سلام عليكم ورحمة الله وبركاته
كل عام والجميع بخير
من يوم رجعة من كيرلا وانا افكر بكتابة هذا الموضوع وهو اضهار الوجه المظلم لكيرلا وهناك اسباب عده لطرحي هذا الموضوع وهي
1- ان كيرلا تعتبر منطقه حديثه تقريبا والتقارير عنها قليله قبل سفري وماشاء الله نزلة كميه كبيره من التقارير هذه الايام
2- انه فيه اشياء بكيرلا رفعة ضغطي وما كانت موجوده بالدول الي رحتلها قبل وحبيت اوضحها
3- انه الشباب ما قصروا ونزلوا تقارير عن مميزات كيرلا وفصلوا وما اعتقد اني اوصل لتقاريرهم لو حاولت انزل تقرير
4- عناد لواحد من الشباب الي راحوا معي الرحله (اقصدك يا ثامر ) وكانت الرحلة معجبته مررررررره
وعلى هذا الاساس قررت انزل الموضوع للفائده وعلشان يقراه الناس الي تخطط لسفر لكيرلا
اولا _ مشكلة الفيزا واستخراجها فهناك بعض التعقيدات عند استخراج الفيزا كالسكن وحجز الطيران واذا كنت رجل تبغى تطلع الفيزه من دونهم لازم تدفع زياده وهذا اعتبره لعب على الدقون وبخشيش اجباري على الي بيطلع الفيزا
ثانيا_ بعد مادفعة مبلغ وقدره في الفيزا واخذ مني المعقب 400 ريال علشان يمشي لي سالفة السكن والطيران رحت لكوتشن واتفاجات انه الي ماشي عليه اغلب الناس انه يحجز رحلته كامله بفنادقها قبل يروح من كوتشن وما تدري هل الفنادق الي يختارها لك المكتب كويس او لا يعجبك او لا يعني انت برحلتك مع المكاتب انك مسير ولست مخير وهذا ما اعجبني ابد حتى اني جلست يومين بكوتشن احاول اضغط على المكتب انه اروح للفنادق الي هو عطاني واذا اعجبني ادق عليه ويحجزه لي لكن للاسف ابا الا انه يحجز الفنادق كامله ويسوي لي الباكج كامل وادفع المبلغ كامل قبل اطلع من عنده وهذا يعطي المكتب مجال انه يلعب عليك او انه تروح وما تلاقي حجز او او او او
ثالثا_ اذا تهورت وطلبت سواق من غير فنادق فانه يعطيك السائق بتقريبا 2200 ربيه لمسافة 100 كيلو بس وما يكون معك الرحله كامله يعني راح تواجه مشكله مع التنقلات ايضا
رابعا_ طلبت فنادق او شاليهات او منتجعات يكون فيها الطبخ مسموح ولكن اتفاجات انه للاسف الحكومه مانعه الطبخ بالمنتجعات وهذا شي ضايقني
خامسا _ هناك مبالغه باسعار الفنادق والمنتجعات بصراحه يعني الارخص تقريبا ب200 ريال بينما لو تروح المنتجعات الي يتكلموا عنها الاعضاء توصل الي 800 ريال بالليله ليش انا جاي الهند ولا رايح سويسرا
سادس_ الاكل مشكله والله تعبنا كثير كثير كثير يعني فعلا فعلا والله لو ما اخذنا جبن بكميات كبيره كان رجعنا بدري وقدمنا الرحله اكلهم اما سيئ وماتلاقي شي تاكله او حار وما تقدر تاكله
سابعا _ التنقل بين القرى متعب صحيح انه ممتع وما ينمل لكن مرهق وخاصه من مونار الي تكيدي
ثامنا _ الاماكن بالمدن قريبه من بعض لكن للاسف قليله يعني لو تجلس في وحده من المدن 3 ايام ممكن اليوم الثالث ما تلاقي مكان تروح له وفيه بعض المدن اصلا ما فيها مكان ينراح له زي البي وكوماركوم فمدري وش المطلوب من وضعهم بالبرنامج اصلا
تاسعا _ الهاوس بوت وهذا ممكن تكون المشكله عندي انا ممل ومقرف اخذته 24 ساعه والله كرهت السفر علشانه وكان ممكن نستغني عنها برحله بسيطه على قارب اخذناها لمدة ساعتين او ثلاث على قارب صغير يمشيك داخل القنوات
عاشرا_ الرحلات السياحية زي رحله اخذتها في تكيدي بوسط بحيره واعتقد الجميع راح لها اخذنا بالقارب بدور الثاني واتفاجانا انه الدور الثاني فل وانهم حاطين كراسي بلاستيك بنصف السفينه ههههههه انا جاي ابي طرف علشان اتفرج وش الفايده ونزلنا تحت مع انه قيمة التذكره النصف
احدى عشر _ بعض الرحلات تروح علشان تشوف شي وتتفاجاء انه مو موجود زي رحلة الماعز الجبلي هههههه انا توفقت وشفتها بكميت كبيره لكن اكثر من تقرير يقول ما شفناها وزي رحلة السفاري بتكيدي هههههه ما شفت الا العلق الله لا يعيده وكان هناك حيوانات يشوفها المرشد وحنى مانشوفها لذلك قررت اسوي عملية ليزك او اخذ معي دربيل اذا رجعت مره ثانيه
اثنى عشر _ فيه اشياء ما انصح احد يجربها او يروحلها يعني فيه تهوله عندهم بشكل غريب زي رقص المودرا او المساج او حديقة الزهور الي بمونار او ركوب الفيله او الهاوس بوت او رحلة المتحف الي بكوتشن والكنيسه وسنرات الصيد الصينيه
الثالث عشر _ فيه رحلة بمونار والله يا هي تكسر الضهر وهو انك تستاجر جيب من منطقه قريبه من المونتن كلوب تقريبا ب1200 روبيه وترقى جبال بهالجيب الكسره والله يا هي مناضر خيال خيال خيال لكن والله يا هي مرهقه بشكل خيال خيال خيالي وفيه اقدم مصنع شاهي بالهند فوق الجبل للعوائل ما انصح ابد ابد يروحها
الرابع عشر _ فيه رحلة سفاري بتكيدي قيمتها ب1800 ربيه لشخص مع الفطور والغداء تاخذ تذاكرها من عند المكان الي فيه عروض الفيله وركوبها تبداء من الساعه 5 الفجر الي 5 العصر خطيرررررره جدا واقصد بخطيره مو انها حلوه لا لكن يدخلونك محميه طبيعيه تمشي فيها على رجلينك مع قايد بوسط الغابه ويلبسونك شرابات بلاستك وملابس ضد المويه عن الامطار طبعا الشربات علشان العلق الي يحمينا واياكم منها ويجيك القايد المنسم ويقول المحميه فيها 41 نمر ههههههههههههه طيب وشلون مدخلنا هنا يقولي لا ما تجي لهذي المناطق لكن طلع كلامه خرطي وبغينا نروح هواء لولا ان الله ستر علينا ونجانا ما طلع علينا نمر لا ما ابي اتهول لكن وحنى نمشي قرر قايدنا انه يغير مسارنا عن القروبات الثانيه لانه انا عندي مشاكل بالقلب وما اقدر امشي مرتفاعات كبيره لاني اتعب واتفاجانا انه في وجهنا حيوان البيفلوا ( الجاموس ) ومن شدة الضباب والرذاذ ما قدر قائدنا يحدد هل هي متوحشه ولا بلديه وبعد ما قرب لمها قامت كلها بشكل غريب وقالنا انها محليه طبعا انقهرنا لانه كان فيه اكشن بتصويرها وطريقة تختلنا لها ومرينا بعيد عنها ولما رجعنا لنقطة التقاء القروبات قلنالهم القصه ووريناهم الفديوا فقالوا ما فيه بفلوا محلي بالمحميه وهذا بفلوا متوحش والله ستر عليكم وبرضه وحنى نمشي مسك العلق برجل احد من زملائنا وجلس ينزف تقريبا 4 ساعات من غير ما يسوا اي شي ولو حتى لزقه للجروح واكلهم يالله لك الحمد حطينا حيلنا بهالجبن والا المتحف اغرب متحف شفته بحياتي عظام وجماجم مجدعه بغرفه طينيه ويسمونها متحف وكان فيه رحله بالقارب لشلال طبعا انا متعود على السباحه بالشلال سالت القايد اوكيه قال قو هد ما عندك مشكله يوم نزلت اتفاجات انه العلق ماسكني من كل مكان وحاس علينا السباحه لكن استمتعنا وبالاخير ما انصح الي عوائل او اطفال اياني واياه يتهور ويروح لها
الخامس عشر _ هناك تعامل جاف جدا او قد يكون وقاحه في بعض المناطق السياحيه مثل رحلة الماعز الجبلي كان الامن تعامله سيئ وكان نفسيتهم شينه وكان اذا مر الماعز قريب منا كان يطرده للجبل ما ادري ليش انا جي اشوف الماعز او اشوف خشتك وبرضه وجهت النفسيه الشينه برحلة قارب بمونار ورحلة الهاوس بوت
السادس عشر _ البي واعتقد غير البي من المناطق الساحليه تفتقر لمقومات التسليه كالجيسكي ورحلات الغوص والرحلات البحريه وغيره وغيره
وفي الاخير كتابتي لهذا الموضوع لا تعني اني اهضم حق كيرلا او ان كيرلا لا تعجبني او اني لا انصح احد بزيارتها بل بالعكس يعلم الله اني اخطط انا وكم شخص معي لاعادة الرحلة مره اخرى وسوف تكون رحلة مجزيه باذن الله قرابة الشهر ان تسهلة الامور
ولكن احببت ان انقل ما رئيته هناك لكي تكون الصوره واضحه لمن يريد زيارة المنطقه
وكما اسلفت كتابتي لمثل هذه الامور لا تعني اني كيرلا تفتقد للاشياء الجميله ولكن ما قصر الاعضاء بتوضيح الجانب المشرق لكيرلا
وللامانه نصيحه لشباب فقط اياني واياكم تروحون لتكيدي ما تجربون السفاري الي ذكرناها بالنقطه14 فهي كانت افضل مغامره جربتها بكيرلا رغم المشاكل الي ذكرت لكن رحله لن تنسى وايضا رحلة الجيب الي يطلع فيك قمه مرتفعه بمونار الي ذكرتها بالنقطه13 اجراميه وما راح تنسى بس حاول يكون ذهابك لها بيوم مشرق وتجنب الايام الممطره
ختاما اعتذر عن الايطاله بالموضوع واتمنى ما يكون هناك ردود تحسسني اني سبيتها او سبيت دولتها ويجيك يفقع مرارتي بقوله انت ما عندك ثقافة السفر انت ما تعرف تسوي زي الاوربيين (رغم انه الاوربيين قمة سياحتهم يتمصلخون هم وحريمهم على جال البحر ويخشله )
تحياتي للجميع وكل عام وانتم بخيرمواضيع عشوائيه ممكن تكون تعجبك اخترناها لك:
- سؤال سريع باي لغه اراسل المكاتب في الهند بالعربي والا انجلش
- ابغى مساعده من خبير السفر الي الهند
- اسفسار عن تنقل عائله من اشخاص
- سياحة تجارية في مومباي ياشباب ومحتاج كم معلومة
- ارجو من الاعضاء الكرام مساعدتي
- مساعدة في الهند
- ياخبرااء سريلانكا ساعدوني الله يسعدكم
- لَ خبَراء سيَريلنكا ،
- الاربعاء اغسطس
- رحلتي إلى بلاد الشاهي سيرلنكا
- رحله الهند يوم لشخص واحد برنامج
- رحلة لسيرلنكا بصحبة سائق متميز جداً
- بنجلور كما رأيتها اول مرة
- فندق في نوراليا
- رحلتي في تاريخ إلى سريلانكا
- بعد التحية والتقدير سؤالين ولكم الشكر والتقدير
- ۩ ۞ ۩ رحلة سفير الهند إلى حدائق التكنولوجيا بالهند ۩ ۞ ۩
- رآيكم في هذا البكج لكيرلا
- برنامجي لكيرلا في يناير
- رحلتي الى سرنديب الجميلة
رد مع اقتباس
المشاركة الأصلية كتبت بواسطة الليل جواد
المشاركة الأصلية كتبت بواسطة هام السحاب
المشاركة الأصلية كتبت بواسطة حظي خذلني
المشاركة الأصلية كتبت بواسطة asmk
المشاركة الأصلية كتبت بواسطة درب يرد مايسد
المشاركة الأصلية كتبت بواسطة درب يرد مايسد
المفضلات