الموضوع: يا اهل الخبرة فزعتكم

السلام عليكم ورحمة الله وبركاته

اشكركم على المجهود المبذول وعلى هالمنتدى الاكثر من رائع اللي جبرني اني اشترك فيه


وطبعا لا يخفى عليكم اني استفدت من بوابة ماليزيا وتايلند كثير لشهر العسل في فبراير الماضي


وحبيت اخذ رايكم ياهل اوروبا وكلي ثقة فيكم وبارائكم




انا في فصل الشتاء الاوروبي بعد الموسم راح ازور اوروبا باذن الله


ومخطط اني اروح لمدريد وباريس وميونخ وزيلامسي و فيينا في 20 يليلة ان شاء الله


شرايكم في تخطيطي هل هو متعب؟
ابي منكم ترتيب ابتدي وين واخلص وين ؟
وانا افكر ان اتنقل بالقطار بين هالمناطق شرايكم بهالنقطة؟


طبعا الرحلة فيها اناوزوجتي فقط


واشكركم على المجهود الجبار بالمنتدى الروعه باعضائة

مواضيع عشوائيه ممكن تكون تعجبك اخترناها لك:

• اسبانيا شهر
• رحلات القطار في اسبانيا
• سؤال غريب شوي عن الفنادق في اسبانيا
• عاجل سانتاندير أو خيخون ؟؟ ومعلومات تذاكر القطار
• طلب لمن لديه وقت
• احتاج مواقع حجز اكواخ في الشمال
• من اسبانيا لفرنسا
• استفسار مهم؟؟؟
• ابي مساعدتكم ياخبراء اسبانيامسافر اول مره ﻷسبانيا
• رحلتي بعد اسبوع وابغى مساعدتكم تكفوون
• مدينه الفن و العلمفلنثيا
• تكفون انا داخله على الله ثم عليكم
• خبراء اسبانيا ارجو ألمساعده
• كيف اقسم رحلتي بين اسبانيا وفرنسا ؟
• أريد سكن نظام شقق في الأندلس أوغرناطة
• تجربتي مع الغلاء في القرية الاسبانيه
• عاجل بخصوص سان سبيستيان
• رحلة كروز استفسر فندق ميلايا بنسكن في برشلونة في فندق Melia خمس نجوم
• اريد السفر الى اسبانيا
• شنو لازم أعرف عشان لا يقصون علي؟

أرى أن اختيارك كله عواصم ( يعني ما تشوف شي في البلد اللي بتروح لها )
زيلامسي كلها ثلوج في الشتاء وما أدري هل أنت من محبي الثلوج أم لا
أرى أن تخصص لأسبانيا 12 ليلة تقسمها بين مدريد وبرشلونة ومدن الآثار
ويبقى عندك أربع ليالي في باريس
وأربع ليالي تكون في أي مكان آخر
والتنقل يكون بالطائرة للمسافات البعيدة وبالقطار للقريب

ماشالله اخوي استفدت من بوايتي مالزيا وتايلاند ومجموع مشاركاتك 4 وكلهم عنوانهم فزعه
صرنا مكتب استعلامات بس الناس تدخل تسأل وتروح
ياخي دامك استفدت على الاقل جاوب على استفسارات البعض في ذيك البوابات ولا حط لنا تقارير

ياخي اذا انت مب راعي فزعه ليش شاط عمرك احشم حالك عن هالكلام

وبعدين انا كتبت في كلامي ان انا الوضع جبرني واخيرا اني اسجل في منتدى مع ان انا في حياتي ما اقتنعت اسجل في منتدى من قبل هاي اول تجربه لي وشكلك انت بتخليني ماحب اشارك حتى اهني و احتك بالناس عن طريق النت لاني طول عمري كنت متعقد منها وماحبها


ومثل ما قلت توني راد من شهر العسل وليحين ماعندي الخبره الكافية لكتابة تقرير و الواحد ما يسوي تقرير اي كلام واذا انا جفت في سؤال اقدر افيد احد فيه راح افيده ما بنتظرك تخبرني ان افيده
وهالمره اذا ماعندك رد سنع لا ترد على مواضيعي الشيخ


والسموحه

تعوذوا من إبليس
والموضوع بسيط
ومعليش أخوي ولد سند شف ردي فوق وعطني رأيك

يقولك يالشيخ لجل عين تكرم الف عين

والله يالغالي انا رحلتي ضروري اروح فيها مناطق ثلوج لان هالشي حلمي
وانا اخترت مدريد لانها بلد فريقي المفضل وودي اروح لهم مباراة واخترت باريس لان زوجتي حلمها زيارة باريس والنمسا لان الطبيعة عندهم خيال وودي ازورها وميونخ لانها في طريق النمسا وللسوق

طبعا اعتمادا للخبره والراي السديد انا باخذ رايك انت قبل فكرتي لكونك افهم مني في المنطقه وبقيت نصيحتك عقب ما بينت لك اسبابي و الرحلة ماعندي مشكله لو اخليها من 20 ليله او اكثر

وطبعا اليوم الصبح خبروني ان اجرب اجازة اقدر احصلها في فبراير فسفرتي باذن الله بتكون في فبراير المقبل بس بغيت اخلص اموري من حجوزات في شهر نوفمبر فتخطيطي ابتدى من هاللحظه

واخصص في ردي الشي الكبير لمجهودك وكل كلمات الشكر ماتعبر اللي بداخلي من امتنان لك ولاعضاء المنتدى كلهك وحتى اللي هاجمني خخخخخخخخخ

الله يعطيكم العافية

أسبانيا أبشر لا تشيل هم
فرنسا اكتب لك استفسار في البوابة الفرنسية وأمورك تضبط ما عليك أنا حدي باريس
المدن الجيدة في أسبانيا شتاء هي
برشلونة - مدريد - مدن الآثار ( قرطبة وغرناطة وأشبيلية )
لو حبيتوا مدن ساحلية ممكن تروحون لساحل ( كوستا ديل سول ) الي فيه مدن ملقا و بينا المادينا وفونخيرولا وماربيا وكلهن قريبات جدا من بعض وممكن تروحون لبالنسيا وأليكانتي
مناطق الثلج والتزلج في إسبانيا منطقتين واحدة بقرب مدريد والثانية قرب غرناطة
أفضل وسيلة للتنقل داخل أسبانيا هي السيارة فلو استأجرت سيارة راح تستمتع أحلى متعة

مشكور على تفاعلك يالغالي وانا تقريت في ركن فرنسا تقارير وحبيت موضوع الريف الفرنسي والتنزة بالسيارة فاي افضل استاجر سيارة في فرنسا او اسبانيا؟والمدن اللي ذكرتها لي كم ليله اقدر اقضي في كل مدينة يعني ماعطيها اكثر من حقها مدريد و برشلونة معني ماحب نادي برشلونة ( متعصب للملكي ) واشبيلية ؟تاجير السيارة في اسبانيا كم يكلفني بالتقريب احنه شخصين انا وزوجتي ؟اشكرك على مساعدتي

استئجار السيارة في أسبانيا تقريبا يكلف اليوم في حدود 30 يورو يعني 150 ريال
لو استأجرت سيارة في إسبانيا من برشلونة ممكن تسافر بها إلى نهاية رحلتك في أسبانيا مستخدما طريق الساحل إلى ماربيا ثم تمشي لمدريد بحيث تمر على كل المدن اللي بحطها لك تحت بالترتيب وعدد الأيام
برشلونة 3 أيام
بالنسيا أو أليكانتي يومين
غرناطة يوم
ماربيا أو أي مدينة قريبة منها ( ملقا - فونخيرولا - بينا المادينا ) 3 أيام
قرطبة يوم
مدريد 4 أيام تتخللها زيارة طليطلة

والفندق ابيه يكون اقتصادي بس مب على حساب الراحه والرفاهيه يعني ابي شي معقول هاي اللي في بالي

انا حسب اتفاقي معاك اخوي ان بستاجر سيارة باذن الله

بس سفرتي ومثل ما خبرتك ان اجرب اجازة حصلتها في فبراير فبيكون تاريخ 24 فبراير تبتدي رحلتي لمدة عشرين ليلة في اسبانيا وفرنسا

اهي مثل ما تقول يات فرصه وقلت دام اني ما حصلت اجازة الا في فبراير قلت بخلي السفرة احتفال مرور سنة على زواجنه في نفس الوقت فبراير

ما تقصر يالشيخ وخلني اتاكد من كلشي واعطيك الامور بالضبط شلون

ما قصرت يالغالي واسمح لي تعبتك معاي وعسى الله يوفقك دنيا واخره