الموضوع: ممكن مساعدة في اختيار السكن لرحلتي لشهر العسسسل تكفون ساعدوني

السلام عليكم ورحمة الله وبركاتة

جدولي كالتالي :
أول يوم عند الوصول الاستراحة في فندق ( أستون مارينا وتم حجزه عن طريق موقع أقودا )
ثاني يوم التوجة لجزيرة بالي وقضاء 6 أيام 5ليالي
وبعدها التوجه إلى باندونق والجلوس يومين
بعدها الذهاب للجبل والجلوس 6 ايام
واخيرا العودة لجاكرتا والجلوس 3 أيام

طبعا الرحلة مدتها 18 يوم
رحلتي بإذن الله شهر العسل يوم الاثنين 25/6/2012 وصولي لجاكرتا 1:45 ظهرا بتوقيت جاكرتا
والعودة لأرض الوطن يوم السبت 14/7/2012 الساعة 1 ظهرا

المطلوب منكم أعزائي الكرام :
1-أفضل سكن في بالي وأفضل منطقة كوني عريس هل هي ( كوتا - ناسادوا-ابود-سيمناك ) وأريد سكن يليق بي كعريس وباسعار جميلة ؟
لو سكنت في منطقة هادئه يومين اريد فله بمسبح خاص ؟
و3 ايام في منطقة حركيه ورائعة عادي حتى لوفي فندق ؟
.........................
2- السكن في باندونق لمدة يومين ؟؟؟؟
..........................
3- الجبل وماادراك مالجبل ؟؟؟
.........................
4- عند العودة لجاكرتا أريد أفضل سكن قريب من المجمعات التجاريه وفي منطقة حيويه ؟؟
..........................

طبعا تكلفه الرحلة اللي معي 15000 الف ريال من غير التذاكر الدولية هل تكفي للرحلة كامله
وكم بيكلفني السكن في ( جاكرتا - بالي - باندونق - الجبل - جاكرتا )
اريد ميزانية السكن
علما بإني حجزت ( أستون مارينا بـ 300 ريال وذلك للراحه مثل ماسبق وقلت في أعلى الموضوع

ــــــــــــــــــــــــــــــــــــــــــــــــــ ــــــــــــــ

اتمنى مساعدتي فأنا في حيره من أمري ..

مواضيع عشوائيه ممكن تكون تعجبك اخترناها لك:

• التكسي و رحلتي و مطار باندونق ؟؟
• استفسارات وصــايــف
• من الكبه الشاميه الى الاندومي
• استفسار
• استفسار بسيط
• مساعدة يإخوان في ترتيب جدول إلى أندونيسيا
• انا بسافر في يناير لمدة ايام
• افضل صرف ياليت الرد
• محتار اندو ام تايلند ام ماليزيا للعائلة ؟؟
• ابي رايكم لو سمحتو
• رحلة شبابية لأندونيسيا
• قبل السفر شاركوني لاهنتم
• رحلتــي الأولـى لأندنوسيــا افيدووني ؟؟؟
• هام وعاجل رقم سواق في الجبل بعد ساعه بكون في الجبل
• عضو جديد ومسافر لندونيسيا ونبغا نصائح
• استفسار بخصوص الاطفال والسفر
• كرت الدخوووول وكم سؤال
• اريد ترتيب جدول ل اسرة 3 اشخاص في اندونيسيا
• الجدول النهائي لـ اشخاص لـ ايام نرجو طرح المزانيه المقترحه منكم؟؟
• استفسار للاهمية

وعليكم السلام ورحمه الله وبركاته ..
وألف ألف مبروووك والله يوفقكم يارب ويجمع بينكم على خير ..
خط سيرك ممتاز جدا ولاكن ياليت تشيل يوم من بنشاك الجبل وتضيفه لمدينة باندونق
علشان تزور ضاحية لمبانق القريبة من مدينة باندونق فاأغلب المزارات السياحية فيها
والجبل بنشاك مدة 4 الى 5 أيام كافية للعرسان ..
بالنسبه للسكن بجزيرة بالي وكون الرحلة شهر عسل فاأنصحك باأن يكون على شاطئ
نوسادوا الرائع والخيارات كثيرة وأرشح لك فندق نيكو نوسادوا أو فندق نوسادوا بيتش ..
بمدينة باندونق أنصحك بفندق سنسا أو فندق هاريس أو فندق أستون توربيكانا ..
الجبل بنشاك أنصحك بفندق سيروني 2 أو سيروني 3 أو فندق نوفوس ..
بالعاصمة جاكرتا أنصحك بفندق أكماني أو فندق قران ميليا ..
والافضل لك أن تحجز السكن قبل مغادرتك الى هناك سواء من موقع بوكينج أو
موقع اقودا أسرع وأرخص لك ..
مبلغ 15 ألف ريال غير كافية ولابد من زيادتها مبلغ 3000 ريال على الاقل وعلى
العموم أحسب حسابك على مبلغ يومي لايقل عن 900 ريال لشحصين شامل :-
السكن الاكل والشرب المواصلات رسوم المزارات السياحية ..
وكذلك أحسب حسابك على مبلغ تقريبي 1200 ريال قيمة تذكرتين ذهابا وعودة لجزيرة
بالي على خطوط اير اسيا او خطوط ليون ..
وبالنسبه للسكن بجاكرتا وباندونق أحسب حسابك على مبلغ يومي يترواح من 350 ريال
الى 400 ريال وأما بالجبل بنشاك فاأحسب حسابك على مبلغ يومي يترواح من 250 ريال
الى 300 ريال وأما بجزيرة بالي فاأحسب حسابك على مبلغ يومي يترواح من 700 ريال
الى 900 ريال ..
وبالتوفيق يارب ..

أهلا أخي العزيز ابن السعودية

الله يبارك فيك ورحم الله والديك

عزيزي شاكر لك تفاعلك معي ومساعدتك لي في إضاح خيارات السكن الجميلة التي تشرفت بوضعها هنا .
بالنسبه لجميع الحجوزات التي راح احجزها للسكن لو توقعنا بتكلف 6000 ريال ( جاكرتا -بالي -باندونق - الجبل - جاكرتا ) والرحلة 1200 ريال من جاكرتا لبالي لباندونق ..
يعني 7200 ريال خاصة للسكن + الرحلة الداخليه .. هل توفرمبلغ 10000 الاف ريال من غير الـ 7200 ريال كافيه لقضاء أيام العسسسل وإلا أزودهااا ^_^

السكن :
1جاكرتا عند الوصول ( أستون مارينا ) حجزته وخلصت منه
بالي ( فندق نيكو نوسادوا أو فندق نوسادوا بيتش ) هذه المنطقة تقع في الشرق من جزيرة بالي ! هل هيا جميلة بمعنى الكلمة وهل أسكن فيها جميع ايام الرحلة وإلا اسكن يومين فيها وأنتقل لمنطقة ثانيه ؟
وماذا ترشح لي مع نوسادوا لو حبيت اسكن في منطقة أخرى معها ؟ واسم الفندق لو تكرمت ؟

باندونق ( بفندق سنسا أو فندق هاريس أو فندق أستون توربيكانا ) أيهما أجمل وماراح اندم عليه؟
الجبل ( سيروني 2+3 ) جميلة وسمعت بها مع المسافرين .. وأيضا هناك مجمع كوتا بونقا هل يناسبني أم لا .. ؟
جاكرتا ( بفندق أكماني أو فندق قران ميليا ) هل هي أفضل من أستون مارينا ولماذا ؟ ^_^

آخي الغالي ( ( لاتنسى إني عريييسسسسس ^_* ) وأبي شئ يبيض الوجه

ربي يوفقنا ويآك وبإنتظآر المسااعدة

أخوي العزيز والغالي ...
الخيارات اللي تبيض الوجه كما تفضلت راح تكون من فئه الخمس نجوم وراح
تكون غالية جدا جدا وأنا أخترت لك هالخيارات النظيفة والمجربة واللي أسعارها
معقولة ومناسبة وعلشان ماتحتار أكثر ركز على الفنادق التالية اللي راح أذكرها
لك وهي كالتالي :-
بجاكرتا ركز على فندق قران ميليا وموقعه بوسط العاصمة جاكرتا وقريب من المولات ..
بجزيرة بالي ركز على فندق نيكو نوسادوا وأنصحك بالمكوث بمكان واحد وشاطئ نوسادوا
يعتبر من الشواطئ الجميله والرائعه بجزيرة بالي وصحيح أنه فيه شواطئ ومناطق أخرى
ولاكن راح تكون أسعار الفنادق مرتفعه فيها ..
بالجبل بنشاك ركز على فندق سيروني 3 أو سيروني 2 وهو من أفضل الفنادق بالجبل
بنشاك وبالنسبه لمجمع كوتا بونقا غير مناسب للعرسان ويفضل للعائلات اللي عددها كثير ..
بمدينة باندونق ركز على فندق سنسا ..
بالنسبه لمبلغ 6000 ريال لو تم تقسيمها على مدة 18 يوم فعلي فالمبلغ اليومي للسكن راح
يكون 333 ريال وهذا المبلغ غير كافي ياليت تنتبه لهذه النقطة أخوي العزيز وكذلك لاتنسى
أن السكن بجزيرة بالي لايقل عن 700 ريال لليوم الواحد وأنت راح تجلس بجزيرة بالي تقريبا
مدة 5 أيام ولو ضربنا 5 أيام في مبلغ السكن اليومي لو أفترضنا 700 ريال فالناتج راح يكون
مبلغ 3500 ريال .. وأما بالنسبه لجاكرتا ومدينة باندونق ماراح يقل مبلغ السكن عن مبلغ 400 ريال
ولو ضربنها بعدد الايام اللي راح تجلسها بجاكرتا وبمدينه باندونق فالناتج راح يكون 2000 ريال
وكذلك الجبل بنشاك لن يقل السكن عن مبلغ 300 ريال ولو ضربنها بعدد الايام اللي راح تجلسها
بالجبل فالناتج راح يكون 1800 ريال .. يعني السكن راح يكلفك تقريبا مبلغ 7300 ريال ..
أتمنى أن تكون الصورة واضحة أخي العزيز ..
وأي أستفسار أخر لاتتردد فالجميع بخدمتك بأذن الله ..

صباحك ورد
اخي العزيز
من ناحية السكن في بالي لاتشيل هم ابد
عندك خيارات كثيرة سواء في نوسا دوا او سميناك او كوتا او حتى سانور
لكن اللي ابيه منك هل المهم عندك السكن والاطلالة او مو مهم 00
يعني عندك استعداد تسكن في مكان حلو رايق وهادئ حتى لو كان بعيد عن البحر بحيث انك تصحى الصباح وتاخذ السائق وتزور الاماكن السياحية او لازم يكون سكنك مواجه للبحر ؟؟
هالنقطة راح تساعدنا بوضع خيارات حلوة تناسبك بما انك عريس
والافضل بما ان فترة اقامتك في بالي 5 ايام انها تكون مابين سميناك ونوسا دوا او سميناك وكوتا

في كوتا عندك فندق كوتا سي فيو وفندق الميركوري وفندق هاريس وفندق استانا راما تمتاز انها على شاطئ كوتا وفي منطقة حيوية وجميع المطاعم بيتزا هت وكنتاكي وماكدونالدز بالاضافة الى ستار بوكس وجي كو دونات بجانب الفندق يعني كلها مشي من 3 الى 5 دقائق وسعر الفندق اتوقع من البوكينق ب 500 ريال الليلة
اما الفيلل الخاصة في سميناك واللي يتوفر بها مسبح خاص ومستقلة راح تحصل فلل حلوة اسعارها تبدا من ال 170 دولار الى ال 300 دولار
بالإضافة الى سعر السائق اليومي 350 الف روبية 00

اما بخصوص جاكرتا لو انك حجزت في مالرين بارك او اكماني او موريسي او منهاتن يكون افضل لك لأن استون مارينا للاسف اصبح المجمع بالي وعلى قولتنا مدهوك وبما انك عريس انا اشوف انك تاخذ لك في مالرين بارك جناح تيفاني سعره تقريبا ب 350 ريال اليوم مع الجاكوزي 00 والفندق نظيف ومرتب 00
فإذا يمديك تكنسل الاستون مارينا وتختار احد هالفنادق يكون افضل لك 00

بخصوص الجبل اذا كنت تفضل السكن في فندق عندك فندق سيروني 2 او 3 واذا المشوار مايفرق معك وتحب تكون في مكان حلو وراقي انصحك بالسكن في بقور في فندق استون بقور وتقدر تبحث عنه من خلال موقع اقودا او البوكينق وللامانة الفندق رايق وفخم ومتعوب عليه وموقعه حلو وسعره تقريبا 115 دولار الليلة مع الافطار مع العلم ان المسافة من بقور للجبل تستغرق نص ساعة يعني مو ذاك الفرق الكبير تقدر تفطر وتطلع على الساعة 8 الصباح للجبل وتزور الاماكان السياحية بحيث ان كل يوم ترتب له مناطق معينه وهذا من وجهة نظري اشوف انه خيار حلو ومميز واذا لقيت الفندق في موقع بوكنق او اقودا فل تقدر تحجزه من مكتب كاها 00 العام صارت لي هالمشكلة حاوت احجزه بالعائلة من النت طلع لي فل ويوم وصلت جاكرتا حجزته من مكتب كاها 00

اما بخصوص باندونق الافضل فندث سنسا خيار حلو كذلك استون براغا 00

واي استفسار حاضرين وانا اخوك

مودتي

ماشاء الله تبارك الله
حظك حلو ياحبيب ابن السعودية وابو راكان في صفحة استفساراتك
ماتركوا لنا شئ نذكره سوء التأكيد على ماذكروا بارك الله فيهم
وهو أفضليه اختيار الخيار الأول الذي ذكره مشرفنا ابن السعودية
لرحلة الطيران الداخلي(طيران آير اسيا) لوجود خط سير مباشر له
وبدون ترانزيت من بالي إلى باندونق
والتأكيد على نصحية ابو راكان بتغييراستون مارينا كونه لايناسب العرسان
تحيتي وتقديري

و الله شرفتوني واخجلتوني صراحة بتواضعكم ومساعدتكم أخواني الاعزاء ( ابن السعودية _ معاند _ الكوكب الطائر )|~
جزآكم الله خير على تواصلكم معي ..
كما تعلمون يالربع حجزت فندق استون مارينا والله شفت عليه عرض في موقع اقودا .. وبيني وبينكم عجبني السعر وحجزته على نياتي .. وبالنسبي لي يعتبر للراحة فقط لمدت ماتزيد عن 18 ساعة يعني عند وصولي يوم الرحلة 25/6/2012 بوصل جاكرتا 1:45 ظهرا والفندق ماراح ادخله إلا 2 تقريبا .. وحطلع منه اليوم الثاني الصباح متوجه إلى بالي ( أتوقع إنه مايأثر صح وإذا رجعت آخر 3 أيام راح احجز فندق من الخيارات اللي عطيتوني ) وش رآيكم ياشباب ؟؟

ثانيا : محتار وبشششدة في السكن في بالي ( أكيد إني بقضي برامجي في بالي تمشيات وجولات سياحيه كل يوم في منطقة معينه مثل ( نوسادوا - أبود - كوتا - جيمبران ) وغيرهاا .. فاللي اتمناه السكن في موقع جميل ويكون في وسط بالي يعني أقدر اطلع منه للتمشية شمال وشرق وجنوب وغرب .. سؤالي لكم هل فلل دريم لاند تناسبني كعريس ..؟؟!! وإلا عندكم خيارات ثانية تناسبني . والله محتااااااااااااااااااااااااار ..
ولو سكنت 3 أيام في فله بها مسبح خاص وإطلاله جميلة وتكون على البحر ( وش افضل فله ؟ .. ....................................
وآخر يومين اسكن في فندق أيضا مطل على البحر ؟! ( اريد فندق مناسب ايضا )؟!
............................................
آريدها كلها على البحر .. لآني بروح بونشاك الجبل وبسكن في منطقة كلها خضراء .. وإنتم عارفين الوضع
نصحني اخي وعزيزي ابن السعودية بمنطقة نوسادوا للعرسان صراحة أؤيده الرآي وبقوووة لكن عيب المكان إنه في اقصى الشرق من الجزيرة .. مدري إذا فيه عندكم رآي آخر فكلي إصغاء واستماع لأرآئكم ..
هنا مجموعة فنادق في نوسادوا رآيكم فيها وأيهما أفضل محتار بين 3
1- Nusa Dua Beach Hotel And Spa
2- Kinds Villa Bintang Resort & Spa
3- Novotel Bali Nusa Dua Hotel
__________
بالإظافة إلى The Dreamland Luxury Villas & Spa الموجود في الجزء الجنوبي من كوتا
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
المطلوب واضح يااخواني ( الوصول لبالي 26/6/2012 .. والخروج منها 3/7/2012 )|~
( الثلاثاء - الأربعاء - الخميس - الجمعة - السبت - الأحد - الاثنين )

ودي عند الوصول أنزل في فله فخمة وفيها استقبال جميل للعرسان .. وآخر 3 أيام السبت والاحد الاثنين في فندق على الشاطي وجميل وفي منطقة مركزية قريبة من المطاعم والاسواق والمحلات التجاري

والله حيرتكم معاي ودوختكم .. بس من شدة الحيرة متلخبط ولا أدري وش أسوووي ( المشكلة إني عارف خريطة بالي كاملة ) لكن السكن هو المشكلة أما البرامج السياحية قد جهزتها كاااملة

مايأثر وهو من خيارات السكن الجيده واللي دائما ننصح به العوائل والشباب
فتوكل على الله وكلها يوم واحد فقط ولاكن الثلاث الايام الاخيرة بالعاصمة
جاكرتا أنصحك بالحجز بالفنادق اللي تم ذكرها لك سابقا ..
بالنسبه للفندق بجزيرة بالي هناك خيار أخر رائع وهو فندق نيكو نوسادوا
وهالرابط راح يفيدك كثيرا بأذن الله وهو من أعداد أختنا أم هتونه ..
http://www.arabtravelersforum.com/travel632642/
وأذا كنت ترغب بفندق بموقع حيوي وقريب من الاسواق والمطاعم
فاأرشح لك فندق ديسكفري كوتا وهو ملاصق لمجمع ديسكفري مول ..
وبالتوفيق يارب ..

يعني وأنا أخوووك تنصحني بالسكن في مكان واحد في بالي أفضل من إني أسكن 3 أيام في موقع وآخر يومين في موقع ثاني ؟؟

لكن فندق نيكور مافيه مسبح داخلي