ماذا سترى في فينيسيا ؟؟؟

1- تروح تيرمني تشتري التذكرة التذكرة رايح جاي من روما لفينيسيا على قطار اليورو ستار وهو احسن القطارات 78 يورو للشخص اول شي تروح مكتب الانفروميشن وتاخذ رقم يجي دورك تقول للرجال وين تبغى تسافر واي تاريخ وهو يعطيك القطارات اللي بهذاك اليوم وانت تختار وبعدها رح يقولك عند أي كاونتر تروح توقف لأني رحت وقفت بكاونتر غلط بعد طول انتظار .

2- التذكرة تصمها زي اسمك كل شي فيها له دلالة انا صار فيني مقلب عطاني التذكرة من روما الى فينيسيا ميستري مو لفينسيا لوتشيا فينيسيا ميستري تبعد 15 ميل عن فينيسيا لوتشيا اللي فيها التمشيات المهم انا ما نزلت في فينيسيا ميستري لأن القطار اصلا مشي ومافي احد جا راقب علينا بس بالرجعة اشترينا تذكرة بواحد يورو تركب أي قطار من فينيسيا لوتشيا رح يوقفك في فيينسيا ميستري وتنتظر قطارك هناك بس عشان لا تدوخ خذ التذكرة روما – فينيسيا لوتشيا . وعموما لو صار فيكم مثلي الجهاز كل شوي يقول اسماء المحطات . بالتذكرة رح يكون مكتوب رقم المركبة والمقاعد ورقم القطار اتعلم ميف تقرأ التذكرة ومارح تضيع ابدا انا ما خليت احد بالمحطة ما سألته اهلي شكاكين يقولوا يمكن غلط ليش نوقف هنا ما ادري ايش . بس الحمد لله كل شي كان ماشي تمام .
Corrozz 11 يعني المركبة 11 من القطار
Posti 24 ,27 يعني المقعدين رقم 24 و 27

3- وصلنا فينيسيا لوتشيا رحت وسمعت كلام اخونا في الله ايطالي وكانت مغامرة لأننا ما نعرف اسعار الفنادق وكنت احاول ادخل المنتدى بس ما كنت اقدر اكتب المهم رحت مكتب الفنادق وطلبت اوتيل وقلت لها ابغا شي بحدود 100 يورو قالت خذي فندق ماركوني ثلاث نجوم 120 يورو الليلة وقالت لي هذا ارخص شي عندي اخذت الفندق ورحت وفي فينيسيا يبيعوا الخريطة 2 يورو مهي ببلاش المهم علمتني أي باص اركب الله يهديهم ما يعرفوا انجيلزي يعني يقولوا الارقام غلط الحرمة قالت خذي باص 98 وهي قصدها 28 لأنه اصلا مافي باص مائي رقمه 98 المهم الفندق طلع عند جسر ريالتو كنا نتمشى ونرجع نجلس بالفندق ونتجول بالمنطقة كل الدنيا والسياحة هناك موظف الاستقبال اللي اسمه كارلو انسان متعاون جاب لنا عروض عشا بمطاعم وعروض سياحية تشوف فيها فينيسيا كلها زي الباص حق 110 بس باص مائي وشركة ثانية .. واعطانا الفندق جولة مجانية لمصنع الزجاج وشرحوا لنا كيف يصنع الزجاج بالنفخ وقعد الرجال قدامنا يسوي كذا شي اتذكرت ايام كنت بالمدرسة وكنت معلمة الكيميا مستنفرة على صنع الزجاح ثلاث اسابيع وهي تعلمنا الرجال في خمس دقايق علمنا وبعدين طلعنا لسوق الزجاج وكنت زعلانة لأنو ما كان معي فلوس اشتري هناك الاكسسورات الزجاجية غريبة السلاسل والخواتم وكل شي كان غريب غالي بس غريب ومافي مثله .

4- نصيحة لوجه الله خذ فندق ما يكون وسط حواري في فينيسيا عشان لا تدخل بحواري وتضطر تركب تاكسي خاص حط الفلوس في فندق على الشارع العام احسن لك .

