بسم الله الرحمن الرحيم
السلام عليكم ورحمة الله وبركاته
سوف أحاول سرد بعض المواقف والتجارب التي واجهتها في أثناء السفر. كما سوف أحاول أن أدعم بعضها بالصور ( وجميع ما سأقوم بطرحه من الصور من تصويري الشخصي عدا ما تتم الإشارة إليه ).
وأملي أن يجد الأخوة الكرام فيها الفائدة والمتعة ، والله ولي التوفيق
الموقف الأول: خلوني أبدأ بالموقف الطريف هذا : قبل كم سنة سافرت بريطانيا للدراسة وسجلت في أحد المعاهد طبعا طلبت سكن مع عائلة مكونة من شايب وعجوز.
وأنا في طريقي من مطار هيثرو للمدينة اللي راح أدرس فيها اتصلت على الشيبان أبشرهم اني وصلت بالسلامة واني جاي لهم هالحين بالباص وأنا راح نوصل خلال ساعة ـ بحول الله قلت لعلهم يفهمونها ويجهزون المفطح والا على أقل شي التوست والكورن فليكس.
قال لي الرجال: خلاص راح نستقبلك في محطة الباص وما يحتاج تاخذ تاكسي.
قلت: ما يحتاج تكلفون أنفسكم ومن هالكلام. لكن الرجال أصر انه يجي ويجيب العجوز معه يشيلوني من محطة الباصات. من قدك راح يجون يستقبلوني بأنفسهم ما يبغون يخسروني قيمة التاكسي. بادرة حلوة تدل على انهم أهل كرم وشهامة.
سألتهم: طيب وين أحصلكم فيه. قالوا: تحصلنا في مواقف محطة الباص. وسيارتنا صغيرة لون سماوي.
كبرت الوسادة وجلس أتأمل في بديع صنع الخالق والأشجار والخضرة وجداول الماء والأنهار المنتشرة على طول الطريق، وأقول: سبحان الله اللي أعطاهم.
وصرت أقارن أرضهم بأرضنا القاحلة. وجوهم الجميل بجونا الملتهب حتى في نصف الليل, ثم تذكرت قول ربي: ( ذرهم يأكلوا ويتمتعوا ويلهم الأمل فسوف يعلمون ) وتذكرت ان هذي جنة الكافر ونصيبه ثم في الآخرة يردون إلى العذاب الشديد. فحمدت الله على الهداية وأن كنوز الأرض كلها ما تقارن بهذه النعمة.
وصلنا بحمد الله بعد غياب الشمس بقليل. أخذت عفشي وجلست أطالع وين هي المواقف فإذا هي خلفي مباشرة. شلت عفشي ورحت هناك.
كنت منتعش ولله الحمد من برودة الجو ومرتاح اني وصلت رغم تعب السفر. طالعت في السيارات اللي في الموقف ما حصلت السيارة المطلوبة. المهم عادي يجون بعد شوي. قمت اتفرج على المنطقة المحيطة وحركت السيارات والباصات والناس اللي جاية ورايحة وأذكر ربي وأحمده وأشكره على نعمة السلامة.
راح ربع ساعة ما جاء أحد. راح نصف ساعة برضه ما فيه أحد. يالله يمكن مكانهم بعيد وشيبان يسوقون شوي شوي.
راحت ساعة وأنا أقلب عيوني بين السيارات أدور على سيارة الشباب. للأسف ما فيه.
نفد صبري دقيت عليهم جوال لكن ما أحد يرد. كررت الاتصال. ما فيه أحد صبرت شوي بعدين دقيت. ما فيه أحد. لا يكونون ماتوا بس. وش هالحظ.
راحت ساعة ونصف ، ساعتين. ما هو معقول ما وصلوا لين هالحين. فصرت أي سيارة لون سماوي أشوفها حتى لو كانت فيراري أروح لهم أنتم فلان الفلاني؟ يقولون لي لا.
كررت الاتصال على الجوال وحتى على تلفون البيت لكن ما يرد أحد.
الوقت صار ليل وأنا خلاص ما أتحمل أنتظر زيادة تعبان وجوعان.
كنت أفكر آخذ تاكسي وأروح. بس كنت أقول ما هي معقولة الشباب وعدوني يجون ياخذوني من المحطة. بعدين ليش أروح وما فيه أحد في البيت يرد على التلفون.
كررت الاتصالات، والحمد لله أخيرا فيه رد. لكن الصوت مختلف. يالله خل نشوف.
منزل فلان الفلاني؟ نعم أي خدمة.
أنا: نعم السالفة كذا وكذا وأنا منطق بالمحطة لي أكثر من ساعتين.
قال أنا ولدهم. صحيح الوالد والوالدة راحوا علشان يجيبونك وخلوا الجوالات حقتهم هنا في البيت. طيب كيف أحصلهم؟ قال: ما أدري اللي أعرفه انهم طالعين من البيت بدري.
قلت شوف يالحبيب. ما عاد فيني حيل أنتظر أكثر من كذا. راح آخذ تاكسي وأجي.
أخذت التاكسي ورحت على بيتهم. وصلت بالسلامة وأنا جالس أحاسب الرجال راعي التاكس الإ والشباب الشايب وعجوزه جايين. الحمد لله على السلامة.
حييتهم وتبسمت وضحت وأنا ودي أعطي كل واحد منهم كف. قالوا: وينك تعبنا ننتظر؟ قلت: أنتم اللي تعبتوا تتنظرون. يا أخي صار هالحين تقريبا نصف الليل وأنا منطق هناك بالمحطة، لا عادت على فزعتكم.
قالو: من قبل ما تغيب الشمس واحنا جالسين ننتظرك.
بغيت أقول : كذابين.
سألتهم وين تنتظرون وأنا ما خليت راعي سيارة لون سماوي ما طليت بوجههة.
صارت السالفة اني كنت أنتظرهم في مكان وهم ينتظروني ويدورون علي في مكان ثاني.
كان فيه موقفين. مواقف خاصة بانتظار القادمين وتحميل وتنزيل العفش، وهذا ما دريت عنها هم كانوا واقفين فيها.
ومواقف عامة للانتظار الطويل ، وهذي كنت مسنتر فيها للأسف.
حرمت بعدها أخلي أحد يستقبلني مرة ثانية.
وفي اللقاء القادم بحول الله، نشوف نتيجة القرار هذا ويش صار لما رحت بالتاكسي للسكن مباشرة في رحلتي الثانية وفي سكن آخر.مواضيع عشوائيه ممكن تكون تعجبك اخترناها لك:
- السفر الى بريطانيا
- رحلة لشهر العسل
- تجمع لافضل موقع حجز للسيارت
- أرجـــو الـمــســــاعـــــدة
- تجربتي التأمين على السفر
- السعودية
- مخطط سفرة لنا
- خصومات على تذاكر الطيران
- الحجز عن طريق موقع أقودا بلييييييز مسااعدة
- سفر لاندنوسيا ارجو الرد
- ايهما افضل فلاي دبي او طيران ناس
- محتااااارة
- عريس محتاج مساعدتكم
- هل تفضل السفر عن طريق مكتب سياحي أم تخطط لوحدك ؟
- اسعار صرف العملات اليورو والفرنك مقابل الريال السعودي
- ابي اسافر لكن محتار بين لندن وسويسرا
- محتاج نصايحكم وين أقضي الاجازة الصيفية
- مواقع التراث العالمي حول العالم
- بطاقة الصراف
- استفسار عن الطيران
رد مع اقتباس
المفضلات