موسوعتي الخاصه للندن

**hibaa** · 02-03-2016, 11:11 AM

السلام عليكم ..

زرت لندن مرات عديده .. حبيت اجمع خبراتي بلندن كلها بمكان واحد للفايده .. بالصور و الشرح

الموضوع بيكون من اقسام :

* القسم الاول الفنادق اللي جربتها شخصيا :

1- The Montcalm .. مرتين

2- Marriott Grosvenor Square .. مره

3- The Cumberland .. مرتين

4- Raddisson Sas Portman Square .. مره

5- WestBury .. مرتين

6- Royal Garden (Hi-Street Kensington) ... مرتين

7- millenium Myfair .. مره

8- Churchill .. ثلاث مرات

9- Intercontinental Park Lane (قريبا)

* القسم الثاني أماكن الزياره :

1- Oxford Street - Regent Street - Bond Street - Piccadilly

2- Westfield Mall - Shefards Bush

3- Brent Cross

4- Portobello Market

5- Covent Garden

6- Bicester Village

7- Thorpe Park

8- Leeds - York Outlet

9- Ashford

10- Blue water Mall

11- Portsmouth

12- Manchester

13- الرحله النهريه

14- Harrods - Harvey - knightsbridge

15- Hight street Kensington - Whole foods

* القسم الثالث بعض المطاعم :

1- Zizi

2- بيتزا هارودز

3- ASK

4- ريجينت فود كورت

5- جيمس ستريت

6- هول فودز السيلفردجز

7- Napket

8- بيقل فاكتوري

9- Hummos Bar

10- Pure waffle - وافر شارع اوكسفورد

12- The italian kitchen

13- food court الويستفيلد

14- Wagamama

15- مطاعم عربيه بالاجوار رود

16- مخبز (و مطعم) ارجنتيني عجيب

17- نوره

18- بضيف بعض المطاعم بعد في حال التذكر ان شاء الله

* متفرقات من لندن :

1- الباص و التاكسي و القطارات

2- الهايد بارك

3- التسوق و بعض المشتريات ال MUST

4- الصرف و البطاقات و الشئون الماليه

5- الذهاب لباريس او بعض الدول الاخري من لندن

6- الطيران و الحجوزات و الافضل.

7- اخرى

ان شاء الله لو تذكرت شي اخر بضيفه .. و بحاول اخلصه كله باسرع وقت

مواضيع عشوائيه ممكن تكون تعجبك اخترناها لك:

**hibaa** · 02-03-2016, 11:19 AM

Part (1)
السلام عليكم ..

مقدمه (متفرقات عامه) :

أول شي أحب اقول أني اعشق لندن فسامحوني لو كان التقرير من أوله الي اخره مدح بهالديره

1- لندن ديره تصلح لكل الأذواق و الأعمار .. معروفه الديره بالتسوق لكن لندن ما تقتصر علي السوق و بس .. صحيح ان سوقها من أفضل الاسواق في العالم لكن ايضا فيها اشياء ثانيه .. سوق .. طبيعه .. رحلات .. تاريخ .. تمشي و قهاوي .. كل شي فيها ..

2- أسوء اوقات السفر الي لندن الصيف من كثره الزحمه و العرب و الخليجيين فيها .. تفقد جزء من حلاوتها لكن مو كل حلاوتها .. تبقي لندن اهيه لندن .. صحيح لندن متروسه عرب و خليجيين علي مدار العام لكن اشهر الصيف 10 دبلات الطبيعي ..
افضل اوقات السفر الي لندن من وجهه نظري .. شهر 12 و 1 .. برد قارص جميييييل .. ثلج و أمطار (فينا فقر) .. السوق خصومات هائله .. احتفالات و عروضات الكريسماس ممتعه جدا جدا ..
اما ارخص الاوقات و اهدي الاوقات للسفر للندن شهر 10 و 11 و اشهر 3 و 4 و 5 تقريبا .. السفر يكون هادي و الاجواء حلوه و الاسعار تنزل ..

3- افضل الخطوط للسفر الي لندن البريطانيه بسبب انها دايركت و خدمتهم زينه و مضبوطين ..
اما افضل كمستوي القطريه و الاماراتيه .. لكن يعيبهم كثره الجاليات الاسيويه فيها و الترانزيت ..
عموما اللي يبي يحجز قبل لا يحجز يدخل علي موقع www.expedia.com و اختر Flights و حددو مطار الذهاب و الهبوط لندن طبعا و التواريخ و يعطيكم مقارنه باسعار التذاكر في التاريخ المختار لجميع خطوط الطيران ..
طبعا الاسعار تفرق باليوم ..

