رحلتي من السعودية الى اوروبا

**abdulllah_O** · 02-10-2017, 10:55 PM

السلام عليكم ورحمة الله وبركاته

كيف حالكم طيبين ان شاء الله ،، عندي جدول ودي اشاركم فيه ،، انا ان شاء الله حاجز وخالص بعد شهر نص باذن الله راح اروح الى اوروبا ،، الرحلة راح تبدآ من مطار ميونخ (( المانيا )) وتنتهي في مطار جنيف (( سويسرا )).
الدمام > الدوحة > ميونيخ
جنيف > الدوحة > الدمام
كذا راح يكون مسار الرحلة ،، لكن باشرح لكم كيف بتنتهي في سويسرا وكيف راح ابدآ رحلتي ::

اولا: اول ما انزل من الطيارة راح اخذ السيارة الي مستاجرها ونروح الى فيينا (( النمسا )) وهي تبعد حوالي 440KM ،، طبعا الاغلب بيقول سلامات توك واصل من خط وتعبان وكيف بتروح فيينا !! انا باخذها تمشية بما اني باوصل مطار ميونخ الظهر بتوقيتهم يعني حرام يروح اليوم علي وانا نايم ،، اما اذا تعبت ولا قدرت اوصل فيينا باوقف في اقرب قرية واريح فيها مع اني متحمس كثير واتوقع اني ما راح اوقف الا في فيينا.

ثانيا: راح اسكن في فيينا 3 ليالي واحاول اروح اهم الاماكن والمعالم السياحية وبعدها باذن الله باكمل طريقي الى سالزبروغ وهي تبعد حوالي 300KM ،، وباذن الله راح امشي من فيينا الساعة 3 العصر علشان اوصل سالزبورغ قبل غروب الشمس.

ثالثا: راح اسكن في سالزبورغ ليلتين فقط ،، وراح احاول اني اغطي كل الاماكن المهمة ،، وبعدها ان شاء الله باتوجه الى زيلامسي وتبعد حوالي 90KM فقط ،، وباجلس في زيلامسي 3 ليالي ،، وبصراحة كان ودي اطول في زيلامسي لكن انا مقيد بايام محدودة.

رابعا: بعد ما اخلص من زيلامسي ان شاء الله راح تكون هذه اخر رحلة في دولة النمسا وسوف اتوجه الى قرية جارمش (( Garmisch Partenkirchen )) في المانيا وهي تبعد حوالي 210KM عن زيلامسي ،، طبعا ان شاء الله باجلس في جارمش 3 ليالي ،، وهذه القرية هي المكان الوحيد الي باجلس فيه في المانيا.

خامسا: ساتوجه الى انترلاكن في سويسرا ،، وهي تبعد حوالي 375KM ،، الصراحة هذا المكان يمدحونه مرة ومن كثر ما اسمع عنه ودي اشوفه ،، وان شاء الله باجلس في انترلاكن ٣ ليالي ،، طبعا كثير يقولون كيف تجلس في بعض القرى ٣ او ٤ ليالي ؟؟ انا اقولكم وش الطريقة (( انتوا تسكون في قرية جميلة وعليها اقبال كثير ولكن تطلعون تتمشون في القرى المجاورة والآماكن الي قريبة منها ،، وكذا تكون سكنت في مكان جميل وجالس تستمتع في الاماكن الي جنبها بدون ما تشيل اغراضك وشنطتك كل يوم.

سادسا: ونقول ان هذه هي المحطة الاخيرة في رحلتنا ان شاء الله وهي جنيف في سويسرا ،، طبعا انا اضطريت اني اروج جنيف بحكم ان رجعتي راح تكون من جنيف وانا صراحة احب اسكن جنب المطار لتسهيل عملية الذهاب اليه بدون قلق او خوف او استعجال ،، طبعا الكثير يقولون لي ليه ما تجلس في انترلاكن 4 ليالي وبعدين تروح المطار بدون ما تسكن في جنيف ،، انا اعلمك ما هو السبب (( المسافة بين انترلاكن وجنيف 215KM تقريبا يعني تقريبا حوالي ساعتين وشوي ،، وهذا شي يخوف لو تبنشر او يكون في حادث لا قدر الله او يصير اي ظرف ممكن تروح عليك الرحلة ،، وانا لا اريد المغامرة وخاصة انها رحلة دولية وليست داخلية ))

اخيرا: راح اكتب لكم تفاصيل كل من (( فيزا شنغن + الرخصة الدولية + اسعار تذاكر الطيران + حجوزات الفنادق + سعر السيارة )) ،،
1/ فيزا المانيا الي طلعتها كلفتني الوحدة 900 ريال.
2/ الرخصة الدولية تقريبا 150 ريال.
3/ انا حجزت تذاكر الطيران على الخطوط القطرية الذهاب " من الدمام الى الدوحة ومن الدوحة الى ميونخ " الاياب " من جنيف الى الدوحة ومن الدوحة الى الدمام " والانتظار في الذهاب والاياب تقريبا ساعتين فقط ،، وسعر التذكرة للشخص الواحد 1600 ريال مع الخصم.
4/ الفنادق دفعت في Booking حدود 7200 لمدة 15 يوم في النمسا + المانيا + سويسرا ،، طبعا غير مسترد.
5/ حجزت السيارة من موقع rentalcar وانا اشوف ان معالمتهم جيدة واسعارهم حلوة ،، السيارة هي مرسيدس C كلاس ،، طلعت علي السيارة 3300 ريال لمدة 15 يوم + تامين شامن عن الحوادث بقيمة 400 ريال + قيمة ارجاع السيارة في بلد اخر بقيمة 1100 ريال يعني المجموع = 4800 ريال لمدة 15 يوم يعني في اليوم الواحد تقريبا 320 ريال فقط.

وبكذا اكون اعطيت لكم تفاصيل رحلتي كاملة من الالف الى الياء ،، وان شاء الله اكون وفقت في سرد بعض المعلومات ،، والي عنده اي استفسار باحط لكم حساب سناب شات (( abdulllah_O )) ،، وان شاء الله راح اغطي لكم السفرة كاملة وراح ازيد عن هذه المعلومات بمعلومات الفنادق لكن ابي اتاكد من نظافتها وموقعها.

اخوكم عبدالله

مواضيع عشوائيه ممكن تكون تعجبك اخترناها لك:

**سمير ايطاليا** · 02-11-2017, 10:55 AM

السلام عليكم .مقال جيد اخي ومدقق اتمنى لك رحلة ممتعة و مفيدة انشاء الله .وعملت خير بنومتك في جنيف لتتجنب اي عائق .مش حيكون تعب انشاء الله الطرق هنا في اوروبا جيدة والاجواء غير حارة الشيء اللذي لا يرهق اثناء السياقة .