وعليكم السلام ورحمة الله وبركاته
ما قصروا الأخوان والأخوات في الرد على استفسارج بس أحب أضيف:
أولاً: عن الفيزا ومتطلباتها: الفيزا والأوراق المطلوبة، أخوي عبدالله 86 ما قصر، وطلباتهم باختصارها لج، وهي:
- جواز السفر ونسخ منه.
- نسخة من تذكرة السفر.
- نسخة من حجز الفندق.
- شهادة راتب من عملك موضح فيها الراتب.
- كشف حساب 6 شهور لحسابك في البنك.
ثانياً: الفندق: مثل ما قال أخوي Dr Haz إذا كان كمبرلاند إللي مقابل الماربل آرتش فهو ممتاز ويعاب عليه صغر حجم الغرف فقط.
ثالثاً: الانجليزي في المطار: أبد لا تحاتين اللغة الانجليزية في المطار بتجوفينهم متمللين ومب طايقين عمرهم في بعض الأحيان بس الأمور طيبه وأغلبهم بتلاقينهم هنود، بس أهم شي في المطار إنج تملين الفورمه إللي قبل ما تروحين كونتر الجوازات وفي هذي البوابة في المواضيع المثبته أحد الأخوان مسوي تعريب حق هذي الفورمه وشنو الاجابات المتوقعه بالصور..
رابعاً: التعامل مع غير المتحدثين بالانجليزية: مثل ما ذكروا الأخوان والأخوات لا تحاتين أهم ودودين ويتعاملون معاج بسهوله ويساعدونج..
خامساً: الأماكن إللي ممكن تروحونها: طبعاً ما أدري إذا كان المقصود بالأماكن السياحية فهي كثيرة بس تقدرين تختصرين الموضوع في إنج تروحين جولة سياحية بالبق باص (Big Bus) عندهم محطات كثيرة منها محطة عند حديقة الهايد بارك ورا الماربل آرتش .. ذي الباص يودييج جولة سياحية في معظم المناطق المشهورة في لندن على مدى يومين ...
أما إذا كا المقصود الأسواق والمحلات الكبيرة فعندكم المحلات الموجودة في شارع الأوكسفورد منها لرخيصه مثل محلات (بريمارك) والغالية مثل (السلفدرج) وهناك محلات كثيرة في مناطق ثانية مثل (هارودز) ومحلات (أم أند أمز) وغيرها
وبعد عندكم الأوتلت وهناك أكثر من أوتلت في لندن بس أنا رحت الأوتلت الموجود في (بياستر فيلج)
عموما في توقيعي موجود تقرير عن لندن ممكن تستفيدين منه في معرفة بعض الأماكن إللي يروحونها في لندن وفي تقارير أخرى كثيرة ومتنوعة في هذي البوابة ممكن تطلعين عليها للاستفادة ..
ورحلة موفقة بإذن الله
وأحنا 3 اشخاص جميعنا بالغين !!
رد مع اقتباس
المفضلات