4- السكن من اهم معضلات لندن .. الفنادق مستوياتها متفاوته .. و ال 5 نجوم يكاد يكون بالكاااد 4 نجوم للفنادق اللي متعودين عليها ..
من افضل المواقع لمقارنه اسعار الفنادق و مستوياتها .. يقارن بين جميع المواقع الموثوقه للحجز ..
Compare Hotel Prices - Best Hotel Deals Guaranteed
www.hotelscombined.com
و اللي يبي معلومات اكثر عن اي فندق او صور واقعيه حقيقه ما عليه الا يحط اسم الفندق و يبحث عنه بموقع :
Reviews of Hotels, Flights and Vacation Rentals - TripAdvisor
www.tripadvisor.com

5- كثير يسألون عن الصرف .. كاي دوله تسافر لها جزء يفضل يكون معاك كاش .. و جزء يكون بالبطاقات الحسابيه و الائتمانيه للامان ..

6- بالنسبه للتنقلات بلندن الافضل الباصات .. و الاندرقراوند .. لو الواحد يعتمد علي التكاسي بيكون يبيله ميزانيه بروحه ! .. و ايضا استخدام التنقلات العامه في لندن ممتع و سهل و كسر للروتين .. و تحس بطعم السفر!
اول ما توصل لندن .. من اي محطه اندرقراوند او قطار .. استر بطاقه Oyster
في نوعين للاويستر .. وحده ب 17 باوندز مفتوحه للاستخدام الغير محدود للباصات بس اسبوع كامل ..
و الثانيه ب 28 باوندز مفتوحه استخدام غير محدود للباصات و الاندرقراوند اسبوع كامل ..

لمعلومات عن استخدام الاندرقراوند انصحكم بزياره موضوع مشرفنا موادع :

طريقة استخدام underground لندن بالصور

و لمعلومات عن استخدام الباصات ما قصر مشرفنا القطري بموضوع كامل عنها :

)()( شرح مبسط عن الباصات الحمراء )()(
www.arabtravelersforum.com/travel251123.html
و طريقه التنقل بين المطار الي داخل لندن الاخ موادع جمع الخيارات بالشرح المفصل بموضوع :

طريق الذهاب من مطار هيثرو الى لندن

7- من سابع المستحيلات ان الواحد يرجع من لندن بدون لا يحتاج يشحن اغراض معاه .. حيث ان سعر الكيلو الزائد بالطيران سعر مبالغ فيه ..
اللي يكون حجزه علي البريطانيه .. و الوزن الزايد عنده معقول يقدر يشتري جنطه اضافيه 23 كيلو او 32 كيلو بسعر معقول جدا لا يتعدا 35-40 باوندز يختلف اذا الحجز بالانترنت او بالمطار و 23 او 32 كيلو ..
اما اللي حجزه علي طيارانات ثانيه او الوزن الزائد كبير .. يفضل ان يشحن اغراضه قبله ..
شخصيا استخدمت شركه العربي للشحن رقمهم 02073735017
شحنا اغراضنا يوم الاربعاء الصبح .. السبت الصبح استلموهم في الكويت ..
سعر الكيلو 1.3-1.4 باوندز و بوليصه التامين 60-70 باوندز ..

8- الاجوررود (شارع العرب) من اسوأ الاماكن حسب رايي الشخصي للتمشي او السكن ... مركز تجمع العرب و المهاجرين و النصابين و الاسعار غير معقوله فيه .. انصح الواحد ما يزوره الا اذا مشتهي ياكل من احد المطاعم و يمشي منه .. راي شخصي ..

9- بالنسبه للاتصالات في لندن .. حسب راي الجميع افضل شريحه للاتصالات الدوليه ليبرا .. لكن ليبارا مافيها خدمه البلاك بيري .. فاللي يبي بلاك بيري ياخذ شريحه اورانج او تي موبايل .. خدمه البلاكبيري فيها ب 5 باوندز شهر كامل ..
اما للايفون فودافون او اوارنج او تي موبايل كلهم نفس الشي .. 5 باوندز بالشهر ل 1 قيقا .. لكن فودافون غير كل شحن جديد تشحنه يعطونك 500 ميجا مجانا .. و كل 500 زياده ب 2.5 باوندز ..

10- في مدن كثيره الواحد ممكن يروحلها يوم و يرجع .. رحلات ممتعه و هروب من زحمه لندن .. من هذي المدن ..
بورتسموث .. مدينه بحريه جميله جدا و المنظر فيها يرد الروح .. و فيها اوت لت و سوق عادي ..
ليدز .. مدينه هاديه جدا و حلوه .. قريب منها اوت لت يورك ..
مانشستر .. شخصيا رحت لها الصبح و رديت في الليل .. لكن الغالبيه يحبون قضاء ليله او ليلتين فيها و زياره بلاكبول منها .. في مجمعين كبار و سوق عادي و طبعا النادي و بعض الاماكن اللي تستحق الزياره بتطرق لها بعدين ان شاء الله ..
برايتون .. مدينه ساحليه جميله ..
كارديف .. ما زرتها لكن يمدحونها ..
اما لقضاء بعض الايام في الريف بنصح بزياره البحيرات ... او اسكتنلدا..

11- هذي النقاط اللي في بالي الحين و لو تذكرت اي شي عام بضيفه هني او بذكره من خلال التفاصيل بالاجزاء القادمه ..

البارت الثاني ان شاء الله اليوم او باجر .. اعتقد اخليه عن الفنادق ان شاء الله ..

اي ملاحظات او اسفسارات لا تترددون بطرحها ..

**hibaa** · 02-03-2016, 11:31 AM

Part 2-A فنادق في لندن

من خلال زياراتي في لندن جربت العديد من الفنادق .. و احيانا في السفره الوحده اسكن في فندقين احيانا لمجرد التغيير و التجربه و احيانا يكون في نفس السفره زياره دوله ثانيه باوربا و العوده للندن فمن باب التغيير نحجز فندق غير الفتره الاولي ..

1- Marriott Grosvenor Square - 5 Stars

http://www.marriott.com/hotels/trave...svenor-square/

هذا فندق المفضل الأول في لندن .. ما صادفت فيه وايد خليجيين ابدا .. مع ان موقعه بنص اللويه ..
السعر وقت حجزنا ..
الغرفه العاديه تقريبا 90 دينار كويتي ..
الغرفه الكلب كانت 120-130 دينار كويتي ..
السويت كان تقريبا 200 دينار كويتي ..

سكنا في الثلاث انواع علي فترات طبعا ..

طبعا الأسعار تختلف حسب الوقت و الموسم ..

* المميزات :

1- الموقع : لا يعلي عليه ! بوسط اوكسفورد علي القروفنر سكوير .. خطوات و انت جبال سلفردجز ..

بالضبط بشارع اوكسفورد عند محل الرياضه اديداس .. اللفه اليمين .. في محل Pure Waffle ألغني عن التعريف ..
بعده بخطوات علي اليمين يكون الفندق ..

2- مستوي الفندق فخم .. ستايله مودرن جدا .. الفندق مجدد بالكامل عام 2008 .. الغرف حديثه و نظام جديد مو كلاسيكي .. ببساطه تشرح القلب ..
حجم اغرف العاديه معقوله .. مو صغيره حيل .. بالنسبه لغرف لندن طبعا ..
الغرف المطله و الكلب .. حجمها جيد جدا ..
السويت عباره عن غرفتين بينهم ممر .. غرفه المعيشه كبيره و فيها طاوله اكل و 2 سوفا وحده منهم تصير سرير .. و كراسي و تلفزيون غير تلفزيون غرفه النوم ..

هذي الغرفه الصغيره :

و هذي الغرف الاكبر المطله علي السكوير :

و هذا اللونج الي دخوله مجاني مع الحجز الكلب و السويت :

3- النظافه 100% و الخدمه فوق الممتازه ..

ببساطه فندق مريح جدا من كل التواحي

* العيوب :

1- عند حجز السويت .. اول شي عطونا سويت ستايله قديم و حسيت اني في شقه بمصر سنه 1950!
و علي قولتهم عندهم نوعين سويتات مودرن و انجلش كلاسيك ..
طبعا رجل بالارض و الثانيه بالسما عشان يغيرونه لواحد مودرن و الحمدلله تم التغيير ..
فاللي يبي يحجز سويت ياكد عليهم ان يبي الستايل المودرن

2- الانترنت غالي و المفروض الواي فاي مجاني في الفنادق الحين

3- السويت ل 4 اشخاص لكن للاسف فيه تكرمون حمام واحد .. المفروض 2 بما ان اساسا حاطينه حق 4

لكن اقدر اقول ان الفندق Highly Recommended !!
و اعذروني لعلي رداءه الصور ماكانت معاي كاميرتي و كنت اصور بالبلاك بيري ..

نشوفكم بعد شوي مع فندق 2 ..