5- اكتشفت ان جسر ريالتو ممكن بالمشي توصل منه لساحة سان ماركو ..
6- فينيسيا مافيها شي غير انها جزيرة من الجمال الفاتن والمناظر الخلابة .
7- جولة بالجندول تكلف 70 او 100 يورو بس انا قلت له خذني وقت اقل ودفعت 50 يورو اهم شي عندي كان اني اركب الجندول لأنك في فينيسيا رح تطفش من البحر كل شوي رح تركب باص مائي ..
8- تذاكر فينيسيا غالية في المواصلات تذكرة الساعة خمسة يورو تذكرة 24 ساعة 10 يورو للشخص بس ما دققوا علينا عشان كذا اشتريتها اول يوم بس وبعد كذا ولا اشتريت شي .
9- فينيسيا بلد الاناقة يعني احنا قلنا موية وما ادري ايش طلع بالعكس البس كويس واتشايك عشان لما تدخل المحلات يحترموك الناس هناك انيقين بقوة .
10- امنية حياتي اني اروح فلورنس او فرينيز على قولتهم بس خسارة ما قدرت اروح .
11- فينيسيا حلوة ويومين قليل عليها فيها اماكن كثير ما رحتها انا جلست فيها بس يومين ساحة سان ماركو وجسر ريالتو وفي شي عند السالوت ما شفته .
12- في ساحة سان ماركو رح تطلع الكنيسة اللي هي ستة ادوار الدخولية 6 يورو وبعدين رح تدخل الدوج بالاس .. وفي اشياء ثانية كل يوم كان يغيروا الصورة مرة بيغ بن ومرة برج ايفل واشوف الناس طابور بس كنا تعبانيين وما رحنا .. وفي سوق في ساحة سان ماركو وجلسات حلوة وانا جلست بناءا على نصيحة اخونا فؤاد صاحب موضوع رحلتي الى ايطاليا بالصور جلست في مقهى مافيه عزف عشان لا تطلع الفاتورة عالية 90 يورو جلسنا هناك والجلسة ترد الروح كان النفر 8 – 10 يورو يعتبر عادي بالنسبة لساحة سان ماركو .. طبعا من 8 – 10 يورو هذا يعني انك تطلب مثلا بيبسي او عصير برتقال او شيبس .. وتسمح لك الحرمة تجلس لو ثلاث ساعات اهم شي تطلب حاجة .. والناس كلها تسوي كذا .. في ساحة سان ماركو فيه الحمام تشتري بواحد يورو الكيس وتأكلهم يطلعوا فوق راسك وياكلو من يدك انا كيفت عليهم وعشان كذا ضيعت كل فلوسي على الحمام وكانت امي تصرخ وتجيب لي بسكوت وتقول وفري الفلوس حرام علييكي احنا اولى فيها .. والله لحظات خيالية خصوصا لما ينزل المطر وانت بالساحة .

13- وانت راجع لبلدك من مطار فامتشينو خلي معاك فلوس السوق حلو وبدون ضرايب وفيه عندهم كل شي 12 يورو على بالهم زي محل كل شي بريالين .. .

14- في اشياء كثير ببالي ولكن ما ادري احس حاست الدنيا فوق راسي .. اكتشفت ان كتابة التقرير صعب موسهل .. وبصراحة ياخذ وقت .. ادعولي اذا استفدتو من الموضوع ..

15- هذي اخر كلمة قرأتها واحنا رايحين نركب الطيارة في عودتنا باي باي روما .. عرفت لحظتها ان ايام ايطاليا انتهت ورح نرجع خلاص كنت مشتاقة للسعودية غرفتي اشتقت لها ... بس الحين نفسي ارجع لايطاليا بصراحة . الصور رح تلاقوها بين الموضوع الحين رح انزل الموضوع اول .. والى رحلة اخرى مع عاشقة الترحال .

مواضيع عشوائيه ممكن تكون تعجبك اخترناها لك: