الموضوع: برشلونه في أيام رحلة شبابيه

السلام عليكم ورحمة الله وبركاته جميعا ،

ان شاء الله في هذا التقرير ، راح ناخذكم في رحلة الى مدينة برشلونه .. المدينه الأوروبيه الجامعه لكل شي ،

جامعه لطيبة الشعب في التعامل ، جامعه لوجود البحر ، والأسواق ، والتاريخ العريق ، الجبال الجميله ، والأكل اللذيذ ...

برشلونه مدينة تقع في شرق أسبانيا ... وفي القطاع المعروف بالقطاع الكتلوني ... لهم علمهم الخاص والموجود في شعار نادي برشلونه ... اللي يميز برشلونه هو ان الشعب الأسباني يحب السهر ، ويحب الأكل !!

وجبة العشاء عندهم تبدأ من الساعه 12 بالليل !!! يعني المطاعم لا تشيل همها ! مفتوحه لوقت متأخر !

واللي يميز برشلونه عن مدريد ، ان الشعب متأثر بالسياحه ، يعني ريلاكس !

نبدأ التقرير ...

العدد 3 شباب ... يعني رحلة عزوبيه طال عمركم ...

الخطوط
KLM
وياريتنا ما أخذناها ... في العوده من مطار امستردام الى مطار البحرين ،، تعطلت الطياره وخلونا داخل الطياره لمدة ساعتين ، بعدين قالوا تفضلوا انزلو المطار !!! وراح نرشدكم الى رحلة ثانيه ... واستفدنا صراحه بمبيت ليلة مجانيه على حساب الـ KLM في مدينة امستردام ...

الفندق
شقق من اروع مايكون ، بصراحه ، مهما تكلمت عن روعة الشقه اللي اخذناها ما راح يكفي الوصف ، مرتبة احسن ترتيب ، نظيفه لأبعد مايكون ، فيها 3 غرف ، ومطبخ متكامل من كل شي ( احسن من مطبخ بيتنا ) ، وحمامين خمس نجوم ، غساله ومجففة ملابس ، مكواة ، صاله مجهزه بطاولة طعام مع 6 كراسي ، وتلفزيون LCD ، نافذة الصاله كبيره وتكون ممتازه في الصباح الباكر ، وحتى الستائر بالكهربه شغاله !! يا عيني والله ... وسعرها كان 600 ريال سعودي لكل ليله ...

مشكلة الشقه انها بعيده عن وسط المدينه ، يعني 5 دقايق بالقطار ( الأندر جروند ) !
وفي نفس الوقت ، هدوء في الليل بعيدا عن وسط برشلونه ...

وهذي صوره للصاله ... لا تواخذونا عالكركبه يا جماعه ... وعالعموم الصوره هذي وقت الظهر ! يعني الستائر ممتازه ...



وهنا رابط موقع الشقق نفسهم ،

http://www.apartmentsapart.com/Europ...s/Detail/17068

معلومه مهمه !

المكتب اللي يعطيك المفتاح ويوقع معاك عقد الإيجار موجود في قلب المدينه بعدين اخذنا القطار الى الشقه ! يعني السالفه متعبه من ناحية الشنط !! وخاصه اذا اول مره تجي المدينه !! ما تدري وين تروح ...

في الخريطه التاليه ,, تقسيمه سريعه لأهم مناطق وسط مدينة برشلونه ...



رقم 1

الساحه المشهور جدا في وسط برشلونه والمعروفه بـ بلازا دي كاتالونيا او بلاسا دي كاتالونيا مثل ما ينطقها الأسبان ،
الساحه مشهوره بالزحمه والجلسات الروعه ، عشان تاخذ استراحه ، وحولها 4 مداخل لمحطة القطار الأرضي ،
اسم المحطه
كاتالونيا
وانصح الأخوان بالنزول عندها ومن ثم الإتجاه الى .. الشارع الشهير ( لا راملا )
وهذي صور في الساحه ومثل مانشوف النافوره الجميله وبعض التماثيل الحلوه يمين يسار وكراسي استراحه ، وناس تبيع اكل للحمام ومشروبات غازيه وعصيرات ...



الرفق بالحيوان ... ... طبعا كيس الأكل الواحد يكلف 2 يورو



رقم 2

أشهر شارع في برشلونه والمعروف بـ الرامبلا او كما ينطقها الأسبان ( لا راملا ) ،،، حرف الباء ما ينطق هنا !!

محطات القطار اللي تاخذك على لا راملا هي

- كاتالونيا Catalunya ( بداية الشارع )
- ليسيو Liceu ( منتصف الشارع )
- دراسانس Drassanes ( نهاية الشارع )

الشارع هذا مشهور بالإزدحام ... يعني خلك حريص على محفظتك

ومشهور بالمطاعم اللي تقدم الوجبات الخفيفه المعروفه بإسم ( تاباس - Tapas ) ... وراح تلاقي الناس هناك جالسين وكل واحد قدامه كاس كبييييير فيه شراب لونه عنابي مثل الفيمتو ... اسمه سانغريا Sangria وهو شراب الله يعيذنا وياكم مليااااان كحول وشوية عصير !!! بس شكله يفتح النفس

نقطه مهمه ،

وانت تمشي في لا راملا متجه الى البحر ، المنطقه اللي تقع على يسارك ممتازه جدا من ناحية الأسواق والمطاعم والأماكن السياحيه ، وتعتبر اقدم منطقه في برشلونه ، يعني انصحكم تدخلوا الشوارع الجانبيه اللي على اليسار وتاخذو جوله ، ولاتنسوا الآيسكريم الإيطالي ( Gelato ) .. والفلافل !!
بصراحه الفلافل رهيييييييب .. وطريقة التقديم احلا وأحلا ...

شوية صور من لا راملا ...

مدخل لا راملا من ناحية البلازا ... بلاسا دي كاتالونيا



هنا نلاحظ الناس اللي تقدم عروض حلوه ، طبعا هم واقفين ويترجوا منك يورو او نص يورو بعدين يبدأ العرض حقه ، والا ما يعطيك وجه !!





برشلونه تشتهر بالسوق الشعبي ( لا بوكيريا ) للحوم والأسماك والفواكه والخضار ... سوق مزحوم وفي نهايته افضل مطاعم التاباس ، وبإمكانك تشتري سمك مثلا او لحم وتروح الى مطعم ويسويها لك على كيفك !!

وهذي صوره الى مدخل السوق من ناحية لا راملا ...


مقابل مدخل السوق ، في شارع يؤدي بك الى ساحه اسمها بلازا ريال ( بلاسا ريال - Placa Real )
الساحه هذي جميله جدا وفيها افضل مطاعم الأكلات الشعبيه ... وبإمكانك تاكل فيها
الأكله اللي اشهر من نار على علم ، هي أكلة الباييا Paella
عجييييييييييبه من كل النواحي ،

رز مطبوخ بشكل عجيب
وفي الصوره احنا طلبنا باييا خضار مع ربيان بالثوم ...


مثل ما ذكرت ، وانت متجه للبحر ، اي شارع على يسارك من الراملا ادخل فيه وشوف الأماكن الحلوه ...

وان شاء الله راح اذكر بعض الأماكن الفرعيه من لا راملا في وقت ثاني ...

في نهاية الشارع ، راح تلاقي رساااااامين وااااااجد ، يرسمون كاريكاتير او رسمات عاديه ،
وياريت لو تاخذ لك تذكار اذا حبيت ...

ينتهي شارع لا راملا بدوار كبير ، فيه تمثال كريستوفر كولومبوس ... مثل ما تلاحظو في الصوره ...

العمود عباره عن مصعد ياخذك الى اعلى ، بحيث تشوف نظره بانوراميه لبرشلونه ... سعر التذكره 7 يورو ...

والمصعد ضيق يكفي 4 اشخاص بالموووت ...!!



نظره من اعلى البرج ناحية لا راملا ..



نظره اخرى ناحية الميناء الأولمبي ...
تم بناء هذا الميناء في اولمبيات 1992 ... لجذب السياح ، وفي نهاية جسر المشاة مجمع صغير مع سينما ومطاعم و حديقة مائيه ( اكواريوم ) ...



بصراحه ما انصحكم تروحوا المطاعم اللي على الميناء الأولومبي لأنها نصب و جودة الأكل تعبانه !!

راح تلاحظوا طبعا شغله مشهوووووره وتضحك ، بعض الرجال في لا رملا ( لونهم اسود ) ، واقف وعنده فرش عليه شنط وساعات تقليد ، وطبعا كل زاويه في الفرش مربوطه بحبل وماسك الحبل بيده ، أول ما تجي الشرطه ، يطوي الفرش باللي فيه في لحظات ...

يتبع ان شاء الله باقي التقرير ،،

وفيه ...

الباصات السياحيه ... اهم مناطق برشلونه التاريخيه ... الكامب نو ( ملعب نادي برشلونه ) ... رحلة السيغواي Segway في برشلونه ...

تحياتي ...

مواضيع عشوائيه ممكن تكون تعجبك اخترناها لك:

• اسعار المواصلات في برشلونة
• رحلتي الى أسبانيا
• للي عنده خبره يفيدني بخصوص ملقا ماربيا فنخيرولا
• استفسار بخصوص قــطارات ارجو من الجميع الدخول
• سؤال عن الفيزا لي انا وزوجتي الي اسبانيا
• جدول لـ رحلة اسبانيا
• رخصة قيادة السعودية
• طلب مساعدة الخبراء بالوصول للكامب نو
• الى خبراء فنادق مدريد
• استفسار عن الباس هاف فير
• رحلتي إلى أسبانيا وفرنسا
• اتمنى من الجميع المشاركه
• إسبانيا تعلن إصدار قانون يحظر النقاب في الأماكن العامة
• قائمه بجميع المدن الموصوله بالقطارات في اسبانيا مع اسماء الشركات
• رايح برشلونا بليز ساعدوني
• سؤال عن الحقائب والطيران؟؟؟
• الي حاجز على عيد الفطر
• مطلوب برنامج اسبانيا و فرنسا لمدة يوم
• انتقدوني كي استفيد في هالجروب السياحي
• طلب برنامج رحلة الى اسبانيا في الى غاية

تقرير رائع اخ بيفيل و بداية موفقة
بصراحة انجذبت للموضوع بشكل قوي
كان من نفسي من زمان في موضوع زي كذا
فيها نوع من الشرح و التفصيل و النصائح

سوال داخل عرض
تنصحني اسكن باي منطقة او حي ببرشلونة
ابي منطقة قريبه من اسواق و مطاعم غير الراملا


في انتظااار اكمال رحلتكم الشيقة

بداية رائعة

نظره




اخرى ناحية الميناء الأولمبي ...
تم بناء هذا الميناء في اولمبيات 1992 ... لجذب السياح ، وفي نهاية جسر المشاة مجمع صغير مع سينما ومطاعم و حديقة مائيه ( اكواريوم ) ...





هذا المرفأ ما يسمى الميناء الأولمبي

الميناء الأولمبي شوي بعدي عن لارمبا و هو شاطئ رملي و فيه تمثال سمكة كبيرة

[center]بداية حلوووووة

[size="4"][color="teal"]اول مره الحق تقرير من بدايته وذلك ينبى انه بيكون من اكثر التقارير متعه

الحمدلله على السلامة سجلني متابع لتقريرك المميز من اولة

حلو ,,,, يهمنا كثير التقارير الشبابيه عن برشلونه

ونبي نصايح حلوه واماكن زينه تصلح للشباب تنصح فيها

متابعين بشغف ... دمت بود

المشاركة الأصلية كتبت بواسطة الليل و النهار
http://www.arabtravelersforum.com/tr...0/#post5459440

بداية رائعة

نظره

هذا المرفأ ما يسمى الميناء الأولمبي

الميناء الأولمبي شوي بعدي عن لارمبا و هو شاطئ رملي و فيه تمثال سمكة كبيرة



عذرا أخوي ،

بس انا متأكد ميه بالميه ان المجمع ، والجسر اللي تشوفه في الصوره ، والسينما والأكواريوم ما كانت موجوده قبل 1992 ، وهذا يسمى الميناء الأولمبي ، يعني اللي تتكلم عنه انت مو ميناء !!!!

الميناء يكون محطة ايقاف سفن وقوارب !! والا انا غلطان !!؟

تحياتي لك

المشاركة الأصلية كتبت بواسطة بنت ادم و حواء
http://www.arabtravelersforum.com/tr...2/#post5459292

تقرير رائع اخ بيفيل و بداية موفقة
بصراحة انجذبت للموضوع بشكل قوي
كان من نفسي من زمان في موضوع زي كذا
فيها نوع من الشرح و التفصيل و النصائح

سوال داخل عرض
تنصحني اسكن باي منطقة او حي ببرشلونة
ابي منطقة قريبه من اسواق و مطاعم غير الراملا


في انتظااار اكمال رحلتكم الشيقة



هلا اختي ، بصراحه أغلب الناس تحب تسكن في لا راملا ،

انا من الناس اللي حاولت ابتعد عن لا رملا ، لأن الشعب الأسباني يحب السهر ، واغلب الناس تقول ان لا راملا أو الشوارع الفرعيه منه تكون ازعاج في الليل ناهيك عن بعض الحركات اللي مش أوكي !!

في شارع مشهور في برشلونا بالماركات والأسواق ، شارع واااااسع وراقي ، اسمه Diagonal ، من اسمه يعني مائل بشكل زاويه ...

هذا هو في الخريطه موضح بالخط الأحمر ... واحنا سكنا في منطقة Fontana
يعني المسافه بينها وبين بلازا دي كاتالونيا محطتين ،
Diagonal و Passeig de Gracia



اذا حصلتو شقق هناك او فندق ، توكلو على الله ... والمسافه بينه وبين بلازا دي كاتالونيا قليله ...

بسم الله الرحمن الرحيم ...

اليوم ان شاء الله نكمل معكم مشوار رحلتنا في برشلونه الساحره ...

نكمل الخريطه ...

رقم 3

الحي المعروف بــ إل بورن ( El Born ) ...

حي هااااادئ جدا ، وراااااايق ...

حي يستحق الزياره لمدة نصف يوم ، ملئ بالمطاعم ومحلات الآيسكريم ، وماركات حصريا لبرشلونه ...

بعض الناس ربما يحبذ السكن في إل بورن بعيدا عن زحمة لا راملا ...

هذي بعض الصور من الإنترنت ، عذرا ، ما مداني اصور ... ومثل ما تشوفوا ، حي جدا هادئ ...



انا تسوقت وشريت تذكار من المحل اللي عاليمين اسمه طوييييييييل وكله حروف S و X !!

واخذت للمدام والوالده الله يحفظها من المحل المقابل ( يسار الصوره ) - محل Natura ...

اكلنا وجبة غداء ، وايسكريم ( جيلاتو ) ، وبعدها تسوقنا ....


ما بين لا راملا و إل بورن ... بين رقم 2 ورقم 3

المنطقه هذي معروفه بالـ جوثيك كوارتر Gothic Quarter
أقدم منطقه في برشلونه ... مليئه بالمعمار الرومي ... والكنائس والساحات ...
ممرات ضيقه ... شعور خيالي لمن تتمشى في هالمنطقه وتسمع بعض العازفين في ازقة الشوارع على القيتار أو البيانو ...

هذي صوره لأجمل شارع في الحي القديم ... طبعا صوره مستعاره من النت



يستحق جوله لمدة 3 ساعات ...

يتبع ...

رقم 4

شاطئ برشلونه ، منطقه جميله للغايه ، مزدحمه نوعا ما ، أعمال نحت على الرمال جميله ... موسيقى ... خيمات صغيره لعرض منتجات صناعه يدويه ...

ملاحظه مهمه !!!

ينقسم شاطئ برشلونه الى قسمين ... في نهاية الشارع المؤدي للشاطئ ... اتجه لليسار باتجاه العمارتين الموضحين في الصوره ... لأن القسم الواقع على اليمين مخصص للشواذ !!!

يعني خلي اتجاهك باتجاه الصوره التاليه ...



في نهاية الصوره نلاحظ مبنيين جميلين تم ايضا تشييدهم في عام 1992 بمناسبة الأولومبيات ... ونلاحظ امام المبنيين شكل جمالي على شكل حوت او سمكه .. ومن الأمام يكون على شكل قبعه ( مثل اللي كان يلبسها نابليون ).
عند شكل السمكه راح تشوفو 3 او 4 مطاعم ، وفي الليل بعد الساعه 12 يصيرو نوادي ليله ... موسيقى ورقص !!

المبنيين يحتوو على كازينو ... وخلفهم نافوره جميله ...

يتبع ان شاء الله ... انتظرونا مع جولات الباص السياحيه في برشلونه ،

ومع رمز برشلونه ... المعماري .. أنتوني جاودي

والكامب نو ... ملعب نادي برشلونه ...

تحياتي

تقرير رائع يسلموا الأيادي ولا هنت

شئ رائع ماشاء الله تبارك الله ,,

بسم الله ...

قبل ان نبدأ تقريرنا عن رحلة الباصات المكشوفه ، لازم اكتب شي عن فنان برشلونه الكبير ، أي زائر لمدينة برشلونه لابد ان يسمع بإسم الرمز الكبير ، والذي ترك بصمته واضحة في شتى أنحاء برشلونه ...

المعماري الكبير ...

أنتوني جاودي - Antoni Gaudi



توفي جاودي عام 1926 بعد ان ترك تحفا معماريه ، روعة في التصميم الداخلي والخارجي ، شئ من الخيال ...

قصة وفاته تعتبر بصمة عار في تاريخ برشلونه !!!
الرجال من كثر ماكان مكرس حياته للعماره ، وخاصه الكنيسه الكبيره "ساجرادا فاميليا" ، كانت حالته آخر أيامه مثل اي عامل عادي، ثيابه وصخه وماكان يحلق ، مع انه كان رمز كبير ، وماكن يركب القطار ، كان دائما يمشي ، وفي مره من المرات ، صدمه قطار ، والناس ما كانت تعرف ان هذا جاودي ، ومسكين اخذوه الى مستشفى عادي ، وتوفي في المستشفى بدون ما احد يعرفه !!!

