اخواني بسرعهبخصوص السياره نصايكم

**ahmed2** · 01-30-2015, 12:13 PM

اخواني كل عام وانتو بخير,,,,,

ارجوكم ياليت تبلغوني بخصوص تأجير سياره

انا ان شاءالله في تاريخ 14/9 بكون في ميونخ

بخصوص السيارات

انا وزوجتي,,,,,,فقط

تنصحوني اخذ سياره صغيره او متوسطه

حصلت اوبل او فود فوكس ,,, ويقولون لي مناسبه,,,,,

لكن اهل الخبره’’’’’’
ياليت تنصحوني

وبخصوص الطريق انا بروح على طول الى سالزبورغ ومن بعدها الى زلامسي’’’’’’’

هل القياده سهله وخصوصا السياره ياليت تنصحوني وخصوصا ممكن امطار يكون

بسرعه ياليت وبانتظاركم

وبخصوص مواقع تأجير السيارات في شروط وقاوانين

يعني الافضل بخصوص العقد

مواضيع عشوائيه ممكن تكون تعجبك اخترناها لك:

**ahmed1** · 01-30-2015, 12:14 PM

المشاركة الأصلية كتبت بواسطة الحرملك
http://www.arabtravelersforum.com/tr...0/#post4222427

اخواني كل عام وانتو بخير,,,,,

ارجوكم ياليت تبلغوني بخصوص تأجير سياره

انا ان شاءالله في تاريخ 14/9 بكون في ميونخ

بخصوص السيارات

انا وزوجتي,,,,,,فقط

تنصحوني اخذ سياره صغيره او متوسطه

حصلت اوبل او فود فوكس ,,, ويقولون لي مناسبه,,,,,

لكن اهل الخبره’’’’’’
ياليت تنصحوني

وبخصوص الطريق انا بروح على طول الى سالزبورغ ومن بعدها الى زلامسي’’’’’’’

هل القياده سهله وخصوصا السياره ياليت تنصحوني وخصوصا ممكن امطار يكون

بسرعه ياليت وبانتظاركم

وبخصوص مواقع تأجير السيارات في شروط وقاوانين

يعني الافضل بخصوص العقد

اذا انت بتنزل مطار ميونيخ انصحك تستاجر السياره من بلدك يعني اذا انت بالرياض استحسن مجرد استحسان
انك تمر مكتب سكست وتستاجر منه وتاخذ ورقة الحجز لانك ماراح تدفع بالرياض الدفع بيكون بالمانيا ...وبالفيزا يعني كاش مايقبلون

وعموما انت تحجز بالفئه فقط مو بالسياره يعني مثلا لو حجزت لك بئم دبليو كشف ورحت مو شرط تلاقيه لكن لو

ماكان متوفر وقت تواجدك يعطونك نفس الفئه مثل مرسدس كشف ....وماعندهم ايضا التزام بالبنزين او الديزل لكن

اترك اللي بمكتب الحجز يأكد عليهم وانت بتحجز تكون السياره ديزل وتكون قير توماتيك واذا تبي اكيد توماتيك خله يكتب

لهم ملاحظه انه انت ماتقدر تسوق عادي لأسباب طبيه يعني رجلك الثانيه فيها مشكله فال الله ولا فالي لكن بعض

المرات الواحد يجبر يقول كذا .............وش بعد وش بعد اي نسيت اقول لك لاتنسى يكون مبلغ الفيزا اللي معك

ضعف قيمة الاجار مره ونص للاحتياط لسبب الا وهو انه مثلا انت استأجرت السياره بقيمه الفين ريال راح يسحبون

من الفيزا اربع الاف ريال الفين ريال قيمة الاجار والفين ريال تأمين مسترجع بعد تسليمك السياره يرجع بحساب الفيزا

بعد 15 يوم من التسليم ...........وش بعد وش بعد انصحك بالسياره الصغيره لكن مو صغيره مره مثل الخنافس لاء

يعني اوبل حلوه بالخط يعني انت فكر فيها السياره الصغيره مره ماتنفع لسببين الاول انه انت راح تمسك خطوط فيها

والسياره الصغيره مشكله بالخطوط وماتمشي الشئ الثاني فكر في الشنط ياحبيبي يعني لو كانت صغيره مره

راح تكون مسأله الشنط مشكله بالنسبه لك ....ويتبقى لك الخيار امالو كنت تبي السياره بوسط المدينه بميونيخ مثلا

مع اني بوسط ميونيخ ما انصح بالسياره لكن لو براسك السياره بوسط المدينه خذ اصغر حجم بالعالم ....لكن خط الاوبل حلوه

اما بخصوص الطريق بالعكس الطريق اكثر متعه مع الامطار وراح تعيش متعة القياده في اوربا لكن

لاتنسى تولع الانوار حتى لو انت بالنهار ولع النور يعني الليت لازم يكون شغال بوقت نزول الامطار او الضباب

والا بيصكونك بمخالفه .........ولا تنسى ربط حزام الامان انت وزوجتك ضروري والا بيصكونك بمخالفه ....

وقبل لا تطلع من المانيا وتدخل النمسا وقف عند اقرب محطه وادخل البقاله واطلب منهم ستيكر ضريبه طريق

النمسا يعطيك استكر لزقه على القزازه الاماميه والا بيصكونك مخالفه هذا اذا شافوك طبعا ....ممممم وش بعد وش بعد

اما بخصوص المواقع تاجير السيارات ما ادري وش تقصد يعني تقصد مواقع الويب والا مواقع الفروع على ارض الواقع

اذا مواقع الويب فيه سكست ويورب كار هذولي انا افضلها على غيرها لكني بصراحه دامك بالرياض انصحك تحجز من

الرياض تلاقي مكتب سكست على طريق خريص جنوب مستشفى مدينة الملك فهد الطبيه تحت شقق داركو الفندقيه....ويعطونك كل التفاصيل وتختار السياره اللي تبي وعندهم هندي ودك تحب راسه حبوب واخلاق ومتعاون لابعد درجه ..............هو مدير الحجز الدولي ..............

ممممممممممممممماذا بعد ماذا بعد

بخصوص المتطلبات

رخصه سعوديه جديده سارية المفعول وركز هنا على ان تكون الرخصه الجديده فيها عربي واننجليزي

رخصه قياده دوليه ليست ضروريه لكن مايمنع استخراجها تلاقيها عند مكاتب السفر والسياحه بمية ريال اتوقع

واهم شئ تحط ببطنك بطيخ صيفي من ناحية الهم والتفكير المزعج والمقلق للمخ بخصوص تخوفك من قيادة

السياره في اوربا وخذها قاعده بالعالم كله من استطاع القياده بمهاره في شوارع المملكه العربيه السعوديه

فهو جدير بان يكون من امهر قائدي السيارات في الدول الاوربيه يعني قيادة السياره صعبه بالسعوديه سهله باوربا

الى درجه ماتتخيلها لكن اركز على شئ واحد فقط النظام النظام سوالف تضرب بوري (( تدق هرن يعني ))

او تسقط على سياره والخطوط اللي بالارض متواصله مو متقطعه هنا بيصكونك بمخالفه كبر راسك

او مثلا لاتتقيد بالسرعه المحدده او مثلا ماتربط حزام الامان او مثلا ماتشغل الانوار وقت نزول الامطار والضباب

المخالفه بتكون لك بالمرصاد غيره صدقني بتحس انك ملك وانت تسوق باوربا وبتحمد الله انك اخترت افضل وانسب

شئ للسفر مع رفيقة دربك بكل راحه وخصوصيه وسعة صدر .....

ولا تنسى ان كانك رايح النفقيشن شئ مهم جدا وبدونه انت لاشئ وكأنك رجل جرد من سلاحه وزاده وراحلته

في وسط صحراء قاحله .....يعني النفقيشن هو الصديق الوفي والدلوله والمري اللي راح يوديك المكان اللي تبي

وانصحك تمر محلات قارمن وتشتري لك قارمن نوفي الجديد وتبدا تدخل الاحداثيات حتى لو تبي بالعربي صحيح غالي

لكن لك وللزمن ويفرق عن القارمن الاوربي ترى والله راح تحس بالمتعه ........

والله يحفظك في حلك وترحالك ويرجعك سالم غانم مستانس ومسفهل ....واتمنى لك قضاء اجازه وسياحه سعيده

جدا لايشوبها اي كدر .....

**ahmed2** · 01-30-2015, 12:14 PM

الله يبيض وجهك دنيا وآخره,بالخير

والله ماقصرت,,,,,كفيت ووفيت,,,,,,,

الله يفرج لك ...
ونصايحك هي الطيبه,,,,,,,وتم الحفظ,,,,

وانا من الكويت اخوي.....وماقصرت