في البداية أحب اشكر القائمين على هذا المنتدى الأكثر من رائع واللي استفدت منه وايد وايد
شكرا مره ثانيه :113: .... واقدم لكم موجز الرحله
قضيت في ايطاليا اجمل اسبوع ، صحيح ان الفترة كانت وايد قصيرة بحكم ظروف الاجازة لكن ولله الحمد لفيناها وشفناها واستانسنه وااااايد :bounce8:
حبيت انقل لكم جدول الرحله حتى ان يكون مفيد للي حابين يسافرون لايطاليا مستقبلا خلال فتره محدوده ... انصح الكل يسافر لها لانها وبصراحه اكثر من راااااائعه حيث الماء والخضره والوجه الحسن
ما أطول عليكم وندخل بجدول الرحله .... احنا كنا 3 اشخاص شباب مسافرين، انا واختي واخوي ( سفره خفيفه ظريفه) :36_15_17:
حجزنا على الخطوط الجويه القطرية كويت – الدوحه – ميلانو والعوده روما – الدوحه – الكويت الخطوط كان مستوى خدماتها وايد عالي وراقي بنفس الوقت ... الله يعطيهم العافيه
ميلانو ... والمناطق المجاوره
اول يوم وصلنا ميلانو وكان الساعه 8:30 صباحا ، توجهنا من المطار للفندق والحمدلله بسرعه سوينا اجراءات التسجيل لان كان لنا حجز مسبق من الكويت وبعدها دخلنا في نومه الى الساعه 12 الظهر
اول ما صحينا كان الجوع ذابحنا ... نزلنا الاستقبال واخذنا خريطة المنطقة وتعرفنا على اسلوب التنقل وانصحونا نستخدم الترام او المترو (مترو الانفاق) لان اوفر واسرع للتنقل وفعلا استخدمنا الطريقه هذي طول فترة وجودنا في ميلانو وعلى فكرة تذكرة الاستخدام لمرة واحده بيورو وتذكرة ال 24 ساعه ب 3 يورو يعني تستخدمينها طوول اليوم
توجهنا اول يوم الى ساحة "الدومو" وهي ساحه كبيره واسعه تحيط فيها المباني الاثريه واللي حاليا كلها محلات تجارية ومبنى الدومو الرئيسي اللي هو الكنيسة. تمشينا بالساحه وتغدينا وشربنا القهوه واكلنا الايسكريم الايطالي اللذيذ وقضينا فيها 3 ساعات ممتعه، وكل ما تاخر الوقت تبدأ تطلع الناس الغريبه تشوف اللي يعزف واللي يرقص واللي يبيع اشياء غريبه وتشوفهم متناثرين بكل صوب بعدها توجهنا للفندق وكملنا نوم الى الصبح
ثاني يوم كانت الرحلة الى فينيسيا (البندقية) وهي المدينة المائية في ايطاليا ، كانت الرحلة مدتها بالقطار السريع ساعتين ونص تقريبا لكن ما تحسين بالوقت من المناظر الجميله اللي تمرون عليها وتشوفونها، وبعد ما وصلنا لها قمنا نتمشى ونشوف المنطقه ، ركبنا الجندول ( كان غالي شوي ) وتمشينا مدة نص ساعه وشفنا المنطقه وبعدها كملناها مشي على رجولنا ودخلنا المحلات وتسوقنا ( كانت غاليه اسعارها) والاكسسوارات عندهم كان خياااال ، وكملناها مشي، وبعدها تغدينا، ثم كملنا مشي الى ان وصلنا الى ساحة ( سان ماركو) الاكثر من رائعه ، كانت ساحه واسعه وكبيرة وتحيط فيها المناطق الاثرية واللي هي حاليا تستخدم ككنائس ودخلنا وتمشينا فيها وبعدها أخذنا قارب (تاكسي مائي) ووصلتنا الى محطة القطار وردينا الى ميلانو – وصلنا الساعه 9 بالليل
بصراحه فينيسيا كانت اكثر من رائعه وتكفيها زيارة يوم واحد
اليوم الثالث قضيناه في ميلانو ... رحنا تمشينا فيها وفي اسواقها ودخلنا كنسية الدومو واللي كانت الزخارف والتماثيل فيها اكثر من رائعه ومبهره بنفس الوقت ... وأكلنا الايسكريم وشربنا الكبتشينو
اليوم الرابع توجهنا الى منطقة (كومو) اخذنا القطار من ميلانو الساعه 10 صباحا ووصلنا خلال نص ساعه تقريبا
عباره عن منطقه هاديه وفيها بحيره كبيره ، اول ما وصلنا اخذنا قارب وتمشينا لمدة نص ساعه كان الجو رااااااائع واكثر من رائع ، البحيرة تحيط فيها الخضره والجبال، بعدها نزلنا من القارب وقمنا نمشي على رجولنا وشفنا المنطقه بالكامل وشفنا مبانيها التاريخيه واسواقها الحلوه الرخيصة – كان في محلات تبيع الشنط والاحذيه والملابس بأسعار خياليه ورخيصه فاشترينا واشترينا واشترينا
تغدينا الساعه 4:00 العصر والساعه 5:00 رجعنا الى ميلانو
وصلنا الفندق الساعه 6:00 ارتحنا وبدلنا ملابسنا ونزلنا نتمشى ونشرب قهوه ورجعنا الفندق الساعه 9 بالليل
اليوم الخامس والأخير في ميلانو ... توجهنا الى استاد كرة القدم (سان سسيرو) لان اخوي كان يلح ويحن من اول يوم وصلنا ،، كان استاد ضخم وكبير وعلى فكره يعتبر الاستاد الخامس على مستوى العالم من حيث الحجم :soccer_h4 اخذنا تور في الاستاد وفي المتحف اللي فيه .. كانت رحله حلوه واكثر من رائعه
رجعنا الفندق وارتحنا شويه وردينا للسوق نكمل التسوق وبعدها اخذنا اغراضنا ورحنا لمحطة القطار واخذنا القطار الى روما ( اسرع قطار يوصل روما خلال 4 ساعات وطبعا خلال رحلتنا كنا نمر على المزارع والخضره ) .... ووصلنا روما الساعه 9:00 مساءا
أخذنا تاكسي ورحنا للفندق وسيييييده الى الفراش ونوم الى الصبح
يومين في روما
اول يوم صحيت الساعه 7 ونص صباحا .. طليت من دريشة الفندق والاقي تحتنا سوق (بسطات) بسرعه قعدت اختي وقلت لها ... نزلنا تريقنا وضبطنا تذاكر العوده للديره عن طريق الفندق ورحنا للسوق وتمشينا ، كان رخيييييييص فيها بضاعه صينينة وفيه ايطاليه حتى اصحاب البسطات يقولون لك وفيه صراحه بضاعه ما تتطوف وخصوصا الاحذيه الايطاليه كانت رووووعه
ردينا الفندق وحطينا اغراضنا ونزلنا ,, بعدها رحنا الاوت لت ( وهو مجمع تجاري فيه بضاعه من ماركات عالميه تباع بخصم من 30 – 70 % ) وقضينا بالمجمع يوم كامل تمشينا واشترينا وردينا الفندق الساعه 7 بالليل ارتحنا ساعه وبعده توجهنا الى الساحه الاسبانية وكان مكان ممتع وتشوفون الناس متجمعه والباعه المتجولين حاطين بضاعتهم ، تمشينها بالساحه وصعدنا الدرج الطويل وبعدها تمشينا بالشوارع اللي جنب الساحه الى ان بدت الدنيا تظلم واخذنا تاكسي وردينا للفندق :101:
اليوم الثاني سويناها جوله في روما وحجزنا مع قروب سياحي عن طريق الفندق لان هذا اخر يوم لنا في ايطاليا فحبينا نشوف كل شي ... ابتدينا الرحله الساعه 8 صباحا ورجعنا الساعه 8 بالليل
زرنا كل المتاحف والآثار اللي في روما وكان في الرحله غدا .. اهم المعالم اللي زرناها الكولسيوم ، نافورة روما الشهيرة ، ساحة الفاتيكان ، والعديد من الآثار العجيبه.
بالليل جهزنا الشنط استعدادا للسفر والعوده الى الكويت
في اليوم التالي تريقنا والتاكسي كنا حاجزينه قبلها بيوم .. اخذ الاغراض وتوجهنا الى المطار ومنها الى الكويت
طبعا الوقت ما كان كافي ان نزور المناطق المجاوره مثل فلورنسا وبيزا ونابولي ... اوالجزر القريبه لكن انشالله لنا عوده لايطاليا مستقبلا لانها بلد أكثر من راااااااائع
هذي رحلتنا باختصار وانا حاضره لاي استفسار حسب معلوماتي البسيطه
نسيت لا اقولكم ان الايسكريم عندهم اشكاااااااال وانوااااااااع ... لذيذ لذيذ لذيذ والافضل انكم تاكلونه من محلات الايسكريم المتخصصه مو من السيارات المتجوله لانه يكون افضل بكثير وهذا غير الكابتشينو والتوب كوب .. ما اوصيكم علييييييه
معلومات عامة للاستفادة :114:
المدة من الكويت الى ايطاليا 7 ساعات تقريبا
العمله هي اليورو
التنقل اما الباصات او المترو او التاكسي ( التاكسي هو الاغلى)
الوضع هناك آآآآآآآآمن وسهل التعامل معاهم مع ان اللغه الانجليزية عندهم ضعيفه
حطوا بالكم من الاكل لان اغلب اللحوم المستخدمه هي الخنزير
تأكدوا انكم تحجزون فنادق قريبه من وسط المدينه حتى توفر عليكم مصاريف التنقل
الذهاب الى الاوت لت يكون عن طريق الحجز من الفندق لان المشوار يكون اوفر لكم لان المركز يكون بعيد عن المدينة سواء في روما او ميلانو
يفضل تطلبون جدول رحلات القطار الى المناطق من الاستقبال بالفندق وممكن تحجزون عن طريقهم قبل بيوم
الاكشاك اللي منتشره بالشوارع تحصلون عندها تذاكر الباصات والمترو
اجهزة البنوك والسحب متوفره بكل مكان والافضل انكم تصرفون فلوسكم من الديرة
اكثر الجاليات انتشارا هي الهنديه والبنغاليه والصينية وفيه شويه عرب
بخصوص الضرائب ... بعض المحلات تصرف لج ورقة التاكس فري واللي ممكن انك تستردين فلوسك عن طريق المطار او محطات القطار لكن احيانا يطلبون منك مقارنة البضاعه بالفواتير
مهم يكون معاكم خريطة كل منطقه واللي تلقونها بالمطار او الفندق حتى تساعدكم في كل تنقلاتكم وخصوصا بالباصات والمترومع تمنياتي لكم باجازه سعيده
.مواضيع عشوائيه ممكن تكون تعجبك اخترناها لك:
- رحلة الأحلام روما البندقية باريس سويسرا النمسا بكاميرا احترافية
- اسفسار الى جهابزة السفر الى ايطاليا؟ بس هههههه
- واخيرا ياايطاليا
- استفسار بخصوص نموذج السفار ساعدوني يا شباب
- شراء شقه في روما
- شباب بنات أبي مساعدة
- زواجي في ومحتاج مساعدتكم
- أسئلة عن مدينة ميلان؟
- فزعة ياجماعة ابغا مساعدتكم
- نداء الى اصحاب الخبرة والمختصين في ايطاليا ارجو مساعدتي
- ممكن مساعده الله يخليكم
- مساعده بالفيزا والإتصالات
- خبراء القطارات ارجو الدخول؟
- الجنبلاطي ساعدنا في الطقس
- معارض ايطاليا
- منحة دراسية لمدينة بولونيا
- ريمني ولا رتشوني
- مساعدةبعض الأسئله عن رومافينيسيا
- محتار بين شهر أغسطس وأبريل لإيطاليا وكم التكلفة تقريبا
- رحلتي الشتوية للديار للأوربية تقرير مصور
رد مع اقتباس
المفضلات