الموضوع: مسافر للبحرين الاسبوع الجاي وأبي مساعدتكم

هلا والله وغلا كيفك اخبارك ...
الله يطول عمرك انا من اهل باريس نجد ( اقصد من الرياض ) وعندي شغله في البحرين وطالع انا وواحد معي وبصراحه هذي اول مره ازور فيها البحرين حبيت اسأل عن باصات Vip تسافر من الرياض الى البحرين عندك معلومات عنها وعن طريقة الحجز .. وكمان الفنادق الفخمه والحلووووه والنظفيه هناك وبالنسبة للعمله اخذ معاي ريالات او اصرف والفنادق احجزها من هناك او من مكاتبنا وبالنسبة للسياره وش تقترح نستأجر وكم الاجار او تكاسي وكمان ( زودتها معاك لكن تحمل ) الأ ماكن الحلوه هناك ... ومشكور يالغالي ...

مواضيع عشوائيه ممكن تكون تعجبك اخترناها لك:

• ستفسار عاجل حول الحلوى الملكي دايت
• سؤال مهم ارجو المساعده
• لو خيركوم بن هذه الفنادق ؟
• سباق الفورمولا وان مهرجان جائزة البحرين الكبرى العد التنازلي
• لاهل الخبره بالبحرين
• ابغي فندق في البحرين 4 نجوم
• هل هناك جامعة بالبحرين تقبل الدراسة بالإنتساب من الكويت؟؟
• إستفسار لرحلة إستجمام
• سياحة الاطفال في البحرين اهل البحرين الكرام لاهنتوا
• استفسار شقق فندقية البحرين
• دراسة حديثة لجامعة «الخليج» تكشف عن سر شجرة الحياة
• لاحبتي في البحرين اقول ؟؟
• يااهل البحرين؟؟
• لاتتعب روحك البحرين هنا
• كم سعر فندق المنزل
• هل بالامكان استخدام البطاقه للسفر من المطار؟؟
• الاسواق الشعبية في المنامة
• سؤال ضروري ضروري لأهل البحرين وكل من زار البحرين
• استفساار عن سكن بالبحرين
• معرض البحرين للأم والطفل

هلا و الله اخوي يا مرحبا فيك بالبحرين

بالنسبة للباصات هذي يجاوبونك عليها اهل السعودية بس حسب معلوماتي باصات سابتكو هي الاشهر عندكم , و بالنسبة للصرف تطمن الريال السعودي يمشي في البحرين يعني يتعاملون مع ال 10 ريال كانها دينار بحريني واحد في كل مكان تقريبا من اصغر برادة او بقالة الى اكبر مجمع او سوق تجاري ,


بالنسبة للفنادق توجد عدة فناق فئة خمس نجووم راقية و نظيفة و فخمة و ايضا اربع نجوم راقية و نظيفة و توجد فنادق فئة ثلاث نجوم و حتى اربع نجوم و لكن للاسف تحتوي على مراقص و ديسكوات و غيرها .

و بالنسبة لتأجير السيارات يوجد اوسكار لتاجير السيارات و البدر لتاجير السيارات هذيلا اللي اذكرهم الحين و انصحك تاجر افضل من التكاسي عشان تاخذ راحتك ,

و الفنادق اللي انصحك فيها اذا تبي خمس نجووم افخم فندق في البحرين ريتز كارلتون بضاحية السيف , و نوفوتيل بالمحرق هذا جديد , و عندك الريجنسي بوسط المنامة تماما و الشيراتون و الدوبلمات و الكراون بلازا و الهلتون واايد فنادق 5 نجوم .

فندق اليت سويس بضاحية السيف اربع نجوم و بخدمات خمس نجوم انصح فيه .

الاماكن الحلوة بالنسبة للمجمعات التجارية افخم مجمعات بالبحرين السيف و العالي ( و هما بجانب بعض في منطقة ضاحية السيف) و حواليهما عدة مطاعم راقية مثل تشيليز و بنجنيز و مطاعم ايطالية و غيرها . و هناك مقهى البنديرة بجانب مجمع العالي و هو مقهى فخم جدا .

ايضا مقهى لاميزون دي كافي مقهى راقي و فخم بمنطقة ضاحية السيف ايضا و له فرع بمنطقة الزنج .

مجمع الدانة و مجمع البحرين ( جيان) بضاحية السيف ايضا و لكن على الجهة الاخرى من ( الهاي وي) و قريب منهم فندق اليت سويس اللي قلت لك عنه .

اذا كنت من هواة الاشياء التاريخية و التراثية تروح متحف البحرين الوطني بشارع الفاتح و لا تنسى تزور جامع الفاتح , ايضا اذا كنت من هواة الاشياء التاريخية تروح بيت القرآن بالقرب من شارع المعارض .

حدائق للاسف ماعندنا حاليا يمكن غير الحديقة المائية بالسلمانية و يقال هناك الاكوا بارك في منطقة سار بس مازرتها .

عندك سوق المنامة (بجانب فندق الريجنسي) و سوق المحرق اذا تحب تاخذ حلوى شويطر من مصدرها .

و اي استفسار انشالله حاضرين لك اخوي .

اشكرك اخوي راشد وهذا والله حشمنا فيكم وانا وانتم واحد والله يخلينا لبعض يارب ...

باصات سابتكو اللي ذكرها الأخ راشد هذي الظاهر خاصة بالنقل بين البحرين والشرقية فقط
أما باصات الـ vip فهي توصلك من الرياض إلى البحرين والعكس صحيح والحجز فيها يتم عند فندق قصر العليا بالرياض وهي باصات مميزة وراقية
أما بالنسبة للفلوس فالأفضل أنك تصرف دنانير بحرينية لأن الفنادق بالذات ماتحسب لك الدينار بعشرة وتاخذ عليك فائدة مبالغ فيها

مشكور اخوي سرور لكن عندي سؤال محيرني كثير ...
وش هالمشكله اللي ابتلشت فيها ؟؟؟ تعرف ايش انت واخوي راشد ...
المشكله هي الغلاء الفاحش في الفنادق يعني فندق 5 نجوم اقل حاجه بـ 600 ريال في الليله وش هذا ؟؟؟
عندكم حل ؟ يعني اخذ من الرياض او من هناك وش رايكم ؟؟
وودي اشتشيركم في الطائره اروح بها او بالباص ؟

هلا اخوي اتصل على فندق اليت سويس

فندق اربع نجوم بمستوى خدمات خمس نجوم بيعجبك و تقدر تروح لمجمع البحرين او الدانة مشي , و اعتقد سعره لليلة الواحدة 30 دينار . بس للاسف الرقم ماعندي الحين اذا عندك اياه اتصل و احجز عليه و بترتاح فيه و هذي نصيحة مني يعني . و بالنسبة للصرف انا قلت لك يحسبون العشرة ريال بدينار بس اخوي سرور قال الفنادق ياخذون زيادة فاحتياط اصرف بحريني .


سلملم

مشكور اخوي راشد المهم انا حجزت ورحلتي انشاء الله يوم الاربعاء اوكي .
ابسأل عن احسن سينما وين ... وبالنسبة لاحسن الاماكن في الليل وين ...
ومشكورين... يالغالين

أخوي أموت بالسفر
الأفضل أنك تحجز فندق من مكتب سفريات قبل وصولك للبحرين
وإذا كنت جاي بالبر ففيه مكاتب سياحية في الجسر بعد ماتخلص جمارك البحرين تقدر تحجز منها في أي فندق وبسعر أفضل من السعر اللي يعطونك اياه لو حجزت بنفسك
ولاتنس مثل ماقلت لك تحاسب الفندق اللي بتسكن فيه بدنانير بحرينية أما باقي المحلات والمطاعم فتتعامل بالريال السعودي
بالنسبة للسينما هناك سينما في مجمع الدانة القريب من الفندق اللي ذكره لك الأخ راشد وفيه سينما السيف في مجمع السيف

أنا مع الاخ راشد في أختيار الفندق .
أولا جديد وقريب من المجمعات التجارية وبعيد عن ازدحام السيارات الموجودة بفنادق 5 نجوم .
واي شئ ترى حاضرين

وهذ رقم الفندق
17558888 وأعتقد ما يقل سعر الليلة 500 ريال

مشكورين يااخوان وماقصرتوا بس انا عندي عقده اني مااسكن الا في خمس نجوم وخصوصا ان الفرق في المتوسط بينها وبين الفنادق اربع نجوم تقريبا من المائه وفيها ...

أفضل حل و أوفر لك:
اطلع على الدمام بالطياره ثم استاجر من المطار ورح للبحرين.

بالنسبع للفنادق عندك سفريات الجزيره اللي على الجسر بعد الجمارك تراها اسعارهم جيده.