بعدين أسبانيا كحكومه ، حست بالفشل وسو له جنازه تليق بمقامه ...

من أجمل تحفه الكنيسة المشهوره في برشلونه واللي كرس آخر 40 سنه من حياته لتصميمها وبناء جزء منها ، وتعتبر رمز برشلونه المتفرد بجماله ..

Sagrada Familia

جاودي له اكثر من تصميم تم تشييده في برشلونه وتمت المصادقة عليها وضمها الى منظمة اليونسكو ، ورحلة الباصات المكشوفه راح تاخذكم الى اغلب هذي الأماكن ..

من ضمن تصاميمه والتي للأسف لم يتم اضافتها الى اليونسكو ... في ساحة بلازا ريال
، راح تشوفو المصباح هذا ،



انا من عشقي الكبير للعماره والتصاميم ، كل مكان زرته الى انتوني جاودي كان بمثابة الحلم اللي تحقق ، ومستحيل اي احد يزور الأماكن هذي ولا ينبهر ، لأنها تمثل تاريخ برشلونه العريق ...

رحلة الباصات المكشوفه في أنحاء برشلونه ...

الباصات المكشوفه موجوده اتوقع في كل مكان في العالم ... وتقريبا الكل ماشي على نفس النظام ... انزل واركب ..
Hop on Hop off ...



في برشلونه ، تبدأ نقطة الإنطلاق من بلازا دي كاتالونيا ، هناك راح تلقي "كشك" صغير وفيه شراء التذاكر ، سعر التذكره للبالغ ( 23 يورو ) ، الرحلة تبدأ من الساعه 8 الصبح ، بس بأمكانك تبدأ اي وقت يعجبك ، لأن الباصات تدور حول برشلونه ، وعند كل نقطة توقف ، يمر باص كل 15 دقيقه ...

هذي علامة التوقف ، اللي يجي عندها الباص ، ينزل ركاب ويحمل ركاب ...



يعني تنزل عند معلم سياحي ، تاخذ راحتك ، بعدين تطلع وتنتظر الباص يجي وتكمل مشوارك السياحي ....

هناك اكثر من شركه في برشلونه ، لكن الأشهر شركتين ، وحده باصاتها لونها أحمر والثانيه باصاتها لونها ازرق ...

والخطوط اللي يمشو عليها تقريبا نفس الشي ، احنا اخذنا تذكرة لمدة يومين ،

وكانت رحلتنا ،،، يوم الخط الأحمر ، ويوم الخط الأزرق

مثل ما موضح في الصوره ...



تركب الباص طال عمرك ، وتشبك السماعه وتختار الرقم على حسب اللغه ...





بعض الأماكن اللي تمر عليها الباصات ، وانصحكم تنزلو فيها ...

أول مكان ... تحفه من تحف جاودي
La Padrera
لا بادريرا

القصر السكني اللي صممه جاودي على شكل أمواج بحر ، وتلاحظوا البلكونات على شكل اعشاب بحر ، انصحكم بجوله داخل البيت ، والصعود الى الطابق اللي يستعرض كيف كان يشتغل جاودي ، ومن ثم الصعود الى السطح ورؤية 34 مدخنه ، كل مدخنه تختلف عن الثانيه من ناحية الشكل والتصميم.

صورة القصر من الخارج - تصويري المتواضع



صور متنوعه للسطح والمداخن







طبعا تصميمه للمداخن بحيث انها توحي الى تصاعد الدخان ...

المحطة الثانيه ... التحفه الثانيه ..
Casa Batllo
كاسا باتيو

يعجز اللسان عن وصف القصر هذا ، الغرف من داخل تصميم خيالي ، والسقف الخارجي للقصر على شكل جلد تنين !!!

معليش !! اللي صورني الظاهر يحب يصور الجواتي ويخلي المناظر !!
سلامات !!!



يتبع ...

تقرير اكثر من رائع يعطيك العافيه

روووعة


واصل ويعطيك العافيه برشلونه رائعة وغاودي ماكنت ادري انه عتيج جدا عبالي انه مات في الـسبعينات لان تصاميمه غريبة وحديثه مب مثل المباني القديمة

يعطيك العافيه

المشاركة الأصلية كتبت بواسطة احلى من العقد
http://www.arabtravelersforum.com/tr...8/#post5491138

روووعة


واصل ويعطيك العافيه برشلونه رائعة وغاودي ماكنت ادري انه عتيج جدا عبالي انه مات في الـسبعينات لان تصاميمه غريبة وحديثه مب مثل المباني القديمة

يعطيك العافيه




أختي أحلى من العقد ،

اتشرف بوجودك على صفحات تقريري المتواضع ! ... وشكرا على الإطراء ....
غاودي ما زال اعجوبة العصر في التصاميم ... وفخر لبرشلونه ...

تحياتي ,,,

بسم الله الرحمن الرحيم ، ونكمل مشوارنا في مدينة برشلونه ...

بعد رحلة الباصات المكشوفه لمدة يومين ، قررنا العودة الى ملعب نادي برشلونه ،

الكامب نو ،

للجولة السياحيه ...

طبعا احنا حضرنا مباراة قبلها ... كان سعر التذكره 82 يورو .. وكانت الكراسي في الوسط ،،

بصراحه ترتيب حلو في الدخول ، وخاصة ان الملعب كان مليان .. يعني ما يقارب 80 الف متفرج !!! يا ساتر !!

الملعب ضخم بشكل غير طبيعي ، وتنظيم البوابات ممتاز جدا واللوائح الإرشاديه سهله للوصول الى مقعدك ,,,

احنا كنا 3 شباب ، وحسب الحجز في الإنترنت ، كانت كراسينا متباعده ، لكن الشعب الأسباني حبووووب وما عنده مشكله ، جلسنا جنب بعض ومشت امورنا ....

بعد ما خلصنا من المباراة ، شفنا الناس متجمعه عند شارع يطلع من المواقف التحتيه للنادي ، الناس تنتظر خروج اللاعبين بسياراتهم الخاصه .. وكل اللاعبين طيراااان ، ماعدا مدرب برشلونه المتواضع ، جارديولا ، اللي كان يمشي ويلوح بإيده للناس ,,,

المهم ، لمن رجعنا النادي للجوله السياحيه ،

اخذنا تذاكر الدخول ,, تقريبا سعر التذكره 11 يورو ...

وأول ما دخلنا ، استأجرنا سماعه جماعيه ... سبيكر- speaker يعني ...

ومشينا مع الناس ، واول شي ، سينما ثلاثية الأبعاد ، يعطوك نظاره ورقيه هديه ، وتحضر الفلم كأنك مع اللاعبين في الملعب ،،، بعدين كملنا الجوله ، وشفنا غرف التبديل ,, وقبل خروج اللاعبين للملعب ، في كنيسه صغيره للاعبين عشان الظاهر ياخذون دافع معنوي !!! هههههههه !! الله يعينك يا أبيدال !!

وفي الصوره ، مكان خروج اللاعبين للملعب ...



وهنا يا طويلين العمر الملعب الكاتالوني / البرشلوني .... على العموم ، ممنوع انك تروح للعشب ، حاطين اسوار مثل ما ظاهر في الصوره فوق !!

شوفو حرف الــ S ، هناك كانت مقاعدنا !!



بعدين خلصنا وركبنا المدرجات ، واماكن جلوس رؤساء النوادي ، ومكان المعلقين ... بعد كذا نزلنا للمعرض ، وفيه استعراض كامل لتاريخ النادي ، والكؤوس اللي حصل عليها برشلونه .. وكل شييييي !! وفي الصوره مجسم لمبنى النادي ...



بعد التمشية والجوله السياحيه ، رحنا المحل التجاري اللي في الملعب ، وتسوقنا وشرينا تذكار من النادي ،

حطو في بالكم ان التي شيرت الرسمي سعره غالي ، وكل حرف تكتب عليه بسعره !!

خويي اشترى لأولاده الزي الرسمي ، وما طلع من المحل الا صارف اكثر من 2500 ريال ...

انصحكم بزيارة الملعب صراحه ... حتى لو ما كنتو من مشجعين برشلونه ! مثلي يعني ...

يتبع ،،،

ابدااع الله يعطيك الف عافيه ،،

يعطيك العافيه أخوي وماقصرت على هالتقرير الحلو والممتع
وأنا أستفدت منك حق سفرتي الجايه
تقرير بصراحه السهل الممتنع

المشاركة الأصلية كتبت بواسطة احلى من العقد
http://www.arabtravelersforum.com/tr...2/#post5498942

والله فله


حلو السيغواي وانا اشوفه في النت بس عندي سوال


ماينقلب فيك اذا ماوازنت خخخ

يعطيك العافيه وماقصرت

هلا فيك اختي ،

لا والله ، بالعكس ، الجهاز فيه 5000 حساس تحت القدمين ، يعني هو يوازنك وما يخليك تنقلبي !!!

فللللللللللللله ....

المشاركة الأصلية كتبت بواسطة tottiuno
http://www.arabtravelersforum.com/tr...4/#post5500244

يعطيك العافيه أخوي وماقصرت على هالتقرير الحلو والممتع
وأنا أستفدت منك حق سفرتي الجايه
تقرير بصراحه السهل الممتنع




حياك الله اخوي ،
وانا تحت امرك في اس سؤال تسأله ... حاضرين للطيبين ...

ادري ان التقرير ماخلص ..

ولكن اقول لو ماكتبت الا هذا لكفى ..

ماشاء الله كميه وافره من المعلومات وموثقه ايضا ..

اهنيك على هذا العلم الزاخر الذي تحمله .. وبلا شك فمستقبلك في الارشاد السياحي واضح المعالم واقل من لقب مستشار لن يوفيك حقك ..

صحيح ان كثره الصور توفي عن كثير من الشروح والمعلومات .. ولكن معلوماتك اغنتنا عن صورك القليله ..

تقرير دسم ووافر وموثق .. ارشحه لان يكون مرجع لقاصدي برشلونه بلا منازع ..

لو كل من لديه معلومه كتبها هنا .. صدقني من سيذهب الى برشلونه بعد الان سيسير بدون خريطه وسيكون عارف كل مبنى وكل طريق بدون مرشد ..

واسال الله ان يجزيك عنا خير الجزاء .. شكلك تعبت على اعدادا هالتقرير .. ومتابع للنهايه ياغالي ..

تقريــــــــــــــــــــــر رائـــــــــــــــــــــــــــــــع ,,,


معلومـــــــــــــــــــات دقيقة جدااااااااا ومفيدة للسائح ,,,


جزاك الله خيـــــــــــــــــــر ,,,,,,,,

يعطيك العافيه اخوي بيفيل صراحه تقرير جدا رائع ومفيد لكل اللي يبون يرورحون الى برشلونه انا ناوي اروح برشلونه وكم دوله اوربيه بعد سنه ان شاء الله وقاعد اخطط من الحين وابحث وحبيت اسألك كم سؤال
هل تظن ان الـ 7 ايام اللي قضيتها في برشلونه كافيه ؟
فيه اماكن تحسفت انك مارحت لها ؟
هل واجهت عوائق هناك ؟

تحيااااتي لك وننتظر المزيد

السلام عليكم
مساك الله بالخير و الحمد لله على السلامة .
الحقيقة استمتعت بتقريرك و اهنيك على الرحلة الشيقة .

انا تقريبا ً من شهر ودي أسافر لبرشلونة لأني من عشاق النادي الكاتالوني ولا لقيت احد يفيدني فالحقيقة تقريرك كفى و وفى .
لكن عندي استفسار لو سمحت ناوي السفرة بس أبغى منك لو تكرمت من وين حجز الطيران و السكن علماً بأنني سأسافر أنا و زوجتي و طفلتي سنتين عمرها و ش تنصحني فيه .

اخوي بيفيل الله* يعافيك رد على اسألتي في صفحة 3 شكلك ماشفتها

وابسألك السيغواي 82 يورو كم المده ساعتين يعني بـ 82 ولا كيف *

المشاركة الأصلية كتبت بواسطة 100 slo0om
http://www.arabtravelersforum.com/tr...8/#post5536148

يعطيك العافيه اخوي بيفيل صراحه تقرير جدا رائع ومفيد لكل اللي يبون يرورحون الى برشلونه انا ناوي اروح برشلونه وكم دوله اوربيه بعد سنه ان شاء الله وقاعد اخطط من الحين وابحث وحبيت اسألك كم سؤال
هل تظن ان الـ 7 ايام اللي قضيتها في برشلونه كافيه ؟
فيه اماكن تحسفت انك مارحت لها ؟
هل واجهت عوائق هناك ؟

تحيااااتي لك وننتظر المزيد



حياك الله اخوي ، واعذرني ، بصراحه ما شفت اسألتك ،

هل تظن ان الـ 7 ايام اللي قضيتها في برشلونه كافيه ؟

نعم ، كافيه ... 7 أيام حسيتها ممتازه لبرشلونه ، لا اقل والا اكثر ...

فيه اماكن تحسفت انك مارحت لها ؟

- لا والله ، مو لدرجة اني تحسفت ، بس كان ودي ننزل فيها من الباص ، بس احيانا التعب يلعب دور ، وثانيا ، يكون في بالك انك تنزل مكان معيّن ، فودك توصل له بسرعه وتطنش بقية الأماكن ،،،

- في مدينة العاب وكنيسه فوق اعلى جبل في برشلونه ، بس خبرونا ان مدينة الألعاب مغلقه والمكان عادي يعني.

- حديقة الحيوانات ما زرناها لأن قالو لنا انها تعبانه وما تسوى ان الواحد يصرف عليها فلوس تذاكر او انه يضيع فيها وقت.

هل واجهت عوائق هناك ؟

- لا والله ، الشي الوحيد اللي واجهناه ، كان تذكرة القطار تدخل المكينه وتطلع من الجهة الثانيه بدون ما تفتح البوابه ! ويحسب عليك دخول ، بس صادفتنا مره او مرتين !

- ومثل ما تعرف يا طويل العمر ، احنا مسلمين ولنا عاداتنا ، مثل استخدام الماء في دورات المياه ، لذلك خذ احتياطك دايما ، خلي عندك قارورة ماء لمن تطلع تتمشى ، لغرض الطهور ، وفي السكن بعد لا تنسى!

- واحد من الشباب جاه صداع ، وكنا جالسين في مقهى نتابع مباراه للدروي الإنجليزي ، وراح مشوار خمس دقايق للصيدليه واخذ بنادول ، الصيدليات موجوده بكثره حوالين " لا راملا " ... او انك تاخذ احتياطك من هنا !

- لمن رحنا السوبر ماركت ، على طول يقولون لك السعر باللغة الأسبانيه ! يعني ممكن لمدة خمس ثواني راح تتوهق !! وما تعرف شنو قالت لك المحاسبه !! !! بس هدّي بالك وتكلم معاها بالإنجليزي ! اغلب الأسبان يعرفوا يتكلموا انجليزي ممتاز !!

تحياتي ، وانا حاضر اجاوب اي استفسارات ثانيه ... اتمنى اني ما طولت في الإجابه

المشاركة الأصلية كتبت بواسطة 100 slo0om
http://www.arabtravelersforum.com/tr...8/#post5536988

اخوي بيفيل الله* يعافيك رد على اسألتي في صفحة 3 شكلك ماشفتها

وابسألك السيغواي 82 يورو كم المده ساعتين يعني بـ 82 ولا كيف *





بالنسبة للسيغواي ، سعر التذكره 85 يورو ، لمدة الجوله كامله ( ساعتين ونص ) ، مع ربع ساعه تدريب !

السلام عليكم .
صبحك الله بالخير أخ بيفيل .

سؤال لو تكرمت .
سمعت أن مافيه طيران دايركت لبرشلونة و أذا كان ما فيه كيف الطريقة ؟
كم التكلفة التقديرية غير التذاكر لمدة 7 أيام أنا و زوجتي و طفلتي ؟
احسن و قت للسفره اللي ما يكون فيه سياح كثير ؟

ماعليش ونا أخوك تحمل أسألتي و أستفساراتي كل ما تذكرت لي شي بجي أسألك عنه .

على العموم جزاك الله خير و بيض الله و جهك على سعه صدرك و الله يوفقك دنيا و آخره يارب .

المشاركة الأصلية كتبت بواسطة غاطي برشلوني
http://www.arabtravelersforum.com/tr...8/#post5544268

السلام عليكم .
صبحك الله بالخير أخ بيفيل .

سؤال لو تكرمت .
سمعت أن مافيه طيران دايركت لبرشلونة و أذا كان ما فيه كيف الطريقة ؟
كم التكلفة التقديرية غير التذاكر لمدة 7 أيام أنا و زوجتي و طفلتي ؟
احسن و قت للسفره اللي ما يكون فيه سياح كثير ؟

ماعليش ونا أخوك تحمل أسألتي و أستفساراتي كل ما تذكرت لي شي بجي أسألك عنه .

على العموم جزاك الله خير و بيض الله و جهك على سعه صدرك و الله يوفقك دنيا و آخره يارب .




هلا اخوي ، وان شاء الله نقدر نخدمك في اي وقت ، وتفضل اسأل على كيفك ، ما هنا ازعاج !!

بالنسبه للطيران ، دايركت ، يعني قصدك الخطوط السعوديه !! صح ؟
لأن باقي الخطوط لازم توقف في دولتها ! يعني الإماراتيه لازم توقف في دبي ، والقطريه في الدوحه !

وازيدك من الشعر بيت ، اغلب الخطوط اللي رايحه لبرشلونه ، راح توقف اما في المانيا ( فرانكفورت ) أو في هولندا ( أمستردام ) ، بعدين تبديل طياره الى برشلونه. انا الحين تأكدت من القطريه والإماراتيه والسعوديه ،
طبعا السعوديه ماعندهم رحلات لبرشلونه !!!

طيب ، احنا رحلتنا بالتفصيل كانت ،
خطوط klm ، من مطار البحرين الى أمستردام ،
وصلنا امستردام ، وختمنا جوازاتنا دخول دولة شنغن ، يعني تسجل لنا الدخول في هولندا ،
بعدين رحلة من امستردام الى برشلونه ، تعتبر رحلة اوروبيه داخليه ، ما احتجنا نختم جوازاتنا ولا تفتيش شنط اول ما وصلنا برشلونه !

بالنسبه للتكلفه ، والله يعتمد على سعر السكن اللي راح تحصله ، يعني لو حصلت شقه بـ 200 يورو في الليله ، وجلست 7 ليالي ، هذي 1400 يورو للسكن ،
تذاكر القطار ، يبيعون تذكره اسمها t10 ، تركب فيها القطار عشر مرات ، وسعرها 7 يورو ،
بالنسبه لتذاكر الباص السياحي ، 23 يورو للشخص البالغ ، يعني يطلع عليك 46 يورو لليوم ، واذا بتركب الباص يومبن ، يطلع عليك 92 يورو انت والمدام ،
الأكل ، انت واختيارك ، بس انا احب اني احسب لي مبلغ يومي عشان ارتب اموري ، واتوقع 100 يورو راح تكفيك ليوم كامل انت وزوجتك ،

مثال،،،
سبعة أيام / 1400 يورو سكن + 92 يورو تذاكر باص سياحي + 22 يورو دخول ملعب برشلونه + 8 يورو دخول ساجرادا فاميليا + 800 يورو أكل ومشتريات غذائيه + 20 يورو دخول قصر لا بادريرا + 21 يورو سعر 3 تذاكر قطار + 16 يورو سعر تذاكر التلفريك

يعني تقريبا 2400 يورو مصاريف ، ويمكن تزود او تنقص ! على حسب اختيارك للأماكن السياحيه ودفع رسومها !

أما بالنسبة لوقت السفر ،
انا شخصيا احب اسافر في الأشهر الخمسه !! هههههههه
مارس (3) - ابريل (4) - مايو (5) - سبتمبر (9) - اكتوبر (10) ،

تحصل فيها افضل الحجوزات واسعار التذاكر والأجواء تكون ممتاااااااازه . بس حط في بالك ان شهر مايو ( 5) يكون عادة ممطر في اوروبا والمناطق الشماليه مثل امريكا !

كأني كثرت عليك !!

تحياتي

جزاك الله خير و بيض الله و جهك و الله يحفظك من كل شر و يسهل امورك .

ما قصرت على التقرير الطيب

بالنسبه لشارع رامبلا السكن فيه افضل ول شارع قارسيا؟

موقع فندق الرويال ول الميريديان افضل ب رامبلا؟ وكيف فندق الماجستك؟

بالنسبه لفندق الدبليو شرايك فيه كموقع يعني وين تقدر تروح مشي منه؟

بالمسا وين نقدر نروح غير الاولمبك؟

يعطيك العافيه

تقرير رائع سلمت اناملك كفيت ووفيت ,,,جزاك الله الف خير

ماشالله تقرير يجنن الله يعطيك العافيه
ماتعرف لو في اماكن في برشلونه فيها سبحاخ مع الدلافين او سكاي دايفنق والبرشوتات لانه انا رايحه في سبتمبر وماني عارفه اي شي فيها

شاكر ومقدر
تقريرك الجميل
دمت بخير

تسلم إيدك على هالتقرير الجميل..

إن شاء الله ستكون لي زيارة مستقبلاً لهذه المدنية الجميلة خاصة إني برشلوني

انا زرت برشلونه في نوفنبر وشارع الرملا بس الي كرهني فيه البنقاليه ويووجدوون بكثررره ومعااهم العااب يرمونها فووق وتطيح على روس الشعب العاب خفيفه وكاان في الشارع اشكاال موحشه شووي الخوال والبنقاليه واشيااء كذاا وترا فيه كارفور بالرملا الي بيشتري منه يجيب كيسه معااه احنى شرينا قالوا الكيس بفلووس ويا ليت الكيس زين كيس من قشر بطاطس قارورتين مويه بتقطع وفيه سوق اللحووم ادخلووه واشتروو العصاااير من هنااك شي ثاني وشكرا ومعليش عللى الاطاله بس حبيت اضيف

تقرير مميز ماشاء الله

يعطيك العافية

بيض الله وجهك على التقرير الرائع ..
لكن حبيت أستفسر منك على تكاليف الرحله هل 5300 للشخص الواحد أم الجميع ؟!
بالنسبه للفندق الي سكنتوه ويش أسمه ؟
وكم مبلغ التذكره تبع خطوط klm??

احس انكم ماتكلفتوااااااااااااا 5300

تقرير رائع

أشكركم أخواني كل الشكر على الإطراء الجميل ....

المشاركة الأصلية كتبت بواسطة المسافر القريب بأذن الله
http://www.arabtravelersforum.com/tr...2/#post6015102

بيض الله وجهك على التقرير الرائع ..
لكن حبيت أستفسر منك على تكاليف الرحله هل 5300 للشخص الواحد أم الجميع ؟!
بالنسبه للفندق الي سكنتوه ويش أسمه ؟
وكم مبلغ التذكره تبع خطوط klm??




هلا أخوي ،

تكاليف الرحله كانت 5300 للشخص الواحد ...

واحنا ما سكنا فندق ، استأجرنا شقق واسمها مذكور في اول صفحه ...

وتذاكر الطيران اذكر ان كان سعرها تقريبا 2100 او أقل شوي ..

تحياتي ،

صور جميله يعطيك العافيه

الله من ايام

كنت هناك في يوم ما

يعطيك العافيه ع التقرير الحلو واللي تذكرني بالماضي الجميل



تحياتي ,,,

المشاركة الأصلية كتبت بواسطة بيفيل
http://www.arabtravelersforum.com/tr...8/#post5545978



مثال،،،
سبعة أيام / 1400 يورو سكن + 92 يورو تذاكر باص سياحي + 22 يورو دخول ملعب برشلونه + 8 يورو دخول ساجرادا فاميليا + 800 يورو أكل ومشتريات غذائيه + 20 يورو دخول قصر لا بادريرا + 21 يورو سعر 3 تذاكر قطار + 16 يورو سعر تذاكر التلفريك

يعني تقريبا 2400 يورو مصاريف ، ويمكن تزود او تنقص ! على حسب اختيارك للأماكن السياحيه ودفع رسومها !



تحياتي



يالغالي بسألك عن اذا كان عددنا اربعه اشخاص كم التكلفه اليوميه تقريبآ
وكم تكلفه التنقلات في الباص والمترو وماإلى ذلك
كذلك ابغى سعر اجمالي لرحله تقريبآ 5 ايام في برشلونه مع التذاكر

المشاركة الأصلية كتبت بواسطة ToRReS_KSA
http://www.arabtravelersforum.com/tr...0/#post6228700

يالغالي بسألك عن اذا كان عددنا اربعه اشخاص كم التكلفه اليوميه تقريبآ
وكم تكلفه التنقلات في الباص والمترو وماإلى ذلك
كذلك ابغى سعر اجمالي لرحله تقريبآ 5 ايام في برشلونه مع التذاكر

هلا بيك يالطيب ،

والله سؤالك يمكن يكون من اصعب الأسئله ، ولكن ، احسب يوميا للشخص مبلغ 50 يورو أكل ومشروبات واتوقع راح يكفي المبلغ ..

اما بالنسبه لسعر تذاكر المترو ، عندك تذكرة T10 واللي سعرها 7 يورو ، وراح تكفيك 10 رحلات ، مترو أو باص .. وانت واستخدامك !

انا تأكدت من اسعار الشقق ، وشفت ان الأسعار تتراوح بين 65 يورو الى 85 يورو بالنسبه لأربعة أشخاص ،
يعني لو قلنا انك مثلا انك اخترت شقه سعرها 100 يورو بالليله ، يطلع على النفر 25 يورو ..۔ خمس ليالي 125 يورو للشخص ..۔ مع سعر 250 يورو اكل ومشروبات ..۔ 375 يورو سكن وأكل لمدة 5 ليالي / 6 أيام

ما يعادل 1881 ريال سعودي حسب سعر الصرف بتاريخ اليوم

والحين اليورو رخيص ..۔

يبقى سعر تذاكر الطيران وهذي تعتمد على اختيارك انت ..۔

والأماكن السياحيه بعد تعتمد عليك يالغالي ، وعندك الأسعار انا كاتبها قبل حسب كل مكان سياحي ..۔

واذا احتجت اي شي ، انا حاضر ..۔

تحياتي ...

تقرير ولا اروع ..۔ ماقصرت ..۔
وبالنسبة لي استفدت منه كثيررررر ..۔

بالتوفيق ...۔ نتمنى لك السعاده .۔

تقرير متميز فعلا ابداع

تقرير ولا في الخيال مزود في كل شي من صور واماكن ووالخ

الله يعطيك العافيه وان شاء الله انك انبسطت


عندي كم استقسار ياليت مشكورا تساعدني


ناوين 3 اشخاص زيكم هههه نروح مدريد وبرشلونه


هل 4 ليالي مدريد و 6 ليالي برشلونه كافيه
ولا ماتكفي ؟


حصلت شقه في برشلونه بشارع لاس لامبراس 3 اسره من غرفه وحده وحلوه وسعرها 2483 ريال لمدة 6 ليالي وشرايك ؟


وبرضو في مدريد حصلت شقه من غرفتين نوم في وسط مدريد سعرها 2384 ريال لمدة 4 ليالي. وشرايك ؟


كم تتوقع يكون الصرف لمدة 10 ليالي في اسبانيا بالصرف المعقول علما بان ممكن حنا نطبخ لنا بالشقه اذا مطاعمهم غاليه ومايمنع مرتين ثلاث نتعشاء بمطعم


عطني مبلغ تتوقعه من تمشي ودخول الكامب نو والسنتياغو بيرنباو ملعب مدريد وحضور مبارة لبرشلونه ومباراة ايضا لمدريد
كم تقريبا علما باني بطلع من مدريد لبرشلونه بالقطار او بالطياره وخلها بحسبتك
عطني المبلغ المتوقع من دون تذاكر الذهاب ل اسبانيا
ابغى المبلغ فقط بوسط اسبانيا من الصرف وشاكر لك

ابغى كم يصرف الشخص باليوم تقريبا من اكل وشرب ومترو وسياحه

عشان نضبط وضعنا حنا 3 شباب

وهل يفرق الصرف عن مدريد وعن برشلونه ايهم اغلى

يعني تتوقع 50 يورو للشخص في برشلونه لليله الواحده كافيه ؟
ومثلها كذالك في مدريد ؟

الف الف شكر يالغالي على التقرير الاكثر من رائع
سلمت وسلمت يمناك وجعله الله في موازين اعمالك ..افدتني كثيرا لاني بالفعل اخطط للسفر الى اسبانيا (برشلونه) في سبتمبر المقبل

جزاك الله عنا خير الجزاء

رحلة شبابية ممتعة جدااا الصراحة و الله يعطيك العافية

تقرير جدا جميل استفدت منه كثيرا شكرا لك

تقرير راااااااائع ، وصفك للاماكن كأني موجودة معاكم
كل الشكر اخوي على الموضوع، وراح اكون متابعة لكل جديد راح تطرحه.

ياخي والله انك ((((( بطل ))))) وتستاهل كل خير على هالموضوع الاكثر من رائع

ياجماعة قولوا امين ..

قلتوا امين؟؟؟

الله يجزيك الجنة ويجزينا والسامعين والقارئين

تقرير مميز دمت بحفظ الرحمن

تقرير رائع يعطيك العافيه
مشكور وجزاك الله خير