومانسيه وليلها حلوو خصوصا انكم معاريس بتصيرون شعراء مع الاجواء اللي هناك

ودي ارشح لك مناطق في ايطاليا بس مشكلتي ماجربت الا ميلان وفنيسيا وبصراحه ماحبيتهم كثر الدول الثانيه شوف تقارير الاعضاء وانت قرر شنو تبي


طولت عليك حاولت اساعدك باللي اقدر عليه واتمنى اني قدرت اساعدك شوف شنو اللي يناسبكم وان شاءالله بيكون شهر عسل عاااالمي وممتع وماراح تنسونه ابدا ابدا


واي شي تبيه لاتتردد

مواضيع عشوائيه ممكن تكون تعجبك اخترناها لك: