اليوم التاسع:


اليوم صحينا الساعه 8,5 واول ماقمنا جلسنا على البلكونه وكان الجو روعه.,,تغيم شوي وتطلع الشمس شوي .

يوم صارت الساعه 9,15 نزلنا نفطر وكان الفطور مطعم الفطور بالطابق الاول ومثله مثل باقي فنادق اوروبا فطور بسيط ومنوع وكانت الطاولات كثيره بس عدد الاشخاص محدود والخدمه حلوه يعني يستقبلونك اول تدخل واي شي تطلبه ما تكمل دقيقه الا هو عندك واهم شي الابتسامه اللي على وجوههم..
بعد ماخلصنا رحنا بسرعه نكمل الجلسه بالبلكونه اللي ماتتفوت والجو اللي مره حلو.

يوم صارت الساعه 12,5 قررنا ناخذ جوله صباحيه بريميني ومنها نمر محطة القطار عشان نشوف اوقات الرحلات لروما تحسبا لاي ظرف .

اول ما وصلنا محطة القطار كانت مره زحمه بحكم انه يوم السبت قلنا مافيه الا اننا ناخذ جدول الرحلات ونطلع عشان نفكر فيه زين لان مافيه غير رحلتين مباشرتين من ريميني لروما اما الباقي كلهم لازم يتغير القطار باحد المحطات.

ملاحظه: حنا رحنا مشي للمحطة وتحسفنا اننا ما اخذنا سيكل لان الناس كلهم معاهم سياكل وقليل الناس اللي يمشون.

بعدها اخذنا جوله على ريميني ومرينا بالمدينه القديمه ودرناها بسرعه وشفنا بطريقنا هذا الباص يدور بوسط المدينه القديمه واغلب اللي راكبينه كبار في السن

بس شكله يغري للركوب:24: :24:




بعد ما خلصنا قررنا نرجع للفندق بالباص ونستعد للروحه لريتشوني واخذنا باص رقم 11 اللي ينزلنا مباشره قدام المريدان ويكمل طريقه لريتشوني

وحنا طول الرحله ما ركبنا غير باص رقم 11 لانه يمر بالاماكن المهمه وهو يبدا من عند الستيشن ويمر بالمريديان وينتهي بريتشوني ويمر طبعا بمحطات كثير بينهم.

ريحنا بالفندق وتجهزنا بعدها وطلعنا من الفندق وسالنا موظفة الاستقبال (الرسيبشن) قلنا لها اذا عادي ناخذ سيكل؟؟ قالت اليوم السبت تصير الشوارع مره زحمه وماراح تقدرون تمشون بسهوله .

قلنا مافيها الا اننا نركب الباص وفعلا رحنا لمحل بيع المجلات واخذنا تذاكر لريتشوني بس كان سعرها 1,5 يورو لانها تعتبر قريه منفصله عن ريميني بس اغلبهم ما يطبقون هالنظام وياخذون التذاكر اللي بـ 1 يورو لريتشوني شكل الوضع عندهم مافيه تدقيق.

يوم وصلنا ريتشوني نزلنا باخر محطه ورقمها 49 واخذ مننا المشوار 20 دقيقه تقريبا لان الباص ياقف كثير ,, وتوجهنا لشارع viale ceccarini وهو شارع للمشاة يتجمعون فيه الناس وعليه محلات كثيره للتسوق ومطاعم وكافيهات ويتفرع منه شوارع صغيره فيها محلات بعد ومع ان الشارع مهب كبير والمحلات قليله الا ان المحلات اللي فيه حلوه وتستاهل التسوق فيها.

وهذي صوره للشارع بالليل





المهم يوم وصلنا كانت الساعه 8 تقريبا والشمس قربت تغيب وكانوا الناس بادين يتجمعون اللي منهم يتمشى واللي جالس يتقهوى واللي يتسوق مع المحلات اغلبها صاكه بس فيه كم محل مفتوحين

ملاحظه: محلات ريتشوني تفتح من 10-1 وبعدها تصك من 1-4 بعدين تفتح من 4 - 8

مشينا الين وصلنا على الكورتيش كان عليه مطاعم وفيه مسرح مبني هناك وكانوا يجهزون لحفله عليه واحلى شي ان المسرح كان على البحر ويقولون انه بالصيف كل يوم فيه حفله على هذا المسرح.

وهذي صوره للحفله




وهذا اسم الفنان اللي يسوي الحفله عشان اذا صار مشهور تقولون شوشو قالت لنا عنه:36_3_2:





قررنا بعدها اننا نتعشا وشفنا مطعم مره زحمه وشكله حلو وقررنا نستنا الين نلقى طاوله فاضيه وفعلا لقينا طاوله بسرعه لان الخدمه ممتازه عندهم واكثر شي ملفت انهم منظمين

وهذي صورة لاسم المطعم




بعد ماجلسنا جابوا لنا المنيو وكان دفتر كبييير ومليان اوراق وفيه انواع واشكال من الاكل (بيتزا –باستا- اكلات بحريه- سلطات- اكلات للنباتيين -لحوم ....وكل مالذ وطاب)

الصراحه احترنا ماندري وش نطلب بس بالاخير قررنا نطلب باستا وبيتزا ..





الاكل كان مررره لذيذ يمكن يكون من الذ الاكلات اللي ذقناها في ايطاليا والجلسه كانت بعد حلوه مع انها زحمه ,, وبعد ماخلصنا طلبنا الحساب وكان 32 يورو وكان السعر مقبول نسبه للمطاعم اللي بالمدن الايطاليه الثانيه ..


ملاحظه: ريميني وريتشوني ارخص من المدن الثانيه بكل شي :السكن – الاكل- التنقلات.


بعد ما خلصنا وشفنا الساعه صارت 12 قررنا نرجع نلحق على الباص لانهم قالوا لنا اخر باص يمشي لريمني الساعه 1,10 وفعلا توجهنا لمحطة الباصات وشفنا الباص يمشي قدامنا حاولنا نلحقه بس ما امدانا
قلنا ما بدهاش نستنا وبالمره اخذنا تذاكر من الجهاز وجلسنا نستنا الباص ونستنا ونستنا ولا جا احد :36_1_29: :36_1_29:

والعالم تجمعوا وبدوا يتضايقون واللي بدا يتوتر:112: واللي يمشي واللي يتافف واخيرا الحمد لله جانا الباص الساعه 1 ويوم ركبنا اثر الشوارع كلها زحمه والمشوار بدال ما ياخذ 20 دقيقه للفندق اخذ مننا 45 دقيقه .

وبعد ما وصلنا الساعه 2 الاربع للفندق اثرنا تعبانين وما بقا الا ننـــــــــــــــــام:36_1_50: :36_1_50:

مواضيع عشوائيه ممكن تكون تعجبك اخترناها لك: