المشاركة الأصلية كتبت بواسطة بنت الشيخ زايد
http://www.arabtravelersforum.com/tr...4/#post2565514

هلا اخوي

انا بصراحه ما جربت ولا العربيه ولا ناس

بس الحين حاجزين على طيران ناس لجده

وبصراحه وايد خايفين لان ماجربنا الطيران الاقتصادي ودايم سفرنا على الامارات

ياليت اللي جرب طيران ناس يقولي ( مواعيد الاقلاع مضبوطه؟ , حجم الكراسي, جودة الطياره ونظافتها, والوزن )

وماهي سلبيات والاجابيات




أنا سافرت على طيران ناس مرة وحدة في رمضان
من أبوظبي

تجربتي معاهم كانت وايد حلوة
في الذهاب .. الإقلاع كان على الوقت .. بس عيبها ان اذا بتسافرون من أبوظبي .. بيكون من مبنى 2 (اللي تروح منه السودانية الباكستانية ..)
يعني لما كنا هناك .. كل اللي لابسين ثوب وغترة وعقال كانوا رايحين على طيران ناس
وهو مبنى صغير وايد .. ومافيه سوق حرة (إذا كنتوا من النوع اللي تحبون السوق وايد)

في العودة .. الطيارة تأخرت ساعتين .. بس الحلو انهم طرشولنا مسج على الجوال يخبرونا بالتاخير قبلها بيوم (ما أعتقد ان في طيران ثاني يسويها)
وارقام جوالاتنا كانت موجودة عندهم لأني سويت الحجز عن طريق الموقع وحطيت رقمي

وبإذن الله في سفرتي الجاية للعمرة نهاية هالشهر بروح على طيران ناس (مخطط اني أقضي اجازة الربيع في الإمارات ومنها بطلع للعمرة)
واخترت طيران ناس لسبب واحد وهو انهم الوحيدين اللي عندهم رحلات مباشرة من المدينة للإمارات
وبعد لأن سعرهم وااااااايد حلو .. خصوصاً لو حجزت بدري

الكراسي نفس العربية بالضبط
واسعة وحلوة .. بس اعتقد ان حسب الطيارة .. أنا اللي جربتهم كانوا اوكي

بالنسبة للوزن .. ماكان عندي وزن زائد ... بس نصيحتي لكم .. اذا كنتوا متأكدين ان بيطلع وزن زيادة .. فأنصحكم تشحنون الأغراض .. بيطلع وااااااااايد ارخص (غالباً لو طلع عليكم وزن زائد .. سعر الكيلو يكون مابين 20 الى 70 ريال حسب شركة الطيران وخط الرحلة .. بس في الشحن الجوي يكون مابين 3 الى 7 ريال .. وكل مازاد الوزن كل مانقص .. بس حطوا في بالكم ان في ضرائب بتدفعونها في السعودية وفي الإمارات) .. والشحن البري ارخص بوايد .. بس انا ماجربته

أو الحل الثاني تقللون الشنط اللي بتاخذونها وياكم عشان تعطون فرصة اذا بتشترون اي شي من هناك (لا تنسين بعد ماي زمزم .. فيه وزن بعد)

بس العيب الوحيد في الطيران الإقتصادي بشكل عام .. انج بتلاحظين كأنج راكبة باص مواصلات
قصدي من ناحية الناس المسافرين والتعامل

لما تسافرين فيها .. بتعرفين ايش معنى كلامي

مواضيع عشوائيه ممكن تكون تعجبك اخترناها لك: