الموضوع: معيدين في قطروأبي نصائحكم يا أهل الديرة؟

السلام عليكم ورحمة الله

قررت أنا وصديقي يكون عيدنا في قطر يعني الوصول راح يكون في 10 سبتمبر والمتوقع يكون أول أيام العيد.
هذه اول زيارة لنا في بلاد الخير، وأبي مساعدة في أختيار فندقين (اقامه ليلتين في كل فندق) بميزانية سكن 1000 ريال لليلة الواحده، وكذلك أتمنى يكون أحد الفندق على البحر، وهادئ، والعرض يكون شامل وجبة الأفطار...

وهذي معلومات يمكن تساعدكم...
الغرض من الرحلة: التعرف على البلد، الراحة والأستجمام.
عدد ايام الأقامة: اربع ايام.
السفر بالسياره.

راح أنتظر ردودكم وأشكركم مقدما على كل جهد ونصيحة وضعتموها لأجلنا.

مواضيع عشوائيه ممكن تكون تعجبك اخترناها لك:

• استفسار عن فنادق قريبه من مطار الدوحة
• تجمهر للطيور
• افكر بزيارة قطر بعد عيد الفطر ومحتاج فزعتكم
• سؤال عن الصرف والتنقل لاهنتوا
• مين يعرف شركة قيم العرب المحدوده؟؟؟
• مؤسسة الشيخ عيد الخيرية في قطر عرض هام
• مسى الخير لجميع الاعضاء
• استفسار لاهل الدوحه ذاهب للدوحه ساعه
• اي فندق
• ابي شالية بمسبح خاص او شاطئ خاص بالدوحة
• تجربة قطرية رائدة
• زيارة سريعه لقطر
• الى اهل دار بومشعل ضروري
• القطريه على
• فنادق قطر
• خدمه بسيطه
• مطلوب عروض سياحية
• المعيار الذهبي الجديد يشيد بتجارب فنادق الريتز كارلتون الأسطورية
• استفسار عن جزيرة النخيل ومجمع فلاجيو
• ×× دليــــل الهــــاتف الشـــامـــل ××

هلا اخوي حياكم الله

بالنسبة للفندق أنا أنصحكم تقعدون في فندق الريتز كارلتون لأنه أفخم فندق في قطر وهو عباره عن منتجع ويطل على البحر وغرفه واسعه وحلوه

والغرفه حالياً عندهم بـ 850 ريال

يعني أنصحك لو تبي تحجز تحجز من الحين قبل لايرتفع السعر حق العيد

يمكن الفندق شوي بعيد بس يستاهل ومافي شي بعيد في قطر لانها بروحها صغيره وانت مثل ماقلت ياي حق الراحه والاستجمام

والفندق الثاني اللي أنصحكم تقعدون فيه هو فندق جراند حياة

جراند حياة قريب من الريتز وهو عبارة عن شاليهات تطل على البحر

وايد حلو لازم تجربونه

بس مب متأكده من السعر

وبالنسبه للأماكن السياحيه أنصحكم تزورون مجمع السيتي سنتر ومجمع فيلاجيو وعندك بعد مجمع اللاند مارك

ولاتنسون تروحون سوق واقف والكورنيش والمتحف الاسلامي -لو كنتوا تحبون المتاحف- وجزيرة اللؤلؤ

جزيرة اللؤلؤة هذي الله يسلمك قريبة جداً جداً من جراند حياة وهي عبارة عن جزيرة صناعيه فيها فلل وعمارات واسواق ومطاعم وتوصلها عن طريق السياره

الله يعطيك الف عافية على الرد السريع والنصائح الحلوه...
للتأكد فقط على تقصد هذا الفندق ritz carlton sharq village
وبالنسبة للفندق الثاني grand hyatt

حبيت اتأكد اخوي لأجل الحجز من النت...
ويعطيك الف عافيه مره اخرى

حياك الله في بلادك قطر


ماقصرت اختنا الغاليه النوري الله يعطيها العافيه


راح اضيفلك فندقين من احلى الفنادق الموجوده الفندقين الي ذكرتهم اختي النوري من افخم الفنادق


وبعد باخيرك با افخم 3 فنادق


فندق الكمبنسكي واذا الفندق فخم جدا واجدد فنادق قطر وهاذا تقرير عنه


http://www.arabtravelersforum.com/travel422134/


فندق دبليو فخم جدا وجنب الفندق الاول وهاذا تقرير عنه


http://www.arabtravelersforum.com/travel271853/


وهاذيلا الفندقين قريبين جدا من مجمع السيتي سنتر الدوحه


فندق فريج شرق وهاذا فندق ومنتجع وعلى البحر وقريب من مطار الدوحه


http://www.arabtravelersforum.com/travel109279/


واي خدمه احنا حاضريلك يا الغالي

يعطيك الف عافيه اخوي قطر 3333

وبصراحة أضافتك رائعه أشكرك عليها، ومشتاقين لزيارة الديرة الله يحفظها لأهلها ودوم عامره إن شاء الله.

اخوي الفندق الاول اسمه ritz carlton بس sharq village هذا فندق ثاني اسمه فريج شرق

ماادري شلون صار عندك هاللبس

على العموم لو تكتب في قوقل ritz carlton بيطلع لك موقعهم وبتشوف

والفندق الثاني صحيح اسمه hayat grand

واذا بتسكن فيه قول لهم انك تبي شاليه لان في عندهم غرف داخل الفندق وأنصحك تاخذ شاليه أفضل

وبالنسبة للفنادق اللي ذكرهم اخوي qatar3333 أولا فندق دبليو w كئيب ومظلم وصغير وايد حتى مافي مساحه للفندق من برا مجرد انك تجي بسيارتك وتدخل الفندق

مافيه حديقه مافيه بركة سباحيه مافيه شي من برا .. كأنك رايح بيت مب فندق

غير عن الريتز اللي كأنه قرية تقعد تمشي بسيارتك في المنتجع لين ماتوصل الفندق

وثاني شي فندق الكمبنسكي عبارة عن شقق وحتى لو كان غرف بس لاتغرك الصور لأن للحين محد سكن فيه وقال لنا تجربته

بس هالفندقين اللي ذكرتهم لك معروفين وشكثر ناس سكنوا فيهم وأنا مجربه الريتز يعني بتضمن ان الفندقين راقيين

والفندق الثالث اللي حطه اخوي وهو فريج شرق ماأنصحك تقعد فيه لان نظامه عباره عن مباني فيها غرف عاديه

وأنا ماأتوقع انك عقب ماتطلع من الريتز اللي نظامه غرف تبي تروح فريج شرق اللي نظامه ايضاً غرف

لازم تغير نظامك وتروح تاخذ لك شاليه في جراند حياة

طبعا في النهايه القرار لك

وأي سؤال انا حاضره

الله يعطيك العافية أختي النوري
اللبس اللي صار لي كان بسبب أحد مواقع الحجز في النت واشكرك على التوضيح..
الخيارات اللي وضعتيها مناسبة جدا، يمكن فقط عند أختيار شالية في قراند حياة راح يكون السعر مرتفع كثير عن الميزانية المرصوده للسكن، وممكن نعوضها بغرفة بنفس المنتجع.
أضافتك فادتنا كثير شكرا لك.

الله يعافيك

ولاتنسى تكتب لنا تقرير عن رحلتك وتقول لنا شسويت في قطر

حتى لو بالكتابه بدون صور

بكل تأكيد و إن شاء الله راح يكون تقرير بالصور ، والمتوقع أن نصف تقريري راح يكون عن المطاعم

هلا والله اخوي واسمحلي مارديتك عليك بسرعه لانه هل ايام كله سهر ونون وما اصحى الا فليل رمضااان هههه!!

اخوي من ناحية الفنادق الي تطل على البحر في كثير راح اقولك عليهم وانت شوف
1 - جراند حياة : افخم منتجع في قطر وجمبه على طول في فندق انت اختار الفندق بعد وايد فخم واسعار الفنادق فيهم مو وايد غاليه يمكن 1200 او 1100

2 - فندق الريدس كارلتون : شوف تره في الريدس كارلتون ههذا فندق اما الريدس فيلا شرق هذا شاليه وبعيد عنه يعني انتبه لاتحجز بلغلط

3 - الفور سيزون
4 - انتر كونتيننتال
شوف كلهم حلوين ويستاهلون وكلهم جمب بعض في المنطقه الدفنه الي هي افخم منطقه في قطر
ـــــــــــــــــــــــــــــــــــــــــــــــ
المولات : راح ارتبلك من اصغر الى اكبر
1 - سيتي سنتر (( فيه 14 سينما ووايد عود ))
2 - فيلاجيو مول (( فيه 13 سينما و 1 سينما اي ماكس الي هي ثري دي خاصه )) في هاي المجمع لاتنسون تروحون مدينة الاعاب روحو سيارات الفورملا وايد كبار وحلوين يعني حلبه وايد كبيره ولاتنسون روحو ببلات لاتروحون بثوب لان بثوب جنه مايدخلونكم
3 - لاندمارك (( 4 سينما ))
4 - حياة بلازا ( مافيه سينما )
5 - رويال بلازا (( 5 سينما ))
6 - ذامول (( 3 سينما ))
7 - سنتر بوينت
ــــــــــــــــــــــــــــــــــــــــــ
اماكن مفتوحه ينصح بزيارتها
1 - جزيرة الؤلؤه
2 - سوق واقف
3 - اكوا بارك قطر (( مدينة مائيه اول يوم افتتاح في اول يوم عيد الفطر )) وانتو جاين قطر شوفو الخط من عقب الجمارك على يدكم اليمين انتبهوا شوفها اهناك عشان اذا بتروحون تروحون لها))
3 - الكورنيش
ـــــــــــــــــــــــــــــــــــــــ
الحين راح اكتبلك افضل الاماكن الي ذكرته وفوق والي تعتبر من افضل شي في قطر

1 - جزيرة الؤلؤه
2 - فيلاجيو مول
3 - سوق واقف
4 - اكوا بارك قطر
،ـــــــــــــــــــــــــــــــــــــــــــــــــ ـ
الحين راح ارتبلك الاماكن جمب بعض اختصر لك الوقت
1 - سوق واقف + الكورنيش روح الكورنيش فليل 12 قبل لاتنامون شربو كرك اهناك
2 - جزيرة الؤلؤه + سيتي سنتر
3 - فيلاجيو مول + حياة بلازا + اكوا بارك
اما الباقي شوي بعيدين عن بعض بس لاتخاف الدوحه ماتضيع فيها

والحين اسمحلي اني تاخرت على الرد بسبب ضروفي في النوم هههه

والله ما قصرت أخوي رووك شغلك مرتب وراح أطبع منه نسخة، ماخليت شي الله يعطيك العافيه.

الله يعافيك واتمنى انه مايخيب ضنك انشالله