أخي الكريم أنا كانت لي زيارة لماليزيا من نهاية يناير إلى فبراير وكنا بنفس عددكم ونفس المناطق
ليش لاقيت مشكلة مع الفنادق في صحبة الأطفال كلش مافي أي مشكلة!!
مافي داعي تذكر للفنادق عدد أطفالك لان هالشي مايعنيهم إذا عرفت تتعامل مع هالشي
أنا في كوالالمبور سكنت في التريدرز والماريوت
وفي بينانغ سكنت في الغولدن ساندس
وفي سيلانغور سكنت البيراميد
بس عشان ما أتضايق مع عدد الأطفال حجوزاتي كانت كلها في سويتات وإذا مالقيت خذت أستوديو
كان السكن سهالات ومريح وسرير الطفل الصغير مجاني في كل الفنادق
وكلها فيها سوفات واسعة كنا نستغلها في النوم
في التريدرز كنت أنا وعيالي على سرير واحد من وسعه
وريلي السوفا نام عليها وهو مرتاح ومستانس
وفي الغولدن ساندس حجزنا كان في غرفة ديلوكس مطلة عالبحر
لكني لما جفت الغرفة إختنقت من ضيقها وطلبت يغيرونها
وعرضو علي السويت العائلي وبصراحة إنبهرت من وسعه وأناقته وقعدنا نسرح ونمرح فيه
البلكونة بروحها يطرد فيها الخيل وبالأصح بلكونتين قعدتهم ترد الروح
في البيراميد سكنا في أستوديو وهو الأكبر عندهم لكن بصراحة ماحبيته
واسع ونظيف والفندق مرتب وريوقه لذيذ لكني بعد مارتحت
يمكن لأني متعودة على الصنواي ريزورت وغيرته من باب التنويع وندمت
الخلاصة لا تطري عيالك أثناء الحجز بس إحجز الأكبر عشان ماتتضايقون
وهم مالهم شغل فيكم بس لاترز اليهال جدامهم في التشك إن عشان مايتكلمون
والله حتى الريوق اللي ماكانو محسوبين فيه كلهم تريقو معانا وهم يضحكون ولاحد تكلم
رد مع اقتباس
المفضلات