السلام عليكم
شكرا للاخت راعية الموضوع حمامة مكة

انا امس رجعت لابوظبي من مكة والحمدلله الله يسر لي ولاهلي عمرة كانت 4 ايام جميله هاذي الايام هدوء ونظافه ومافي زحمه والسكن متوفر وللمرة الاولى اسكن الهلتون بـ 486 الليلة من زمن طويل .

على كل حال ثاني يوم طلعت من الحرم وكنت محتار شو اتشعى انا وعيالي وفجاءة تذكرت موضوع اختنا حمامة مكة عن فول عم علي وبما ان الموضوع قريته من قبل شهر تقريبا فما كنت متأكد من اسم المحل واسم فندق اجياد المشاعر .
طلبت من الاهل ينتظرو بالفندق وعصرت مخي والشي الوحيد الي كنت اذكرة اسم اجياد . وسالت واحد في ساحة الحرم وين منطقة اجياد وقالي بعد وقف الملك عبدالعزيز روح يمين وامشي 10 دقايق وبعد مامشيت 10 دقايق سألت راعي دكان عن فندق اسمه اجياد قالي وايد فنادق هنية فيها اسم اجياد وذكر لي اسم اجياد المشاعر وكنت تقريبا تحته وطبعا شكرته وطالعت المحلات يسار الفندق واتفاجاء بمطعم فول اجياد واشوف عم علي قاعد خلف الجرة نفس الصورة مالة حمامة مكه وبعد كان ولد عم علي قاعد وعرفته كذلك من صورة حمامة مكه وسلمت عليهم وعجبني المحل لان كل شي فيه جديم حتي غرشة البيبسي تشربها ولازم ترجعها عشان يعاد تعبئتها .

بصراحه الجو العام في المطعم الصغير كان جميل والاحلى ما كان في ولازبون وسألوني من وين تعرفنا وحنا مانعرفك طبعا قلت لهم سالفة منتدى المسافرون العرب وموضوع الاخت حمامة مكه ولكن الظاهر ماعرفو عن شو اتكلم العم علي وولدة ناس طيبين واخلاقهم اطيب .

الي سار بعدين اتخذت قرار ان الاكل في هاي الاجواء مهم وقررت اخون العايله واتعشا لوحدي في مطعم عم علي وبصراحه الفول كان لذيذ وتذكرت كلام الاخت حمامة مكه ان عم علي عندة خلطه سحريه ووالله اني كنت بطلب صحن فول ثاني بس استحت عشان مايقولون هذا ماشاف خير .

وطلبت من عندة سفري للعايله وطبعا اكلت معاهم وسويت عمري ماكلت بالمطعم وعجبهم وايد حتى الصغاريه يبون فول عم علي حتى بالغدا .

آسف على الاطاله ولكن الموظوع يستحق ذلك ..... اخيرا اسمحو لي وشكرا مرة ثانية راعية الموضوع الاخت حمامة مكة .

مواضيع عشوائيه ممكن تكون تعجبك اخترناها لك: