الموضوع: انتبه ....تقرير ساخن

بسم الله ..
السلام عليكم ورحمة الله وبركاته , اعزائي اعضاء منتدى الحلم كنت قد وعدتكم بتقرير عن رحلتي لكوكب الطبيعة اندونيسيا لكني

تأخرت بسبب ظروفي فأرجو المعذرة .
كانت الرحلة عائلية من اربع اشخاص انا وزوجتي وابتي 2 - 4 سنوات على الخطوط السعوديه بتاريخ السبت 8 - 1 - 2011
والعودة يوم الجمعة 21- 1 -2011 .
قبل ان نبدأ احب ان اشكر اعضاء المنتدى الكرام جميعا وذلك لما بذلوه من جهد لتوفير المعلومات والمتابعة ولن اوفيهم حقهم ولكن

.. من لم يشكر الناس لم يشكر الله .

الرحلة كانت حلم لجنة الله في ارضه بل تعدت مخيلتي فلم اتصور هذه الكمية من الخضار والانهار . واما الامطار فحدث ولا حرج .

انتهى الكلام الفصيح ونجي للكلام المليح ..

قبل الرحلة -
من يوم شفت تقارير الشباب وانا حالف يمين اني اسافر بعيالي مع انها اول سفره خارج البلد , ادمنت الموقع وعشعشت كل

التقارير في راسي جمعت المعلومات والتفاصيل والاسعار ( المحقق كونان ) وكلها من ( اعضاء المنتدى ) ربي لا يضيع

تعبهم ,
كانت حجوزاتي من موقع بوكنق جميع الفنادق عدا سيروني رحت لهم مباشرة . الموقع امين ومحترم ( صار لي موقف اني حجزت

عن طريقهم لفندق استون مارينا وبعدين لغيته وفي يوم جاتني رساله عالايميل انو حيخصمو يوم لاني مالغيت الحجز قبل الموعد

المحدد , اعترضت وارسلت رساله لادارة بوكنق باني الغيت الحجز عن طريق موقعكم وارسلتولي انو تم الالغاء وفي اليوم الثاني

اتصلو علي وقالو لا تخاف ما حينخصم منك ولا شي واذا حصل بلغنا واحنا نرجعها لك )
حجز الرحلة كان عن طريق موقع الخطوط السعوديه وكانت اسعار التذاكر بحوالي 4900 للكل السعر كان صيده زي

مافهمت .

يوم الرحلة -
كنت قد جهزت الاغراض من صيدلية ومعلبات وتسالي وحولت دراهم من البلد و سعر الصرف كان الريال ب 2300 روبية تقريبا .

مواضيع عشوائيه ممكن تكون تعجبك اخترناها لك:

• الشقق الفندقيه في بالي والفلل
• استفسارات ابومها متجدده والله يعينكم
• استفسار بسيط عن الطقس
• مساعده جديد في السفر
• ودي ببرنامج لسفرة عائلية في اندونيسيا
• جزيرة باليهل تصلح للعوائل؟
• محتااااره واحتااااج المساعده من الجميع
• سوال عن فيزا رضيع مضاف بجواز اخوه
• أستفسارات متعددة للعضوه جماال الطبيعة
• افيدونا ياخبراء
• مسافر وحداني وابي خوي
• السفريه قررربت
• من يعرف جزيرة في اندنوسيا يكون مائها أزرق وصافي جداً كالسماء ؟
• ارجو مساعدتي يترتيب جدول لعائله لمدة يوم
• الاسبوع القادم رحلتنا نحن اربعه شباب ونحتاج بعض التوجيهات
• أستشريكم
• آخر استفسار قبل السفره
• ساعدوني في فندق بالي
• متى اقدر اطبع بطاقة الصعود للطائرة الخطوط السعودية
• محتاجلكم رايح بالي اول مره فزعتكم

نكمل معاكم الرحلة



رحنا للمطار الساعة 6.30 م والرحلة كانت الساعة 9.30 الحمدلله مشت امورنا تمام ولا تأخرت الرحلة , تسع ساعات في الجو لا ونيس ولا نوم يادوب فلمين اجنبي ومصري لبن ورم راسي . تسليت بالبنات الله يحفظهم رايحين جايين في الطيارة والصغيرة طالعة نازله من الدرج حق الافق طول الرحلة وانا اعيييط .: : . وزعو لنا كروت الدخول قبل لا نوصل جهزت الكاميرا قلت ابصور المناظر قبل الهبوط لكن يعلم الله اني ماصورت الا صورة واحدة لاني كنت فاغر الفاه من شدة الجمال والخضار وما خفي اعظم .




اليوم الأول-

وصلنا المطار وفيزنا ب 25 دولار للشخص وبعدها للشنط وانتهينا بدون مانسمع كلمة هدية . في المطار اتبع اللوحات فيها بالعربي وماتضيع . واحنا خارجين التمو السواقين وهاتك ياعروض واقلها كان ب 350 الف لفندق السلطان تركتهم ورحت كاها
واخذت تاكسي ب 150 الف ( والسواقين جايين معايه للمكتب يعني واثقين من سعرهم ) .





.
في الطريق جاني ( استبحس نفساوي ) دبابات بالهبل والدركسون عاليمين امتحنت السواق انتبه انتبه ( ولولا قرصة الحرمه ماسكت ) , وصلنا الفندق وريتهم الحجز ( كتبتو في ورقه ) خمس دقايق وانا في الغرفة حسب الطلب . الفندق كانت ميزته انه فيه اكبر حديقه بالشرق جميلة جدا وواسعة وخلف الفندق مسابح وحديقة مرتبه وملاعب تنس ومضمار جري 500 م مكون من برجين . لن اتكلم عن فخامة الفندق يكفي انه كان يسمى بالهلتون سابقا , الغرفة في الدور الثامن استوديو مع حمام اكرمكم الله ( بدون شطاف ) مع اطلالة خلابه زجاجية ( كيف بس ) على الحديقة الخلفية والمسابح بدون شباك وفندق الكارلتون امامنا مباشرة .
















.
ريحنا ساعتين الى ثلاث ( للي سافر قبل كذا يعرف ان التعب يروح بمجرد وصلك للبلد ) ونزلنا نتعشى ونشتري شرايح سمباتي واكيد معجنات من برد توك في سوق سنيان على ما اعتقد بعدها رجعنا للفندق ونوم .



















ملاحظة -
1 - سعر الفندق لليلتين ب 197000 ريال خخخ , مصروفات العشا والشرايح والمعجنات مع التاكسي كانت ب 393000
2 - لاتتعامل الا مع تكاسي بلو بيرد ويبدأ عدادها من 6000 روبية وسلامتكم نكمل بكرة ان شاء الله

[size=3]( نسيت اقولكم ان الرحلة كانت موزعه يومين جاكرتا وثلاثة ايام باندونق وثلاثة ايام بونشاك ويوم بوقور وثلاثة جاكرتا )
اليوم الثاني
صحينا قبل الفجر ( اشبكم نمتو ) على احلى اطلالة ( تخيل زخات مطر مع روعة المنظر مع شروق الشمس واللون الاخضر الطبيعي ) وغرفتنا كانت في الدور الثامن . يعني حمااااااس من البداية ..











صلينا وعلى البوفيه لكن قبلها مرينا على بركة صغيرة مع نافورة وصورتين ثلاث وعلى الدسم , البوفيه مرتب ونظيف والاكل منوع بس من اكلهم ( افضل معلباتنا بقوة لان فطورهم رز ودجاج مقلي ومكرونه ولخبطه ) الله يكثر النعمه
عموما الفطور في كل الفنادق ماناسبنا . مافيه زي معلباتنا ... ( الفطور يا ام ايمن ........ اااقصد ام ليان ) الحرمه ماتمزح!!, بعد الدسم نزلنا عالحديقه الخلفية ايش الخضار وايش الاشجار اللي من حولك وشكل المسبح مع ملاعب التنس ورشات المطر الجو كان غير شكل ( خسارة ماعندهم كيرم والا كان ابدعت ) ( جايب معاية البودره ) خخخ




















. وين يامدام ؟ ( الكفيل ) قالت انشول ( انشول منطقة سياحية عالبحر وهي مقسمه عدة اقسام وانصح بزيارتها بقوة ) وعلى اقرب تاكسي بلو بيرد المشوار كان ب 90000 روبيه ( ام هتونه تقولي بالريال وانا ماسجلت بالريال والله.سامحيني ) وصلنا مشوارنا وكانت الالعاب مقفله ماتفك الا الساعة 11 ص قلنا نلف عالبحر وشوية العاب للبنات مع عصيرات ب 73000 .











رجعنا لدنيا فانتازي ( احد اقسام انشول )وهي العاب للكبار والصغار بمساحة كبيرة كان الدخول ب 230000 شاملة الالعاب واحنا داخلين استقبتنا فرقة موسيقية وبالونات وصور مع شخصيات كرتونيه يعني الوضع مو طبيييعي (فله) الجو كان شوية حر لكن مايمديك تشتكي الا يجيك الرذاذ من كل مكان ( زي اللي في الحرم ) ( وصاحبكم مقشعر وفاهي من الاخر ) الملاهي مليانه وخاصة من طلاب المدار س , قبل العصر طلعنا وعالفندق المشوار ب 75000 .













ريحنا لبعد صلاة العشاء .عدها نزلنا على وين وين وين ايوه على مطعم الجزيرة والتاكسي ب 40000 اكلهم عربي حلو ب253000 وجو المطعم كان هادي وبسيط وفي قسم (للعوايل )( لو كتبتها بهمزه احس اني حسن كراني حق الاحوال الجويه الله يذكره بالخير ) موظفي المطعم يهرجو عربي . وللعلم في فرع لمكتب كاها عند المطعم








رجعنا للفندق ب 25000 وهاتك يانوووووووم ( والله ياسمعت الحرمه سمفونيات شخير لبتهوفن من كثر التعب ) .













ملاحظة -
1- في الصيف جو انشول ماحيكون مناسب اكثر حر واكثر زحمة على ما اعتقد .
2- تعبونا شوية البنات الله يحفظهم مع الحركة والزحمة لكن كله يهون لاجل ضحكتهم .
3- حاولت ارفع الصور عن طريق المنتدى اكثر من مرة وما توفقت وتعبت والله لكن لاجلكم ارجع اعيدها فاعذروني لو كانت الحلقات قصيرة .


في الحلقة القادمة .. باندونق والرجل اللذي كويس (السواق) ... تصبحو على خير .

بسم الله..
اشكر الاخوان والاخوات على المتابعة والردود المشجعة واشكر كل من دعا لبناتي واسأل الله لي ولكم الهداية والثبات في طاعته .. الاخوان اللي يقولو اكتب السعر بالريال يسامحوني لاني كاتب الرحلة كلها في دفتر صغير ولا كتبت بالريال وعشان احول كل سعر من الروبيه للريال حتاخذ وقت ..

اليوم الثالث -
في الحلقة السابقة (ماوكلي)انتهى التقرير بعد ما رجعت من مطعم الجزيرة للفندق و كانت عندي ارقام سواقين من المنتدى على اساس اتفاهم معاهم لكن تذكرت ان رحيمي قد اعطاني رقم سواق وكان يمدحه كثير وقال لا تتعامل الا معاه , كلمت السواق واتفقنا بس كان سعرو شويه غالي ( 450000 )شامل الضرائب والبنزين او يمكن يكون السعر مناسب ( السواق من باندونق واسمو سفيان ولبنتي قصه مع اسم السواق ... كانت دايما تعكس اسمو وتناديه عمو ف ... عمو ف جا عمو ف راح ... وهاتك ياضحك ) الرجال محترم كثير وامين ومؤدب وكبير في السن , ممتاز في العربي ويعرف البلد



اتفقنا مع السواق وجاء الصبح وبسم الله وقبل نروح لباندونق مرينا على برج موناس الشهير وهذ مناظر من الطريق للبرج







( سبحان الله يوم وصلنا البرج شفنا شياب يسوون تمارين رياضية مع واحدة بالمكرفون وشباب يتدربو على الكونق فو ولابسين طقم واحد )





تذاكر البرج كانت ب (10000)























بعدها على باندونق المشوار حوالي 140 الى 160 كيلو قمة في المتعة والجمال وكل ماقربنا زاد الجمال والهوا البارد بصراحة شي خيال لما تسافر بالسيارة في بلد متخم بالروعة طبعا المطر شي محسوم امره سبحان الله ( 12 يوم في البلد كلها كانت مطر خفيف ). وصلنا الحمد لله وكنا حاجزين في فندق استون تروبيكانا غرفة في الدور الثاني مطلة على مسبح حلو ب 746400 ثلاث ايام موقع الفندق روعة قدام اسواق الجينزات (طبعا كل الفنادق اوريهم الحجز في ورقة انا كاتبها وتمشي الامور )طلعنا الغرفة وريحنا من المشوار .
بعدها على كنتاكي تعشينا ب 115000 ومرينا على سوق ناسي اسمو شوية فرفره مع دونات وقهوة ب63000 وكان في سوبر ماركت اخذنا شوية اغراض وتسالي ب 33000







بعدها عالفندق ونووووووووووم

اليوم الرابع-
صحينا بدري ( البلد احلى جدول لو تصحي 7ص وتنام بعد العشاء )وعالبوفية شي مرتب لكن المشكلة في نوعية الاكل زي ماقلنا في الحلقات السابقة , كلمنا السواق وبالفعل الساعة 7 وهو مسنتر ( مصطلح شبابي )
على بركان تانكو بان وسبحان الخالق طول الطريق شغالين تسبيح من روعة الطريق . اشجار طويلة وظلها علينا وجبال والكشكات والباعة في كل مكان .






وصلنا البركان واول مانزلنا بغى يشيلنا الهوى كان قوي لدرجة اني مانزلت البنات ويادوبك صورتين وشوية تحف ومسابح من الباعة




وعلى منتزه ساري اتير ( منتزه خاص بالمياه الحارة والينابيع )قطعنا التذاكر ب 28000 ويدوك بطاقة توريها للبوابة الثانية (حصل موقف اني نسيت البطاقة في سيارة السواق ونزلنا عالبوابة وطلبوها وندور و وندق عالسواق مشغول مشغول نبغى نشوف السيارة مافيه امل , رحت للبوابة شرحت الموضوع قالو لازم تدفع مرة ثانية وشوية الا بنتي تصيح بابا شوف عمو (فسيان)ههههه الاخ كان متكي في السيارة في موقع مدسوس ويكلم الحرمة ( طول المدة اللي كان السواق فيها معانا كانت حرمتو دايم تدقدق عليه .. متى تجي متى تجي )اخذت البطاقة ودخلنا المنتزه المكان هادي وكان في زي البركة فيها اسماك ملونة تأكلها مع بناتك والمدام الحركة حلوه ( لو عليه كان اكلت السمك .. مدمن سمك )تمشينا شوية وكان في ناس تسبح في الموية الحارة وفيه ناس تأجر لك بساط تجلس فيه انت وعيالك وتمد رجولك في المويه شعور منتاز











وعلى مزارع الفراولة (قطف الفراولة الطازجة مع العصير الطبيعي او الزبادي تستحق التجربة )دخلنا المزرعة وادونا سلتين مع مقصات عبيناها فراولة وشربنا عصيرات طازه ب 115000 للكل .
بعدها في الطريق تشوف الاناناس في كل مكان ( لايفوتك )اخذناه من كشك عالطريق واحنا راجعين للفندق













تغدينا في ماكدونالدز بجنب الفندق وريحنا .بنتي كانت تعبانة قبلها بيوم (تكحكح )رحنا على عيادة خاصه وادوها علاجات واوكسجين ب 300000 . مدحلنا الدكتور سوق باريس دي جافا كان قدام العيادة وبالفعل السوق جميل وبسيط وفيه ماركات وكافيهات عالشارع ومطاعم خيال مع الجو ( جيوردانو للملابس عندهم بكل الفروع اللي عندنا )مرينا على بريد توك للمعجنات ( لازم تمرو عليه )حق فطور بكره ( لا تقولو مفاجيع ) وعالفندق ونووووووووم .


ملاحظات -
1-جميع العاملين في الفنادق طيبين ومحترمين وخدومين والابتسامه هو العنوان عدا فندق واحد .. يتبع
2-باندونق هي اجمل مكان مريت عليه في البلد لاتفوتوه


تصبحو على خير

بسم الله .. السلام عليكم احبابي ..
اليوم الخامس -
يعتبر اليوم هو اليوم الثاني لنا في باندونق (المدينه المنوعة ) صحينا الصباح الساعة 7 تقريبا (يامحلا قومة الصبح )وكالعادة عالبوفيه (اااه ياكاسة الشاهي ) الف ليلة وليلة
,وهذا من قدام الفندق





, بعد الفطور كان السواق يستنى تحت

وعلى سوق باريس دي جافا ويادوب نزلنا السوق وعلى طوووول مطر بكمية عجييييييييبه سبحان الله تقول بزبوز



(السوق من جوه عليه سقف والسقف مفتوح من الوسط وتحت الفتحة مشتل من تباع الشمس )وعيش جو المطر مع

الورد






اخذنا كم غرض بعدها مرينا سوق ثاني اسمو سوبر مول باندونق فيه كم دور وفيه دور كامل لالعاب الاطفال اخذنا فيه ساعه








وعليها وعلى احلى ( منتزه - مطعم - مشتل - حديقة - جنه ) سمية زي ما تحب

اسم المكان كامبونق داو ... كل الكلام يعجز عن الوصف لكن لازم نوصف المكان ( شلالات صغيرة وموزعة في كل المطعم وصوتها هادر والاشجار تحيطك من كل اتجاه والنهر من تحتك من اول المطعم الى اخره والسلالم

تعيشك اجواء الغابات ,بالنسبة للاكل كان المنيو منوع من اكثر من دوله والطعم خيااااااال ( عني لو كان فشفاش ماتفرق وسط ذيك الاجواء , قبل الاكل طلبنا ثلاثة عصير طبييييعي فاتح شهية ويروق المنقه ويكيف الراس

وكالعادة بعد مانتنح شويه نتذكر التصوير . حساب المطعم ب 357000 .
احلى وقت لزيارة المطعم من قبل العصر لين العشا (لان اجواء الشموع والفوانيس في الليل وقبلها الغروب تخليك شاااااااااعر بالقوه) والاكيد ان طلعة الماكن هذا يبغاله يوم كامل وماتندم .

















ملاحظة -
1-المطعم فيه مصلى للرجال والنساء وفيه محل ملابس صغير
2-اذا كانت باندونق هي احلى مدينة في نظري فهذا المكان هو السر

اليوم السادس -
حاسبنا الفندق (بالروبية مع انو طلب بالدولار عشان فرق العمله في هذا اليوم كان في صالحو لكن على مين )يمكن الفرق طلع من 100 ل150 ريال بعدها مشينا نصرف من بنك مشهور هناك لكن ناسي الاسم وهو احسن مكان

تصرف فيه (احسن من السعوديه وباقي اندونيسيا).كان الصرف فيه الريال يساوي 2415 روبيه وانا صارف في السعوديه بحوالي 2300 بعدها عالبونشاك وسكنا في فندق (سيروني 3) لثلاث ايام اليوم الواحد ب 700 الف

روبيه وصارت قصه اول ماوصلت قالو مافيه الا ليلة واحده عشان بكره سبت اجازة والصينيين حاجزين ومدري كيف وبس وريتو ورقه ابو 100 الف شالني في عيونو واحلى غرفة على احلى مطل (من كثر ماسمعت المدح في فندق

سيروني قلت والله ما اسكن الا فيه )وليتني مادفعت (بكره اقول لكم ليه)


























المهم نزلنا اغراضنا وريحنا حبتين ودغري (قدييييم)على مطعم كمننا (اكلو عربي ونفر اللحم قليل بس طيب و نظافتو اي كلام ويتكلمو عربي وفيه قسم

عوايل).. ياهو يابنت هات الاكل ... اقصد ياولد (المدام تسوي قرقر) وكل شوية زودي نفر زودي نفر , تغدينا والحمدلله ب 132000 وعلى الفندق ونووووووم . وبكره نكمل قصة الفندق والمطل والشلالات

والبحيرة الخراااافية ...

تصبحو على خير

اليوم السادس -
امس قلت لكم ياليتني مادفعت للعامل بخشيش عشان يوفر لي احلى غرفة في الفندق ولمدة ثلاثة ايام ( وااااي ؟ ) عشان الخدمه اي كلام ومستوى الاهتمام

ماش واما البوفيه فحدث ولا حرج (بالتفصيل لوسمحت) اول ماوصلنا كل موظف كان يحك راسه ويطالع فوق وكانو مو شايف ومافيه غرف (يعني بخشيش)

وبس طلعت ورقه ابو 100 الف وهاتك يافزعات وابشر بالاندنوسي وكذا والبوفيه الاكل كلو شرق اسيوي مره مايناسب وكان اخس بوفيه في الرحلة وغير انهم

حولونا للبوفيه الثاني عشان معانا اطفال وتعال شوف موظفي البوفيه اللي مالهم نفس ونجي للغرفه كلها تماثيل ومنحوتات عالجدران (من غير هدوم)

مادري كيف الواحد يصلي ؟ والغرفه بدون تكييف ( بصراحة ماتحتاج ) والحمام (الله يكرمكم) عليه شبك مفتوح من فوق يعني تسمع اللي في السيب

ويسمعوك !!! ( كان احلى مافي الفندق النظافة والمنظر من البلكونه يسوى الدنيا وينسيك العيوب , سلسلة جبال ممتده (سبحان من خلقها)

وتشوف في وسطها القرى متناثرة مع الضباب اللي يدخلك في الغرفة والاشجار وكيف عاد اذا جاك المطر( ياكريم ارزقنا الجنه ) والله ياشباب اني اكتب

ويدي ترتعش من روعة المنطقه (واقول ليش السعوديين متكين فيها)رغم اني ماشفت الا واحد او اثنين بس ..





















اليوم السادس -
اصطبحنا واصطبح الملك لله (اذا بغيت اصحى العيال افك البلكونة ويدخل الهوا البارد , دقيقتين وهم مصحصحين ) ودغري عالبوفيه.. لكن زي ماقلت

لكم فوق ,المهم قلنا وين ياعمي خلينا نرجع عالبلكونة وهات المعلبات وبراد الشاهي ( مكر مفر مقبل مدبر معا كجلمود صخر حطه السيل من علي ) ماني

حافظ ابيات الا هذا تبغو والا بكيفكم ..
( نسيت اقول لكم يوم دخلنا الفندق طاحت بنتي الصغيرة من الدرج وانفتح جرح(مزهريه) في شفتها وصار شكلها فللله وهاتك محشات في البنت )

خلصنا فطور وعلى اقرب مستشفى وشوية ادويه ب 69 الف والحمدلله ماطلعت غرز وعلى شلالات شيبوداس ( كلام كبير ) التذاكر بحوالي 50 الف نزلنا من

السيارة رايحين عالشلال ويقابلنا ولد نشبه الا اشيل الاغراض اقول لا يقول الا يمين يسار يمين يسار شاف مافيه فايده قام يغني ( ياسر وينو في الاستراهه

) ( الله يستر علينا وعالمسلمين ) يوم سمعته فكيت ضحك ( الله يسامح النصراويين )قلت تعال تعال شيل ولك اللي تبغى , كملنا الطريق وشفت

بحيرة ماكنت ادري عنها قبل الشلال قلت اصطوب ( بالمصري ) هنا لازم نروح البحيرة قبل الشلال (اقسم بالله قد ما امدح او اوصف ما اوفيها حقا ( ابو

العيشة اللي هنا ) قال السياحة الداخلية . ( ابغاك تجلس مع نفسك وتخيل اجمل بحيرة يقدر خيالك يوصل لها ) هاه حاولت ؟ ... الصورة تشرح لك

موقفي
من يوم شفت البحيرة وهذا السؤال في راسي لليوم ( متى يجي التقاعد ؟ ) سنترنا عالبحيرة والمطر الخفيف شغال مع القهوه والشاهي وشوية تسالي

تحت اطول الاشجار اللي شفتها (عماره اربع ادوار ) واحنا في جونا جوك ثلاثة اعتقد انهم استراليين رجالين وحرمه مع طفلين والله يافيهم طول ( حست

اني بكت دخان ) .. واسألهم عن الشلال ( مدري وصل صوتي لهم والا لا ) (ابغى اقول لهم وتر فول وتر فول قلت وتر بوم) طالع فيه وحسيت انو

قال الله يشفيك بالاسترالي( قاد شفيينق يو )بس كيف ؟ .. طنشني ومشى , بعدها كملنا عالشلال والطريق)كان شويه صعب(للعوايل والاطفال)

خاصة انو معايه عربية . وصلنا للشلال وكان المكان بديع ( جديده ) وادي ويصب الشلال من فوقنا جلسنا شويه واخذنا كم صوره ( لو تابعتو التقرير

من بدري حتلاقو اغلب الصور شخصيه ومافي غيرها وما يصلح اكتب التقرير بدون صور فأعذروني ).







خلصنا من الشلال وعلى حديقة الزهور (حديقه جميلة

وكبيرة فيها رسمات بالازهار وشتلات وتماثيل بالورد وبداخلها الحديقة اليابانية وغيرها (تقدر تركب قطار صغير او تمشي وهذا افضل للي يبغى يتفرج)كان

الدخول ب 50 الف .





















بعدها على كوتا بونقا الدخول ب 90 الف ( مجمع ضخم جدا يتكون من اشكال والوان من الفلل والبيوت وفيه بحيره والعاب تمشينا في

شويه وركبنا مركب صغير دار فينا ربع ساعة وعلى.. كنتاكي تعشينا ب 200 الف تقريبا وعالفندق ونووووم .. بكره ان شاء الله حديقة تمان

سفاري والتلفريك والالعاب والقطار واحلى صور ..

































اليوم السابع -
صحينا بدري كالعادة وفطرنا احلى فطور عالبلكونه وقمنا صورنا كم صورة للفندق ويالله على تمان سفاري ( اكبر منتزه واحلى منتزه وافخش منتشخ !)

يتكون من حديقة حيوان وحديقة طيور والعاب ومسارح وكافيهات ومطاعم ( والكاوبوي ) الفله , قبل نخش الحديقة .. يابو الشباب بالله ربطتين جزر

على موز ( موسكيلا مابي كلمتو ساباب ) طيب طيب بس هات الجزر واللزي منو كلفنا 20 الف , دخلنا الحديقة ب 440 الف ريال !! وياسلاااام والله

اعلق واصفق الحيوانات في الشارع واحنا في قفص !! ( صور الحيوانات تغني عن التعليق ) بس احساس جميل لمن اولادك ياكلوها وتشوف الخوف

والفرحة فعيونهم ( بالله مو في البنكرياس ) (طبعا البنت الكبيرة ابت واستكبرت الا يكون لها قصة مع حمار الوحش فصارت كل ما شافت واحد تقولي ..

بابا ليش هذا لابس ملابس .. !!)السواق بغى يقلبنا من كثر الضحك .. وشكلو قال بالله هذي عيله ؟ المهم تعدينا الحيوانات الاليفة ورحنا للخفيفة قال

السواق قفلو القزاز انتم في حضرة الكواسر ( مو الاهلي )طبعا بعضها بيننا وبينها شبك وبعضها فري .خلصنا من الحيوانات ورحنا للطيور وهي عبارة عن

سلالم من خشب ومنظر الشلال والبركه من تحت خطير تمر من زي الكهوف تصاعديا ( بالله كيف ) والطيور بجمبك ولا تطير وتتصور جمبها وتأكلها لوحبيت

(مو تاكلها انتبه للهمزه فوق الالف ) شباب متهور ( والله لوعندنا كان تحصل عين الطير بجمبو ).خلصنا ورحنا عاتلفريك اللي زي الصاروخ ( يادوب

ركبنا قالو انزل )ياخذ بك لفه سريعة ب 45 الف ,























































طبعا تمان سفاري ما يكفيها يومين من العاب ومسارح وغيرو . جينا للكاوبوي (اللي رجونا فيه العالم)

وبسرعة عالمسرح وشوف الخلق تستنى ( وكان عرض راااائع وجميل وفيه شغل ولو انو بلغتهم لكن يكفيك الاكشن اللي فيه ) يعني لايفوتك .







خلصنا

من تمان سفاري والجوع لعب فينا لعب واستقر بنا الاختيار على (بيتزاهت) حسيت اني اول مره اكل بيتزا الطعم لذيذ وارخص من فروعنا (اللي كنت اعتقد

انها لذيذه) ومكان المطعم حلو والمنظر جميل..





فاصل .. ( بعد مارجعت من السفر سألني واحد من الزملا في العمل يقولي كم خسرت فلوس ؟ قلت ولا ريال.. قال لا والله من جد.. رديت قول كم

صرفت اقولك لكن تقول خسرت لا والله ماندمت ولا على ريال ) وان شاء الله اكررها مره واثنين وثلاثه . البلد جميل ورخيص والناس في حالها وادب

واحترام والاجواء تشجع الواحد على التكرار .
المهم خلصنا عشانا ب 200 الف تقريبا مافي شي في المطعم ماطلبناه وعلى الفندق ونوووووم .. يتبع ..

تصبحو على خير

بسم الله ..اليوم السابع ..
فطرنا كالعادة في بلكونتنا الغالية ( يمون ) واحلى براد شاهي معطبر ( بالمصري )على احلى منظر وفجأة وبدون سابق انذار وعلى حين غرة نسمع ...
البنت تضحك وهي نايمه (الله يشفيك) !! .. حضر السواق وحملنا الشنط وعلى بوقور مدينة الرومنسية (مدينة غير شكل)شوارعها وسيعة ونظيفة والفلل منتشرة وكأن سكانها من الطبقة الاستر .. الاسترقا .. الاستقراطية (اخيرا). حجزنا في فندق استون بوقور (ياناس ياعالم النهر يمشي من تحت الفندق)وب 310 ريال فقطن ! استقبلونا بالسلام ال ... الو..الو انقطع الخط . رجعنا ..احلى شاي زنجبيل مع ميكروكروم (مادري ايش حاطين فيه )ابلع وبس حار بارد نو مشكله بس لزيز ,كملنا عالغرفة وريحنا شوية .بعده اخذنا كم صور في الفندق وجا الذيب (السواق)الاسواق (احلى اسواق تاخذ منها هدايا )تقليد ماركات درجة منتازه وشي مرتب وحلو + الرخص يعني كلام كبير


















وعلى بحيرة الليدو (تاخذ قارب خشبي مع الغدا ويفرفر بك كم لفة عالبحيرة (عيش جو الملوك )ولو دغيغة (بالسوداني). التكلفة ب 574000 روبيه .بعدها عالفندق ونووووم .

































اليوم الثامن ..
على الساعة 7,30 واحنا مسنترين في البوفية (قلنا الفندق يأهل) احلى فطور منوع على احلى منظر ( مسبحين وشلال اصطناعي ونهر طبيييعي )(معايه ياهيئة السياحة الداخلية )















حاسبنا الفندق وعلى .. جاكرتا ( قرب الموعد ) , يوم وصلنا رحنا على الالعاب المائية (ناسي اسمها)قريبة من تمان مني دخولها ب 38 الف مكان حلو ووناسة للاطفال وللكبار اذا حبو .
اشترينا مايوهات للبنات ونظارة من نفس الالعاب ب 230 الف ,وفلوها البنات وانبسطو









ويادوب غيرنا الملابس وعلى تمان مني ( ماطولنا لان المكان ماعجبنا ( وجهة نظر ) )ومنها على حديقة الفواكة , دخولها ب 100 الف للكل .الحديقه بسيطة ومرتبة ويدوك فواكه مع التذاكر ( اختياري ) .طبعا حجزنا باص مع مرشد سياحي يتكلم لك عن انواع الفواكة ومصدرها ( عربي مكسر )ب 100 الف . اخذنا كم لفه وادونا جائزة اختيارية اما تي شيرت وكاب او شتلة في حوض بلاستيك .













بعدها تغدينا في كنتاكي ب150 الف


وبعدين عالفندق ( استون مارينا )ثلاث ايام ب 769 ريال (فندق السعوديين) الفندق عبارة عن اربع ابراج وقريب من المطار ومن انشول (منطقة سياحية) الموقع ممتاز وغرفتنا كانت في نص البرج الثاني في الدور 17 . وسلامتكم

اليوم العاشر -

اصطبحنا واصطبح الملك لله .. يامدام !! يامدام !! كانت تصلي .. احسب بغيت اديها واحد بقققس..ماط ( تشوفني وانا اكتب ) قالت اشبك تزعق (وين الخشوع ؟) لااا عادي فين نروح ( تصرييييف ) قالت على انشول . توكلنا على الله تاكسي ب 25 الف الى المكان وعلى ساموداريا (الاسبلنق صح ؟ )(الاسبلنق) نوع من انواع البرمائيات ..
طاااخ كمل(الحرمه) المهم المكان عبارة عن سينما البعد الرابع فلللله من الاخر تحس انك وسط جنوب الفيلم ( حلها ) المقاعد تتحرك واحيانا تبخ مويه او هوا حسب المشهد والنسوان بتسوط والرقاله بتئول الله اكبر ( ركز يا... ابو الشباب ) ملاحظة .. بنتي الصغيرة كانت نايمه وانا مغطي اذنها بيدي والا كانت حتسوي فيلم لحالها مع الرجه ( يعني اللي معاه بزورة يفكر قبل لا يخش ) كان الدخول ب 210 الاف والمكان زحمة زحمه مع انو ما كان اجازة , خلصنا وجنبنا شويه طلبنا اسكريم





وعلى عالم البحار دخول الصالة ب 150 الف المكان كان مرتب وجميل ونظيف وفيه اشكال والوان من الاحواض والاسماك بأنواعها .























وبعد الجولة بدأ الجد عند الرجال ( الجوع ).. والمعده هي اسرع الطرق الى قلوبنا معشر الذكور الا من رحم ربي , ومين احسن من مطعم بندر جاكرتا في ارضائك ؟ (ابغى بيض وعنب وشرشف وابو جلمو ومطاطات و دوا غسيل و و و )مع الجوع يضيع التركيز ..طالعت الحرمه فيه وقالت بقي باخرة .. هات .. هات المنيو بلا هبل ( طلبت الغدا بكل هدوء ) وقبل الغدا شوية عصيرات وبسم الله وين يوجعك ( مصطلح شبابي ) الغدا ب 500 الف (زودت كم طلب) وياربي لك الحمد والشكر .





المطعم ذو اطلالة ساحرة عالبحر وخاصة وقت الغروب والجو كان جميل وهادي الا صحوني !! (لا تفوت المطعم ) . واخيرا على الفندق ب 20 الف وكان وقت مباراة في كاس اسيا
( وينك يا نور ؟) واحلى نومه .

اليوم الحادي عشر -

في الصباح وبعد ماصحصحنا مشينا على سوق قراند اندونيسيا ب 70 الف , السوق مكون من عدة ادوار وهو قمة في الفخامة والرقي والمنحوتات منتشرة في ارجاءه تمشينا فيه وبعدها على برد توك ( ادمان ) معجنات وقهوة ب 100 الف




















وقلنا نمر على سوق منقا دو ( في اكثر من سوق منقا دو )احنا رحنا الشعبي ( حلو وفيه بضايع منوعة ورخيصة ) وهو قريب من فندقنا . قضينا شوية اغراض وعلى الفندق نرتاح .بعدها على الفرع الثاني من منقا دو نتمشى ونتعشى ب 160 الف واخيرا عالفندق والتاكسي ب 15 الف .

اليوم الاخير -


اسمحو لي ما احب الفراق وهذي صور اخيرة من بلكونة الفندق والمطار ارجو ان اكون وفقت ..











وسلامتكم