احب اشارك برايي
نصيحه لا تسأل اسئله من النوع هذا ، زي سؤالك هل قرار استقالتي صائب ، انا عارف انك سألته عشن تبغى الشباب يحمسوك ويقولوا لك توكل على الله ، بس صدقني الاسئله من النوع هذا تضر وما تنفع
لانك انت خلاص تركت العمل ، واكيد انك استخرت واستشرت ، فخلاص كثره التكرار وارجاع التفكير مره ثانيه ، راح يسبب لك نوع من الربكه والتردد الدائم ، لانك لو حتترك نفسك تسمع لكلام الناس حتلاقي كل واحد ليه راي ـ ورايهم ماراح يزيدك الا حيره ، وواضح انه فكره اكمال الدراسه داخله راسك تماما فلو حتى ما استقلت وكملت في وظيفتك ، راح تلاقي شي في نفسك وبيلح عليك باقي حياتك ، وهي انك تبغى تكمل دراسه ، فخلاص قررت ـ توكل على الله ولا تطالع لوراء

شوف حبيبي انا راح اقولك اللى عندي واتمني انه يفيدك ، انا العام الماضي زرت شباب بيدروسوا في كرايتشريش بنيوزيلندا وتفاجأت انهم متعقدين من نيوزيلندا ، قالولي وهذا على كلامهم ، يعني ما ادري اذا صادقين او لا ، بيقولوا ان مرحله اللغه محد قادر يخلص واللى شاطر يجلس سنه ونص ، يعني ايش سبب التعقيد هذا كله ما ادري ، وكمان قابلت شباب في الجامعه بيشتكوا من صعوبه الدراسه وانه شي طبيعي الشباب متعترين في الدراسه
انا تفاجات بكلامهم ، قولتلهم يعني دحين نيوزيلندا اللى في اخر الدنيا ومحد داري عنها ولا عمرنا سمعنا ان شهادتها بداك القوه عامله الزحمه دي ، وامريكا اللى معروف ان فيها افضل تعليم الشباب امورهم ماشيه سهالات ، وبيقولولي حتى الملحقيه الثقافيه راح تحاول تتفاهم مع الجامعات عن وضع الشباب لانهم لو استمروا بالطريقه دي راح يطالبوا بنقلهم لاي دوله ثانيه ، بصراحه حسسوني انهم بيدرسوا في جامعه هارفرد او كامبريدج

انا عارف ان عاده الشباب بيحاولوا يبينوا ان دراستهم صعبه عشن يعطونا انطباع ان شهادتهم قويه ، عشن كده قولتلك ما ادري اذا كانوا صادقين او لا ـ لكن انا نقلتلك الصوره اللى شفتها قدامي

اللى باقصده من هذا ـ طالما الهرجه كلها دراسه وتعب هنا وتعب هناك ، اختار بلد يكون شهادتها ليها وزن ، لانك راح تتفاجأ لما تروح تدرس في نيوزيلندا ، ان حتى اهل البلد مستغربين انك جيت تدرس عندهم وسبت الدول المشهوره والكبيره ، وثاني شي حيجيك احباط لان حتلاقي شعب مهو مهتم بالتعليم كثير ، يعني اكثرهم ثانويه ، لان الجامعات عندهم بفلوس وهما مهم مضطرين للدراسه الكثير لان فرص الوظائف سهله، ويفضلوا الحرفي على الجامعي ، يعني حتلاقي ناس بيحسدوا السباك والكهربائي على شغلته اكثر من الموظف واستاذ الجامعه ، يعني البيئه نفسها ما تشجع على الدراسه

انا ما قصدي احبطك ولاشي ، بس هذا واقع لو ماقولتلك هو راح تشوفه بعدين
تحياتي لك وتمنياتي لك بالتوفيق

مواضيع عشوائيه ممكن تكون تعجبك اخترناها لك: