بسم الله الرحمن الرحيم
موعد السفر + مطار الكويت + الخطوط الجوية القطرية + مطار الدوحة
خلصنا الفيزة وكل الامور واسلتمنا فيزتنا واستلمنا التذاكر السياحية اللي خذيناها من مكتب الفيزا بالكويت
وانتظرنا تقريبا شهر لموعد السفر
وطبعا تخللها تسوق لاحتياجات السفر :
1- جنطتين كبار وجنطتين صغار ( هاند باق ) = يفضل الجنطتين الكبار ملونين علشان بوقت اخذ الجنط الا انت عارفهم
2- مظلة = تحسب للاجواء اللندنية
3- ملابس شتوية ثقيلة للي يبي يسافر شهر يناير وشهر فبراير والدس لابد منه
4- صيدلية صغيرة = ادوية للصداع وللانفلونزا وفوار للحرارة
5- بلاك عالمي
6- بطاريات للكاميرا نظام الشحن عدد 4 بطاريات
7- شحن للتلفون متنقل = هالشحن تاخذه معاك بره وانته تمشي يشحن من غير وايرات
8- برنامج Garmin + برنامج مواعيد الصلاة والقبلة
هذي بعض اللي اتذكرها ويمكن تفيدكم
وحان موعد السفرة
كان موعد طيارتنا الساعة 10:30 , فاتجهت انا امبجر لمطار الكويت الدولي لاخذ التذاكر وشحن الجناط وخليت زوجتي في بيت اهلها تسلم عليهم واخذها قبل ساعة من موعد الطيارة , وفعلا تمت العملية بسلاسة في مطار الكويت وخصوصا في كاونتر القطرية كانوا جداً متعاونين لدرجة انهم قالولي راح نحطك في الكراسي الاولى بالطيارة ويم الدريشة خصوصا اني حجزت انا بالنت والجيك ان سويته بالنت لكن اهما زيادة كانوا يبون راحتي حطوني في كراسي ممتازة ويم الدريشة فكانوا جداً متعاونين
وبعد ما خلصت من الكاونتر واستلمت التذاكر وورقة استلام الامتعة رحت بيت زوجتي وقعدت عندهم شوي وبعدها خلصنا ورحنا مطار الكويت على الساعة 9 ونص وقعدنا في قاعة اللؤلؤة في مطار الكويت ننتظر موعد رحلتنا
والساعة 9:45 قالوا انه الحين موعد دخول الركاب للطائرة !
سألنا موعد الطيارة 10:30 ومكتوب بالتذكرة موعد الدخول 10 , ردوا قالوا لانه الركاب كلهم متواجدين + الاحتياطات واجب عشان الطيارة ما تتأخر في الوصول لاي مكان ! يا سلام على الوقت المضبوط برافوا يا القطرية
واتجهنا إلى البوابة ودخلنا الطيارة وكانت الطيارة من درجتين الدرجة الاولى وهي وسيعة وهذي كانت درجتنا في الذهاب من الكويت إلى الدوحة ترانزيت لمدة ساعتين + الدرجة السياحية وكانت أيضا مريحة ووسيعة يعني لو حبيت احجز ما عندي مشكلة احجز على السياحية لانها نظيفة وخدمتهم ممتازة
الخطوط الجوية القطرية من الكويت إلى الدوحة كانت ممتعة ومريحة والوجبات جميلة وجبة وحده خفيفة تختارون من القائمة تبون عيش وربيان او كباب وطلبنا كباب مع عصير اناناس وكانت اكله خفيفة ولذيذة
وبعد ساعة وربع وصلنا ولله الحمد الدوحة وكان الوصول رائع والهبوط اروع وجميل وهاديء وناس محترفة
وبعد الطيارة نزلنا وخذانا باص يوصلنا لقاعة الانتظار الخاصة بالترانزيت لرجال الاعمال والدرجة الاولى في مطار الدوحة
وفعلا قاعة الانتظار تخليك ما عندك مشكلة تنتظر اكثر من ساعتين ترانزيت
كل شي متوفر من سبل الراحة , تكرمون الحمام داخله في دش اذا حاب تتسبح وفي ايضا بوفيه جميع المأكولات الثقيلة والخفيفة متوافرة , غير خدمة الوايرلس وسريع , ومكان لالعاب الأطفال ومكان للبلي ستيشن 3 , شي احترافي
هذا لليوم وان شاء الله المره القادمة راح نستعرض من الدوحة إلى بريطانيا
إلى اللقاء
رد مع اقتباس
والله شوقتنا بالتقرير ... متابعين
المشاركة الأصلية كتبت بواسطة فهد98
المفضلات